Jon 9

Yesus lua gute ka bitna evin

1Alo ka Yesus lila la iye vati gute ka bitna evin. E bitna evin alo ka tna divir iye. 2Deka ila disaipel tipmi iye langane. “Rabai sei ila elio epmes ina due gute ane bitna evin alo ka tna divir iye? Iye tona ila elio epmes ina koke timla koke tna urok elio epmes ina?” 3E Yesus koli wai ke isak langane. “Gute ane bitna evin batne iye due elio epmes ina koke tna koke timla tidue elio epmes ina kovok. Aurou. Wan ka polou ke iye polou batne ma osep tivati elio arit ina ka Ida Tapolngon kene vala karanga due. 4Ke oklou kene kene alo ka oklou dau bublo ma itodue Ida Tapolngon ka pagei ngong ngame ila bokongon. Kesua epmes ma polou e osep tikaranga tiboko ke epmes kovok. 5Alo ka ngadong ke taklak ane ngadong langka bublongon ke osep ka tidong ke taklak.”

6Yesus wai langane deka iye uri omsok duru ke taklak e due digor ine deka iye sake ke gute tonari bitna. 7E wai ke iye langane. “Amla e emris ke aki ina ovuk ka angaine Siloam.” Pelengon palma siloam lana ine langane. Tipagei iye la. Gute klingen Yesus wai deka iye la ris. Iye ris kodong deka alo ka iye iding ke Yesus iye karanga vati omur.

8E mase osep ka tidong olwo boto ke gute tonari ila ninu e osep ka tivati iye aling aling pang mani ke osep tiwai pulu langane. “Gute ane gute ka oglou dong e pang mani ke osep i?” 9E osep leklou tiwai iye gute tonari e osep leklou blang tiwai langane. “Aurou. Iye bitna langka gute e dau iye gute silang.” E gute tonari wai langane. “Ngong tona iye.” 10E tiwai ke iye langane. “Lange ka emtem polou itau?” 11Deka iye koli wai ke isak langane. “Gute ka angaine Yesus due taklak digor e sake ke omtongu e iye wai ma ngala ngaris omtongu ke aki ina ovuk Siloam. Deka ngala ngaris e omtongu polou itau e ngakaranga ngavati omur.” 12E tipmi iye langane. “Gute are dong ge?” E iye koli wai langane. “Aiyo? Ngaile kovok.”

13Mase tipaur gute ka oglou bitna evin la ke osep Farisi ina. 14E oklou ka Yesus due taklak digor e due gute bitna polou itau iye oklou sabat. 15Deka osep Farisi ina tipmi gute ke batne lange oku ane iye karanga vati omur. E gute koli wai ke isak langane. “Gute due taklak digor e sake ke omtongu e ngala e ngaris e oku ane ngakaranga ngavati omur.” 16Osep Farisi ina leklou tiwai langane. “Gute are dar oklou sabat ina pelengon dagar deka iteile Ida Tapolngon pagei iye me kovok.” E osep Farisi ina leklou tiwai langane. “Lange ka gute epmes ina karanga due elio arit ina bitna bitna langka iye due?” Deka osep Farisi ina tipara pelengon pulu e tidardar ine. 17E tipmi gute ka oglou bitna evin blang langane. “Amwai gute due emtem polou itau e oku ane amwai lange ine?” Deka gute tonari koli wai ke isak langane. “Iye gute napaprangan ina.”

