Luka 11

1Ikaoka, ekioho handu ekiomba, ekinaidiwe, mwanalosha wakwe mwe akamburra, Mzuri, utuloshe uswi kuomba, sa Yohana naye ewaloshie waanalosha wakwe. 2Akawawurra, Mukiomba, ghambeni, Apa, lioke ibaha izina lako. 3Uze ufumwa wako. Kidjo chetu cha musi utuinge musi na musi. 4Utushigie ng’oki jetu; amu na uswi twamshigia ose ena sile na uswi. Nete usituete kugheshwa.

5Akawawurra, Niani wenyu mwenye mbuyae, enemtongia kio ghati, amburre, Ee mbuyaa, unietie mabumunda matatu; 6amu mbuyaa wangu anizia ghati ya kuzoka, nete sina kindu cha kumwingia; 7na ula wa nyumbeni amtalua ekighamba, Usinirishe wukiwa, luwi lwaidiwa kufingwa, na waana wangu weoho hamwe nami washinjia, siidima kuwuka nikuinge. 8Namburra, Mtano kwakicha esiwuka amwinge, amu ya kuoka mbuyae wakwe, kake amu ula tena soni, enewuka, enemwinga vyose evikundia. 9Nami namburra unywi, Omboni, muneingwa; endeni munewona; bigheni luwi, munejughuiwa. 10Amu ose aomba, aingwa; ula aenda, awona; ula abigha luwi, enejughuiwa. 11Uhiwa wenyu wawee, mwana wakwe ekimuomba ibumunda, enemwinga ibwe? kana nguluma, handu ha nguluma enemwinga nyoka? 12kana ekimuomba iggi, enemwinga kishushe? 13Huwo unywi wawiwi mukitisiwa kuwainga waana wenyu vindu vyedi, enenetaze Apa eoho wanga kuwainga wala wemwomba Ngoma Mshenete?

14Akaoka ekikinya luhungu, luokie bubu. Ikaoka luhungu lula lukinafume, bubu akateta; matorano wakarighiwa. 15Wengi wawo wakaghamba, Hena Beelzebul mbaha wawo maluhungu ang’ola maluhungu. 16Wengi wekimghesha wakakunda luwano lwa wanga. 17Naye ekitisiwa makusaro mawo akawawurra, Ufumwa wose ughawanyika ndeni yakwe ukurisha wukiwa, na nyumba ighawanyika hena nyumba yagwa. 18Naye Shetani huwo ekighawanyika ndeni yakwe, ufumwa wakwe uneimukaze? amu unywi mughamba, nakinya maluhungu hena Beelzebul. 19Kake mi nikikinya maluhungu hena Beelzebul, waana wenyu wamakinya hena ani? amu iyo niwo weneoka wachili wenyu. 20Kake mi nikikinya maluhungu hena kichaa cha Izuwa, ufumwa wa Izuwa umufikia. 21Ena zinya mwenye nareta jakwe ekirinda kiwaza chakwe, mali makwe meikaa mashorota: 22kake mwenye zinya ja kumkela ye eneikaeze na eneikaamlele, amsoka nareta jakwe jose ejingendiiye ekighawa vindu vyakwe. 23Mundu esiokie hamwe nami ni wanga yangu: naye esiwunganye hamwe nami emiza. 24Luhungu luwiwi lukimfuma mundu luvetia ghati ya handu hesina mbombe, lukienda lusowoko: lusiluwone luteta, Ninehunduka nyumbeni hangu nifumie. 25Lukiza luiwona yahaiwa yakelwakelwa. 26Chwi lutonga lutika maluhungu mafungate mawiwi kukela ye mwenye; namo meingia na meikaa hala: mtano kuidiwika kwa mundu ula kuwiwi kukela kuwoka.

27Ikaoka ekinatete ivi, mche mwe ghati ya matorano akawushija ighonda lakwe akamburra, Keba ndeni ikutikie na mawee umaamwie. 28Ye akaghamba, Ni huwo, na keba wala nawo wekisikia kiteto cha Izuwa na kukigura.

