Mak 2
2
Yesus lua gute gesa ka kamla e limla timete
(Matyu 9.1-8 e Luk 5.12-16)
1Oklou leklou mela yagos deka Yesus bauluk ke armok Kaperneam blang e dong ke ninu gesa. E ari osep matamur tiklingen omon ka iye bauluk blang. 2Deka osep pula time tiduni pulu ke ninu tonari e tisepe ma ninu bon e gute silang karanga sepe blang kovok. E osep pula tivri ke ninu ina ekreng bitna. Deka ari Yesus napapra Ida Tapolngon ila pelengon ke isak. 3Alo ka iye dau dong wai ke isak osep apanal time tipolou ke ninu tonari. Tikalke bota ka gute gesa ka kamla e limla timete munu ine ma tipaur iye polou ke Yesus. 4E osep pula tidong ma ninu bon deka osep apanal tonari tikaranga tipaur iye polou ke Yesus kovok. Deka tipaur iye tito ke ninu tona e tidar ninu tona leklou ke omur ka Yesus vri ine. Deka tidue bota ka gute tonari munu ine duru ke ovuk tonari e tidue nerir nerir duru ma munu ke ninu aitno. 5Yesus vati osep tonari tidue elio langane deka ile aitno lisak dagar ma iye lua gute tonari. Deka iye wai ke gute ka kamla e limla timete langane. “Erigu ngasak lem elio epmes ina noklok la.”
6Iye wai langane deka osep ka tile itau ke Moses ila sogongon ka tidong ke ninu tonari tiklingen ila pelengon deka tidigrik ine e aitno lisak mter pula ine langane. 7“Ina lange gute ane wai langane? Iye wai soulu ke Ida Tapolngon kesua Ida Tapolngon vala karanga sak osep urok elio epmes ina tinoklok la.”
8E lokono Yesus ile osep tonari aitno lisak e pmi isak langane. “Ina lange umedigrik ke lou pelengon e aitno lumu mter pula ine? 9Elio lange ma opru lokono ke ngong? Langka ngawai ke gute ane ‘ngasak lem elio epmes ina noklok la’ ma opru ngong? E langka ngawai ke iye ‘emtito omdue lem bota e amla’ ma opru ngong? 10Ngawaiki umeile omur ngong ka Gute Ka Polou Langka Osep lou arit dong ke ngong e alo ka ngadong ke taklak ane ngakaranga ngasak osep urok elio epmes ina tinoklok la.” Iye wai ke osep tonari langane deka wai ke gute ka kamla e limla timete langane. 11“Oka emtito e amkakai lem bota deka amkalke amla ke lem ninu.” 12Iye wai langane deka gute ka kamla e limla timete tito deka lokono iye kakai ila bota tito deka songon ninu tonari ke osep pula amtarsak. Deka osep pula aitno lisak digrik omba e tikakai Ida Tapolngon angaine tito la egim lokono ine e tiwai langane. “Oglou imavati elio gesa ka langane kovok.”
Yesus waiki gute Livai ma didi iye
(Matyu 9.9-13 e Luk 5.27-32)
13Elio tonari yagos deka Yesus lila la ke elim Galili ina dingen batne blang. E osep pula time tiduni pulu kap iye deka iye parere isak ke Ida Tapolngon ila pelengon. 14Iye parere isak deka iye la blang la lama iye polou ke ninu ka osep tikli urok takis ine. E iye vati gute Alfius otno arang Livai ka dong ke ninu tonari e due takis ke osep. Deka Yesus wai ke Livai langane. “Emtito e emdidi ngong.” Deka Livai tito e didi Yesus.#2.14 — Osep tisir gute Livai ane angaine silang Matyu ke Matyu 9.9.
