Jon 20

Yesus poga tito ke ina denga

(Matyu 28.1-8 e Mak 16.1-8 e Luk 24.1-12)

1Ke oklou kene ina ke wik Maria ka armok Makdala ina la polou ke Yesus ina denga. Iye polou alo ka dau aivoro e isuk boto kotkotu lokono e iye vati opmu omba ka oglou kading denga bitna kadinge kovok. 2Deka iye suong la ke Saimon Pita orwo disaipel silang ka Yesus lana iye omba ke iye e wai ke isak langane. “Tidue Ida Puda ke ina denga e tikalke la e imeile omur ge ka tidue munu ine kovok.”

3Deka Pita e disaipel silang isak kla ke denga. 4Isak orwo tisuong e disaipel silang mole Pita e polou ke denga mgo. 5E disaipel tonari agune manik e iye vati denga aitno e vati molo ka itau ka oglou tidue e tidugum Yesus pampamu ine. E dau iye sep ke denga kovok. 6Deka Saimon Pita me batne e polou ke denga e sep ke denga. E iye vati molo ka itau munu are. 7E iye vati molo daudeng ke tikading Yesus baraine ine. E iye vati langka osep tipol molo tonari e iye dong ke omur silang. 8Deka disaipel silang ka polou ke denga mgo sep ke denga blang. Iye vati wan e aitno dagar Yesus poga tito ke ina denga. 9E alo ari dau tile malak kovok ke Ida Tapolngon ila pelengon ka wai ma Yesus poga tito ke ina denga. 10E disaipel orwo tiding ke ninu ka tidong ine.

Maria ka Makdala ina vati Yesus

(Matyu 28.9-10 e Mak 16.9-11)

11E Maria dau dong ke dogur olwo boto ke denga e iye kngis. E alo ka iye kngis iye manik e vati denga aitno. 12E iye vati ensel orwo ka titnei klos ka okou e tidong ke omur ka oglou Yesus pampamu ine munu ine. E ensel kene dong ke omur ka Yesus apna munu ine e ensel silang dong ke omur ka Yesus kamla munu ine. 13E tiwai ke Maria langane. “Bela ina lange emkngis?” E Maria koli wai ke isak langane. “Ngakngis kesua osep tidue Ngau Puda e tikalke la e ngaile omur ka tidue munu ine kovok.” 14Iye wai langane deka bauluk e vati Yesus vri are. E dau iye ile gute tonari iye Yesus kovok.

15Deka Yesus wai ke iye langane. “Bela ina lange emkngis? Emkrim gute sei?” E Maria aitno mter iye gute ka kere wan bitna bitna ke yage tonari e wai ke iye langane. “Gute. Langka amkalke Yesus pampamu ine la ke omur silang ampalongo lou ke omur ka iye munu ine e ma ngala e ngadue.” 16Deka Yesus wai langane. “Maria.” E Maria bauluk e wai ke iye langane. “Rabonai.” Pelengon palma rabonai iye pelengon Hibru palma ka lana ine gute parerengen ina. 17E Yesus wai ke iye blang langane. “Emkis ngong dagar kovok kesua ngatito ke Livou dau kovok. E amla e amwai ke sipmi ngawai langane. ‘Ma ngatito ke Livou e Pmomu blang. E iye Tapolngon ka ngalotuim iye e iye Tapolngon ka umolotuim iye blang.’”

18Yesus wai ke Maria ka Makdala ina langane deka Maria la e wai ke Yesus ila disaipel ine langane. “Ngavati Ida Puda kodong.” Deka iye palongo urok ke pelengon ka pula keniye ka Yesus wai ke iye.

Yesus polou ke ila disaipel amtarsak

(Matyu 28.16-20 e Mak 16.14-18 e Luk 24.36-49)

19Epmes polou ke oklou tonari ka Sande e Yesus ila disaipel tidiva ekreng bitna ke ninu ka tidong ine. Tidiva ekreng bitna kesua tiulou tarna lisak ke osep Yuda ina. E Yesus polou e vri airavu ke isak e wai ke isak langane. “Aitno lumu dong epen.” 20Iye wai yagos deka nis isak ke tarna ina amal ke limla e galna. E ila disaipel aitno lisak neser alo ka tivati Inarak Puda blang. 21Deka Yesus wai ke isak blang langane. “Aitno lumu dong epen. Eriar langka Livou pagei ngong ngame ngapagei umu umala.” 22Yesus wai langane yagos deka iye ipu ene omung ine ke isak e wai langane. “Umodue Ano Itau. 23E langka umasak osep urok elio epmes ina deka urok elio epmes ina noklok kodong e langka umasak osep urok elio epmes ina kovok urok elio epmes ina dau dong ke isak.”

Tomas vati Yesus

24E alo ari alo ka Yesus polou ke ila disaipel Tomas ka angaine silang Didimus ka iye gute kene ke Yesus ila disaipel songotno orwo dong kap isak kovok. 25E mase Yesus ila disaipel leklou tiwai ke iye langane. “Imavati Ida Puda.” E Tomas koli wai ke isak langane. “Lama ngavati nil ina amal ke limla e ngadue lungu otno sep ine e ngadue lungu sep ke ovuk ke galna ma aitno lungong dagar ke elio ka iye dong blang kovok.”

26Mase oklou epmes lumorwo mela yagos e ila disaipel tidong ke ninu e Tomas dong kap isak blang. E tidiva ekreng bitna e Yesus polou airavu ke isak e wai langane. “Aitno lumu dong epen.” 27Deka iye wai ke Tomas langane. “Omdue livep otno ane e amvati lungu e omdue livep sep ke galna lungong. Aitno lugom dagar ke ngong e aitno lugom orwo sakam.” 28Deka Tomas koli wai ke iye langane. “Ngau Puda e Ngau Tapolngon.”

29E Yesus wai ke iye langane. “Aitno lugom dagar kesua amvati ngong. E osep ka tivati ngong kovok e dau aitno lisak dagar ke ngong aitno lisak itau itau.”

Jon wai ke ila sogongon batne

30E Yesus due elio arit ina ka nisngen pula leklou ke ila disaipel amtarsak. E ngasogo ke isak keniye ke buk ane kovok. 31E ngasogo pelengon ane batne langane. Ma aitno lumu la dagar langane. Yesus iye gute Krais ka Ida Tapolngon rere ma iye lua osep ke urok elio epmes ina e iye Ida Tapolngon Otno Arang. E langka aitno lumu dagar ke iye ma umodue mosongon ka dong vala dong.

Currently Selected:

Jon 20: ANT

Highlight

Copy