Luka 12
12
1Na matorano maghana ighana wekinawunganyike, mtano kuwatana, akawoka kuwawurra waanalosha wakwe kuwoka, Mukurinde ghati ya chachu la Wafarisayo, nilo ukeleki, 2Amu tehena kifinikirwa kikisikajughuwe ikwade, nete kiwisiwe kisikatisiwike ikwade. 3Huwo na viteto vyose muviteta kijeni vinesikiwa ghati ya kyangaji; navyo muviweweda nyumbeni vinechilika wanga ya ghu. 4Namburra unywi, wambuyaa, Musiondoke wala wakoma muri, wekiidiwa wesina kitetowa cha kuketa. 5Kake ninembondja unywi niani munemwondoka. Mwondokeni ula mwenye zinya ja kukoma na kutagha ghati ya jehannum; kididi namburra, Mwondokeni uu. 6Wudeghe wusano towutaghika pesa mbiri? na mtano kamwe kajo tekeiwaika msongorana wakwe Izuwa: 7Kake na nyui ja mitwi yenyu jitarika jose. Musiondoke, ni keba unywi kukela wudeghe wuingi. 8Namburra unywi, ose eneniitikija mi msongorana wa wandu, Mwana wa Adamu enemuitikija ula msongorana wa malaika wa Izuwa: 9naye enikana msongorana wa wandu, enekanwa msongorana wa malaika wa Izuwa. 10Mtano ose eneghamba kiteto wanga ya Mwana wa Adamu, eneshigiwa; kake ula erigha Ngoma Mshenete, teshigiwaye. 11Na weneikawemuete ghati ya masunagogi na msongorana wa wandu wabaha na wenye zinya, musikurishe wukiwa kindu ani kana nikini munetalwa, kana kuteta; 12amu Ngoma Mshenete enemulosha magheri mala vimbevyo kuteta.
13Mundu mwe ghati ya matorano akamburra, Mlosha, umburre mundwetu anighawie wuhodji. 14Akamburra, Mundu we, niani eniwikie mi mchili kana mghawi henyu? 15Akawawurra, Yoeni mukurinde ghati ya kulangwa kwose, amu si hena wiingi wa mundu moo wakwe, hena mali ena. 16Akawawurra mfwanano, ekiteta, Heokie na mundu, mmasi; ngonde yakwe ikagera muno. 17Akakusara ngoroni, akateta, Niketeze, amu sina ha kuwunganya mafindiko mangu? 18Akaghamba, Mineketa huwo, ninebaa kilalo, ninejenga kibaha, ninewunganyikia hoo mafindiko mangu mose, na mali mangu. 19Nineiwurra ngoro yangu, Ngoro we, una mali meingi mewisiwe ma miaka miingi: sowoka, ule, unywe, uizihirwe. 20Izuwa akamburra, Utomode we, kio iki ngoro yako yaendwa; najo ujiwisie jineoka ja mundu ani? 21Ni huwo ula ekuwisia mali, esiokie mwenye mali hakwe Izuwa.
22Akawawurra waanalosha wakwe, Amu ii namburra, Musikurishe wukiwa hena kukia kwenyu, munela kini, nete hena muri wenyu, munedoka kini. 23Amu kukia ni kubaha kukela kidjo na muri kukela suke. 24Yoeni malukuru, tewehanda, nete tewefindika; tewena ha kuwisa, nete kilalo: naye Izuwa awarisha. Na unywi munetaze kuoka keba kukela ndeghe? 25Niani wenyu aidima ekirisha wukiwa kunetija wueza wakwe mkono mwe? 26Na musiidime kindu kidongo sa iki, nini kukurishia wukiwa hena vingi. 27Yoeni viwaro vimeawo; tewehira ndima nete tewefuma: nami namburra unywi, mtano Suleman hena kirumi chakwe chose tedokiwe sa kimwe chawo. 28Na mani ma ngondoni, meoho yoo, na yawo megerwa motoni, Izuwa ekimahamba huwo, teneta kumuhamba unywi, lwa luitikijo ludongo? 29Huwo musiende unywi mule kini, munywe kini, nete musioke na ngoro ja kubangabanga. 30Amu ama mose meendwa ni mbare ja masanga, naye waweo wenyu etisiwe, ti muvikundie ivi. 31Kake endeni unywi ufumwa wakwe, huwo munenetijiwa ivi. 32Musiondoke, unywi ifio idongo: amu Waweo wenyu aizihirwa kumuinga unywi ufumwa. 33Muvitaghe vila muvina, mung’ole itasi; mukuarehie vikuchu visisakaa, mali mesiduhuka, wanga, muhiwi esisongeriaho, nete ndondoworo jisinyamara. 34Amu handu mali menyu meoko, niho ngoro jenyu jineoka.
