Luk 7
7
Yesus due gute bokongon ina polou itau
(Matyu 8.5-13)
1Alo ka Yesus wai ila pelengon keniye ke osep pula pula yagos iye la ke Kaperneam. 2E gute ola ina ka plau osep ola ina buno kene dong ke armok tonari e ila gute bokongon ina paia e isuk boto iye mete. E gute tonari aitno omba ke ila gute bokongon ina. 3Deka iye klingen omon ke Yesus e vai osep namormor ke osep Yuda ina ke Yesus ma tipmi iye ma iye me due ila gute bokongon ina polou itau blang. 4Alo ka osep namormor tipolou ke Yesus tiwai dagar ke iye langane. “Gute ane gute itau e langka omlua iye are itau. 5Kesua iye lana iye ke ite osep Israel ina e iye due osep tiuri limem duningen ina ninu.” 6E Yesus la kap isak e polou olwo boto ke gute ola ina tonari ila ninu. Deka gute tonari vai ila saten ke Yesus ma tiwai ila pelengon ka langane. “Puda omdue wan silang ka opru wom kovok. Kesua ngong gute soulu e lou elio itau kovok ma emsep ke lou ninu. 7Ke batne langane aitno lungong mter ngakaranga ngauti ke wom kovok. E amwai vala e lou gute bokongon ina ma polou itau blang. 8Kesua ngadong moli ke osep ka tiplau ngong e silang blang ngaplau osep ola ina blang. E ngawai ke gute kene ‘amla’ e iye la e ngawai ke gute silang ‘omo’ e iye me. E ngawai ke lou gute bokongon ina ‘omdue wan ane’ e iye due.” 9Deka alo ka Yesus klingen gute tonari ina ila pelengon iye digrik ine. E iye bauluk wai ke osep pula pula ka tididi iye langane. “Ngawai ke umu langane. Ngapado gute kene vala ke omur Israel kovok ka aitno dagar langka gute are aitno dagar.” 10Deka osep ka time ke Yesus tiding ke ninu e tivati gute bokongon ina polou itau blang kodong.
Yesus lua gute auram ke armok Nain ma iye poga tito
11E mase sasi boto iye gosok ila disaipel isak kla ke armok ka angaine Nain e osep pula pula blang isak kla kap iye. 12E alo ka tipolou olwo boto ke armok ina ari ina ekreng bitna osep tikalke gute auram ka mete ke armok ina dogur. Gute auram tonari apmang ka asap batne otno arang ka kene vala e osep pula pula ke armok tidong kap apmang tonari. 13E alo ka Ida Puda vati apmang aitno kro ke iye e wai ke iye langane. “Emkngis kovok.” 14E iye polou olwo boto ke karoro e kaie deka osep ka tikalke karoro tivri vala e Yesus wai langane. “Gute auram ngawai langane. Ompoga emtito.” 15E gute auram ka mete poga tito e nogrum wai ke osep. E Yesus paur iye iding ke tna. 16E osep keniye tiulou tarna lisak e tikakai Ida Tapolngon angaine tito e tiwai langane. “Gute napaprangan ina ka angaine omba polou airavu ke ite.” E tiwai silang blang langane. “Ida Tapolngon me ma iye lua ila osep kodong.” 17E omon ka la ke wan ka iye due pakes lila ke omur Judia keniye e ke omur keniye ka lelei omur Judia.
Jon pagei ila disaipel ke Yesus
(Matyu 11.2-19)
18E Jon ila disaipel tipalongo ila ke elio tonari keniye. 19E Jon gi ila disaipel gesa orwo e pagei isak ke Ida Puda. Ma tipmi iye langane. “Wom gute ka imapara ke iye ma iye me koke ma imekrim ke gute silang?” 20E alo ka tipolou ke Yesus tiwai ke iye langane. “Jon ka paunim osep pagei imi ma imepmi wom langane. ‘Wom gute ka imapara ke iye ma iye me koke imekrim ke gute silang.’” 21E alo ari Yesus due osep pula ka paiangan bitna bitna due isak tipolou itau blang e iye sapir angelo soulu ke osep leklou e iye due osep leklou ka amtarsak evin ma tikaranga tivati omur blang. 22E iye koli wai ke isak langane. “Umala e umapalongo Jon ke wan ka umavati e wan ka umoklingen ine. Osep ka amtarsak evin tikaranga tivati omur blang e osep ka kamsak mete tikaranga tilila blang e osep ka paiangan lepra due isak tipolou itau blang e osep ka talsak karanga klingen pelengon kovok tikaranga tiklingen pelengon blang e osep ka timete tipoga titito ke inarak denga e osep ka urok wan isuk boto vala tiklingen omon itau. 23E gute ka vati ngong e aitno dagar ke ngong ma aitno itau itau.”