15Deka Yesus la ke Livai ila ninu e sepe. Deka iye gosok ila disaipel tidong lelei bota ma tingen inarak ngangon ine. Ari osep pula tididi iye. Deka osep ka tidue takis e osep epmes ina pula tigosok Yesus tidong ke bota tonari. 16E osep ka tile itau ke Moses ila sogongon ka isak osep Farisi ina tivati elio ka Yesus dong ngen ina ngangon kap osep ka tidue takis e osep epmes ina. Deka tiwai ke ila disaipel langane. “Ina lange gute Yesus dong ngen ina ngangon kap osep ka tidue takis e osep epmes ina?” 17Yesus klingen urok pelengon deka iye wai ke isak langane. “Osep ka tipaia vala ma isak kla ke dokta ma iye lua isak. E osep ka tipaia kovok ma isak kla ke dokta kovok. E langane. Ngame ma ngalua osep ka tile omur isak osep epmes ina. E ngame ma ngalua osep ka aitno lisak mter isak tipolou itau ke Ida Tapolngon bitna kodong kovok.”
Osep ka tipli inarak ngangon
(Matyu 9.14-17 e Luk 5.33-39)
18Alo gesa Jon ila disaipel e osep Farisi ina urok disaipel tipli inarak ngangon kesua tiwaiki aitno lisak la ke Ida Tapolngon vala. Deka ari osep leklou tipolou ke Yesus e tiwai ke iye langane. “Ina lange gute Jon ila disaipel e osep Farisi ina urok disaipel tipli inarak ngangon e lem disaipel tidue langane kovok?” 19Osep tonari tiwai langane deka Yesus koli wai ke isak langane. “Langka gute gesa waiki gi deka alo ka iye dau dong kap sisrok ma tipli inarak ngangon? Aurou. Ma tidue langane kovok. Alo ka gute ka waiki gi dau dong kap sisrok tingen inarak ngangon vala. 20Mase ma osep tidue gute tonari la deka ma iye dong kap sisrok blang kovok. Deka ari ma tipli inarak ngangon.”
21Yesus wai ke isak ke pelengon ano gesa langane. “Lang-ka ovuk dong ke molo oglou ina gute sisir molo oku ina arlak ke ovuk tonari kovok. Kesua langka iye due langane mase alo ka iye grong molo ma arlak tonari polou daudeng e ma trum molo ka oglou ina. Deka ovuk polou omba e mole ovuk ka oglou ina dong.” 22Yesus wai ke isak ke pelengon ano silang langane. “Langka osep tidue aki wain oku ina ma tibasere la sep ke aki wain tarna ka oglou ina ka tidue ke meme tarna kovok. Kesua langka tidue langane ma aki wain ka oku ina due aki wain tarna ka oglou ina ka polou dagar kodong ma nabak. Langka osep tidue langane ma tipaiavu aki wain oku ina tonari e aki wain tarna ka oglou ina blang. Deka osep tibaser aki wain ka oku ina sep ke aki wain tarna ka oku ina vala.”
Yesus wai ke oklou sabat ina pelengon dagar
(Matyu 12.1-8 e Luk 6.1-5)
23Oklou sabat gesa Yesus gosok ila disaipel tilila tididi ekreng ka munu airavu ke yage wit ina. Deka ari ila disaipel tituktuk wit otna leklou ma tingene. 24E osep Farisi ina tivati e tipmi Yesus ine langane. “Ina lange lem disaipel tidar oklou sabat ina pelengon dagar e tituktuk wit otna ma tingene?”
25Deka Yesus koli wai ke isak langane. “Umeritim Ida Tapolngon ila pelengon ka wai ke elio ka oglou Devit due koke aurou? Oglou Devit gosok sisrok inarak ngangon dong kovok deka sapanga due isak. 26Alo ari gute Abiatar ka iye gute loulou ina ka mgo dong. Iye boko ke Ida Tapolngon ila ninu molo ina. Deka ari Devit la sep ke ninu tonari e due bret ka tiwaiki Ida Tapolngon ina bret ka dong munu ke bota gesa. Osep loulou ina vala tikaranga tingen bret tonari e langka osep leklou tingene ma tidar pelengon dagar. Alo ari Devit due bret deka iye gosok sisrok tingene.”
27“Ida Tapolngon rere pele-ngon dagar ka dong ke oklou sabat kesua batne iye waiki pelengon dagar tonari ma lua itosep. E iye due ite ma itolua oklou sabat kovok. 28Deka langane. Ngong ka Gute Ka Polou Langka Osep ngong oklou sabat Ina Puda deka ngaplaue.”
Currently Selected:
Mak 2: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
