Rome 8
8
Ove ve ovokake
1Laelave, Iesu Keriso ve oki auvahaealula la haela au hahaea va ka, ehovea ere va aivau ve oki auvahaea va ka, aka ove la okiharo hiki. 2Ehovea Iesu Keriso ve la ovokake ve pupu araro mai haiae i apaki hoa ve ovokake le leipe. 3Ehovea Aualari are ikivere havahu Akore ma meahaiapo maea hovea kiparaeape. Are elare aivau ve mai heaha heheavi au hahape: ma horova pupu hiki leikive ore au leila, ehovea are va aivau v'ila mahuka leipe. 4La pupu ve mai ehoe elaviilave ureve le horerape, ehovea ela va aivau ve okiharo hiki auvahaea va ka, aka ove ve okiharo. 5Ehovea aivau ve oki ikivere la haela, ere va aivau ve eharu kelavalula. Aka ove okiharo ikivere la haela ere va ove eharu kelavalula. 6Ehovea ma maea ikivere la leikila haela le apakilai, aka ove ikivere la haela are va ovokake i havila ila aeakilai. 7Ma maea ve hiki kekela la haela are va Aualari ve iri haela — ehovea aivau eharu Aualari ve pupu kekela va ka, aeva la pupu kiva leikive haveva. 8Laelave aivau hiki kelavalula haela Aualari ikivere leivahaea va ka. 9Aka Aualari ve Ove eve ureve la aeakilava, e va aivau hiki apea va ka, e va ove ila apealula. O iele, haela ae Keriso ve Ove avaki aue la leikilava, are Areve haela va ka. 10Keriso e i hareho la aeakilava, maea va apakilai ehovea mai heaha, aka ove va ovokake leikilai, ehovea mai ehoe. 11Aka, Iesu kapu lai urapape la Aualari ve Ove e i hareho la aeakilava, Keriso kapu ve lai urapape la Aualari eve maea kara lei ovokake leivahaeakilai, ehovea areve Ove eve ureve aeakilai.
12Laelave, apavara, elaviila aivau ve la maea ve ape karava au laila, ehovea areve pupu kiva leivahaeakive. 13Ehovea aivau ve la mai hiki la leikilava, e va apihaeakilai, aka e va Ove la okiharo ve maea ve heaha la hapurukavakilava, e va ovokake leivahaeakilai.
Aualari ve Akore
14Ehovea Aualari ve Ove kari auvahaeaki la haela, ere va Aualarive akoremari. 15Ehovea ero lei oaoka leilula la horova heaha ve ove ero au hahaila, aka ero hahaealula la ove va Aualari ve ero karailula ove hovea. Elaviila la ove avi, Oa va iele, rare itavalula. 16La Ove iele elaviilave ove ila hareho elaro Aualari ve akoremari rare vavavahaelula. 17Elaviila akoremari la leivahaeakilava, elaviila va haruku aeaki haela kara. Elaviila Keriso i hareho kakare la leivahaeakilava, elaviila are i hareho haruku aeaki haela, Aualari ve haruku aeaki haela, ehovea elaviila Keriso i hareho lei mekaka leivahaeakilai.
Aireaki haharika mekakure
18Ehovea arave ikikekela elaviila ma hoa ve kakare oaria va perehekai iele: aka aireaki la basileia ve eharu mekaka oaria iele elaviilave ureve hihika leivahaeakilai. 19Ehovea au karikivahaeape haela oaria ikivere eapapo iele Aualari ve akoremari hihika eavavahaeakilai. 20Ehovea haela oaria elarelare maea pelaea naoae naoae leivahaeape, ehovea ere havahu ve ikivere va ka, aka ehovea erero karikipe la haela ve ikivere. 21Ehovea au karikipe haela poaea leikive la okiharo au hareavakilai, kai Aualari ve akoremari ve ovokake mekakure iele avakilai. 22Ehovea elaviila ore, au karikivahaeape haela oaria, overa hoa ikiki ma hoa, kakare i heraho ila leivahaeape. 23Ere hiki ka, elaviila kara, Ove Veveke ve haruku oropa aeape haela, iki ureve hi ila kai heraho leivahaelula, ehovea elaviila Aualari karape la haela ve haruku veveke elaviilave maea ureve la ovokake au hiki karilula. 24Ehovea elaviila ikivere lei la haropakilava, elaviila ovokake leivahaeakilai. Oropa eavakive, aire haropakive, la mai va iele ka. Ehovea eharu overa eavape la haela, are aeka leve haropakilai ha? 25Aka, elaviila eavaki aue la eharu la haropakilava, elaviila la eharu ikihorahora aue karikilai.
26Ove kara elaviilave mahuka hoa elaviilara hukapaive. Ehovea elaviila ivaiva veveke mai haveva — aka ove hi i iki hoara ila elaviila ivaiva leilula, la ivaiva oharo hihika hovea e va ka. 27Aeva iki ureve haropavila la haela are va Ove ve ikikekela ore, ehovea are va hehe haela v'ila, Aualari ve iki hovea ivaiva leivila.
28Aeva, elaviila ore, Aualari va ikivere leilula la haela, eharu oaria erero koarailula, ehovea Are erero itavape, Areve ikivere horova iele leikive. 29Ehovea are ore overa leivahaeape la haela, are ikivere overa leivahaeape erero Akore ve maea hovea koelarikive: are va apoheari oaria ve akoreapo leikive. 30Aeva ma — are oropa ikivere leivahaeape la haela are kai itavavahaeape — are itavavahaeape la haela are lei ehohoe — are lei ehohoe leivahaeape la haela Are momorapupe kara.
Aualari ve Ikiheroe
31Laelave, elaviila ma eharu learia maeaeakilai? Aualari elaviilara la koarakilava, elaviilave iri haela leita hovea leivahaeakilai? 32Are iki havahu akore avarakive oaoka au leila la Aualari, Are areve maea ve la okiharo elaviilara eharu oaria aikiarakilai. 33Aualari ve ikivere leivahaeape haela leita heheava hahakilai? Aualari hiki lei ehohoe leivila. 34Heheavi hahaki la haela va leita ha? Apape haela va Keriso la, o iele, are kai uroupe, are ma hoa Aualari ve mai ore ukai ve aeavila, are kara elaviila v'ila velavela hiki leivila. 35Elaviilara Keriso ve ikiheroe ve leita hareavakilai? — Kakare, aeva heraho, aeva hararuaki mai, aeva eroa, aeva hohera hoa, aeva pura karia, aeva heaha hoa, aeva hahari hoa, ma eharu elaviilara hareava va ka. 36Overa hape oharo maria:
Ehovea Ave harihari, haela hare oaria elaro haealula,
Ela va au haeape mamoe hovea hovea.
37Kaire, elaviila ma eharu oaria heaorapa hiki, ehovea elaviilaro ikiheroe leipe la haela havahu. 38Ehovea arave ikikekela maria, apaki hoa, kai aneru, kai amua heaha, kai aheke haela, kai ma hoa ve eharu, kai aireaki kihoreavaki eharu. 39Akea ve eharu, kai ipi ve eharu, kai eharu oaria kara; ere oaria araro Aualari ve ikiheroe ve hareavaki ore va ka, Iesu Keriso elaviilave Amua ve aeavila la ikiheroe.
Currently Selected:
Rome 8: ORO
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society 1963-1972
