Mark 2
2
Maea heaha haela lei veveke leipe
1Aireaki hare uku karia leipe, are va Capernaum kai araeape. Are va uvi pekaki hare haela oaria ore leivahaeape. 2Leia haela oaria la ita haroapo korukaeape, laelave haela oaria ve apeaki ita va karia, avai okiape mahokaea ve kara. Are va erero oharo veveke iroro ape. 3Ere va maea heaha haela ae va areve leia lai ekepe, areve oraiavape haela hari ila. 4Ehovea leia haela oaria, ere va areve maeamaea pekahavaki oki karia, laelave ere va Iesu epavape la ita ailauki kaivoavape, kai la maea haela haha i hareho paraeai hoai areve oropa ve uavape. 5Iesu ereve ikikekela veveke ovohae eavi, maea heaha haela mari maeape, Akore e, ave mai haeae le hapururuka. 6Aka leia ve hohoa haealula haela uku leia avai elare iki ureve mari kelavape: 7Ipi leve ma haela o heaha maeaive. Mai hahaeae hapururukaki leita? Aualari hiki! 8Iesu ereve iki ureve ore lei mari maeaeape, E va elare iki ureve ma eharu leve kelavaro ha? 9Le eharu koraoka ha? Maea heaha haela mari maeakive, Ave mai haeae hapururukaki; aka arero maeakive, Urou, ave haha kaivi aula? 10Aka ehovea e ore leikive haela ve Akore meahaiapo hoa mai hahaeae hapururukakive hovea (are maea heaha haela mari maeape): 11Ara aro maeaive — Urou, ave haha kaivi elare uvi aula. 12Are elavelave urai areve haha kaivi ere oaria ve oropa aupe. Laelave ere oaria iki le ihahape kai Aualari ve rare morapaeape maria: Ela va mari mai overa au eavaila.
Levi itavape hari
13Are va aeka ma haru poe ve hoaupe — kai haela oaria areve leia korukaiape. Are erero kileavahaeape. 14Are leia aupe la hoa are Levi Alphaeus ve akore tax avaki ita avai la eavape. Are arero maeape, Araro airekai ekela. Are urai arero airekai aupe.
15Iapaila: Iesu areve uvi ureve eapai lape hoa, tax korukaia haela mai hahaeae haela ila oaria Iesu i kilea haela ila hareho korukai avape. Ehovea ere va oaria, kai ere arero airekai auvahaeape. 16Hohoa haealula haela i Pharisee haela ila eavape — are i tax korukaia haela mai hahaeae haela ila eapai lalavahaeape — ere areve kilea haela maeaeape, La va learia, are i tax korukaia haela mai hahaeae haela ila hareho eapai i ma ila lalavaelava ha? 17Iesu la oharo iapai erero mari maeaeape, Maea mekaka haela muramura haela ikivere va ka — maea heahaha haela hiki. Ara ekepe mai ehohoe haela itava va ka, aka mai heahaha haela ereve hahaeae ve ikihuru kelava itavakive.
Ere erereaki oharo
18John ve kilea haela kai Pharisee haela ve kilea haela ere va ere ereavaki mai kiva la leivahaeape. Ere ai arero mari maeape, Ehovealeve John ve kilea haela i Pharisee haela ve kilea haela ila ere ereavalula ha, aka ave kilea haela la mai leivahaea va ka? 19Iesu erero maeaeape, Uva are laeaki haela aeavila hoa areve horova haela ereka apeakilai ha? Are ere i hareho apealula hoa ere va ereka apea va ka. 20Aka, aireaki hare kihorerakilai — uva are laeaki haela erero haitapakilai. La hoa ere va ereka apeakilai. 21Haela pura hakaea are overa pura kopererea kokora va ka. Laria la leikilava, au koperereape la pura are overa la pura haipararapakilai, aireaki ura eapapo iele leikilai. 22Haela wine are overa kavapu kakaita va ka. Laria ra leikilava, wine are overa la kavapu le koekakilai, ma kaita karia le leikilai, kavapu kara le haroaukilai. Wine are kavapu are kakaita va hoveahovea, laria heroe.
Sabati kiva leiki oharo
23Iapaila, are va wheat oru sabati hare araeape: Areve kilea haela oki poe ve wheat hae haroapo haroapo ikaeape. 24Pharisee haela arero maeape, Eavaila. Ehovealeve ave kilea akoremari sabati hare pupu la hararualulava? 25Are erero maeaeape, David i hareho auvahaeape la haela ikivere lei eroa haeape la hoa, e va la oharo au mureaila ha? 26Are Aualari ve Hehe Uvi pekape, akea oharo haela Abiathar ve hoa, kai hehe pai lape: la pai haela oaria pupu ila, oharo haela hiki laralula: are i hareho pekahavape haela kara are aiarape. 27Are erero maeaeape, Sabati leipe iele ehovea haela ve i. Haela sabati ve va au leila. 28Laelave, haela ve Akore are kai Sabati ve Amua.
Currently Selected:
Mark 2: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
