Luk 5

Yesus wai ke Pita e iye due lodu pula

(Matyu 4.18-22 e Mak 1.16-20)

1Ke oklou kene Yesus vri ke elim Genesaret ina dingen batne e osep pula tidong olwo boto e tipes iye e tiklingen Yesus wai Ida Tapolngon ila pelengon. 2E iye vati bot orwo ke aki ina dingen batne ka osep tisongon isak alo ka tigrong urok lodu ina omdu. 3Deka iye sep ke bot kene. Bot tonari gute Saimon ila bot e iye wai ke Saimon ma bot songon aki ina dingen batne sasi boto. Deka iye duru dong ke bot e parere osep.

4E alo ka iye wai yagos iye wai ke Saimon langane. “Ompoi bot ke aki ka olu e umodue lumu omdu duru ke aki e ma umodue lodu.” 5E Saimon koli wai ke iye langane. “Puda imoboko engil ke epmes la iding ke kotkotu lokono e imodue lodu kene vala kovok. E amwai ine deka ma ngadue omdu duru blang.” 6E alo ka tidue omdu duru ke aki lodu pula pula tisep ke omdu ma isuk boto omdu notrum. 7Deka tiuri limsak ke osep ke bot silang ka tiboko kap isak ma time tilua isak. Time e tinonei lodu ke bot orwo la lama isuk boto bot orwo gro. 8Alo ka Saimon ka angaine silang Pita vati elio ane iye gene ke Yesus kamla e wai langane. “Puda amla ke ngong kesua ngong gute epmes ina.” 9Kesua iye kap osep leklou ka tidong ke bot tonari tidigrik ke lodu pula pula ka tidue. 10E Jems e Jon ka isak Sebedi titno arang ka tiboko kap Saimon tidigrik blang. Deka Yesus wai ke Saimon langane. “Emlim kovok. Kesua oglou omboko ma omkngo lodu e nogrum ke oku ane lila la ma omboko ma omdue osep ma tididi ngong.” 11E tipoi urok bot ke aki ina dingen batne deka tisongon urok wan bitna bitna e tididi iye.

Yesus lua gute ka paiangan lepra due

(Matyu 8.1-4 e Mak 1.40-45)

12Mase alo ka Yesus dong ke armok kene gute polou ke iye ka paiangan lepra dong ke tarna keniye. Iye polou ke Yesus deka grum kamla e wai langane. “Puda langka amwaiki omdue io amkaranga omdue lou paiangan lepra yagos e ngapolou itau blang.” 13E Yesus limla kai gute tonari e wai langane. “Ngawaiki ngadue langane e oku ane ompolou itau blang.” Deka suong ila paiangan lepra yagos. 14E Yesus wai dagar ke iye langane. “Amwai ke osep ke elio ane kovok e amla e emnis tarna lugom ke gute loulou ina. Deka omdue elio opmu ina ka Moses wai dagar ine ma osep tile tarna lugom polou itau blang.” 15E dau omon ke elio bitna bitna ka iye due kes lila ke omur pula e osep pula pula time ke iye ma tiklingen ila pelengon e ma iye due urok paiangan bitna bitna tipolou yagos. 16E aling pula Yesus kene vala songon osep e la ke omur ka osep tidong ine kovok ma iye wai itau ke Ida Tapolngon.

Yesus lua gute ka kamla e limla timete

(Matyu 9.1-8 e Mak 2.1-12)

