Yohana 6
6
1Kutera Isa akatonga sela ya keri ya Ndiwa ya Galilaya ya Tiberia.
2Matorano mengi wakamratera wekimawona maluano ewaarehie wewadjua.
3Akakwea Isa ghati ya nduwi, akaikaa uko hamwe na waanaloshwa wakwe.
4Ikafikia Pasaka itasi lawo Wayahudi.
5Isa ekiwushija meso akawawona ti matorano mengi memzia, akamburra Filipo, Tuzoriehi mikate awa wawone kula.
6Akateta ama ekimughesha, ekitisiwa mwenye enearehaze.
7Filipo akamtalwa, Mikate ya dinari maghana meri teiwafika wose wauhe kadongo.
8Akamburra mwe wa waanaloshwa wakwe, Andrea, mundwawo Siman Petro.
9Ewaha kamwana ena mikate misano ya shayiri na nguluma mbiri, kake iji nikini hena awa wengi?
10Isa akateta, Ikajeni wandu si. Mani mengi meoho uko, wandu wakaikaasi, hena kutara maghana makumi masano:
11Isa akauha mikate, akaghamba haika, akawang’olia waanaloshwa, na waanaloshwa wala weikeesi, na nguluma huwo sandu wekundie.
12Wekinawute akawawurra waanaloshwa wakwe, Unganyeni malumong’o mashigajika, kindu kisiteke.
13Wakawunganya, wakajizuja mbinda ikumi na mbiri na vidongo vya mikate wevishigaje wekila.
14Wandu wala wekinawona luano eareha Isa, wakateta, Uu niye nabii eokie eneza masangeni.
15Isa ekitisiwa ti weneza wamgure wamwoshe mfumwa, akafumawa mtano ndiwa ye mwenye.
16Magheri mekivetia waanaloshwa wakwe wakasea na ndiwa,
17Wakaingia ngalawa, wakele ghati ya ndiwa mtano Kapernaum. Chaoka kija na tewafikia Isa.
18Ndiwa ikaruruma amu yaoka ngungu nyingi yeruruma.
19Wekiidima kujuta sandu stadio makumeri na sano au makumi matatu, wakambona Isa ekisela wanga ya ndiwa, aifikia ngalawa, wakaondoka.
20Akawawurra, Nimi, musiondoke.
21Wakakunda kumwuhia ngalaweni, kamwe ngalawa ikafikasi sela ya keri.
22Musi wa keri wakwe matorano meikee sela ya keri ya ndiwa, wekinawona ti tehena ngalawa ingi uko, nde ila imwe weokie waanaloshwa wakwe, na ti Isa teingia ghati ya ngalawa hamwe na waanaloshwa wakwe, kake waanaloshwa wakwe watongie hawo wenye.
23(Nde ngalawa jingi jaza ghati ya Tiberia, afuhi na handu weilie mikate, Bwana ekighamba haika).
24Matorano mekinawona ti Isa tehoho, kana waanaloshwa wakwe, wakakwea ghati ya ngalawa wakaza Kapernaum, wekimwenda Isa.
25Mtano wekimbona sela ya keri ya ndiwa, wakamburra, Rabbi, wazaze aha?
26Isa akawatalwa, akateta, Amin, amin, namburra, munienda si amu mwamawona maluano, kake amu mweila mikate, mkaiwuta.
27Musihire ndima hena kidjo kiteka, kake hena kidjo kiikaa mtano moo wa tendarasi, enemwinga Mwana wa Adamu, amu Apa eiye Izuwa emgera luano.
28Wakamburra, Tuareheze tuhire ndima yakwe Izuwa?
29Isa akatalwa akawawurra, Ii niyo ndima yakwe Izuwa, mwamwitikije ula emwingije.
30Wakamburra, Luano ani uluareha, tuwone tukuitikije? Waarehaze?
31Waapa wetu welie mana ghati ya mashigati, sandu vitamiwe, Akawang’olia kidjo cha wanga, wakala.
32Isa akawawurra, Amin, amin, namburra, Musa si emung’olie kidjo kila cha wanga, kake Apa wangu niye emwingie kidjo cha wanga cheokie cha kididi.
33Amu kidjo cha Izuwa nicho ula esee wanga, eng’ola moo ghati ya masanga.
34Wakamburra, Bwana utwinge misi ose kidjo ichi.
