Jon 16

1“Ngawai pelengon langane ke umu ma umosongon aitno lumu ila dagar kovok. 2Mase osep ma tisapir umu ke urok duningen ina ninu e ma tidue burwa ke umu. E gute ka due burwa ke umu ma aitno mter iye due Ida Tapolngon ila bokongon. 3E ma tidue langane batne langane. Oglou tile Livou kovok e tile ngong kovok blang. 4E oku ane ngawai pelengon ane ke umu ma alo ka elio tonari polou omtomu karanga sisir lou pelengon ka la ke isak.”

Yesus wai ke Ano Itau ila bokongon

“Oglou alo ka nganogrum lou bokongon ngawai pelengon ane ke umu kovok kesua ngadong kap umu. 5E oku ane ma ngala ke Livou ka pagei ngong ngame e dau gute kene ke umu pmi ngong ke omur ka ma ngala ine kovok. 6E aitno lumu soulu lokono kesua ngawai langane ke umu. 7E ngawai lokono ke umu langane. Ngala e are itau ke umu kesua langka ngala kovok ma Luangan silang me ke umu kovok. E oku ane alo ka ngala ma ngapagei iye ke umu. 8E alo ka iye me ma iye nis osep taklak ina malak ke urok elio epmes ina e ke elio ka osuk e itau e ke elio ka Ida Tapolngon wade osep. 9Ma iye nis isak malak ke urok elio epmes ina kesua aitno lisak la dagar ke ngong kovok. 10E ma iye nis isak malak ke elio ka osuk e itau kesua ngala ke Livou e ma umavati ngong blang kovok. 11E ma iye nis isak malak ke elio ka Ida Tapolngon wade osep kesua iye wade Satan ka plau osep taklak ina kodong.”

12“Ngawaiki ngawai pelengon pula leklou ke umu e dau oku ane umakaranga umodue pelengon tonari e umeile itau ine kovok. 13E alo ka Ano Itau ka wai pelengon lokono me ma iye due aitno lumu ma umakaranga umeile pelengon lokono keniye. Iye karanga due langane kesua iye didi aitno e wai pelengon kovok. Aurou. Iye klingen Livou ila pelengon deka wai ke umu ine e ma palongo lumu ke wan ka mase ma polou. 14Iye ma due lou pelengon e wai ine ke umu e ke elio langane ma iye nis umu ke lou elio ka itau lokono. 15Wan ka pula keniye ka tidong ke Livou tidong ke ngong blang e ke batne langane ngawai iye karanga due lou pelengon e wai ine ke umu.”

Mgo aitno lite soulu e mase ma aitno lite neser

16Deka Yesus wai langane. “Isuk boto ma umavati ngong kovok deka mase isuk boto ma umavati ngong blang.” 17Deka ila disaipel leklou tiwai pulu langane. “Iye wai lange alo ka iye wai ke ite langane? ‘Isuk boto ma umavati ngong kovok deka mase isuk boto ma umavati ngong blang.’ E ila pelengon silang langane. ‘Ngala ke Livou.’” 18E tiwai blang langane. “Alo ka iye wai ‘isuk boto’ lana ine lange? Iteile lana ine kovok.”

19Yesus ile ila disaipel tiwaiki tipmi iye ke ila pelengon lana ine deka iye wai ke isak langane. “Umawai pulu ke lou pelengon lana ine alo ka ngawai langane i? Ngawai ‘isuk boto ma umavati ngong kovok deka mase isuk boto ma umavati ngong blang.’ 20Ngawai ke umu lokono langane. Ma umekngis e umodue sisngen omba e osep taklak ina ma aitno lisak neser. E mase ma lumu sisngen polou ketirngen. 21Alo ka isuk boto apmang divir keke tarna doro doro e aitno soulu e alo ka iye divir keke kodong bitna sisir alo ka tarna doro doro kovok. Kesua aitno neser ke keke ina divirngen. 22E umu blang langane. Oku ane aitno lumu soulu e mase ma ngavati umu blang deka ma aitno lumu neser. E ma osep tikaranga tidue lumu ketirngen polou yagos kovok. 23Ke oklou are ma umepmi ngong ke wan gesa kovok. Ngawai lokono ke umu langane. Langka umepmi Livou ke wan gesa batne ke ngong ma iye kare ke umu. 24Oglou me iding ke oku ane umepmi Ida Tapolngon ke wan gesa batne ke ngong kovok. E oku ane umepmi Ida Tapolngon ke wan gesa e ma umodue wan tonari ma lumu ketirngen pula lokono.”

Yesus mole elio ka pula keniye ke taklak

25“Ngawai pelengon ane ke umu ke pelengon ano e mase ma ngawai ke umu ke pelengon ano kovok. Ma ngapalongo lumu ke Livou ke pelengon malak vala. 26Ke alo ari ma umepmi Livou ke wan gesa batne ke ngong. E ngawai ma ngapmi iye ine blang kovok. Aurou. 27Kesua Livou lana iye ke umu batne umu lana umu ke ngong e aitno lumu dagar ke elio ka ngame ke Livou. 28Ngadong kap Livou deka ngame ke taklak ane e isuk boto ma ngasongon taklak e ngaiding ke Livou.”

29Yesus wai langane deka ila disaipel tiwai ke iye langane. “Itau. Oku ane amwai pelengon malak e amwai ke pelengon ano kovok. 30E oku ane imeile wom emile wan ka pula keniye e empmi osep ke wansua ka aitno lisak mter ine ma emile aitno lisak kovok. E ke batne langane aitno limi dagar ke elio ka Ida Tapolngon pagei wom omo ke imi.”

31Deka Yesus wai ke isak langane. “Lange? Oku ane aitno lumu dagar ke ngong i? 32Umo-klingen. Taim ka umadardar e umala ke umu kenmu kenmu lumu ninu ma me e lokono polou kodong. Ma umosongon ngong e dau ngadong kenngong vala kovok. Aurou. Livou dong kap ngong. 33Ngawai pelengon ane ke umu ma aitno lumu karanga tidong epen batne ke ngong. Ke taklak ane ma umanamani elio soulu e dau aitno lumu tidong dagar kesua ngamole osep ka pula keniye ka tidong ke taklak.”

Currently Selected:

Jon 16: ANT

Highlight

Copy