Mak 12
12
Osep soulu bitna tiboko ke yage galou wain ina
(Matyu 21.33-46 e Luk 20.9-19)
1Deka Yesus wai ke osep ke pelengon ano gesa. Iye wai langane. “Gute gesa ila yage dong e iye usak galou wain ine. Iye usake yagos deka uri ina ari lelei yage tonari. Deka iye yas ovuk gesa ma osep tidue wan ka por galou wain toru ine sep ine e ina aki baser la sepe. Deka iye uri ninu gesa ka dong egim ma osep ka tiplau yage tidong ine e tiplau yage. E ma tikli iye ke taiko kene kene. Deka iye wai ke isak langane. ‘Umaplau lou yage ane deka alo ka lana ka galou wain usu polou ma umotuktuk toru ine ma leklou lou wan e ma leklou lumu wan.’ Gute tonari wai langane deka iye songon isak e la ke ila langan ke omur ka mawa. 2Mase galou wain lana ka usu polou. Deka yage ina gute pagei ila wokboi nating kene la ke yage tonari ma osep ka tiplaue tituktuk galou wain toru ine leklou ma isak ila wan. Kesua iye waiki ma ila wokboi nating paur galou wain toru ine time ke iye. 3Wokboi nating la polou ke yage tonari. Deka osep ka tiplau yage tikis iye dagar e timluk iye pula. Deka tipagei iye bauluk e tikar iye galou wain toru ine leklou kovok. 4Mase yage ina gute pagei ila wokboi nating silang ma iye la due ina galou wain toru ine leklou. Deka alo ka iye polou ke yage osep ka tiplaue timluk otuk ine e tidue elio soulu lokono ke iye ka iye mnak iye ine. 5Mase yage ina gute pagei ila wokboi nating silang blang ma iye la due ina galou wain toru ine. Deka osep ka tiplau yage tidue burwa ke iye. Mase yage ina gute pagei ila wokboi nating pula ma isak kla ke yage ma tidue ina galou wain toru ine leklou. Deka osep ka tiplau yage timluk osep leklou e tidue burwa ke osep leklou blang.”
6“Yage ina gute pagei ila wokboi nating keniye ma isak tidue ina galou wain toru ine tonari e osep ka tiplau yage tipaiavu isak keniye. E gute kene vala dau dong ka iye karanga pagei iye la ke osep tonari. Iye otno arang ka iye lana iye omba ke iye. Deka yage ina gute aitno mter langka iye pagei otno arang la ma iye due ina galou wain toru ine ma osep ka tiplau yage tidue anit ke iye. 7Deka yage ina gute pagei otno arang la ke yage deka iye polou ine. Deka osep ka tiplau yage tiwai pulu langane. ‘Gute ka me are iye yage ane ina gute otno arang. Mase ma iye due timla ila wan matamuli deka ma yage ane polou ila wan blang. Itala itodue burwa ke iye ma mete deka ila wan matamuli ka munu ke yage ane ma polou udo wan. 8Deka tikis yage ina gute otno arang dagar e tidue burwa ke iye ma iye mete. Deka tiuri pampamu ine ke dogur ke yage. 9Deka lange? Ma yage ina gute due sua ke osep ka tiplau yage? Umoklingen. Ma iye due burwa ke osep tonari deka ma iye rere osep leklou blang ma tiplau yage.’”
10Deka Yesus wai blang langane. “Lange? Umeritim Ida Tapolngon ila pelengon ka gute napaprangan ina gesa sogo ine koke aurou? Iye sogo langane.
‘Osep ka tiuri ninu tipli opmu are. E dau opmu are iye opmu mgongon ina ka due opmu leklou ka tiuri ninu ine tinepir pulu. 11Elio ka polou langane didi Ida Puda aitno. Deka itavati e iteile omur iye elio itau lokono.’”
12Osep loulou ina ka omba e osep ka tile itau ke Moses ila sogongon e osep namormor tiklingen Yesus ila pelengon ano deka tile omur lana ine la ke isak. Deka tiwaiki tikis Yesus dagar e tikaranga tidue kovok kesua tiulou tarna lisak ke osep pula pula are. Deka tisongon iye e isak kla.
Osep titok Yesus ke pmingen gesa
(Matyu 22.15-22 e Luk 20.20-26)
13Deka osep leklou tipagei osep Farisi ina e osep ka Herot sisrok ke Yesus. Tidue elio langane kesua tiwaiki osep tonari titok iye ke pmingen leklou. E tiwaiki tiklingen ila kolingen e langka ila pelengon gesa soulu ma tisin elio vri ke iye.
