Rome 7
7
Uva maepaki ihova
1Apavara, e ore va ka ha, (ara pupu ore haela kimaeaive) haela ve meahaiapo hoa pupu va arero mea oaria hahavila? 2Ehovea vila ila la uamari ve pupu ma — are va vila ila hareho mea oaria aeakive. Aka vila la apakilava, are va vila ve la pupu karia le leikilai. 3Laelave, areve vila ve ovokake hoa, arero vila ae la laeakilava, are airi pavora mai le leikilai, aka vila au mapila, la pupu are v'ila la haerapakilai, laelave arero vila are la laeakilava, are airi pavora mai lei va ka.
4Laelave, apavara e, e va pupu ureve le apihaeape, ehovea Keriso ve maea ve: hoveahovea ero haela ae laeakilai, iele api kai uroupe la haela. Ehoveala, elaviila Aualari v'ila hae veveke horeavakilai. 5Ehovea, elaviilave aivau hoa, mai heahaha ve horova, pupu heheavape la horova oaria, elaviilave maea ve hae heaha, apakive hovea kihoreavape. 6Aka ma hoa, pupu elaviilaro hahaea va ka, ehovea elaviilara hahaeape la eharu va huru le leipe. Laelave, elaviila ove are ureve horova are leikive, overa pupu oharo hovea ka.
Pupu i mai heaha ila
7Elaviila learia maeakilai ha? Pupu va heaha ha? Arekaea! O iele ara va mai heaha pupu ve okiharo ve hiki ore leipe. Ara va korea mai ore leipe, ehovea pupu maria hape, Haela ae ve eharu ikivere kalailue! 8Aka ara mai heahaha oaria ikivere leivahaeape, ehovea pupu ve la okiharo. Ehovea pupu karia la leikilava, mai heaha le apakilai. 9Ehovea ara overa hoa pupu mahokaea ve ovokake aeaveape: aka pupu leipe la hoa, arave mai heaha ovokake leipe, ara kara huru le leipe. 10Pupu kara ovokake v'ila hape la pupu, apaki maea hovea leipe. 11Ehovea mai heaha, pupu ve okiharo v'ila, araro amurae le hape. 12Laelave pupu iele va hehe ila: la pupu hehe va ehoe i mekakure ila.
13Laelave, veveke la eharu ara v'ila apaki maea hovea leipe ha? Arekaea! aka mai haiae, heaha hovea la mai haiae, veveke ve la okiharo arave ureve le hape, laelave mai haiae pupu v'ila heaha eapapo leipe.
Haela ve mai heaha i mai veveke ila ikivere
14Ehovea ela v'ore, pupu va ove eharu. Aka ara va maea eharu, mai heaha kakavae leipe eharu hovea. 15Ehovea ara leivila la eharu ara ore va ka: arave ikivere horova ara lei va ka, aka ara va ikihairihairi la eharu ara leivila. 16Laelave ara ikihairihairi la eharu ara la leikilava, ara pupu rare veveke rare avila. 17Ma hoa, la horova leiki haela ara havahu ka, aka arave ureve aeavila la heaha. 18Ehovea ara v'ore arave ureve aeavila eharu (oharo iele arave aivau ve) veveke va ka. Ehovea ara horova veveke leikive ikivere, aka la horova veveke ara lei va ka. 19Ehovea ara va ikivere la horova veveke ara lei va ka, aka ara va ikihairihairi leivila la heaha ara leivila. 20Ara va ikihairihairi la eharu ara la leikilava, iele ara havahu lei va ka, aka arave ureve aeavila la heaha.
21Laelave, ara maria pupu eavave, ara veveke ikivere leiki la hoa, mai heaha arave ureve aeave. 22Ehovea iki ure havahu iele ara Aualari ve pupu ikivere havahu iele. 23Aka ara maea ureve pupu lahua la eavave — la pupu i arave ikikekela ve la pupu ila hahari leilula, laelave arave maea ureve la mai heaha ve pupu araro mea oaria hahavila. 24Ara va haela heaha, heraho iele. Arave ma apape maea ve leita araro lei makurikilai? 25Aualari la! Ara va elave Amua Iesu Keriso ve la okiharo v'ila arero thank you eapapo ave. Laelave, ara va iki heraho ve la okiharo ve pupu kiva leivila — aka aivau ve la pupu va heaha hiki.
Currently Selected:
Rome 7: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
