Luk 4

Satan tok Yesus

(Matyu 4.1-11 e Mak 1.12-13)

1E Ano Itau ila arit bon ke Yesus deka iye songon aki Jordan e la. E Ano Itau mgo ke iye ke omur ka dong adai vala. 2Iye dong ke omur tonari oklou epmes isapanal e Satan me tok iye. Alo ari Yesus ngen ngangon kovok e alo ka oklou epmes isapanal mela yagos sapanga due. 3Deka Satan wai ke iye langane. “Langka wom Ida Tapolngon Otno Arang amwai ke opmu ane ma tipolou bret.” 4E Yesus koli wai langane. “Aurou. Kesua gute gesa sogo Ida Tapolngon ila pelengon palma langane.

‘Osep tidue urok mosongon ke ngangon vala kovok.’”

5Deka Satan paur iye ke omur ka dong egim e ke aling kene lokono nis iye ke omur ka pula keniye ka osep tiplaue ke taklak. 6E wai ke iye langane. “Ngakaranga ngakar omur ka pula keniye ka amvati e wan ka pula keniye ka dong ke isak ke wom. Kesua wan ane lou wan e ngakaranga ngakare ke gute sei ka ngawaiki ngakare ke iye. 7E langka omlotuim ngong ma ngakar wan ka pula keniye are ke wom.” 8E Yesus koli wai langane. “Aurou. Kesua gute gesa sogo Ida Tapolngon ila pelengon palma langane.

‘Omlotuim Ngap Puda ka Ngap Tapolngon e omdue ila bokongon vala.’”

9Deka Satan paur iye ke Jeru-salem e due dong ke Ida Tapolngon ila ninu tona ka egim e wai ke iye langane. “Langka wom Ida Tapolngon Otno Arang omkopiuk omduru ke omur ane. 10Kesua gute gesa sogo Ida Tapolngon ila pelengon palma langane.

‘Iye wai ke ila ensel ma tiplau wom itau.’

11E ila pelengon palma silang wai langane.

‘Ma tikalke wom ma kevep napar ke opmu kovok.’”

12E Yesus koli wai ke iye langane. “Aurou. Kesua gute gesa sogo Ida Tapolngon ila pelengon palma langane.

‘Ma omtok Ngap Puda ka Ngap Tapolngon kovok.’”

13Deka alo ka Satan tok iye ke tokngon bitna bitna yagos iye songon iye la e para ke alo ka iye karanga tok iye blang.

Yesus nogrum ila bokongon ke omur Galili

(Matyu 4.12-17 e Mak 1.14-15)

14E Yesus iding ke omur Galili e Ano Itau ila arit dong ke iye e omon ke wan ke iye due la ke omur ka pula keniye ka lelei omur Galili. 15E iye parere osep ke urok duningen ina ninu e osep pula tikakai angaine ine.

Osep Nasaret ina aitno lisak engil ke Yesus

(Matyu 13.55-58 e Mak 6.1-6)

16Mase iye la ke ila armok batne Nasaret e ke oklou sabat iye sep ke duningen ina ninu langka ila aiding. Iye sep deka tito vri ma iye ritim Ida Tapolngon ila pelengon. 17E gute gesa kar iye gute napaprangan ina Aisaia ila sogongon deka iye klok buk e pado sogongon ka wai langane.

18“Ida Tapolngon Ano dong ke ngong kesua iye rere ngong ma nganapapra omon itau ke osep ka urok wan isuk boto vala. Iye pagei ngong ma ngapalongo osep ka tidong ke kalabus ma tikaranga kla e tidong fri e ngapalongo osep ka amtarsak evin ma tivati omur blang e ngapalongo osep ka wan bitna bitna opru isak ma timole wan tonari. 19E ma nganapapra osep ke taim ka Ida Puda waiki due elio itau ke osep.”

20Yesus ritim yagos deka iye diva buk e kare ke gute ka plau buk ke duningen ina ninu deka duru dong. E osep ka pula keniye ka tidong ke ninu amtarsak nekek ke Yesus. 21Deka iye wai ke isak langane. “Eknikane Ida Tapolngon ila pelengon ane ka umoklingen ine polou lokono.” 22E osep are tiwai ila pelengon lokono e aitno lisak mter pula ke ila pelengon itau ke iye wai ine. Deka tipmi pulu langane. “Gute ane Josep otno arang i?”