35Huwo muoke mchungwa vikudi na taa jikiaka, 36na unywi sa wandu wemuindie mzuri wawo eneikaawuke na ngasu ekiza ekibigha luwi wamujughuyie chwi. 37Keba wazoro wala, mzuri eza ewakicha wacheiwa. Amin namburra, enekuchunga, enewaikaja wala, eneza enewaindia. 38Naye ekiza lukamba lwa keri, mtano lukamba lwa katatu, akawakicha huwo, niwo keba. 39Kake yoeni ama, kwakicha ekitisiwa mwenye nyumba magheri ani eza muhiwi, kwakicha ekicheiwa, nete tekishiga nyumba yakwe kutumburwa. 40Na unywi mkuarehie; amu magheri msimagheshijie Mwana wa Adamu emaziia.
41Petro akaghamba, Mzuri, watuwurra uswi mfwanano uu, kana na wose pia? 42Akaghamba Mzuri, Nianira iokie kirote mwitikiji na echee, bwana embika wanga ya wazoro wakwe, awaghawie cha kula magheri makwe? 43Keba mzoro ula enemkicha mzuri wakwe ekiza na ekiketa huwo. 44Kididi namburra unywi, enemuosha mbaha wanga ya mali makwe mose. 45Kake mzoro ula ekighamba ngoroni hakwe, Mzuri wangu ashesha kuza; ekiwoka kuwabigha waghenji na wabora, kula, kunywa, kuengea; 46mzuri wa mzoro ula eneza musi esiugheshijie, na magheri esimatisiwe, enemchwachwa, enemwinga ifungu lakwe hamwe na wala wesiitikija. 47Naye mzoro ula etisiwe vila evikunda mzuri wakwe esimwarehie nete kuketa hena lukundo lwakwe, enebigwa muno: 48kake ula esitisiwe, naye eviarehe vila vimbe kubigwa, enebigwa kadongo. Amu ose eingwa vingi, hakwe viingi vineendwa, naye wemgeria viingi, hakwe weneneta kuenda.
49Nizie nigere moto masangeni; na ukioka ingeriaha uaka nikundie kini? 50Nina lubatijo kubatijwa nalo, nami niwoneze wukiwa mtano lunefika? 51Mughamba nioho niete luworo masangeni? Si huwo, namburra, kake ni lughawo. 52Amu too ingeriaha weneoka ghati ya nyumba mwe wasano weghawanyika, watatu hena weri, weri hena watatu. 53Weneghawanyika, wawee hena mwana, mwana hena wawee; mee hena mwana wa kiche, mwana wa kiche hena mee; mche hena mkwee, mkwee hena mche.
54Akawawurrawa matorano, Mukiwona ijumbi likikwea kigwa‐izuwa, chwi mughamba, Mvua izie; na ni huwo. 55Na ngungu ya kusini ikiruruma, mwaghamba, Ineoka ndughuri: na ni huwo. 56Unywi wakeleki, wusho wa si na wa wanga mwaidima kuwutwarija; nini tomutisiwa kutwarija magheri ama? 57Na nini tomuchila vyedi henyu wenye? 58Huwo ukitonga na mlinganya wako ha mchili, ukete lunyarki nzieni kushigiwa naye; asiwone kukutika hena njama, na njama akung’ola hena mbwange, na mbwange enekugera kichungoni. 59Nakuwurra, Toufuma uko, mtano waidiwa kuiha pesa ya kuidivika.
Currently Selected:
Luka 12: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
