Matyu 28

Yesus poga tito ke ina denga

(Mak 16.1-10 e Luk 24.1-10 e Jon 20.1-18)

1Oklou sabat mela yagos e ke kotkotu lokono ke oklou kene ina ke wik Maria ke Makdala gosok Maria silang isak kla tivati denga. 2E suong orgi omba polou e Ida Puda ila ensel gesa duru ke omur heven e tabulbul opmu la e dong ine. 3E bitna langka aragu egle e ila klos okou lokono. 4E osep ola ina ka tiplau denga tilim ke iye e tinakarkar e tipolou langka osep ka timete. 5E ensel wai ke apmang orwo langane. “Umelim kovok kesua ngaile umekrim Yesus ka tinilim iye ke ina akai. 6E iye dong ane kovok kesua iye poga tito ke ina denga kodong eriar langka oglou iye wai ine. Umomo e umavati omur ka iye munu ine. 7Deka umala umosuong e umapalongo ila disaipel iye poga tito ke ina denga kodong e iye la mgo ke umu ke omur Galili e ma umavati iye are. Omtomu sisir lou pelengon.” 8Deka tisongon ina denga e isak kla tisuong e aitno lisak nesik e dau tiketir blang. E tisuong ma tipalongo ila disaipel ine. 9E alo ka tisuong Yesus soson isak e wai ke isak langane. “Aitno lumu dong itau.” E tipolou ke iye e tikis kamla e tilotuim iye. 10Deka Yesus wai ke isak langane. “Umelim kovok e umala umapalongo lou osua ma isak kla ke omur Galili e ma tivati ngong ari.”

Osep ola ina tiwai ke osep loulou ina

11E alo ka apmang isak kla ke ila disaipel osep ola ina leklou ka tiplau denga tisep ke armok e tipalongo osep loulou ina ka omba ke wan ka pula keniye ka tipolou. 12Deka tiduni pulu kap osep namormor e tilalo pelengon e tikar mani gesa ke osep ola ina tonari. 13E tiwai ke isak langane. “Umawai ke osep langane. ‘Ila disaipel time ke epmes e tidue pampamu ine alo ka imomunu kudung.’ 14E langka gute ka vri mgo ke osep Rom ina ke omur ane klingen ke elio ane ma imawai ke iye e imomosi pelengon ine ma wan gesa polou ke umu kovok.” 15Deka osep ola ina tidue mani tonari e tidue eriar langka osep tiwai ine. E basikngen ane kes lila ke osep Yuda ina la lama oku ane iye dau dong.

Yesus wai ke ila disaipel ke bokongon ka iye waiki tidue

(Mak 16.14-18 e Luk 24.36-39 e Jon 20.19-23)

16E osep disaipel songotno kene kla ke omur Galili ke gigri ka Yesus wai ine. 17E alo ka tivati iye tilotuim iye e dau isak leklou aitno lisak orwo ke iye. 18E Yesus polou olwo boto ke isak e wai ke isak langane. “Ida Tapolngon kar arit ka pula keniye ke ngong ma ngaplau wan ka omur heven ina e wan ka taklak ina blang. 19Deka umala ke omur ka pula keniye ke taklak e umodue osep tipolou lou disaipel e umapaunim isak ke Upu Tapolngon ka Pmomu angaine e Upu Tapolngon Otno Arang angaine e Ano Itau angaine. 20E umaparere isak ma tini wan ka pula keniye ka ngawai dagar ke umu ine. E ma ngadong kap umu e ngalua umu aling aling la lama taklak ane yagos.”

Currently Selected:

Matyu 28: ANT

Highlight

Copy