Mak 13
13
Yesus wai ma osep tidar Ida Tapolngon ila ninu
(Matyu 24.1-2 e Luk 21.5-6)
1Alo ka Yesus songon omur ka lelei Ida Tapolngon ila ninu deka ila disaipel gesa wai ke iye langane. “Gute parerengen ina amvati. Opmu ka osep tiuri Ida Tapolngon ila ninu e ninu ninu ka lelei iye ine isak opmu itau lokono. Deka ninu ane iye ninu ka itau lokono.” 2Deka Yesus koli wai langane. “Amvati ninu ane ka omba? Mase ma osep tidare deka ma opmu keniye tiduru ma opmu kene napal munu ke opmu silang tona kovok.”
Yesus wai ke elio soulu lokono ka mase ma tipolou
(Matyu 24.3-14 e Luk 21.7-19)
3Yesus songon omur ka lelei Ida Tapolngon ila ninu deka la ke gigri Oliv ka dong leklou ari deka iye duru dong ine. Deka ila disaipel apanal Pita e Jems e Jon e Andru vala tidong tipmi iye langane. 4“Lesen ma elio ka amwai ine polou lokono? Amwai ke imi ine. Ma nisngen lange polou mgo deka ma pelengon ka amwai ine polou lokono?”
5Deka Yesus nogrum wai ke isak langane. “Umeile umu itau lama osep leklou tiyak umu ke pelengon ka yakngan. 6Mase ma osep pula tipolou ka tiwai langane. ‘Ngong tona Krais ka Ida Tapolngon pagei ngong ngame ke umu.’ Ma osep tonari tiyak osep pula ke pelengon langane. 7Mase ma umoklingen osep pula tidue ola e osep pula leklou tikere isak ma tidue ola. Alo ka umoklingen ke elio langane aitno lumu kro ine kovok. Kesua elio langane ma tipolou mgo deka mase taim ane ina yagosngon ma polou. 8Ma osep ke kantri kene tidue ola ke osep ke kantri silang. Ma gute ka vri mgo ke omur kene ila osep ola ina tidue ola ke gute ka vri mgo ke omur silang ila osep ola ina. Ma orgi tipolou ke taklak leklou e ma sapanga ombatno polou ke omur leklou. Elio soulu tonari ka tipolou mgo isak langka elio ka apmang tinamani mimi tingen isak. Deka mase elio soulu lokono ma tipolou.”
9“Umaplau umu itau. Ma osep leklou tikar umu ke osep ka tikotim umu batne ke ngong. Ma osep leklou tiules umu ke lumu duningen ina ninu batne ke ngong. Ma osep tidue umu umopolou ke osep leklou ka tiplau omur emkil gesa e ke osep leklou ka tivri mgo ke omur gesa amtarsak ma tiklingen lumu pelengon batne ke ngong. Deka alo ka umevri ke osep tonari amtarsak ma umawai ke isak ke Ida Tapolngon ila omon itau. 10Ma osep tinapapra omon itau ke omur ka pula keniye mgo deka mase alo ka pula ane ina yagosngon ma polou. 11Alo ka osep tikis umu dagar ma tiwade lumu pelengon aitno lumu epen ine vala. Aitno lumu kro ke pelengon ka umokoli urok pmingen ine kovok. Alo ari ma umawai pelengon ka Ano Itau kare ke umu. Kesua pelengon tonari Ano Itau ila pelengon e lumu pelengon kovok. 12Alo ari ma gute gesa lai ina titovro e ina saiver ka aitno lisak dagar ke ngong inarak ke osep ma tidue burwa ke isak. Ma timla lai titno ka aitno lisak dagar ke ngong inarak ma osep tidue burwa ke isak. Ma agau tilai sipmarak e titnarak ka aitno lisak dagar ke ngong inarak ma osep tidue burwa ke isak. 13Ma osep pula aitno lisak engil lokono ke umu batne umedidi ngong. E osep ka tidong dagar ke ngong vala lama agegeng tonari polou ke isak io alo ka agegeng tonari polou yagos ma Ida Tapolngon lua isak.”
