Luka 17
17
1Akawawurra waanalosha wakwe. Teviidimika vindu vya kutekwisha visize: kake wukiwa wakwe eviete. 2Keba hakwe, ibwe la kushaghia kuchungwa singoni hakwe naye kutaghwa ndiweni, kukela kumtekwisha mwe awa wadongo. 3Kurindeni; mundwenyu ekitekwa, mtetee; ekichwa muti, mshigie. 4Na ekitekwa kandu kafungate musi mwe, na kandu kafungate ekihunduka hako, ekiteta, Nachwa muti; yakuwe kumshigia.
5Wasu wakamburra Mzuri, Utunetijie luitikijo. 6Akaghamba Mzuri, Mukioka na luitikijo sa ndembe ya kyardali muneuwurra mforsadi uu, Ng’oleka, urehandwa ndiweni; ukimsikia. 7Kake niani wenyu, ekioka na muzoro ekiima, kana ekirisha maghonji, enemburra, ekiingia ekifuma mtemeni, Izoo chwi urela kidjo? 8Asimburre, Uniarehie kidjo nile; ukuchunge uniinde mtano nikiidiwa kula na kunywa; ikuade unela na unenywa mwenye? 9Ze? amwinga awahache muzoro ula, hena kuareha vila eviwurrwa? 10Na huwo unywi muneikamuidiwe kuareha vyose muviwurrwa, teteni, Wazoro wesiwe uswi; vila vituwe kuareha, nivyo tuviarehe.
11Ikaoka wekinaoke nzieni kutonga Yerusalemi, evetie ghati ya Samaria na Galilaya. 12Ekinaingie kiongo kimwe, wakamtorana wandu ikumi wenye kusumura, weimuke hae, 13nawo wakawushija ighonda lawo wekiteta, Yesu Mzuri, utusarie. 14Ekinawawone akawawurra, Tongeni, murekuwonyanya hena wakara. Ikaoka ghati ya kutonga kwawo wakazerrika. 15Mwe wawo ekiwona ti ahoa, akahunduka akamwisia Izuwa hena ighonda ibaha; 16akagwabu maghuni hakwe, ekimwinga haika: naye eokie Msamaria. 17Akatalwa Yesu akaghamba, Si wose ikumi wezerrika? 18Wala kenda weohi? Tewewonwa wehunduke kumwinga Izuwa luisiso lwakwe, nde mugheni uu. 19Akamburra, Wuka, tonga hako; luitikijo lwako lwakuhodja.
20Akawujanywa ni Wafarisayo, Ufumwa wa Izuwa waza rini? Akatalwa akaghamba, Ufumwa wa Izuwa touza hena kuwonwa; 21nete teweneghamba, Yoa aha! kana Hala! amu yoeni, ufumwa wa Izuwa uoho ndeni henyu.
22Akawawurra waanalosha, Misi ineza, muneikamukunde kuwona mwe wa misi ya Mwana wa Adamu, nete tomuneuwona. 23Wenemburra, Yoa aha! Yoa hala! musitonge nete musiratere. 24Amu sandu kiremera kibigha mbai mwe ya wanga, ikiwaa mtano mbai ingi ya wanga, ni huwo Mwana wa Adamu eneoka musi wakwe. 25Kake kuwoka yambe kunyamarwa viingi, na kusuwa ni irika ili. 26Na sandu iokie misi ya Nuhu, ni huwo ineoka misi ya Mwana wa Adamu. 27Wala wanywa, weaika, weaikwa, mtano musi ekinaingie Nuhu ghati ya safina, ikaza mlombia, ikawakoma wose. 28Huwowa viokie misi ya Lot: wala, wanywa, wazora, watagha, wahanda, wajenga: 29na musi ula Lot ekinafume Sodoma, ikabigha moto na kibiriti wanga, ikawakoma wose. 30Huwo ineoka musi eneikaajughuwe Mwana wa Adamu. 31Na musi ula, ula eoho ghuni, na vindu vyakwe nyumbeni, asisee kuviuha; naye eoho mtemeni huwo asihunduke nyuma. 32Mkumbukeni mche wakwe Lot. 33Mundu ekienda kukukija moo wakwe, eneutesha, na mundu ekiutesha eneukija. 34Namburra unywi, Kio kila weneoka weri wui wumwe: mwe eneuhwa, wa keri eneshigwa. 35-36Wache weri weneoka wekishaga hamwe; mwe eneuhwa, wa keri eneshigwa. 37Wekitalwa wakamburra, Iohi, Mzuri? Akawawurra, Handu kimba kioho, niho na ndei jinewunganyika.
Currently Selected:
Luka 17: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
