Jon 15

Yesus wai iye galou wain palma lokono

1Deka Yesus wai ke isak blang langane. “Ngadong langka galou wain palma ka lokono e Livou iye langka gute ka kere galou wain ke yage. 2E Livou blou galou wain palma tonari tetna ka tiusu otna kovok e uri isak la. E galou wain palma tetna ka tiusu otna Livou pi elilo ka sasi ma tetna tonari usu otna pula. 3E umopolou itau kodong batne ke pelengon ka ngawai ke umu kodong. 4Deka umodong kap ngong e ma ngadong kap umu. Langka galou wain tetna dong dagar ke palma ma iye karanga usu otna. E langka galou wain tetna dong dagar ke palma kovok iye karanga usu otna kovok. E eriar langane ke umu blang. Langka umodong dagar ke ngong kovok umakaranga umodue elio itau kovok.”

5“Ngong galou wain palma e umu galou wain tetna. Gute ka dong dagar ke ngong e ngadong ke iye io iye due elio itau langka iye usu otna pula. E langka umosongon ngong deka umakaranga umodue elio itau kovok. 6Langka gute gesa dong dagar ke ngong kovok ane langka osep tiblou e tiuri tetna ka sasi e tetna tonari polou kakrak. Deka osep tigom tetna ka kakrak e tiuri isak ke eiou e eiou ngen isak.”

7“Langka umodong dagar ke ngong e lou pelengon dong ke aitno lumu umepmi ngong ke wan bitna bitna ka umawaiki umodue e ma wan tonari tipolou langka umepmi ngong ine. 8Langka umodue elio itau pula langka galou wain usu otna pula lumu elio langane kakai Livou angaine tito la egim. E ke elio langane umenis osep umu lou disaipel. 9Eriar langka Livou lana iye ke ngong io ngong lana ngong ke umu blang. E umodong dagar ke elio ka ngong lana ngong ke umu. 10Livou lana iye ke ngong e ngadong dagar ke elio tonari e ngadidi ila pelengon dagar. E eriar langane ke umu blang. Langka umedidi lou pelengon dagar ma umodong dagar ke elio ka ngong lana ngong ke umu. 11Ngawai lou pelengon ane ke umu ma elio ka aitno lungong neser dong ke aitno lumu e elio ka aitno lumu neser ma bon ke umu. 12Lou pelengon dagar ke umu langane. Umu lana umu pulu eriar langka ngong lana ngong ke umu. 13Langka gute lana iye ke osep e iye pli tarna e mete ma iye lua ila saten deka iteile omur iye lana iye lokono ke osep. E elio tonari mole elio ka pula keniye leklou ka osep lana isak ke osep leklou. 14Langka umeini e umedidi wan ka ngawai dagar ine deka umu lou saten. 15E oku ane ngasir umu lou osep bokongon ina kovok kesua gute bokongon ina ile wan ka ina puda due kovok. Oku ane ngasir umu lou saten e wan ka pula keniye ka ngaklingen ke Livou ngawai ine ke umu.”

16“E umerere ngong ma ngadong kap umu kovok. Aurou. Ngarere umu ke bokongon ka ngawaiki umodue. Deka ngawaiki umodue bokongon tonari e osep pula ma tipolou lou osep ine. Are langka galou wain tetna usu otna pula e otna tonari dong. E alo ka umepmi Livou ke wan gesa batne ke ngong ma iye kare ke umu. 17Lou pelengon dagar ane. Umu kenmu kenmu lana umu pulu.”

Osep taklak ina ma aitno lisak engil ke osep disaipel

18“Langka osep taklak ina aitno lisak engil e amnga ke umu ngawaiki aitno lumu mter langane. Osep aitno lisak engil e amnga ke ngong mgo deka aitno lisak engil e amnga ke umu. 19Langka umu osep taklak ina ma isak lana isak ke umu langka isak lana isak ke isak sisrok. E umodong langka osep taklak ina kovok e ngarere umu ma umosongon isak deka ke batne langane aitno lisak engil e amnga ke umu. 20Omtomu sisir lou pelengon ka ngawai ke umu langane. Gute bokongon ina mole ina puda kovok. Langka osep taklak ina tidue agegeng ke ngong ma tidue agegeng ke umu blang. E langka tididi lou pelengon ma tididi lumu pelengon blang. 21E ma tidue agegeng ke umu batne umu lou osep e tile omur ke Livou ka pagei ngong ngame kovok.”

22“Langka ngame e ngawai ke isak ke urok elio epmes ina kovok urok elio epmes ina vri ke isak e munu pes isak kovok. E ngame e ngawai ke isak ine e oku ane tikaranga tikukwop urok elio soulu kovok. 23Gute ka aitno engil e amnga ke ngong aitno engil e amnga ke Livou blang. 24Ngadong airavu ke isak e ngadue elio itau langka gute silang due kovok. E langka ngadue langane kovok urok elio epmes ina vri ke isak e munu pes isak kovok. E oku ane tivati lou elio e aitno lisak engil e amnga ke ngong e ke Livou blang. 25Tidue elio langane ma pelengon ka dong ke urok pelengon dagar polou lokono. Pelengon tonari langane. ‘Aitno lisak engil e amnga ke ngong e batne dong ine kovok.’”#15.25 — Emritim pelengon langane ke Buk Song 35.19.

26“Mase ma ngapagei Lua-ngan silang ke umu. Iye Ano Itau ka iye pelengon lokono batne ka dong kap Livou e me ke umu. Alo ka iye me ma iye palongo lumu ke ngong. 27E umu blang ma umapalongo osep ke ngong kesua umodong kap ngong alo ka nganogrum lou bokongon e lila me ke oku ane.”

Currently Selected:

Jon 15: ANT

Highlight

Copy