24E alo ka osep ka Jon pagei isak ke Yesus tiding kla Yesus wai ke osep pula pula ke Jon ila elio langane. “Umala ke omur ka dong adai vala ma umavati wansua? Umala ma umavati engen ipu wan ka ina arit kovok langka tobor? Aurou. 25Umala ma umavati wansua? Umawaiki umavati gute ka tnei klos ka itau lokono? Oo. Langane kovok. Umoklingen. Osep ka titnei klos ka itau lokono e urok wan pula tidong ke ninu ka osep ka tivri mgo ke omur omur tidong ine. 26Deka umala e umawaiki umavati wansua? Umawaiki umavati gute napaprangan ina i? Ee. E silang blang gute tonari gute napaprangan ina vala kovok. 27Gute ane gute ka osep tisogo ine langane.
‘Ma ngapagei gute ka kalke lou omon mgo ke wom e ma iye kere ekreng mgo ke wom.’
28Ngawai ke umu langane. Gute ka taklak ane ina mole Jon kovok e dau gute ka angaine daudeng lokono ke omur ka Ida Tapolngon plaue mole Jon.” 29E alo ka osep tiklingen pelengon tonari osep ka pula keniye e osep ka tidue takis aitno lisak mter Ida Tapolngon due elio ka osuk. Aitno lisak mter langane kesua oglou isak kla ke Jon ma iye paunim isak. 30E osep Farisi ina e osep ka tile itau ke Moses ila sogongon tipul dogur ke wan ka Ida Tapolngon waiki tidue kesua isak kla ke Jon ma iye paunim isak kovok. 31E Yesus wai ke isak blang langane. “Osep ka tidong oku ane isak langka wansua e ma ngawai lange ke isak? 32Isak langka agau ka tidong ke bilmu e tigi pulu langane. ‘Imeipu piloli ke umu e umetirie kovok e imodue sakul metengen ina e umekngis kovok.’ 33Kesua Jon ka paunim osep me e ngen bret kovok e inim aki wain kovok e umawai langane. ‘Angelo soulu dong ke iye.’ 34E Gute Ka Polou Langka Osep me e ngen e inim e umawai langane. ‘Iye ngen pula e inim pula ma bitna balilu e ila saten isak osep ka tidue takis e osep epmes ina.’ 35Umawai langane e dau Ida Tapolngon ila osep tidue ilengen e elio are nis umu Ida Tapolngon ila ilengen iye pelengon lokono.”
Apmang kene sak wel ke Yesus kamla
36E gute Farisi ina kene wai ke Yesus ma iye me ngen nganon kap iye deka iye la sep ke gute Farisi ina ila ninu e dong ke bota. 37E umoklingen. Apmang ekreng palma ina ka dong ke armok are ile Yesus dong ke gute Farisi ina ila ninu e iye kalke botol opmu ina ka wel ka ina klingen omba lokono ka amna itau dong ine. 38E iye dong ke Yesus dogurne olwo boto ke kamla e kngis omba e bitna olune baser e due Yesus kamla polou epi deka apmang sak kamla ke apna elilo e ene ngen Yesus kamla aling pula e baser wel ka amna itau ke kamla.
39E gute Farisi ina ka gi iye ma iye me ngen kap iye vati elio are e aitno mter langane. “Langka gute ane gute napaprangan ina lokono ma iye ile itau ke apmang ka kai iye. Kesua iye apmang epmes ina.” 40Deka Yesus wai ke gute tonari langane. “Saimon ngawaiki ngawai ke wom.” E Saimon koli wai ke iye langane. “Io gute parerengen ina amwai ke ngong.” 41Deka Yesus wai langane. “Gute gesa kar mani ke osep orwo e para ma tikoli batne. Gute kene due 500 kina e gute silang due 50 kina. 42E mase tikaranga tikoli batne kovok deka gute ka kar mani ke isak aitno due isak e iye sak urok aglunga ma tikoli batne ke iye kovok. Aitno lugom lange? Gute sei ke isak orwo lana iye omba ke gute tonari?” 43E Saimon koli wai langane. “Aitno lungong mter iye gute ka ila aglunga 500 kina e gute tonari sake.” E Yesus wai langane. “Amwai osuk ke elio ane.” 44Deka iye bauluk e vati apmang e wai ke Saimon langane. “Amvati apmang ane? Ngasep ke lem ninu e amkar aki gesa ke ngong ma ngaris kongu ine kovok e apmang ane ris kongu ke bitna olune e sak kongu ke apna elilo. 45Owop ngen banga lungong kovok e apmang ane nogrum ke alo ka ngasep ke ninu ene ngen kongu aling aling. 46E amsak opongu ke wel kovok e apmang ane sak kongu ke wel ka ina klingen omba ka amna itau. 47Deka ngawai ke wom langane. Ida Tapolngon sak apmang ane ila elio epmes ina ka isak pula kodong kesua iye lana iye omba ke ngong. E dau gute ka due elio epmes ina awal boto e Ida Tapolngon sak isak gute tonari lana iye ke osep daudeng.” 48Deka Yesus wai ke apmang langane. “Ngasak lem elio epmes ina kodong.” 49Deka osep leklou ka tidong ke ninu tiwai pulu langane. “Gute ane iye sei e iye sak osep urok elio epmes ina?” 50E Yesus wai ke apmang tonari langane. “Aitno lugom ila dagar lua wom ke lem elio epmes ina kodong. Amla e aitno lugom epen.”
Currently Selected:
Luk 7: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
