Mak 1

Jon ka paunim osep wai ke osep

(Matyu 3.1-2 e Luk 3.1-9 e Luk 3.15-17 e Jon 1.19-28)

1Pelengon ane nogrum wai ke omon itau ka la ke Ida Tapolngon Otno Arang Yesus Krais.

2Oglou gute napaprangan ina Aisaia sogo Ida Tapolngon ila pelengon langane.

“Ma ngapagei gute gesa ka due omon ma iye mgo e kere ekreng itau ma emdidie. 3Ma gute ka due omon lila ke omur ka dong adai vala e ma iye napapra ke osep langane. ‘Osep umekere ekreng itau e umomosie osuk ma Ida Puda didie me polou ke ite.’”

4Mase Jon ka paunim osep me polou ke osep eriar langka oglou ari Aisaia sogo ine. E iye lila ke omur ka dong adai vala e iye napapra ke osep langane. “Umabauluk aitno lumu ke lumu elio epmes ina e aitno lumu mter ke elio itau ma umedidi elio paunimngen ina. Umodue elio langane deka ma Ida Tapolngon klok lumu elio epmes ina la.” 5Jon napapra ke isak langane deka osep pula ka isak omur Judia ina e armok Jerusalem ina isak kla tipolou ke iye. Deka isak kensak kensak tiwai malak ke urok elio epmes ina ka vri ke isak. Deka iye paunim osep tonari ke aki Jordan. 6E Jon tnei klos ka itau kovok. Iye tnei klos ka tidue ke kamel tarna elilo e poue ke let ka tidue ke bulmakau tarna. Jon ngen ina ngangon ka kakan e wame olune. 7Alo ari Jon napapra ke osep langane. “Mase ma gute silang ka ila arit mole ngong me polou ke umu. Ma ngadue anit ke iye kesua ngong itau ma ngakaranga ngakles ila su kovok. 8Ngapaunim umu ke aki. E iye ma due Ida Tapolngon Ano Itau sep dong ke aitno lumu.”

Jon paunim Yesus ke aki Jordan

(Matyu 3.13-17 e Luk 3.21-22)

9Alo ari Yesus songon armok Nasaret ka dong ke omur Galili e iye la polou ke Jon e Jon paunim iye ke aki Jordan. 10Iye paunim iye yagos deka Yesus tito la ke aki ina dingen batne. Deka lokono iye vati sirva nabak e vati Ano Itau langka belis duru dong ke iye. 11E iye klingen Ida Tapolngon wai ke omur heven langane. “Wom Erigu Arang lokono ka ngong lana ngong ke wom omba. Aitno lungong itau lokono ke wom.”

Satan tok Yesus

(Matyu 4.1-11 e Luk 4.1-13)

12Elio tonari yagos deka lokono Ano Itau pagei Yesus la ke omur ka dong adai vala e iye dong ine. 13Iye dong ke omur tonari la lama oklou epmes isapanal mela yagos deka ari Satan dong ma tok iye e ongwa kevena blang tidong ke omur tonari. Deka ari ensel leklou time tipolou ke iye e tikere iye.

Yesus boko ke omur Galili

(Matyu 4.12-17 e Luk 4.14-15)

14Alo ka osep tidue Jon la sep ke kalabus deka ari Yesus polou ke omur Galili e napapra Ida Tapolngon ila omon itau lokono ke osep. 15Iye napapra ke isak langane. “Eknikane taim ka Ida Tapolngon rere ma iye vri mgo ke osep polou kodong. Deka umabauluk aitno lumu ke lumu elio epmes ina e aitno lumu la dagar ke Ida Tapolngon ila omon itau.”

Yesus wai ke osep apanal ka iye waiki tididi iye

(Matyu 4.18-22 e Luk 5.1-11)

16Alo ka Yesus lila ke elim Galili ina dingen batne iye vati Saimon orwo ina tovro Andru ka isak osep ka urok bokongon tikngo lodu tiuri omdu ke aki ma tidue lodu. 17Deka Yesus wai ke isak langane. “Eknikane umoboko ma umodue lodu. E umomo umedidi ngong e ma ngaparere umu ke elio ka umodue osep tididi ngong blang.” 18Isak orwo tiklingen Yesus ila pelengon deka lokono tisongon urok omdu e tididi iye.

19Yesus gosok osep orwo tonari isak kla isuk boto deka tipolou ke Sebedi gosok titno arang orwo ka angainsak Jems e Jon. Isak orwo tidong ke urok bot e timosi urok omdu. 20Deka lokono Yesus gi ke isak langane. “Umomo umedidi ngong.” Tiklingen ila pelengon deka lokono tisongon pmarak e osep ka tiboko ke pmarak ka tidong ke bot tonari deka tididi Yesus e tigosok iye kla.