14Deka time tipolou ke Yesus e tiwai ke iye langane. “Gute parerengen ina imeile omur amwai lokono vala. Imeile omur omdue elio kene vala ke osep ka pula keniye lama angainsak omba koke angainsak omba kovok. E omdue anit ke osep batne angainsak omba langane kovok. E amwai lokono vala deka amparere osep itau ke Ida Tapolngon ila pelengon dagar. Deka imepmi wom langane. Langka imekli takis ke Sisar imadar Ida Tapolngon ila pelengon dagar koke aurou? Lange? Ma imekli takis koke aurou?” 15Osep tonari tipmi Yesus langane e iye ile omur ke urok yakngan. Deka iye wai ke isak langane. “Ina lange umotok ngong? Umodue mani gesa ka itekli wan bitna bitna ine me ma ngavati.” 16Deka tipaur mani gesa me polou ke iye. Deka iye pmi isak langane. “Sei ano e angaine dong ke mani ane?” Deka tikoli tiwai langane. “Gute Sisar ano e angaine dong ine.” 17Deka Yesus wai ke isak langane. “Langka wan ka Sisar ila wan deka umakare ke iye. E langane blang wan ka Ida Tapolngon ila wan deka umakare ke iye.” Yesus wai langane deka osep tonari aitno lisak mter pula ine.
18Deka osep Sadyusi ina ka tiwai mase ma osep tipoga titito ke inarak denga kovok time tipolou ke Yesus e tipmi iye langane. 19“Gute parerengen ina pelengon dagar ka oglou Moses sogo ine wai langane. ‘Langka gute gesa gi esna deka mase iye mete e dau divir titno kovok ma ina aiver gi apmang tonari ma tidivir mimi ma isak tidong langka gute ka mete titno.’”
20“E langane. Gute arang kene dong ka ina saiver lumakene e iye gi esna. Deka tidong e tidivir titorok kovok. Mase gute tonari mete e titno gesa dau dong kovok. 21Deka gute tonari ina aiver ka orwo ina gi apmang tonari e tidivir titorok kovok. Mase iye mete e titno gesa dong kovok. Deka gute tonari ina aiver eklu ina gi apmang tonari deka iye blang mete e titno gesa tidong kovok. 22Elio langane dong la lama osep lumorwo tonari tigi apmang tonari e timete e isak keniye tidivir titorok gesa kovok. Deka mase apmang tonari mete blang. 23Deka lange? Mase alo ka osep tipoga titito ke inarak denga ma gute sei due apmang tonari ma esna iye? Kesua oglou isak keniye tigi iye ma iye isak keniye sasarak.”
24Deka Yesus wai ke isak langane. “Umawai ulik ulik. Umeile Ida Tapolngon ila pelengon lana ine e ila arit kovok deka umawai ulik ulik ke elio tonari. 25Alo ka osep ka oglou timete tipoga titito ke inarak denga ma tigi pulu e tidue sasarak e urok soboget kovok. Ma tidong langka ensel ka tidong ke omur heven e tigi kovok. 26E ke elio ka osep ka timete kodong tipoga titito ke inarak denga ma ngapmi umu ine langane. Umeritim pelengon ka oglou Moses sogo ine koke aurou? Oglou Moses sogo pelengon gesa ka la ke alo ka iye vati akai tetna gesa ka eiou neliplip ine. Iye sogo alo ari Ida Tapolngon wai ke iye langane. ‘Ngong Upu Tapolngon ka Abraham e Aisak e Jekop tilotuim ngong.’ 27E langane. Ida Tapolngon ila pelengon tonari lana ine langane. Lumu seia tonari ka oglou timete isak dau tidong e iye Inarak Tapolngon. Kesua iye osep ka tidong Inarak Tapolngon e iye osep ka timete vala Inarak Tapolngon kovok. E umawai ulik ulik kesua aitno lumu ulik ulik.”
Yesus wai ke Moses ila sogongon
(Matyu 22.34-40 e Luk 10.25-28)
28Alo ari gute gesa ka ile itau ke Moses ila sogongon me polou ke Yesus e klingen osep Sadyusi ina tigosok Yesus timter pelengon pulu. Deka iye klingen Yesus ila kolingen e ile omur Yesus koli osep tonari urok pelengon itau. Deka iye pmi Yesus langane. “Pelengon dagar gesa lange ka oglou Moses sogoe mole pelengon dagar keniye ka iye sogoe?” 29E Yesus koli wai langane. “Pelengon dagar ka Moses sogoe ka mole ila sogongon keniye langane. ‘Umu osep Israel ina umoklingen langane. Ida Puda ka Ida Tapolngon iye kene vala. 30Deka umu lana umu omba ke iye. Aitno lumu keniye la ke iye e umu lana umu ke iye. Umodue elio keniye ka umawaiki umodue batne umu lana umu ke iye. Aitno lumu mter ke iye vala deka umu lana umu ke iye. Umu arit umu ke elio ka umu lana umu ke iye.’ 31E Moses ila pelengon dagar ka orwo ke pelengon dagar tonari wai langane. ‘Umu lana umu ke supmu eriar langka umu lana umu ke umu kenmu kenmu.’ E pelengon dagar ka oglou Moses sogoe mole pelengon dagar orwo tonari kovok.”