18E dau osep Yuda ina aitno lisak dagar kovok langka oglou gute tonari bitna evin e oku ane iye karanga vati omur. Deka tigi gute tna e timla ma time. 19E tipmi isak langane. “Gute ane otopmu arang ka umawai bitna evin alo ka umedivir iye? Batne lange oku ane iye karanga vati omur?” 20E tna e timla tikoli tiwai ke isak langane. “Imeile iye etepmi arang e bitna evin alo imedivir iye. 21E imeile batne lange oku ane iye karanga vati omur koke sei due bitna polou itau kovok. Umepmi iye ine kesua iye ngongle kodong e iye karanga wai iye tona ila pelengon.” 22E tna e timla tiwai langane kesua tilim ke osep Yuda ina. Kesua osep Yuda ina tiwai pulu kodong langka gute gesa wai Yesus iye gute Krais ka Ida Tapolngon rere ma iye lua osep ke urok elio epmes ina ma tisapir iye ke urok duningen ina ninu ma iye karanga la ke duningen blang kovok. 23Ke batne ane tiwai langane. “Iye ngongle kodong. Umepmi iye ine.”

24E tigi ke gute ka oglou bitna evin blang e tiwai ke iye langane. “Amwai lokono ke Ida Tapolngon bitna ma amwai lokono ke imi. Imeile gute are gute epmes ina.” 25E gute koli wai ke isak langane. “Langka iye gute epmes ina koke aurou ngaile kovok e dau ngaile langane. Oglou omtongu evin e eknikane ngakaranga ngavati omur.” 26Deka tipmi iye langane. “Iye due wansua ke wom? Lange ka iye due wom amkaranga amvati omur?” 27E iye koli wai ke isak langane. “Ngawai ke umu ine kodong e umawaiki umoklingen lou pelengon kovok. Ina lange umawaiki ngawai ine blang? Umawaiki umopolou ila disaipel blang?” 28Deka tiwai soulu lokono ke iye langane. “Wom gute are ila disaipel e imi Moses ila disaipel. 29Imeile omur oglou Ida Tapolngon wai ke Moses e imeile omur ke gute are kovok.” 30E gute koli wai ke isak langane. “Ua. Ngadigrik va. Kesua umeile gute are ila omur batne kovok e dau iye due omtongu polou itau. 31Iteile Ida Tapolngon klingen osep epmes ina alo ka tipmi iye ke wan bitna bitna kovok. E iye klingen osep ka tidue anit ke iye e ka tididi aitno vala. 32Ke oglou oglou ari lila me ke eknikane iteklingen basikngen ke gute ka bitna evin alo ka tna divir iye deka gute silang due bitna polou itau kovok. 33Langka Ida Tapolngon pagei gute are me kovok iye karanga due wan gesa kovok.” 34Deka osep Farisi ina tikoli tiwai langane. “Aiya divir wom ke elio epmes ina e lila me ke eknikane wom dau omdong ine. E oku ane amwaiki amparere imi i?” Deka tisapir iye ke urok duningen ina ninu.

Osep epmes ina isak langka osep ka amtarsak evin

35Yesus klingen osep Yuda ina tisapir gute tonari ke duningen ina ninu deka iye la pado iye e wai ke iye langane. “Ate. Aitno lugom dagar ke Gute Ka Polou Langka Osep?” 36E gute koli wai langane. “Puda. Iye gute sei? Amwai ke ngong ma aitno lungong karanga la dagar ke iye.” 37E Yesus wai langane. “Amvati iye kodong e lokono ngong ka ngawai ke wom ngong iye.” 38Deka gute koli wai langane. “Puda. Aitno lungong dagar ke wom.” Iye wai langane deka grum kamla e lotuim Yesus.

39Deka Yesus wai langane. “Ngame ke taklak ane ma ngawade osep ka pula keniye urok elio. Ma osep ka amtarsak evin tikaranga tivati omur e osep ka tivati omur tipolou langka osep ka amtarsak evin.” 40E osep Farisi ina leklou ka tidong kap iye tiklingen ila pelengon e tipmi iye langane. “Lange? Emtemi evin blang?” 41E Yesus koli wai ke isak langane. “Langka omtomu evin lumu elio epmes ina munu pes umu kovok e dau umawai umakaranga umavati omur deka lumu elio epmes ina dau munu pes umu.”

Currently Selected:

Jon 9: ANT

Highlight

Copy