Kufuma 29
29
1Nikyo unewaketia uwashenetije, wanihirie hena wukohani: Uha zao ndongo, na ndorome mbiri jisina owiwi. 2Na mkate usifushwe, na mabumunda mesifushwe mearehiwe na mafuta, na mabumunda masisiri masifushwe megerwe mafuta: ma muchu wa ngano unemaareha. 3Unemagera na mbinda mwe, unemaete na mbinda, kimwe na zao na ndorome mbiri. 4Unewaete Harun na waana wakwe weri mtano mbengeni ha hema ya mawunganyiko, na unewaoja na mbombe. 5Na uneuha nguo, na unemdoka Harun ikoti, na nguo ya efodi, na efodi, na cha‐mbafuni, na unemchunga na ngana ya machumo ya efodi. 6Na unekigera kilemba mtwini hakwe, na unelugera lumerisia lushenete wanga ya kilemba. 7Na uneuha mafuta ma kugera, unemamimina mtwini hakwe, na unemgera mafuta. 8Na unewaete waana wakwe, unewadoka makoti. 9Unewachunga na ngana, Harun na waana wakwe, unewagera vilemba: na wukohani wuneoka hawo hena itanawo la ndarasi: na unemshenetija Harun na waana wakwe. 10Na uneete zao msongorana wa hema la mawunganyiko: naye Harun na waana wakwe wenegera mikono yawo wanga ya mtwi wa zao. 11Na uneikoma zao msongorana wa Mzuri, mbengeni ha hema ya mawunganyiko. 12Na uneuha ya sakame ya zao, uneigera wanga ya mbembe ja kisiko na kichaa chako, na unemimina sakame yose mbai ya kisiko si. 13Na unemauha mafuta mose mefinikira ndeni, na kikonde kioho wanga ya mando‐ma‐ndeni, na mafigho meri, na mafuta meoho wanga yamo, unemashota wanga ya kisiko. 14Kake nyama ya zao, na ngingo yakwe, na kitondo chakwe, unejishota na moto some ya kiengo, nilo itasi la ng’oki.
15Uneuha na ndorome mwe; naye Harun na waana wakwe wenegera mikono yawo wanga ya mtwi wa ndorome. 16Na uneikoma ndorome, na uneiuha sakame yakwe, uneimiza mbai na mbai wanga ya kisiko. 17Na uneichwa ndorome vihindi, na uneoja ndeni yakwe, na maghu makwe, unemagera na vihindi vyakwe, na mtwi wakwe. 18Na uneishota ndorome yose wanga ya kisiko: nilo itasi la kushota hena Mzuri: niyo mbungo yedi, itasi la moto hena Mzuri.
19Na uneiuha ndorome ya keri: naye Harun na waana wakwe wenegera mikono yawo wanga ya mtwi wa ndorome. 20Na uneikoma ndorome, uneiuha ya sakame yakwe, unegera wanga ya mto wa isikio la kuume lakwe Harun, na wanga ya mto wa isikio la kuume la waana wakwe, na wanga ya kichaa kibaha cha mkono wa kuume wawo, na wanga ya kichaa kibaha cha kughu la kuume lawo, na uneimiza sakame wanga ya kisiko mbai na mbai. 21Na uneuha ya sakame ioho wanga ya kisiko, na ya mafuta ma kugera, unemiza wanga ya Harun, na wanga ya nguo jakwe, na wanga ya waana wakwe, na wanga ya nguo ja waana wakwe kimwe naye: naye eneshenetijwa, na nguo jakwe, na waana wakwe, na nguo ja waana wakwe kimwe naye. 22Na uneuha mafuta na mhongo, na mafuta mefinikira ndeni, na kikonde kioho wanga ya mando‐ma‐ndeni, na mafigho meri, na mafuta meoho wanga yawo, na kituro cha kuume: amu niyo ndorome ya kushenetija. 23Na mkate mwe, na ibumunda imwe laarehiwe na mafuta, na ibumunda isisiri imwe la mbinda ya mabumunda mesifushwe msongorana wa Mzuri: 24Na unemagera mose mikononi hakwe Harun na mikononi ha waana wakwe; na unemakuta itasi la kukuta msongorana wa Mzuri. 25Na unemauhia hena mikono yawo, unemashota hena itasi la kushota, hena mbungu yedi msongorana wa Mzuri: nilo itasi la moto hena Mzuri. 26Na uneuha kidari cha ndorome ya kushenetijwa kwakwe Harun, na unekikuta hena itasi la kukuta msongorana wa Mzuri: niyo ngata yako. 27Na unekishenetija kidari cha itasi la kukuta na kituro cha kuwushija, kikutwa, na kiwushijwa, cha ndorome ya kushenetija, ya ila hena Harun, na ila hena waana wakwe. 28Na kineoka chakwe Harun na cha waana wakwe hena itanawo la ndarasi kufuma waana wa Israeli: amu nilo itasi la kuwushija: na lineoka itasi la kuwushija kufuma waana wa Israeli la itasi la matasi mawo ma luworo, nilo ilasi la kuwushija lawo hena Mzuri.