35Akawawurra Isa, Mi nimi kidjo cha moo; ula eza hangu tewona nzaa, naye eniitikija tewona nete ngiru.
36Kake namburra, mwaniwona na tomuniitikija.
37Na ula eniingie Apa, eza hangu, naye eza hangu simkinya hena some.
38Amu niseie wanga nisiviarehe nivikundie, nde avikundie ula eniingije.
39Nivyo evikundie eniingije, ti ula niingiwe asiteke pia, nde ninembusha musi wa kuidiwa.
40Nivyo evikundie eniingije, ula emyoa Mwana, ekimwitikija, awone moo wa tendarasi, na ninembusha mi musi wa kuidiwa.
41Wakamununuwikia Wayahudi amu ateta, mi ni kidjo keseie wanga.
42Wakateta, Siye Isa mwana wakwe Yusuf? Totuwatisiwe wawee na mee? Atetaze ti niseie wanga?
43Isa akatalwa, akawawurra, Musininunuwikie.
44Teidima mundu kuniratera, Apa eniingije esimjutie, nami ninembusha musi wa kuidiwa.
45Vitamwa na nabii, Wose weneeloshwa na Izuwa. Ula esikie ekulosha hena Apa eza hangu.
46Tehena embonie Apa, nde ula ena moo hena Izuwa, uu embonie Apa.
47Amin, amin, namburra, eniitikija ena moo wa tendarasi.
48Mi ni kidjo kila cha moo.
49Wawaweeo wenyu welie mana ghati ya mashigati, wakafwa.
50Nicho kidjo kiseie wanga ekila asifwe.
51Mi ni kidjo kenye moo kiseie wanga, ekila kidjo iki ena moo mtano tendarasi. Na kidjo nineking’ola nicho muri wangu, nineng’olia moo wa masanga.
52Wakakanana Wayahudi wohenawo, wekiteta, Eidimaze uu kutwinga muri wakwe tule?
53Akawawurra Isa, Amin, amin, namburra, musikaule muri wakwe Mwana wa Adamu, mkainywa sakami yakwe, tomna moo henyu.
54Ela muri wangu na enywa sakami yangu ena moo wa tendarasi nami ninembusha musi wa kuidiwa.
55Amu muri wangu nicho cheokie kidjo, na sakami yangu nicho cheokie kinywa.
56Ela muri wangu na enywa sakami yangu eikaa ndeni hangu nami ndeni hakwe.
57Sandu Apa eoho na moo, sandu eniingije, nami nina moo hena Apa, ni huwo ula enila mi eneoka na moo hena mi.
58Nicho kidjo kiseie wanga; si sa wawaweeo wenyu welie mana, wakafwa, ula ela kidjo ichi eneoka na moo mtano tendarasi.
59Akateta ama ghati ya sunagogi, ekielosha ghati ya Kapernaum.
60Wengi wevisikie, waanaloshwa wakwe, wakateta, Kiteto iki kidindie, ninani eidima kukisikia?
61Ekitisiwa Isa na ndeni ti waanaloshwa wakwe weokie wekiwinunuwika iwi, akawawurra, Iki kyamregija?
62Nikini mukimbona Mwana wa Adamu ekikwea uko eokie kuwoka?
63Ngoma niyo iareha na moo, muri towe kindu. Viteto nimburrie nivyo ngoma na moo. Kake weoho henyu wesiitikija.
64Amu Isa etisiwe to kuwoka niani wesiitikija, naye niani enemng’ola.
65Akateta, Na huwo, namburra, ti teidima mundu kuniratera esiingwa na Apa wangu.
66Toaho wengi waanaloshwa wakwe wakafuma ghati ya nyuma yakwe, na teweseliewa kumratera.
67Isa akawawurra wala kumi na weri, Na unwi mkundie kutonga henyu?
68Akamtalwa Siman Petro, Bwana, tumtongie ani? We una viteto vya moo wa tendarasi;
69Na uswi tuitikija, tukatisiwa ti niwe Masiya, Mwana wakwe Izuwa ena moo?
70Akamtalwa Isa, Mi simsawurie unwi kumi na weri, na wenyu mwe ena Shetani.
71Akamtetia Yuda wa Siman Iskariota, niye enemng’ola, ekioka mwe wa wala kumi na weri.
Currently Selected:
Yohana 6: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
