Jon 13

Yesus ris ila disaipel kamsak

1Rogo omba ka lana ine la ke alo ka Ida Tapolngon lua osep Yuda ina tisongon omur Isip polou dau kovok. E Yesus ile isuk boto ma iye songon taklak e la ke Timla. Iye lana iye ke ila osep ka tidong ke taklak e iye lana iye ke isak la lama alo ka iye mete.

2Ke epmes Yesus kap ila disaipel tingen inarak ngangon e ari Satan due Judas ka Saimon otno arang aitno kodong ma iye lai Yesus ina. 3E Yesus ile Timla kar arit ke iye ma iye plau wan ka pula keniye e silang iye ile iye me ke Ida Tapolngon e ma iye iding ke Ida Tapolngon. 4Deka iye tito ke ngangon e klok ila molo ka alang e pou taul kene lelei iye. 5E iye baser aki ke dis e nogrum ris ila disaipel kamsak e sak isak ke taul ka lelei iye ma isak epis.

6Yesus polou ke Saimon Pita e Pita wai ke iye langane. “Ngau Puda ma omgrong kongu?” 7E Yesus koli wai langane. “Oku ane emile batne ke wan ka ngadue kovok e mase ma emile batne.” 8Deka Pita wai langane. “Aurou. Ma omgrong kongu kovok de.” E Yesus koli wai ke iye langane. “Langka ngagrong kevep kovok amkaranga omdong kap ngong kovok.” 9Deka Pita koli wai ke iye langane. “Ngau Puda omgrong kongu vala kovok. Omgrong lungu e bara lungong blang.” 10E Yesus koli wai langane. “Aurou. Gute ka grong pampmau ine keniye kodong iye eip e ma iye grong kamla vala. E umu eip e dau umu keniye eip kovok.” 11Yesus ile gute sei ma lai iye ina e ke batne langane iye wai isak keniye eip kovok.

12Yesus ris kamsak yagos deka iye tnei molo ka alang blang e iding duru ke bota. E iye pmi isak langane. “Umeile batne ke wan ka ngadue ke umu koke aurou? 13Umesir ngong lumu gute parerengen ina e Upu Puda e umawai lokono alo ka umawai pelengon tonari kesua ngong lumu gute parerengen ina e Upu Puda. 14E langka ngong ka Upu Puda e lumu gute parerengen ina ngaris kopmu deka are itau ma umu blang umeris kopmu pulu. 15Ngadue elio ane ma umavati ngong e umakana lou elio ka ngadue ke umu. 16Ngawai lokono ke umu langane. Wokboi nating mole ina puda kovok e gute ka kalke omon mole gute ka vai iye ma iye kalke omon kovok. 17Langka umeile omur ke lou pelengon tonari e umedidie ma Ida Tapolngon due aitno lumu itau itau.”

18“Ngawai ke umu keniye kovok kesua ngaile umu ka ngarere umu kodong. E elio ane polou ma Ida Tapolngon ila pelengon palma polou lokono. Pelengon tonari langane.

‘Gute ka ngen ngangon kap ngong pul dogur ke ngong e aitno soulu ke ngong.’#13.18 — Emritim pelengon langane ke Buk Song 41.9.

19Ngawai ine ke umu oku ane mgo ke alo ka elio tonari polou ma alo ka elio polou aitno lumu dagar ngong Gute Ka Ngadong Kodong. 20Ngawai lokono ke umu langane. Langka osep aitno lisak itau ke osep ka ngapagei isak deka aitno lisak itau ke ngong blang. E langka aitno lisak itau ke ngong deka aitno lisak itau ke Ida Tapolngon ka pagei ngong ngame blang.”

Yesus wai ma Judas lai iye ina

(Matyu 26.20-25 e Mak 14.17-21 e Luk 22.21-23)

21Yesus wai langane yagos deka aitno kro lokono e iye wai malak ke isak langane. “Ngawai lokono ke umu. Gute kene ke umu ma lai ngong ngau.” 22E ila disaipel tivati isak pulu e aitno lisak mter pula kesua tile gute sei ka iye wai ine kovok. 23E ila disaipel kene ka Yesus lana iye omba ke iye dong olwo boto ke Yesus. 24Deka Saimon Pita apna nemit ke disaipel ane e wai ke iye langane. “Empmi iye langka iye wai ke gute sei ke ite.” 25Deka disaipel ane apna la dong ke Yesus omun ine e pmi iye langane. “Ngau Puda amwai ke gute sei?” 26E Yesus koli wai langane. “Ma ngadue bret emkil ane sep ke dis deka ngakare ke gute kene. E gute ka ngakare ke iye io iye gute ka ngawai ine.” Deka iye due bret sep ke dis e kare ke Judas ka Saimon Iskariot otno arang.

27Judas due bret kodong deka Satan sep ke aitno. E Yesus wai ke Judas langane. “Omsuong omdue elio ka amwaiki omdue.” 28E gute kene ke osep ka tidong ke bota are ile Yesus ila pelengon batne kovok. 29E Judas plau karoro ka urok mani dong ine e ke batne langane isak leklou aitno lisak mter Yesus wai ma iye la kli urok rogo omba ina wan koke ma iye la kar mani leklou ke osep ka urok wan isuk boto vala. 30E alo ka Judas due bret iye songon ninu. E alo ari epmes kodong.

Yesus wai ke ila disaipel ke elio oku ina

31Alo ka Judas songon ninu kodong Yesus wai langane. “Taim polou ma ngong ka Gute Ka Polou Langka Osep lou arit e lou elio itau lokono ma polou malak ke osep amtarsak. E ma osep tidue anit ke Ida Tapolngon batne ke Gute Ka Polou Langka Osep. 32E langka osep tidue anit ke Ida Tapolngon batne ke Gute Ka Polou Langka Osep deka Ida Tapolngon ma nis Gute Ka Polou Langka Osep ila arit e ila elio itau lokono ke osep blang. E ma iye due suong. 33Umu ka langka dirgu ma ngadong kap umu dau isuk boto vala. Ma umekrim ke ngong e langka ngawai ke osep Yuda ina ngawai ke umu blang langane. Umakaranga umomo ke omur ka ngala ine kovok. 34Ngakar pelengon dagar oku ina ke umu langane. Ma umu lana umu pulu. Eriar langka ngong lana ngong ke umu io umu lana umu pulu. 35Langka umu lana umu pulu deka osep ka pula keniye ma tile umu lou disaipel.”

Yesus wai Pita ma wai iye ile Yesus kovok

(Matyu 26.31-35 e Mak 14.27-31 e Luk 22.31-34)

36Deka Saimon Pita pmi iye langane. “Ngau Puda ma amla ge?” E Yesus koli wai langane. “Amkaranga emdidi ngong ke omur ka ngala ine oku ane kovok. E mase ma emdidi ngong e ompolou ke omur tonari.” 37Pita pmi iye blang langane. “Ngau Puda ina lange oku ane ngakaranga ngadidi wom ke omur ka amla ine kovok? Langka amwaiki ngadue io ma ngapli tarna lungong e ngamete ma ngalua wom.” 38E Yesus koli wai ke iye langane. “Lokono? Ma empli tarna lugom e emmete ma omlua ngong? Ngawai lokono ke wom langane. Eknikane mgo ke alo ka kwako bole wai ma amwai emile ngong kovok aling eklu.”

Currently Selected:

Jon 13: ANT

Highlight

Copy