Kufuma 30
30
1Nawe uneareha kisiko cha kufukija: unekiareha na mti wa mshitta. 2Mkono wueza wakwe, na mkono kuarama kwakwe; kineoka kuarangamba: na mikono miri kutonga wanga kwakwe: mbembe jakwe jineoka huwo. 3Unekifinikira na thahabu izerre, wanga yakwe, na mbai na mbai yakwe, na mbembe jakwe; unekiarehia lutiriwo lwa thahabu mbai jose. 4Na unekiarehia pete mbiri ja thahabu, si ya lutiriwo lwakwe, hena misawajo yakwe miri unekiarehia, jineoka hena handu ha mitikio ya kukitikia. 5Na uneiareha mitikio ya mti wa mshitta, uneifinikira na thahabu. 6Na unekiwi@a msongorana wa pazia lioho mbai ya sanduku ya luwondjo, msongorana wa kiikaiyo‐cha‐lusario kioho wanga ya luwondjo, handu nitoranaho na we. 7Naye Harun eneshota uko mafukijo medi heyawo misi yose: magheri ma kuareha taa, eneshota mafukijo wanga yakwe. 8Na Harun ekiasha taa chamagheri eneshota mafukijo wanga yakwe, mafukijo ma misi yose msongorana wa Mzuri hena marika menyu. 9Musing’ole mafukijo magheni wanga yakwe, nete itasi la kushota, nete itasi la kidjo; nete musimimine itasi la kunywea wanga yakwe. 10Naye Harun eneareha lukombolo wanga ya mbembe jakwe kandu kamwe hena mwaka na sakame ya itasi la ng’oki la makombolo: kandu kamwe hena mwaka eneareha lukombolo wanga yakwe hena marika menyu: nikyo kishenete muno hena Mzuri.
11Mzuri akamburra Musa, ekiteta, 12Ukaareha kutara kwa waana wa Israeli hena kutara kwawo, niho weneng’ola mundu ose lukombolo lwa ngoro yakwe hena Mzuri, ukiwatara: isioke ndwari ghati yawo ukiwatara. 13Nikyo weneking’ola, mundu ose evetia ghati yawo wetarika, kihindi cha shekeli hena shekeli ya heshenete: (shekeli niyo gerah makumeri): kihindi cha shekeli itasi hena Mzuri. 14Mundu ose evetia ghati yawo wetarika, mwenye miaka makumeri na ekelie, eneng’ola itasi hena Mzuri. 15Wamasi wasinetije nete wakiwa wasiduhue, nde kihindi cha shekeli, wekimng’olia Mzuri itasi, kuareha lukombolo lwa ngoro jenyu. 16Na uneuha fetha ya lukombolo ya waana wa Israeli, uneiaghanya hena ndima ya hema ya mawunganyiko; nesa ioke lukumbusho hena waana wa Israeli msongorana wa Mzuri, kuareha lukombolo lwa ngoro jenyu.
17Mzuri akamburra Musa, ekiteta, 18Uneareha na birika la usango, na kughu kwakwe kwa usango: uneliwika ghati ya hema ya mawunganyiko na kisiko, na unegera mbombe ndeni yakwe. 19Amu Harun na waana wakwe weneoja mikono yawo na maghu mawo uko. 20Wekiingia na hema ya mawunganyiko, wenekuoja na mbombe, wasifwe; na wekisongeria kisiko wahire, washote itasi la moto hena Mzuri 21Huwo weneoja mikono yawo na maghu mawo, wasifwe: na lineoka itanawo la tendarasi hawo, hakwe na ha waana wakwe hena marika mawo.
22Nawa Mzuri akamburra Musa, ekiteta, 23Ukuuhie mabungu medi, manemane ma shekeli maghana masano, na mdalasini unonie nussu yakwe, shekeli maghana meri na makumi masano, na kane inonie ya shekeli maghana meri na makumi masano; 24Na kidda ya shekeli maghana masano, hena shekeli ya heshenete, na mafuta ma zeituni hini. 25Na unemaareha mafuta ma kugerwa meshenete, mafuta mearehiwe hena ndima ya waghanga meneoka mafuta ma kugerwa meshenete. 26Na unegera mafuta hema ya mawunganyiko namo, na sanduku la luwondjo, 27Na meza na viya vyakwe vyose, na kinara na viya vyakwe vyose, na kisiko cha kufukija, 28Na kisiko cha matasi meshotiwe na viya vyakwe vyose, na birika na kughu kwakwe. 29Na unevizerrija, vishenete muno: ose evikuwara enesheneta. 30Na unemgera mafuta Harun, na waana wakwe, wanihirie hena wukohani. 31Na uneteta na waana wa Israeli, ukighamba, Ama meneoka mafuta ma kugerwa meshenete hangu hena marika menyu. 32Wanga ya mundu mesimiminiwe, nete musiarehe ma mbare yakwe hena kuarehiwa kwakwe: nimo meshenete, meneoka meshenete henyu. 33Ose eareha ma mbare yakwe, kana ose emgera mugheni namo: ula enechika ghati ya wandu wakwe.
34Mzuri akamburra Musa, Ukuuhie mabungo, atifaru, na shecheleti, na chelibena, mabungo na lebona izerre jineoka jose ja mng’ana mwe. 35Najo unejiareha fukijo, mabungo hena ndima ya mughanga, jirunganyike kimwe, izerre na ishenete. 36Na mondo uneishagha nezo, uneigera msongorana wa luwondjo hemeni ha mawunganyiko, niho ninetorana na we @ ineoka ishenete muno henyu. 37Nalo fukijo muneliareha, musikuarehie hena kuarehiwa kwakwe: hako lineoka lishenete hena Mzuri. 38Ose eneareha la mbare yakwe, alinuse, ula enechika ghati ya wandu wakwe.
Currently Selected:
Kufuma 30: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