29Na nguo jishenete jakwe Harun jineoka ja waana wakwe kutera kwakwe, wagerwe mafuta najo, na washenetijiwe najo. 30Na mwana ula eye mkohani handu hakwe enejidoka misi mifungate, ekiingia na@ hema ya mawunganyiko ahire ghati heshenete.
31Na uneiuha ndorome ya kushenetija uneirugha nyama yakwe ghati ya heshenete. 32Naye Harun na waana wakwe weneila nyama ya ndorome, na mkate uoho na mbinda, mbengeni ha hema ya mawunganyiko. 33Na wenevila vindu vila lukombolo lwaarehika navyo, kuwashenetija na kuwazerrija: kake mugheni asivile, amu vyasheneta. 34Na kwakicha ifungu la nyama ya kushenetija, kana la mkate, lashighajika mtano heyawo, niho unemashota mashighajiko na moto: isiliwe, amu yasheneta. 35Ni huwo unemketia Harun, na waana wakwe, hena vyose nikuaghanyie: misi mifungate unewashenetija. 36Na uneng’ola misi yose zao hena itasi la ng’oki hena lukombolo: unezerrija kisiko, ukiidiwa kukiarehia lukombolo, na unekigera mafuta, ukizerrije. 37Misi mifungate unekiarehia kisiko lukombolo, ukizerrije; nakyo kineoka kisiko kishenete muno: kyose kyakuwara kisiko kinesheneta.
38Iki nikyo uneking’ola hena kisiko; vidorome viri vya mwaka wa kuwoka musi hena musi. 39Kadorome kamwe unekang’ola heyawo: na kadorome ka keri unekang’ola chamagheri. 40Na kimwe na kadorome kamwe ifungo la ikumi la muchu larunganyika na ifungu la kanne la hin ya mafuta mearehiwe; na ifungu la kanne la hin ya mvinyo hena itasi la kunywea. 41Na kadorome ka keri unekang’ola chamagheri, na unekaarehia sa itasi la nyama la heyawo, na hena itasi la kunywea, hena mbungo yedi, itasi la moto hena Mzuri. 42Itasi la kushota la misi yose hena marika menyu mbengeni ha hema ya mawunganyiko msongorana wa Mzuri: niho ninetorana na unywi, nitete uko nawe. 43Niho ninetorana na waana wa Israeli, na ineshenetijwa na kirumi changu. 44Na nineizerrija hema ya mawunganyiko, na kisiko: ninemzerrija na Harun na waana wakwe, wanihirie hena wukohani.
45Nami ninetua ghati ya waana wa Israeli, na nineoka Izuwa wawo. 46Nawo wenetisiwa ti nimi Mzuri Izuwa wawo, niwaetie kufuma isanga la Misri, nesa nitue ghati yawo: nimi Mzuri Izuwa wawo.
Currently Selected:
Kufuma 29: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