32Deka gute tonari wai ke Yesus langane. “Gute parerengen ina lem pelengon lokono. Amwai Ida Tapolngon iye kene vala e tapolngon silang blang ka lokono langka iye dong kovok deka lem pelengon lokono. 33Amwai ma ite lana ite omba ke Ida Tapolngon ka Ida Puda. Amwaiki aitno lite keniye la ke iye e ite lana ite ke iye. Amwaiki itodue elio keniye ka itawaiki itodue batne ite lana ite ke iye. Amwaiki aitno lite mter ke iye vala deka ite lana ite ke iye. Amwaiki ite arit ite ke elio ka ite lana ite ke iye. E amwaiki ma ite lana ite ke sudo eriar langka ite lana ite ke ite kente kente. Elio ka langane mole elio ka osep tidue elio opmu ina ke wan e bakopngon keniye ka osep tiwaiki isak Ida Tapolngon ila wan.” 34Gute wai langane deka Yesus ile iye koli ila pmingen itau deka wai ke iye langane. “Omdong olwo boto ke omur ka Ida Tapolngon plaue.” Ari osep keniye ka tiklingen Yesus ila pelengon tiulou tarna lisak ke iye deka tiwaiki tipmi iye ke pmingen silang blang kovok.
Yesus pmi osep ke gute ka Ida Tapolngon rere Krais
(Matyu 22.41-46 e Luk 20.41-44)
35Yesus dong ke omur ka lelei Ida Tapolngon ila ninu e parere osep ka tidong are langane. “Ina lange osep parerengen ina tiwai gute Krais ka Ida Tapolngon rere ma iye lua osep iye Devit ila napakngan gesa? 36Ida Tapolngon Ano Itau due Devit aitno deka Devit tona sogo langane.
‘Ngau Tapolngon wai ke Ngau Puda langane. “Om-dong ke lungu odung. La lama ngamole ngap oul keniye deka kevep munu ke isak ma tini wom.”’”
37“Devit tona sir gute ka Ida Tapolngon rere Krais Ina Puda. Deka lange? Ina lange Devit wai gute ka Ida Tapolngon rere Krais iye ila napakngan gesa?” Ari Yesus wai langane deka osep ka pula ka tiklingen ila pelengon aitno lisak neser omba ine.
Yesus wai osep ka tile Moses ila sogongon urok elio soulu
(Matyu 23.1-36 e Luk 11.37-54 e Luk 20.45-47)
38Yesus parere osep e wai ke isak langane. “Umaplau umu itau ke osep ka tile itau ke Moses ila sogongon e umakana urok elio bitna bitna sakam. Tiwaiki titnei urok molo ka alang e tilila e tiwaiki osep tikakai angainsak tito. Tiwaiki tidong ke bilmu ma osep tiwai ‘oklou itau’ e tipakuru isak ke osep amtarsak. 39Alo ka tidong ke duningen ina ninu tiwaiki tidong ke kova ka osep ka angainsak omba vala tidong ine. E langka osep tidue rogo omba gesa tiwaiki tidong ke bota ka osep ka angainsak omba vala tidong ine. 40Tiwai ke apmang ka sasap batne deka tiyak isak e tidue urok wan. Alo ka tiwai itau ke Ida Tapolngon tiwai tauni kesua batne tiwaiki osep pula tipalem isak ma bina lisak tito. E elio ka Ida Tapolngon mulu osep ka tidue elio langane ma mole elio ka iye mulu osep leklou.”
Apmang ka asap batne kar ila mani ke Ida Tapolngon
(Luk 21.1-4)
41Alo ka Yesus dong ke Ida Tapolngon ila ninu iye dong olwo boto ke karoro ka osep tiuri urok mani ka tiwaiki la ke Ida Tapolngon sepe. Deka iye vati osep ka urok mani pula pula tituk urok mani pula e tiurie mani la sep ke karoro. 42Deka ari apmang ka asap batne gesa ka ila mani isuk boto lokono me uri ila mani ka daudeng boto lokono langka kapa orwo sep ke karoro. 43Deka Yesus wai ke ila disaipel ma time tipolou ke iye. Time tipolou ke iye deka iye wai ke isak langane. “Ngawai ke umu ke pelengon lokono. Wan ka apmang ka asap batne are ka ila mani isuk boto vala urie la sep ke karoro mole wan keniye ka osep ka urok mani pula pula tiuri isak. 44Kesua osep ka urok mani pula pula tituk urok mani e tiuri leklou la sep ke karoro e leklou dau dong ke isak. E apmang ka asap batne ila mani isuk boto lokono. Deka iye due ila mani keniye e urie la sep ke karoro e ila mani leklou dau dong kap iye kovok.”
Currently Selected:
Mak 12: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
