Jon 21

Yesus polou ke ila disaipel leklou amtarsak

1Elio ane yagos deka mase Yesus polou ke ila disaipel blang ke elim Taiberias ka angaine silang elim Galili. E iye polou ke amtarsak langane. 2Saimon Pita dong kap Tomas ka angaine silang Didimus e Nataniel ka ila armok batne Kana ka dong ke omur Galili e Sebedi titno arang orwo e Yesus ila disaipel orwo silang. 3E Saimon Pita wai ke isak langane. “Ma ngala e ngauri omdu ma ngadue lodu.” E tiwai ke iye langane. “Ma imala kap wom.” Deka isak kla e tisep ke bot e lama tiuri omdu ke epmes la iding ke kotkotu lokono tidue lodu kene kovok.

4E alo ka oklou tito oku Yesus vri ke elim ina dingen batne e dau ila disaipel tile iye Yesus kovok. 5E iye wai ke isak langane. “Lou saten umodue lodu koke aurou?” Deka tikoli tiwai ke iye langane. “Aurou. Imodue lodu kovok.” 6Deka Yesus wai ke isak langane. “Umouri omdu ke bot galna odung e ma umodue lodu.” E tididi ila pelengon e tiuri omdu e tidue lodu pula. Tidue lodu pula ma tikaranga tiriri omdu ke bot kovok.

7E disaipel ka Yesus lana iye omba ke iye wai ke Pita langane. “Gute are Ida Puda.” Saimon Pita klingen pelengon ane deka tnei ila molo kesua iye klok molo alo ka iye boko. Iye tnei molo yagos deka kopiuk ke aki e sisu ke aki ina dingen batne. 8E disaipel leklou tidong ke bot e tiriri omdu ka bon ke lodu e tipolou ke aki ina dingen batne. Kesua tidong mawa kovok langka mita buno kene vala.

9E alo ka tipolou ke aki ina dingen batne e tivri ke taklak tivati eiou ka lodu munu ine e tivati bret blang. 10E Yesus wai ke isak langane. “Umakalke lodu leklou ka oku ane umodue me.” 11Deka Saimon Pita sep ke bot e riri omdu ke taklak. E omdu bon ke lodu omba e inarak sasa 153. E lama lodu pula dong ke omdu dau omdu nabak kovok. 12E Yesus wai ke isak langane. “Umomo e umangen ngangon.” E ila disaipel tile iye e ke batne langane tipmi iye langane kovok. “Wom gute sei?” Kesua tile iye Inarak Puda. 13E Yesus me e due bret tonari e kare ke isak e due langane ke lodu blang.

14Ane aling eklu ina Yesus polou e nis iye ke ila disaipel batne ke taim ka iye poga tito ke ina denga.

Yesus wai ke Pita

15Alo ka tingen yagos Yesus wai ke Saimon Pita langane. “Saimon wom ka Jon otno arang elio ka wom lana wom ke ngong mole elio ka osep leklou isak lana isak ke ngong?” Deka Pita koli wai langane. “Ee. Ngau Puda emile ngong lana ngong ke wom.” E Yesus wai ke iye langane. “Emkere lou osep ka isak langka sipsip titno itau.”

16E Yesus pmi iye aling orwo ina langane. “Saimon wom ka Jon otno arang wom lana wom ke ngong?” E Pita koli wai langane. “Ee. Ngau Puda emile ngong lana ngong ke wom.” Deka Yesus wai ke iye langane. “Amplau lou osep ka isak langka sipsip itau.”

17Deka Yesus pmi iye aling eklu ina langane. “Saimon wom ka Jon otno arang wom lana wom ke ngong?” E Pita aitno soulu kesua iye pmi iye aling eklu ina langane. “Wom lana wom ke ngong?” E Pita koli wai langane. “Ee. Ngau Puda emile wan ka pula keniye e emile ngong lana ngong ke wom.” Deka Yesus wai ke iye langane. “Emkere lou osep ka isak langka sipsip itau.”

18Deka Yesus wai ke Pita blang langane. “Ngawai lokono ke wom langane. Alo ka wom dau auram emtnei lem klos e emkere wom ma emdidi aitno lugom e emlila ke omur omur. E mase alo ka ompolou lapun ma amkakai livep e osep leklou ma titnei wom ke lem klos e timgo ke wom ke omur omur ka amwaiki amla ine kovok.” 19E Yesus wai pelengon ane ma iye palongo Pita ila ke elio ka ma iye mete e ke elio langane ma iye due osep tidue anit ke Ida Tapolngon. Deka Yesus wai ke Pita langane. “Omo emdidi ngong.”

20Deka Pita bauluk e vati disaipel ka Yesus lana iye omba ke iye didi isak. E disaipel tonari iye gute ka munu olwo boto ke Yesus omun ine alo ka tingen ngangon e iye pmi Yesus langane. “Ngau Puda sei ma lai wom ngap?” 21Alo ka Pita vati gute tonari deka iye pmi Yesus langane. “Ngau Puda wansua ma polou ke gute are?” 22E Yesus koli wai ke iye langane. “Langka ngawaiki iye dong la lama ngaiding ngame are wan gesa kovok ke wom. E emdidi ngong vala.” 23Mase omon ke Yesus ila pelengon ane kes lila ke osep ka tididi Yesus. E aitno lisak mter langka disaipel are ma mete kovok. E dau Yesus wai langare kovok. Aurou. Iye wai langane vala. “Langka ngawaiki iye dong la lama ngaiding ngame are wan gesa kovok ke wom.”

24E ngong disaipel are e ngapalongo osep urok ke elio ane e ngasogo pelengon ane. E iteile lou pelengon iye pelengon lokono.

25E dau Yesus due elio pula pula leklou. E langka osep tiwaiki tisogo buk ke elio ka pula keniye ka Yesus due io omur dong ke taklak ka buk ka pula keniye tonari karanga dong ine kovok.

Currently Selected:

Jon 21: ANT

Highlight

Copy