Jon 14

Yesus wai iye ekreng ka paur osep ke omur heven

1“Aitno lumu kro omba sakam. Ma aitno lumu dagar ke Ida Tapolngon e aitno lumu dagar ke ngong blang. 2Eliang pula tidong ke Livou ila ninu ke omur heven. E ngala are ma ngakere omur ka ma umodong ine. Langka langane kovok ma ngakaranga ngapalongo lumu ine kovok. 3E ngala e ngakere lumu omur e mase ma ngaiding e ngadue umu ma umodong kap ngong ke omur ka ngadong ine. 4E umeile ekreng ka la ke omur ka ngala ine kodong.” 5Deka Tomas wai ke iye langane. “Ipem Puda imeile omur ka amla ine kovok e batne lange imakaranga imeile ekreng ka la are?” 6E Yesus koli wai langane. “Ngong tona vala ekreng e ngong pelengon lokono batne e ngong mosongon ka dong vala dong batne. E ekreng silang dong ka osep tikaranga tididie e tipolou ke Livou kovok. Aurou. 7E langka umeile ngong itau umeile Livou blang. E oku ane e la ine umeile iye kodong e umavati iye kodong.”

8E Filip wai ke iye langane. “Ipem Puda emnis imi ke Abo e are karanga ke imi.” 9Deka Yesus koli wai ke iye langane. “Filip ngadong kap umu tauni kodong e dau emile ngong kovok i? Gute ka vati ngong vati Livou blang. Deka ina lange amwai langane? ‘Emnis imi ke Abo.’ 10Aitno lugom lange? Aitno lugom dagar ke elio ka ngadong kap Livou e Livou dong kap ngong koke aurou? Ngadidi aitno lungong e ngawai pelengon ke umu kovok. Aurou. Livou ka dong kap ngong didi aitno e due wan ka iye waiki due. 11Aitno lumu dagar ke pelengon ane. Ngadong kap Livou e iye dong kap ngong. E langka aitno lumu dagar ke lou pelengon ane kovok io aitno lumu dagar ke elio bitna bitna ka ngadue.”

12“Ngawai lokono ke umu langane. Gute ka aitno dagar ke ngong ma due elio arit ina langka ngadue e silang blang ma iye due elio bitna bitna ka mole elio ka ngadue kesua ngala ngadong kap Livou. 13E wan ka umepmi Ida Tapolngon ine batne ke ngong ma ngadue ma Ida Tapolngon Otno Arang nis osep ke Timla ila elio ka itau lokono. 14Langka umepmi Ida Tapolngon ke wan batne ke ngong ma ngadue.”

Yesus wai ma iye pagei Ano Itau me

15“Langka umu lana umu ke ngong ma umeini lou pelengon. 16E ma ngapmi Livou e ma iye pagei Luangan silang ke umu e ma iye dong kap umu aling aling. 17Luangan tonari Ida Tapolngon Ano Itau ka wai pelengon lokono vala. E osep taklak ina tikaranga tidue kovok kesua tivati iye kovok e tile iye kovok. E umeile iye kesua iye dong kap umu e ma iye dong ke aitno lumu blang.”

18“Ma ngasongon umu langka osep ka isak bimsei kovok. Aurou. Mase ma ngame ke umu. 19Isuk boto dau e osep ke taklak ma tivati ngong blang kovok. E ma umavati ngong. Ngadong ke mosongon e ke batne ane umu blang ma umodong ke mosongon. 20E alo ka elio tonari polou ma umeile ngadong kap Livou e umodong kap ngong e ngadong kap umu. 21Gute ka due lou pelengon e inie iye gute ka iye lana iye ke ngong. E gute ka iye lana iye ke ngong ma Livou lana iye ke gute tonari. E ngong blang ma ngong lana ngong ke iye e nganis ngong malak ke iye.” 22Deka Judas ka Judas silang e Judas Iskariot kovok pmi Yesus langane. “Ina lange ma emnis wom malak ke imi vala e ke osep ka pula keniye kovok?” 23E Yesus koli wai ke iye langane. “Langka gute lana iye ke ngong ma iye ini lou pelengon e ma Livou lana iye ke gute tonari e ma imorwo imeme ke iye e ma imodong kap iye. 24E gute ka iye lana iye ke ngong kovok iye ini lou pelengon kovok. E pelengon ka ngawai iye lou pelengon vala kovok. Aurou. Pelengon ane Livou ka pagei ngong ngame ila pelengon.”

25“Ngawai lou pelengon ane ke umu alo ka dau ngadong kap umu. 26E mase ma Livou pagei Luangan silang ma iye kasip amun ngong e ma iye parere umu ke wan ka pula keniye e sruk aitno lumu ma omtomu sisir lou pelengon.”

27“Ngasongon umu e dau ngadue lou elio ka aitno lumu dong epen dong kap umu. Ngakar elio tonari ke umu e iye langka elio ka osep ka taklak ina aitno lisak dong epen kovok. Aitno lumu kro ke wan bitna bitna kovok e umelim kovok. 28Oglou umoklingen ngawai ke umu langane. Ngasongon umu e ngala e mase ma ngaiding ke umu. Langka umu lana umu ke ngong aitno lumu neser kesua ngala ke Livou. E Livou mole ngong. 29E ngawai ke elio ane oku ane mgo ke alo ka wan polou ma alo ka wan tonari polou aitno lumu dagar ke ngong. 30Ma ngawai ke umu dau tauni kovok kesua Satan ka plau osep ka pula keniye ke taklak me. E iye karanga mole ngong kovok. 31E ngadidi Livou aitno e ngadue wan ka iye waiki ngadue ma osep ka taklak ina tile ngong lana ngong ke Livou. Io umetito e itosongon omur ane.”

Currently Selected:

Jon 14: ANT

Highlight

Copy