29Na matorano mekioka wembughanyikia akawoka kuteta, Irika ili ni irika iwiwi: laenda luwano; nete telineingwa luwano, lusioke luwano lwa Yunus. 30Amu sa Yunus eokie luwano hena wala wa Ninawi, ni huwo Mwana wa Adamu eneoka hena irika ili. 31Mfumwa wa kiche wa kusini enewuka ghati ya wuchili na wandu wa irika ili, enewachilia; amu ezie kufuma kuidiwika kwa masanga asikie kucha kwa Sulemani, na mbaha kukela Sulemani eoho aha. 32Wandu wa Ninawi weneimuka ghati ya wuchili na irika ili, wenelichilia: amu wechwie muti hena kutinda kwa Yunus, na mbaha kukela Yunus eoho aha.

33Tehena easha taa, na kuiwisa ghati ya kizembe, kana hena mbinda, kake aigera wanga ya kindu cha taa, wala weingie wawone kyangagi. 34Taa ya muri ni ijiso, na ijiso lako likioka lizerre, muri wako wose una kyangaji, kake likioka iwiwi, muri wako una kija. 35Huwo yoa, kyangaji kioho ndeni hako kisioke kija. 36Na muri wako wose ukioka na kyangaji, usioke na ifungu imwe la kija, uneoka na kyangaji pacha, sa taa ikikugera kyangaji na kuwaa kwakwe.

37Na ekinaoke ekiteta, Mfarisayo mwe emkundie ale kidjo hakwe; akaingia akaikaa si. 38Mfarisayo ekinawone akarighiwa, amu teioje mikono kuwoka esimela. Mzuri akamburra, 39Ingeriaha unywi Wafarisayo muzerrija kila kiokie some ya ndemwa na kamwanje; kake kioho ndeni henyu kiizue ikwe na uwiwi. 40Unywi mutomode, ula earehe cha some tearehewa cha ndeni? 41Kake ng’oleni hena itasi vila vya ndeni, na vyose vyazerrike henyu.

42Kake wukiwa wenyu Wafarisayo! amu mung’ola itasi la naana, na la mchicha, na la mbogha jose, mukishiga hae wuchili na lukundo lwakwe Izuwa: kake ivi vimbe kuareha, na vila si kuvishiga. 43Wukiwa wenyu, Wafarisayo! amu mwakunda kuikaa handu ha nganyi ghati ya masunagogi na kukeziwa kichinda. 44Wukiwa wenyu! amu unywi ni sa mbira jisiwonwa, wandu wejiwata wasijitisiwe.

45Akatalua mwe wawo waana wa wuchili, amburra, Mlosha, ukiteta ivi waturigha na uswi. 46Akaghamba, Na unywi waana wa wuchili, wukiwa wenyu! amu mwatikija wandu vindu visitikika, na unywi wenye tomuvikuwara vindu na kichaa chenyu kimwe. 47Wukiwa wenyu, amu muareha mbira ja waroti, na wawaweo wenyu wewakomie. 48Nihuwo muviteta vihiro vya wawawee wenyu ti muizihirwa navyo: amu wawo wewakomie, na unywi muwaarehia. 49Amu iyowa kucha kwa Izuwa kukaghamba, Ninewaingijia waroti na wasu, wengi wawo wenewakoma, wenewakinya; 50iwone kuendwa hena irika ili sakame ya waroti wose iitishwe too kuarehiwa masanga; 51too sakame ya Habil mtano sakame ya Zakariya ekomiwe ghati na ghati ya kisiko na heshenete. Kididi, namburra unywi, ineendwa hena irika ili. 52Wukiwa wenyu waana wa wuchili! amu muutikie uchunguo wa kucha, unywi wenye tomuingie, nawo weokie wekiingia muwaswije. 53Na ekinafume hala, wetama na Wafarisayo wakawoka kula ja kumteshanya muno, 54na kumuitara lodoo lwingi, wekimyayia, wawone kumtegha kiteto cha itumbu lakwe, nesa wawone mimulinganyijie.

Currently Selected:

Luka 11: TAVETA

Highlight

Copy