Jon 10
10
Osep ka tiplau sipsip
1“Ngawai lokono ke umu langane. Gute ka sep ke sipsip inarak eger ke ina ekreng bitna kovok e iye klou ari ke omur silang iye gute panakongon ina e waiki due sipsip. 2E gute ka sep ke eger ke ina ekreng bitna iye sipsip inarak plaungan. 3E gute silang plau ekreng bitna e kloke ke sipsip inarak plaungan. E plaungan tonari gi ila sipsip e tiklingen kreine e tididi iye e tisongon eger. 4Alo ka tisongon eger kodong iye mgo ke isak e tididi iye kesua tile kreine. 5E ma tididi gute silang kovok kesua tile kreine kovok. Aurou. Ma tiulou ke iye.” 6Yesus wai pelengon ano ane ke isak yagos e tile pelengon ka iye wai ke isak lana ine kovok.
7E Yesus wai ke isak blang langane. “Ngawai lokono ke umu langane. Ngong sipsip inarak eger ina ekreng bitna. 8Osep ka pula keniye ka time mgo ke ngong isak osep panakongon ina ka tipi osep urok wan. E sipsip tiklingen ke isak kovok. 9Ngong ekreng bitna e gute sei ka me ke ngong e sep ke eger ma iye dong itau ine. Ma aling aling iye sep ke eger e songon eger e due ina ngangon. 10E gute panakongon ina me ma iye panako wan e due burwa ke osep e due agegeng ke osep vala. E ngame ma osep tidue mosongon ka dong vala dong e mosongon tonari due wan itau bon ke isak.”
11“Ngong sipsip inarak plaungan ka itau. E sipsip inarak plaungan ka itau pli tarna e mete ma iye plau sipsip itau. 12Gute ka boko ke mani vala vati gemle kevena me e songon sipsip e ulou la. Deka gemle kevena ma due sipsip kene e sipsip leklou tidardar kla. Gute tonari ulou la kesua iye boko ke mani vala e iye sipsip inarak plaungan ka iye inarak gute kovok. 13Iye ulou la kesua iye boko ke mani vala e aitno kro ke sipsip kovok.”
14“Ngong sipsip inarak plaungan ka itau e ngaile lou sipsip e tile ngong. 15Ane eriar langka Livou ile ngong e ngaile Livou. E ngapli tarna lungong e ngamete ma ngaplau lou sipsip itau. 16E lou sipsip leklou tidong ka tidong ke eger ane kovok. Ma ngadue isak tisep ke eger ane blang e ma tiklingen kre lungong. Deka sipsip keniye ma tipolou osua kene vala e ngong vala ngadong inarak plaungan. 17Ma ngapli tarna lungong e ngamete ma ngakaranga ngadue lou mosongon blang. E ke batne langane Livou lana iye ke ngong. 18Gute kene karanga due ngong ma ngamete kovok. Aurou. Ngadidi aitno lungong e ngamete e silang blang ngakaranga ngadue lou mosongon blang. Livou wai dagar ke ngong ma ngadue langane.”
19Osep Yuda ina tiklingen Yesus ila pelengon ane deka tipara pelengon pulu e tidardar ine. 20Isak pula tiwai langane. “Angelo soulu dong ke iye e due manga manga. Ina lange umoklingen ila pelengon?” 21E osep leklou tiwai langane. “Gute ka angelo soulu dong ke iye karanga wai pelengon langane kovok. E angelo soulu karanga lua gute ka bitna evin ma iye vati omur kovok.”
Osep Yuda ina aitno lisak engil ke Yesus
22E alo ari osep Yuda ina tidue rogo omba kene ke Jerusalem. Rogo omba tonari lana ine la ke alo ka osep Yuda ina tirere Ida Tapolngon ila ninu ina wan. Tidue rogo omba tonari alo ka omur epen. 23E Yesus lila ke omur ka lelei Ida Tapolngon ila ninu ka tisir omur are Solomon ila opos. 24E osep Yuda ina tidong lelei Yesus e tipmi iye langane. “Ma imodong tauni e aitno limi mter ke wom koke aurou? Langka wom gute Krais ka Ida Tapolngon rere ma omlua osep ke urok elio epmes ina amwai malak ke imi.” 25E Yesus koli wai ke isak langane. “Ngawai ke umu ine kodong e aitno lumu la dagar ke lou pelengon kovok. E silang elio arit ina ka ngadue ka didi Livou aitno palongo lumu ke ngong. 26E aitno lumu la dagar ke isak kovok kesua umu lou sipsip kovok. 27Lou sipsip tiklingen kre lungong. E ngaile isak e tididi ngong. 28E ngakar isak mosongon ka dong vala dong e ma timete kovok e gute kene karanga pi isak ke lungu kovok. 29Livou ka kar isak ke ngong mole wan ka pula keniye e gute kene koke wan gesa karanga pi isak ke limla kovok. 30Ngong e Livou imi eriar vala.”
31Deka osep Yuda ina tidue opmu ma tiuri isak ke Yesus ma iye mete ine. 32E Yesus wai ke isak langane. “Ngadidi Livou ila arit e ngadue elio arit ina pula ke omtomu. E oku ane umawaiki umouri opmu ke ngong batne ke elio arit ina lange?” 33E tikoli tiwai ke iye langane. “Imawaiki imouri opmu ke wom ke elio arit ina ka omdue kovok. Aurou. Imawaiki imodue langane kesua amwai soulu ke Ida Tapolngon. Wom gute vala e amwai wom eriar langka Ida Tapolngon.”
34E Yesus koli wai ke isak langane. “Oglou osep tisogo lumu pelengon dagar palma langane.
‘Ngawai langane. Umu langka tapolngon.’
35Oglou Ida Tapolngon sir osep ka tidue ila pelengon ‘tapolngon’ e iteile ila pelengon karanga segesege kovok. 36Langka iye wai ke isak langane lange ke ngong ka Ida Tapolngon rere ngong e pagei ngong ngame ke taklak? Ina lange umawai ngawai soulu ke Ida Tapolngon alo ka ngasir ngong Ida Tapolngon Otno Arang? 37Langka ngadue Livou ila bokongon kovok deka aitno lumu la dagar ke ngong kovok. 38E langka ngadue ila bokongon lama aitno lumu dagar ke lou pelengon kovok aitno lumu la dagar ke elio arit ina ka ngadue ma umeile malak langane. Livou dong kap ngong e ngadong kap Livou e imi eriar.” 39E aling silang tiwaiki tikis iye dagar e iye pren ke isak e la.
40Deka iye iding la ke aki Jordan burla ke omur ka oglou Jon nogrum paunim osep ine e iye dong are. 41Osep pula time ke Yesus e tiwai langane. “Lama Jon due elio arit ina ka isak nisngen kovok wan ka pula keniye ka iye wai ine ka me ke gute ane iye pelengon lokono.” 42E osep pula aitno lisak la dagar ke Yesus ke omur are.
Currently Selected:
Jon 10: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
