Matthew 19
19
Uva i vila ila haure leiki oharo
1Iesu ma oharo oaria kari lei Galilee harepape. Are Judea ve hoa Jordan ukai ve la Judea ita elaupe. 2Haela oaria areve aire auvahaeape — are erero leia lei makukuripe.
3Pharisee haela kara iki arero amuraeape — ere mari maeape, Haela areve uva naoae haure leikive pupu karia ha? 4Are erero kavale maeaeape, E va au mureaila ha? Meahaiapo avare koai karikipe la haela are mea i avu ila karikipe. 5Are mari maeape, Ehovea ma — haela areve oa i lou ila haitapai areve uva hiki koarai aeakilai: ere va ari orahokaila aivau haroapo hiki. 6Laelave erealila orahokaila va ka, aivau haroapo hiki. Aualari hahaeape la eharu haela ka helaukarue. 7Ere va arero mari maeape, Ehovealeve Moses haure leiki pepa harive maeape, ae va arero haure leiki kara maeape ha? 8Are erero maeaeape, Ehovea eve iki aheke iele, Moses ero uavila haure leiki oki avarape, aka avare koare hoa are laria ka. 9Ara kai ero maeaeaive — areve uva haure leiki la haela (la uamari airi pavora au leila) are uva ae ra laeakilava, are airi pavora leive: haure leipe la uamari laeaki la haela, are kara airi maea leive.
10Areve kilea haela arero maeape, Haela areve uva pupu mari ra leikilava, veveke are uva laea va arekaea. 11Are erero kavale maeaeape, Ma oharo haela oaria iapaki hovea ka, uku haela hiki. 12Uku haela lou ra ve eharau ureve eunauka hovea erape, uku haela eunauka ehovea haela erero mari leivahaeape, uku haela le apearo, eunauka hovea leivahaeape, ehovea kaia ve basileia ve rare ve. Ma oharo iapaki hovea la haela, iapaila.
Iesu akoremari titaeka lei momorapupe
13Ere va akoremari titaeka areve oki kari ekevahaeape, ehovea are erero mai papaehai ivaiva leikive. Kilea haela erero oropai maeaeape. 14Aka Iesu maeaeape, Akoremari titaeka aikahukamaeailue ere va arave oki ka eke, ehovea ere va kaia ve basileia ve eharu veveke. 15Are erero mai kohari haitapai ita lahua aupe.
Erohoho haela ovokake iele haropape
16Iapaila, haela ae iki arero mari maeape, Haelapo veveke e, ara le horova veveke ra leikilai, ehovea ovokake haiapo avakive? 17Are arero maeape, Ipi leve a araro veveke rare laila ha? Haela oaria veveke ka, haroapo iele, Aualari hiki. A va ovokake haiapo ikivere ra leikilava, pupu ra kiva leila. 18Are arero maeape, Lela pupu ha? Iesu mari ape, A haela va kahaealue, Airi pavora va kalailue, Korea kalailue, opoepoe kahukavalue, 19oa i lou momorapuki kai a i apealula haela ikiheheroe leiki. 20La harokou arero maeape, Ma pupu oaria ara va kiva leipe, arave are hoa aiai mahau. Ara ve le eharu aea karia ha? 21Iesu arero maeape, A mekakure ikivere ra leikilava, aula, ave eharu oaria ilaea leivahaeai merava haela aiaraki, a erohoho eharu va oaria, kaia akea ve aeakilai, araro airekai ekela. 22Harokou ma oharo iapai ikihairihairi lei aupe ehovea are va erohoho oaria ila.
Erohoho ve heraho
23Iesu helari kilea haela maeaeape, O iele ara ero maeaeaive — Erohoho oaria ila la haela kaia ve basileia ure ve araeaki va heraho iele. 24Ae va ara ero maeaeaive, Kamela karahe ve ura ve ukaki ai horerakilai va heraho perehekai, aka erohoho oaria ila la haela Aualari ve basileia ure la araeakilava, heraho eapapo iele. 25Areve kilea haela la oharo iapai ikihorahora eapapo leivahaeape kai mari maeape, Ehoveala, ovokake leita avakilai ha? 26Iesu erero ovohae eavi mari maeaeape, Haela oaria ore va ka, Aualari eharu oaria aupoverai. 27Peter arero kavale maeape, Iapaki, ela va eharu oaria haitapai aro airekai auvahaeape — laelave ela va le kavale aeakilai ha? 28Iesu arero maeape, O iele, ara ero maeaeaive, E araro airekai ekevahaeape haela, basileia are horeraki la hoa, haela ve Akore areve morapaeaki haha akea ve haiavaki la hoa, e kara terona 12 akea ve avakilai, kai Israel ve hiru 12 heheavakilai. 29Uvi aka apoheari aka maritaloa, aka oa, aka lou, aka uva, aka akoremari, aka elare ita ipi haitapape la haela oaria, ehovea arave harihari, hoa 100 hovea erereapakilai, kai ovokake lari hiki apeakilai. 30Aka, oropaki haela oaria ere va aireaki leivahaeakilai, aireaki la haeala ere oropaki leivahaeakilai.
Currently Selected:
Matthew 19: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
