Luk 6

Yesus wai ke oklou sabat ina elio

(Matyu 12.1-8 e Mak 2.23-28)

1Ke oklou sabat kene Yesus gosok ila disaipel tilila ke yage wit ina e ila disaipel tivu wit e tisake ke limsak e tingen wit otna. 2E osep Farisi ina leklou tivati elio ane e tipmi isak langane. “Umodue wansua? Imadangdang osep tidue elio ane ke oklou sabat.” 3Deka Yesus koli wai ke isak langane. “Umeritim basikngen ke wan ka oglou gute Devit due alo ka sapanga due iye kap osep ka tididi iye koke aurou? 4Iye sep ke Ida Tapolngon ila ninu e due bret ka osep loulou ina tikare ke Ida Tapolngon ka isak tona vala tikaranga tingene. Deka iye ngene e kar leklou ke osep ka tididi iye.” 5E Yesus wai ke isak blang langane. “Gute Ka Polou Langka Osep iye oklou sabat Ina Puda.”

Yesus lua gute ka limla mete

(Matyu 12.9-14 e Mak 3.1-6)

6Ke oklou sabat silang iye sep ke duningen ina ninu e parere osep ine. E gute dong ke ninu ka limla odung mete. 7Osep Farisi ina e osep ka tile itau ke Moses ila sogongon tiwaiki tisin elio vri ke Yesus deka tivati iye ma tile langka iye due gute limla polou itau ke oklou sabat koke aurou. 8E Yesus ile aitno lisak e wai ke gute tonari langane. “Emtito omo e emvri ke osep amtarsak.” E gute tito vri are. 9Deka Yesus wai ke osep langane. “Ngapmi umu langane. Wansua itau ma itodue ke oklou sabat? Itodue elio itau koke itodue elio soulu? Itolua gute koke itodue asmel ke gute?” 10E bitna lila e vati osep deka iye wai ke gute tonari langane. “Omgotok livep odung.” Gute due langare deka limla polou itau blang. 11E osep Farisi ina e osep ka tile itau ke Moses ila sogongon aitno lisak nevlik omba e engil e tiwai pulu ke wansua tiwaiki tidue ke Yesus.

Yesus rere ila aposel songotno orwo

(Matyu 10.1-4 e Mak 3.13-19)

12Alo ari Yesus tito ke gigri gesa ma iye wai itau ke Ida Tapolngon e iye wai epmes la iding ke kotkotu. 13Kotkotu polou e iye gi ke ila disaipel pula e rere osep songotno orwo vala ke isak e sir isak aposel. 14Iye rere Saimon ka iye sir angaine silang Pita e ina tovro Andru e Jems e Jon e Filip e Bartolomyu. 15E Matyu e Tomas e Jems silang ka gute Alfius otno arang e Saimon silang ka iye gute Selot ina. E osep Selot ina isak osep ka tiwaiki kantri silang plau isak kovok. 16E Judas ka Jems otno arang e Judas Iskariot ka iye gute ka mase ma lai Yesus ina.

Yesus lua osep pula ka tipaia

(Matyu 4.24-25 e Mak 3.7-12)

17Deka iye duru ke gigri kap isak e vri ke omur ka mang e ila disaipel pulu pula tidong are kap osep pulu pula leklou. Osep tonari ka time ke armok armok ke omur Judia e ke Jerusalem e ke misuon ina dingen batne olwo boto ke Tair e Saidon. 18Time ma tiklingen ila pelengon e ma iye due osep ka tipaia tipolou itau blang. E osep leklou ka angelo soulu due asmel ke isak tipolou itau blang. 19E osep ka pula keniye tiwaiki tikai iye kesua ila arit polou ke iye e osep ka tikai iye tipolou itau blang.

Yesus wai ke elio ka osep aitno lisak dong itau

(Matyu 5.1-12)

20Deka bitna la ke ila disaipel e iye wai ke isak langane. “Umu ka lumu wan isuk boto vala aitno lumu itau itau kesua mase ma wan ka omur heven ka Ida Tapolngon plaue polou lumu wan. 21Umu ka oku ane sapanga due umu aitno lumu itau itau kesua mase ma umogot ke ngangon. E umu ka oku ane umekngis aitno lumu itau itau kesua mase ma umeivel. 22Umu ka osep aitno lisak soulu lokono ke umu e tipli umu e tiwai soulu ke umu e aitno lisak mter angainmu wan ka soulu kesua umedidi Gute Ka Polou Langka Osep aitno lumu itau itau ine. 23Alo ka osep tidue langane aitno lumu neser omba kesua lumu klingen itau dong para ke umu ke omur heven. Kesua ke oglou ari osep tonari urok seia tidue elio langane ke osep napaprangan ina blang.”

24“E aisudo ke umu ka lumu mani pula dong kesua umodue lumu wan ka itau ke taklak ane kodong. 25Aisudo ke umu ka oku ane umangen ngangon pula kesua mase ma sapanga due umu. Aisudo ke umu ka oku ane umeivel kesua mase ma umekngis omba. 26Aisudo ke umu alo ka osep ka pula keniye tikakai angainmu kesua oglou ari urok seia tidue elio langane ke osep napaprangan yakngan ina.”

