Mark 3
3
Horo au hareavape haela lei veveke leipe
1Are va kai synagogue pekape: leia horo au hareavape haela ae pekape. 2Ere arero ovohae eavape — lehae — are sabati hare la haela veveke leikilai la, ehovea ere ikivere arero oropai maeakive. 3Are horo hareavape haela maeape, Urai, hihika pava. 4Are erero maeaeape, Lehae ha? Pupu leari ha? Sabati hare mai veveke leikive, aka mai heaha leikive — haela lei makurikive, aka haela harive? Ere va oharo ka, muruha le avape. 5Are va ikiheaha helari erero ovohae eavape, kai ikihuru eapapo leipe ehovea ereve iki aheke iele. Are la haela maeape, Ave mai horapa. Are mai le horapape — areve mai veveke havahu leipe, mai ukai hoveahovea. 6Pharisee haela hoahukai Herodian haela ila hareho oharo hukavape, arero leari lei harive.
Maea heaha lahua lahua lei makukuripe
7Aka Iesu i kilea haela ila ma poe ve hoahukape, kai haela oaria Galilee ve arero airekai auvahaeape, Judea haela kara. 8Jerusalem haela, Idumaea haela ve ukai, Jordan la ukai haela kai Tyre i Sidon ila ve ukai haela, ere oaria areve hari iapai areve leia auvahaeape. 9Are va kilea haela vevaea ma poe ve avaki maeaeape — ehovea haela oaria: ere arero helari hupakai hukikiki ave. 10Ehovea are haela lei makukuripe — laelave ere oaria are i hareho arero au hukikiroape, ehovea arero mai koharakive. 11Ovehahu arero eavi areve oropa ekaopi ara hai itavape maria, A va Aualari ve Akore. 12Are erero ahilape ere areve rare hihika kalailue.
Iesu kilea haela 12 hareavape
13Are kela pekai areve ikivere leipe haela itavavahaeape. Ere kai areve leia korukaiavahaeape. 14Are va haela 12 apostle haela leivahaeape ehovea erero areve oharo iroro arive paparaehakive. 15Kai are erero aheke aiarape maea heahaha haela lei veveke leikive, kai ovehahu haruapakive. 16Are Simon rare ae va Peter itavape. 17James Zebedee ve akore, kai John areve akoreheari — ma haela are rare are itavape Boanerges (la rare ve iele — kaia kukururu are la akoremari). 18Kai Andrew, Philip, Bartholomew, Matthew, Thomas, James, Alphaeus ve akore, Thaddaeus, Simon Canaan haela: 19Kai Judas Iscariot, arero hihila epape la haela.
Iesu Satan ve horova leivila opore oharo
20Ere hareho uvi pekahavape, kai haela oaria ereve leia korukaiavahaeape, laelave ere eapai auhohi va au leila. 21Areve apavara la oharo iapai arero mai paeakive ikivere leipe, ehovea ereve oharo maria, are heraho eapapo leive. 22Jerusalem ve ekevehaeape haela, hohoa haealula haela mari maeape, Beelzebub areve iki ureve le aeave, are va ovehahu ve amua ve aheke ila, laelave are ovehahu haruapaivila. 23Are erero itavi parable maeaeape, Satan lehae lei Satan havahu avakakilai ha? 24Basileia ae va elare urai hahari la leikilava la basileia aheke lei va ka. 25Lalava aea elare urai hahari la leikilava lalava kara aheke lei va ka. 26Satan urai elare hahari la leikilava are kara aheke va ka, areve hoa karia leikilai. 27Haela ae ikivere la leikilava haela aheke ve uvi pekai areve eharu ra hararuakive, are va oropa la haela aheke mai hahakilai, aireaki are areve uvi hararuakilai.
28O iele ara ero maeaeaive, haela ve akoremari ve haeae oaria hapururukakilai, aeva ereve naoae naoae o heaha oaria kara. 29Aka Ove Veveke ve rare o heaha maeaki la haela areve haeae hapururuka va ka, areve heaha kara karia lei va ka. 30Ehovea ere maeaeape, Are va ovehahu ila.
Apavara mai iele
31Aireaki areve lou i apavara ila arai ve epavape kai are v'ila oharo paraeape. 32Haela oaria arero au hukikiroape. Ere arero maeape, Iapai — ave lou i apavara ila mahokaea ve leia aro haroparo. 33Are erero kavale maeaeape, Arave lou leita, aka arave apavara leita? 34Are helari haela oaria eavi mari maeape, Eavaila — arave lou i apoheari ila ma. 35Ehovea Aualari ve ikivere horova ra leikilava, la haela hovea hovea ere arave apoheari, kai arave mariloa, kai arave lou kara.
Currently Selected:
Mark 3: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
