Matthew 20
20
Vine oru horova haela ve parabole
1Kaia ve basileia maria. Uvi haela havahu leia — are vevelare mea hoai areve oru ve horova haela haropakive. 2Are horova haela hare haroapo ve kavale penny haroapoharoapo okoare maeai erero oru ureve paparaehape. 3Hare nine o'clock hovea are karikara hihi ve uku naoaenaoae epavava haela aea eavavahaeape. 4Are erero maeaeape, E kara oru arahavaila, eve kavale hovea ara ero aiarakilai. Ere kara arahavape. 5Kai hare hihi kai hailaea 3 o'clock hovea are mea hoai lari leipe. 6Hailaea 5 o'clock hovea kara are hoai naoae naoae epavava haela uku eavavahaeape, are erero maeaeape, Ehovealeve e hare haiapo naoae hiki apearurava ha? 7Ere arero kavale maeape, Ehovea haela elaro au itavavahaeaila. Are erero maeaeape, E kara oru arahavaila, eve kavale hovea e va aeakilai. 8Laelave, hailaea hoa, la oru haela areve horova kiva haela maeape, Horova haela itavaila, ereve kavale aiarakive — aireaki larahavila la haela aiai oropa larahavila la haela. 9Hailaea 5 o'clock arahavape la haela pekahavi kavale denarius#20:9 See Mat 18:28 haroapo haroapo aeavahaeape. 10Vevelare hoa arahavape la haela ereve ikikekela kavale eapapo aeakive. Ere kara kavale denarius#20:10 See Mat 18:28 haroapo haroapo aeavahaeape. 11Ere kavale aeape hoa ere la uvi haela ve lavuku lavuku ape. 12Ereve oharo maria, Ma aireaki haela ve horova perehekai iele, a erero aka elaro kavale hovea laleila — ela va hare haiapo horova ahea eapapo la leivahaeaila. 13Aka are haela ae kavale mari maeape, Haelakaru, ara aro haeae lei va ka — a va arave okoare au iapakue ha — kavale denarius#20:13 See Mat 18:28 haroapo haroapo avakive? 14Ave kavale avi elare ita aula. Ara ma aireaki haela ave la kavale hovea hovea aiarakilai. 15Ara havahu ve eharu arave ikivere leiki veveke va ka ha? Ave ovohae heaha la, ehovea arave mai veveke leivila? 16Laria, aireaki haela oropaki leikilai, oropaki haela aireaki leikilai. Ehovea oaria itavavahaeape, oaria ikivere au leila.
Hao aea Iesu areve aireaki apaki oharo kileape
17Iesu Jerusalem pekape. Are okiharo ve kilea haela 12 muruhari mari maeaeape, 18Iapaila, elaviila Jerusalem pekahavaro. Leia ere haela ve Akore oharo haela i hohoa haealula haela hihila epai avarakilai, ere arero heheavi harilai. 19Ere arero ita lahua haela avarakilai — la haela arero ihape leikilai, haru harilai, satauro akea ve hahai harilai, are va hare ilehoila le uroukilai.
Kilea haela Basileia meahaiapo hovea kelavape
20Zebedee ve akoremari ve lou i mekehaku ila Iesu kai iki arero morapai eharu ae v'ila velavela leipe. 21Are arero maeape, A va ikivere le ha? Are kavale maeape, A oharo maeaki arave akoremari orahokaila ave basileia ureve — ae va ave ore ukai ae va ave keva ukai avakive. 22Iesu kavale maeape, Eve apevelavela la eharu e haveva. E va ara larikilai la hekako e leia la larilai ha? Ere arero maeape, Ela va heroe, hovea. 23Are erealilara maeaeape, O iele, ealila arave la hekako larilai, aka arave ore ukai kai keva ukai avaki — la va ara avaraki eharu va ka; arave Oa iki overa kekelape la haela are avarakilai. 24Kilea haela aea ma oharo iapai ere la akoremari orahokaila hihiri eapapo leivahaeape.
Akea mai iele
25Iesu erero itavavahaeai mari maeaeape, E va ore ita lahua ve haela ere amua elare momorapurura, kai ereve oropa haela elare pelaea leivahaelula. 26Aka e va laria kalaivahaelue. Eve oropa leikive ikivere la haela, are eve kiva haela hovea leikive. 27Eve amua hovea leikive ikivere la haela are va eve horova haela hovea leikive. 28Lahovea, haela ve Akore ekepe ehovea haela arero kiva lei va ka, aka ehovea are haela oaria kiva leikive: kai areve ovokake aiarakive, ehovea haela oaria lei makukurikive.
Ovohae kariri haela orahokaila ve ovohae kohehelaukape
29Ere va Jericho harepape: haela oaria arero airekai auvahaeape. 30Iapaila — haela orahokaila oki poe ve avape — erealila areve eke hari iapai ara hai itavape maria, Amua e, David ve Akore, elalilaro ikiheheroe leivahaeaila. 31Haela oaria erealilaro aihukamaeape — erealila oharo va arekaea: aka erealila ara oaria hape maria, Amua e, David ve Akore, elalilaro ikiheheroe ra leivahaeaila. 32Iesu epavi erealilara itavape kai mari ape, Ara va ealilara learia leikilai ha? 33Erealila arero maeape, Amua e, elalilave ovohae lai kohehelaukakive. 34Laelave Iesu erealilara ikiheheroe leivahaeape. Are erealilave ovohae mai koharape: erealila ve ovohae le kohehelaukape, erealila arero airekai le auvahaeape.
Currently Selected:
Matthew 20: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