17Ke oklou kene Yesus parere osep e osep Farisi ina leklou e osep ka tile itau ke Moses ila sogongon leklou tidong are blang. Time ke armok pula ke omur Galili e omur Judia e ke Jerusalem blang. E Ida Puda ila arit dong ke Yesus ma iye due osep ka tipaia tipolou itau blang. 18Deka osep leklou time e tikalke gute ka kamla e limla timete ke ila kova. E tiwaiki tipaur iye ma iye dong ke Yesus bitna. 19E tikaranga kovok kesua osep pula pula tivri tidangdang isak. Deka titito ke ninu tona e tidar ninu tona leklou e tidue kova ka gute tonari munu ine duru ke ovuk ma iye dong airavu ke osep e iye dong ke Yesus bitna. 20E Yesus vati urok elio e ile aitno lisak dagar ke Ida Tapolngon deka iye wai ke gute ka munu ke kova langane. “Ate ngasak lem elio epmes ina la.” 21Iye wai langane deka osep Farisi ina e osep ka tile itau ke Moses ila sogongon aitno lisak mter ine e tiwai pulu langane. “Gute ane gute sei ma iye wai soulu ke Ida Tapolngon ila elio? Ida Tapolngon vala karanga sak osep urok elio epmes ina.” 22E Yesus ile wansua aitno lisak mter ine deka iye pmi isak langane. “Ina lange aitno lumu mter ke elio ane? 23Pelengon lange opru ngong kovok? Ngawai ‘ngasak lem elio epmes ina’ koke ngawai ‘emtito e emlila?’ 24E ngawaiki umeile Gute Ka Polou Langka Osep due arit ke taklak ma iye karanga sak osep urok elio epmes ina.” Deka iye wai ke gute tonari langane. “Emtito e amkalke lem kova e amla ke lem ninu.” 25Yesus wai langane deka lokono gute tito vri e due ila kova ka iye munu ine e la ke ila ninu. E alo ka iye la iye kakai Ida Tapolngon angaine tito la egim. 26E osep keniye ka tivati elio ane tidigrik ine e tikakai Ida Tapolngon angaine tito la egim blang. E aitno lisak mter pula e tiwai langane. “Eknikane itavati elio omba ka itavati ke oglou kovok.”

Yesus gi Livai ma iye didi iye

(Matyu 9.9-13 e Mak 2.13-17)

27Mase Yesus lila la e vati gute ka due takis ka angaine Livai dong ke omur ka osep tikli takis ine e wai ke iye langane. “Emdidi ngong.”#5.27 — Osep tisir gute Livai angaine silang Matyu ke Matyu 9.9. 28E Livai tito e songon wan keniye tidong are e iye didi Yesus.

29E Livai due rogo ke Yesus ke ila ninu e osep pula ka tidue takis e osep leklou pula tingen kap isak. 30E osep Farisi ina e osep ka tile itau ke Moses ila sogongon ka tididi osep Farisi ina tingurngur ke Yesus ila disaipel e tipmi isak langane. “Ina lange umangen e umeinim kap osep ka tidue takis e osep epmes ina?” 31Deka Yesus koli wai ke isak langane. “Osep ka tarna lisak itau isak kla ke dokta kovok. Aurou. Osep ka tipaia vala isak kla ke dokta. 32Ngame ma ngagi osep ka tidong itau e osuk ke Ida Tapolngon bitna kovok. Aurou. Ngame ma ngagi osep epmes ina ma tibauluk aitno lisak ke urok elio epmes ina.”

Yesus wai ke elio ka osep tipli inarak ngangon

(Matyu 9.14-17 e Mak 2.18-22)

33Deka osep Farisi ina tiwai langane. “Aling aling Jon ila disaipel tipli inarak ngangon ma aitno lisak la ke Ida Tapolngon e tiwai itau ine e limem disaipel tidue langane blang. E lem disaipel dau tingen ngangon e tinim aki.” 34E Yesus koli wai langane. “Langka isuk boto gute ma gi umakaranga umawai ke ila saten ma tipli inarak ngangon alo ka iye dau dong kap isak koke aurou? Aurou. 35E mase gute tonari ma dong kap isak kovok deka ma tipli inarak ngangon.”

36Deka iye wai pelengon ano ke isak langane. “Gute gesa due molo arlak ke molo oku ina e sisire ke klos ka oglou ina kovok. Langka iye due langane molo oku ina ma nabak e dong eriar langka klos oglou ina kovok. 37E silang blang ke aki wain tarna ka osep tidue ke meme tarna. Gute gesa baser aki wain oku ina ke aki wain tarna ka oglou ina kovok. Langka iye due langane aki wain oku ina ma due tarna oglou ina ka polou dagar nabak e ma aki wain baser e silang blang ma due pogle ke aki tarna. 38E gute due aki wain oku ina sep ke aki wain tarna oku ina. 39E gute gesa ka inim aki wain oglou ina waiki inim aki wain oku ina kovok kesua iye wai langane. ‘Aki wain oglou ina itau e mole aki wain oku ina.’”

Currently Selected:

Luk 5: ANT

Highlight

Copy