23Deka Yesus wai ke isak langane. “Aitno lungong langka ma umawai pelengon langane ke ngong. ‘Dokta omlua wom tona.’ Omdue elio ke lem armok batne ane langka imeklingen omdue ke armok Kaperneam.” 24Deka iye wai langane. “Ngawai lokono ke umu langane. Osep tidue anit ke gute napaprangan ina ke ila armok batne kovok. 25E ngawai pelengon lokono ke umu langane. Alo ka gute Elaija dong apmang sasap batne pula tidong ke omur Israel. Alo ari aragu duru kovok ke tobor eklu emkil e sapanga omba polou ke omur ka pula keniye ke omur Israel. 26E dau Ida Tapolngon pagei Elaija ke isak kovok. Aurou. Iye la ke apmang asap batne kene ka dong ke armok Sarefat ka dong ke omur ka armok omba Saidon dong ine vala. 27E alo ka gute napaprangan ina Elisa dong osep pula dong ke omur Israel ka paiangan lepra due isak. E dau gute kene ke isak polou itau blang kovok. Aurou. Gute Naman ke omur Siria vala ila paiangan lepra polou yagos.”

28Alo ka osep ka pula keniye ka tidong ke duningen ina ninu tiklingen ila pelengon deka aitno lisak nevlik e engil ke iye kesua osep orwo ka iye basik ine isak osep Yuda ina kovok. 29Deka titito e tisik iye ke armok e tipaur iye ke perper ka tiuri armok ine. E tiwaiki tiuri iye gene duru ke gigri. 30E iye lila airavu ke isak e songon isak e la.

Yesus sapir angelo soulu ke gute kene

(Mak 1.21-28)

31E iye la duru ke Kaperneam ka dong ke omur Galili e iye parere osep ke oklou sabat. 32E tidigrik ke ila parerengen kesua ila pelengon ina arit dong ine. 33E gute kene dong ke duningen ina ninu ka angelo soulu dong ke iye e iye daiku omba langane. 34“Aisudo. Wom Yesus ka Nasaret ina amwaiki omdue wansua ke imi? Omo ma omdue agegeng ke imi? Ngaile wom. Wom gute ka itau itau lokono ka me ke Ida Tapolngon.” 35E Yesus wai ke iye dagar langane. “Amwai sakam. Ompolou ke gute e amla.” Deka angelo soulu due gute gene duru airavu ke isak e songon iye la. E iye due asmel ke gute kovok. 36E osep ke ninu tonari tidigrik e tiwai pulu langane. “Lange iye karanga wai langare? Kesua arit dong ke ila pelengon deka iye wai dagar ma angelo soulu tisongon osep e tididi ila pelengon.” 37E omon ke elio ka iye due la ke osep ke omur keniye ka lelei omur are.

Yesus due Pita rana apmang ka paia polou itau

(Matyu 8.14-15 e Mak 1.29-31)

38Deka Yesus tito e songon duningen ina ninu e sep ke Saimon ila ninu. E Saimon rana apmang paia e tarna engil lokono e tipmi Yesus ma iye lua iye. 39E iye vri olwo boto ke apmang e wai dagar ma tarna engil kovok deka tarna polou epen e itau blang. Deka suong apmang tonari tito e kamlu ngangon ke isak.

Yesus lua osep pula ka tipaia

(Matyu 8.16-17 e Mak 1.32-34)

40Alo ka oklou duru e olwo boto ke epmes osep tipaur osep ka tidong ke urok osua ka paiangan bitna bitna due isak time ke Yesus. E iye kai isak kene kene ke limla deka tipolou itau. 41E silang angelo soulu tisongon osep pula e tidaiku langane. “Wom Ida Tapolngon Otno Arang.” E Yesus wai dagar ke isak e dangdang isak ma tiwai kovok kesua tile iye gute Krais ka Ida Tapolngon rere ma iye lua osep ke urok elio epmes ina.

Yesus lila ke armok armok

(Mak 1.35-39)

42Alo ka oklou tito iye songon armok e la ke omur ka osep tidong ine kovok. E osep tikrim ke iye e alo ka tipado iye tiwaiki iye dong e songon isak kovok. 43E iye wai ke isak langane. “Ma nganapapra omon itau ka la ke omur ka Ida Tapolngon plaue ke armok leklou blang. Kesua ke batne langane Ida Tapolngon pagei ngong ngame.” 44E iye dong parere osep ke duningen ina ninu kene kene ke osep Yuda ina urok omur keniye.

Currently Selected:

Luk 4: ANT

Highlight

Copy