Kufuma 28
28
1Umuuhe Harun mdwenyu, na waana wakwe kimwe naye ghati ya waana wa Israeli, nesa anihirie ndima ya wukohani, Harun, Nadab na Abihu, Eleazar na Ithamar, waana wa Harun. 2Unemwarehiya Harun mundwenyu nguo ya wusheneto, hena kirumi na uwedi. 3Unewawurra wose wena ngoro ya ng’eno, nawo wenemwarehia Harun nguo, ashenetijwe, anihirie ndima ya wukohani. 4Na iji nguo wenejiareha: ya mbafuni, na efodi, na kanzu, na ikoti la machumo, na kilemba, na ngana: nawo wenemwarehia Harun mundwenyu nguo ishenete, na waana wakwe, anihirie ndima ya wukohani. 5Nawo weneuha thahabu, na ngoningoni, na ngundu, na irotome, na nguo ya kitani.
6Weneareha efodi hena thahabu, na ngoningoni, na ngundu, na irotome, na nguo ya kitani kiiwitwe, na ndima ya mwaria. 7Vituro viri vinelunganywa hena miidiwo yakwe; ni huwo vinelunganyika. 8Na ngana ya machumo ya efodi, ioho wanga yakwe, ineoka huwo, hena ndima yakwe; thahabu, ngoningoni, na ngundu, na irotome, na nguo ya kitani kiiwitwe. 9Na we uneuha mabwe meri ma shoham, unesongoa wanga yamo mazina ma waana wa Israeli: 10Mazina mawo matandatu wanga ya ibwe imwe na mazina matandatu meshighajike wanga ya ibwe la keri, hena kuwoneka kwawo. 11Hena ndima ya msongoi‐mabwe, sa kusongowa kwa muhuri, unemasongoa mabwe meri na mazina ma waana wa Israeli: unemaingija ghati ya mawiko ma thahabu. 12Unemawika mabwe meri wanga ya vituro vya efodi, mabwe ma lukumbusho hena waana wa Israeli: naye Harun enetika mazina mawo msongorana wa Mzuri wanga ya vituro vyakwe viri hena lukumbusho.
13Na uneareha mawiko ma thahabu. 14Na nyise mbiri ja thahabu izerre; sa nzighe unejiareha ja ndima ya kuaghosa: na unejichunga nyise ja ndima ya kuaghosa na mawiko.
15Na uneareha cha‐mbafuni cha wuchili, ndima ya ng’eno; hena ndima ya efodi unekiareha: thahabu, ngoningoni, na ngundu, na irotome, na nguo ya kitani kiiwitwe unekiareha. 16Ineoka ngamba kandu keri, idambo la vichaa wueza wakwe, na idambo la vichaa kuarama kwakwe. 17Unekiizuja kuizua mabwe, mitambara minne ya mabwe: mtambara wa kuwoka, la ngundu, la muruku, na la zumaridi; mtambara wa kuwoka. 18Mtambara wa keri, la manimani, la baharamani, na la akiki nyewa. 19Mtambara wa katatu, la ain‐il‐hiri, la yashimu, na la yemashtu. 20Mtambara wa kanne, la zabarajadi, la jazaa, na la yashbu: menewikwa na thahabu hena maizua mawo. 21Na mabwe meneoka na mazina ma waana wa Israeli, ikumi na meri hena mazina mawo, kusongowa kwa muhuri; yose hena izina lakwe, hena mbare ikumi na mbiri.
22Uneareha wanga ya cha‐mbafuni nyise sa nzighe, ndima ya kuaghosa, thahabu izerre. 23Uneareha wanga ya cha‐mbafuni pete mbiri ja thahabu, unejiwika pete mbiri wanga ya mito miri ya cha‐mbafuni. 24Unejiwika nyise mbiri ja thahabu ghati ya pete mbiri ja mito ya cha‐mbafuni. 25Na miidiwo miri ya nyise ja kuaghoswa uneichunga na mawiko meri, na unemawika wanga ya vituro vya efodi msongorana wakwe.
26Uneareha na pete mbiri ja thahabu, na unemawika wanga ya mito miri ya cha‐mbafuni, ghati ya lutiriwo lwakwe mbai ya efodi ndeni. 27Uneareha na pete mbiri ja thahabu, unejiwika mbai mbiri ja efodi si mbai ya some, kuiwiria machungo makwe wanga ya ngana ya machumo ya efodi. 28Wenechunga cha‐mbafuni hena pete jakwe hena pete ja efodi hena luzighe lwa ngoningoni, nesa kioke wanga ya ngana ya machumo ya efodi, na cha‐mbafuni kising’olwe ghati ya efodi. 29Naye Harun enetika mazina ma waana wa Israeli ghati ya cha‐mbafuni cha wuchili wanga ya ngoro yakwe, ekiingia heshenete, hena lukumbusho msongorana wa Mzuri misi yose.
30Nawe unewika ghati ya cha‐mbafuni cha wuchili Urim na Thumim; jineoka wanga ya ngoro yakwe Harun, ekiingia msongorana wa Mzuri: naye Haru enetika wuchili wa waana wa Israeli wanga ya ngoro yakwe msongorana wa Mzuri misi yose.
31Uneareha nguo ya efodi yose ya ngoningoni. 32Heneoka iworo wanga yakwe, ghati ghati yakwe, luneoka na lutiriwo lwa ndima yakuiwita kujunguluka iworo, sa lwa madini, isibajike.
33Na hena lutiriwo lwakwe lwa si uneareha makamamanga ma ngoningoni, na ngundu na irotome kujunguluka lutiriwo; na njuga ya thahabu ghati yawo kujunguluka. 34Njugha ya thahabu na kamamanga, njugha ya thahabu na kamamanga, hena lutiriwo lwa si kujunguluka. 35Nayo ineoka wanga yakwe Harun hena kuhira kwakwe: na ngori yakwe inesikiwa ekiingia na heshenete msongorana wa Mzuri, na ekifuma, asifwe. 36Na uneareha kabamba ka thahabu izerre, unesongoa wanga yakwe, sa kusongoa kwa muhuri, USHENETO HENA MZURI. 37Na unekawikia luzighe lwa ngoningoni, kaoke wanga ya kilemba; msongorana wa kilemba kaneoka. 38Kaneoka wanga ya lusinga lwakwe Harun, nesa Harun atike owiwi wa vindu vishenete waana wa Israeli wenevishenetija ghati ya mang’olwa mawo meshenete mose, na kaneoka misi yose wanga ya lusinga lwakwe, nesa vikundike msongorana wa Mzuri.
39Na uneliaghosia ikoti la nguo ya kitani, na uneareha kilemba cha nguo ya kitani, na uneareha ngana ya ndima ya sindano.
40Na unewaarehia waana wa Harun ma koti, na unewaarehia ngana, unewaarehia kofia, hena kirumi na hena uwedi. 41Na unemdoka Harun mundwawo najo, na waana wakwe kimwe naye; na unewageria mafuta, unewashenitija, unewazerrija, wanihirie ndima ya ukohani. 42Unewaarehia na serwali ja nguo ya kitani, kuwafinikira utuhu; kufuma kikudi mtano vigha jinefika: 43Najo jineoka wanga ya Harun, na wanga ya waana wakwe, wekiingia na hema ya mawunganyiko, kana wekisongeria kisiko wahire na handu heshenete; wasitike owiwi, na wasifwe: itanawo tendarasi hena ye na waana wakwe nyuma yakwe.
Currently Selected:
Kufuma 28: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