Yesus sik angelo soulu ke gute gesa aitno

(Luk 4.31-37)

21Isak kla e mase tipolou ke armok Kaperneam e tidong ine. Deka ke oklou sabat Yesus la sep ke osep Yuda ina urok duningen ina ninu e parere osep ke Ida Tapolngon ila pelengon. 22Osep tiklingen ila parerengen deka ansak nesik omba ine. Kesua iye didi ila arit e parere osep ke pelengon tonari. E iye wai adai eriar langka osep ka isak urok parerengen ina tidue kovok. 23Iye dau dong parere isak deka gute ka angelo soulu dong ke aitno daiku langane. 24“Yesus ka Nasaret ina wom lange wom ka omo omdong are? Omo ma ampaiavu imi? Ngaile omur ke wom. Wom Ida Tapolngon Otno Arang itau ka iye pagei wom omo.”

25Deka Yesus wai dagar ke iye langane. “Amwai sakam. E omdong ke gute are aitno sakam. Ompolou amla.” 26Angelo soulu tonari klingen Yesus ila pelengon deka iye due gute ka iye dong ke aitno nakarkar omba. Deka iye daiku omba e songon gute tonari la. 27Osep tivati elio tonari deka aitno lisak mter pula ine e tiwai pulu langane. “Ua. Elio ane lange? Gute ane parere ite ke pelengon oku ina ka ila arit dong ine. Iye wai vala deka angelo soulu tini ila pelengon.” 28Yesus due elio tonari deka lokono omon ke wan ka iye due kes lila ke omur Galili keniye.

Yesus lua apmang ka paia

(Matyu 8.14-15 e Luk 4.38-39)

29Deka Yesus gosok osep leklou tisongon duningen ina ninu tonari e isak kla tipolou ke Saimon orwo ina tovro Andru urok ninu deka tisepe. E ari Jems e Jon isak kla kap isak blang. 30Deka lokono osep tiwai ke Yesus ke Saimon rana apmang ka paia e tarna engil ka munu ke ila kova. 31Deka iye la polou ke apmang tonari e kis limla deka lokono ina paiangan ka tarna engil yagos. Deka apmang tonari tipa e la kere isak ke inarak ngangon.

Yesus lua osep pula ka tipaia

(Matyu 8.16-17 e Luk 4.40-41)

32Kirui alo ka oklou duru Yesus dau dong ke ninu tonari. E osep tipaur osep pula ka tipaia e osep ka angelo soulu dong ke isak time tipolou ke iye ma iye lua isak ke inarak paiangan. 33E osep matamur pula time tiduni pulu ke ninu tonari ina ekreng bitna. 34Deka ari Yesus lua osep pula ke inarak paiangan bitna bitna. Iye sik angelo soulu ka tidong ke osep deka isak kla. Angelo soulu tonari tile omur iye gute sei deka iye dangdang isak ma tiwai kovok.

Yesus lila ke omur Galili

(Luk 4.42-44)

35Epmes polou e Yesus munu kudung ke ninu tonari la lama kotkotu lokono deka iye tipa e songon ninu. Deka iye la polou ke omur ka dong adai vala e dong ine e wai itau ke Ida Tapolngon. 36Mase Saimon gosok sisrok isak kla ke omur tonari e tikrim iye. 37Tikrim iye la lama tipado iye deka isak tiwai ke iye langane. “Oka osep ka pula keniye tikrim ke wom.” 38Deka Yesus koli wai langane. “Ma itodong ke omur ane kovok. Ma itala ke armok leklou ka lelei omur ane ma nganapapra Ida Tapolngon ila pelengon ke isak. Ngame ngadong kap osep kesua batne ma nganapapra Ida Tapolngon ila omon itau ke osep.” 39Deka Yesus lila ke armok pula ka tidong ke omur Galili. E iye sep ke urok duningen ina ninu e napapra Ida Tapolngon ila pelengon ke isak. E iye sik angelo soulu pula ka tidong ke osep.

Yesus lua gute ka paiangan lepra due

(Matyu 8.1-4 e Luk 5.12-16)

40Oklou kene gute gesa ka paiangan lepra due me polou ke Yesus bitna deka grum kamla duru ke taklak e wai langane. “Langka amwaiki omlua ngong ke ngau paiangan ngaile amkaranga omdue.” 41Yesus vati gute tonari deka aitno kro ke iye e limla la ke iye e kai iye. Deka iye wai langane. “Ngawaiki ngalua wom. Ngap paiangan yagos.” 42Deka lokono gute tonari ina paiangan lepra yagos.

43Yesus lua gute tonari yagos deka lokono kar pelengon ke iye e pagei iye la. 44Iye wai langane. “Amwai ke osep ke elio ane sakam. Amla ompolou ke gute loulou ina bitna ma iye vati tarna lugom. E emdidi elio ka oglou Moses sogo ine ka la ke osep ka inarak paiangan lepra yagos. Omdue lem wan gesa ma omdue elio opmu ina ine. Omdue elio langane batne ma emnis osep ka pula keniye eknikane ompolou itau.” 45E gute tonari lila la deka palongo osep pula ine. Iye due elio langane deka Yesus karanga lila ke armok pula kovok lama osep tivati iye deka tididi iye. Deka iye la dong ke omur ka dong adai vala. E osep ka tidong ke omur pula isak dau time tipolou ke iye.

Currently Selected:

Mak 1: ANT

Highlight

Copy