Yesus waiki osep tidue elio itau ke inarak oul

(Matyu 5.38-48)

27“E ngawai ke umu ka umo-klingen lou pelengon langane. Umu lana umu ke upu oul e umodue elio itau ke osep ka aitno lisak amnga e engil ke umu. 28E umepmi Ida Tapolngon ma iye due elio itau ke osep ka tiluk umu e umawai itau ke Ida Tapolngon ke osep ka tidue elio soulu ke umu. 29Langka gute mluk umu ke banga lumu kene io umabauluk ma iye mluk umu ke banga lumu silang. Langka gute waiki due lumu kolsinglis io umosongon iye ma iye karanga due lumu siot blang langka iye waiki due. 30Langka gute pmi umu ma umakar wan gesa ke iye io umakare ke iye e langka gute pi lumu wan io umawai dagar ma iye due lumu wan iding kovok. 31E elio ka umawaiki osep tidue ke umu io umodue elio langane ke isak blang.”

32“E langka umu lana umu ke osep ka isak lana isak ke umu vala sei ma kakai angainmu ine? Kesua osep epmes ina blang isak lana isak ke osep ka isak lana isak ke isak. 33E langka umodue elio itau ke osep ka tidue elio itau ke umu vala sei ma kakai angainmu ine. Kesua osep epmes ina blang tidue elio itau ke osep ka tidue elio itau ke isak. 34E langka umakar mani ke osep e aitno lumu mter ma tikoli batne sei ma kakai angainmu ine? Kesua osep epmes ina blang tikar mani ke osep leklou e tiwaiki tidue batne keniye ke isak. 35E umu lana umu ke upu oul e umodue elio itau e umakar lumu mani ke osep e aitno lumu mter ke ila kolingen kovok. Deka ma umodue lumu klingen ombatno e ma umodong Ida Tapolngon ka dong egim lokono titno umu. Kesua iye tona due mada ke osep ka aitno lisak itau kovok ke wan ka iye due e iye due mada ke osep ka soulu bitna. 36Aitno lumu due osep eriar langka Pmomu aitno due osep.”

Itawade osep leklou urok elio kovok

(Matyu 7.1-5)

37“Umawade osep leklou urok elio kovok deka Ida Tapolngon ma wade lumu elio kovok blang. Umomulu osep leklou kovok deka Ida Tapolngon ma mulu umu kovok blang. Umasak osep urok elio soulu ka tidue ke umu deka Ida Tapolngon ma sak lumu elio soulu blang. 38Umakar wan bitna bitna ke osep e Ida Tapolngon ma kar wan bitna bitna ke umu blang. Langka iye nonei kerka bon deka pes wan duru ine e tagurgur kerka deka nonei blang ma wan baser e iye kar kerka ke umu. Kesua eriar langka sasa ka umakare ke osep io Ida Tapolngon ma kar sasa tonari ke umu blang.”

39E iye wai pelengon ano ane ke isak langane. “Gute ka bitna evin karanga nis gute silang ka bitna evin blang ke ekreng kovok. Langka iye waiki due langane isak orwo ma tigene ke ovuk. 40Gute gesa ka disaipel iye mole gute ka parere iye kovok. E alo ka gute ka disaipel nana kodong iye polou langka gute ka parere iye.”

41“Ina lange umakaranga umavati wan daudeng langka group dong ke supmu amtarsak e dau umakaranga umeile wan langka akai palma omba dong ke omtomu kovok? 42Koke langka akai palma omba dong ke omtomu lange umakaranga umawai ke supmu langane? ‘Ma imepi group ka dong ke omtomu.’ E dau umeile akai palma omba dong ke omtomu kovok. Umu ka aitno lumu orwo e umayakyak umodue langane. Mgo umepi akai palma omba ka dong ke omtomu deka umakaranga umepi group ka dong ke supmu amtarsak.”

Yesus wai ke akai ka itau e akai ka sasi

(Matyu 7.16-20 e Matyu 12.33-35)

43“Akai ka itau usu otna ka sasi kovok e silang blang akai ka sasi usu otna ka itau kovok. 44Osep tivati e tile akai alo ka tivati otna ka akai tonari usue. Osep tivu fik otna ke galou marak kovok e tivu galou wain toru ine ke akai daudeng ka marak dong ine kovok. 45Gute ka itau didi wan ka itau ka dong ke aitno e due elio itau e gute ka soulu didi wan ka soulu ka dong ke aitno e due elio soulu. Gute ila pelengon nis osep ke wan ka dong ke aitno.”

Osep orwo ka tiuri ninu

(Matyu 7.24-27)

46“Umawai ke ngong langane. ‘Puda Puda.’ E dau umedidi lou pelengon kovok. 47Ma ngawai ke umu ke elio ke gute ka me ke ngong e klingen lou pelengon e didie. 48Iye langka gute ka waiki uri ila ninu deka iye yas taklak e uri ninu ke opmu dagar. Deka langka aki song e pes ninu ma iye nemilmil kovok kesua gute uri ninu itau. 49E gute ka klingen lou pelengon e didie kovok iye langka gute ka uri ila ninu ke taklak vala. E langka aki song e pes ninu ma ninu nobong e ina agegeng omba.”

Currently Selected:

Luk 6: ANT

Highlight

Copy