Yesus wai elio soulu lokono ma tipolou
(Matyu 24.15-18 e Luk 21.20-24)
14Ngawaiki osep ka tiritim pelengon ane ma tile omur ke lana ine. Kesua Yesus wai ke ila disaipel langane. “Mase ma umavati wan ka soulu lokono vri ke omur ka osep tidangdang iye ine. Alo ari osep ka tidong ke omur Judia ma tiulou kla ke omur ka gigri gigri. 15Langka osep tidong ke urok ninu tona ma tiduru tisep ke urok ninu ma tidue urok wan gesa kovok. Ma tiduru tisuong kla vala. 16E osep ka tidong ke urok yage ma tibauluk ke urok ninu ma tidue urok molo leklou kovok. Ma tisuong kla vala. 17E aitno lungong kro lokono ke apmang ka tidong ke taim ari ka isak dau tisomogu e ka dau tipainim mimi. Kesua ma tikaranga tisuong kla kovok. 18E umawai itau ke Ida Tapolngon e umekel iye lama elio soulu tonari me tipolou ke alo ka omur epen lokono. 19Alo ka elio soulu ka ngawai ine tipolou ma iye mole elio soulu keniye ka tipolou ke oglou. Nogrum ke alo ka Ida Tapolngon tapol wan bitna bitna keniye oku me iding ke alo ane elio soulu gesa langane tipolou kovok. E mase ma elio soulu ka langane ma tipolou aling kene silang blang kovok. 20E langka Ida Puda due elio soulu tonari yari duru kovok ma osep keniye timete ine. E ma Ida Puda due elio soulu tonari yari duru kesua batne ma iye lua osep ka iye rere isak ila osep.”
21“Deka ke taim tonari ma osep tiwai langane. ‘Osep umoklingen. Gute ka Ida Tapolngon rere Krais ma iye lua osep iye dong are.’ Koke ma tiwai langane. ‘Osep umoklingen. Gute ka Ida Tapolngon rere Krais iye vri ari.’ Alo ka osep tiwai langane aitno lumu la dagar ke urok pelengon sakam. 22Ma osep yakngan ina time tiyak osep langka isak Krais lokono. E ma osep yakngan ina leklou time tiyak osep langka isak osep napaprangan ina lokono. Ma tidue elio arit ina e nisngen leklou kesua batne tiwaiki tipagolgol osep aitno lisak ka Ida Tapolngon rere isak ila osep. 23E umaplau umu itau ine. Kesua ngawai ke umu ke elio soulu ka mase ma tipolou. Deka umu umaplau umu itau.”
Alo ka Gute Ka Polou Langka Osep ma iding me
(Matyu 24.29-31 e Luk 21.25-28)
24“Alo ka elio soulu tonari tipolou yagos ma oklou polou aivoro e ma taiko bublo kovok. 25E ma gigimo gene duru ke taklak. Deka wan keniye ka tidong ke omur ka egim ma tidardar tipolou ke amunsak. 26Deka ma osep tivati ngong ka Gute Ka Polou Langka Osep ngaduru ke gaup kap lou arit e lou bublongon ka isak ombatno lokono. 27Deka ma ngapagei lou ensel ma tigom osep ka pula keniye ka ngarere isak lou osep ka tidong ke taklak ka pula keniye. Ma ensel tonari tidue lou osep ka pula keniye ka tidong ke omur heven e ka tidong ke taklak.”
Yesus wai pelengon ano ke akai fik
(Matyu 24.32-35 e Luk 21.29-33)
28Deka Yesus wai pelengon ano ke isak langane. “Akai fik ina elio nisngen ka parere umu ke elio gesa. Langka akai fik tetna ka autop tipolou deka umeile omur isuk boto oklou lana ma polou. 29E langane. Alo ka umavati elio soulu bitna bitna tonari tipolou ma umeile omur langane. Isuk boto vala taim ka ngong ka Gute Ka Polou Langka Osep ngaiding ngame ma polou. 30Ngawai ke umu ke pelengon lokono ane. Elio soulu bitna bitna tonari ma tipolou lokono alo ka osep ka tidong ke taklak oku ane isak dau timete kovok. 31Omur ka egim e taklak ma isak tipolou yagos e lou pelengon ma dong vala dong.”
Pmada vala ile lesen wan ka pula keniye ma tipolou yagos
(Matyu 24.36-44)
32Deka Yesus wai langane. “Gute kene gesa ile oklou koke aua lange ka elio tonari polou lokono kovok. Ensel ka tidong ke omur heven isak blang tile ine kovok. E Ida Tapolngon Otno Arang ile ine kovok. Pmada kene vala ile ine. 33Deka umeile umu itau. Umaplau umu itau kesua umeile ke elio tonari ina taim kovok. 34Elio ka mase ma polou iye langka gute ka due ila langan ke omur ka mawa ka iye waiki dong dau tauni ine. Alo ka iye waiki songon ila ninu la iye wai ke ila wokboi nating ke bokongon bitna bitna ka iye waiki tidue. E iye kar pelengon ke gute ka plau ila ninu ina ekreng bitna ma iye plaue itau. 35E langane. Umaplau umu itau lokono kesua umeile ke taim lange ninu tonari ina gute ma bauluk blang kovok. Kirui gesa ma iye bauluk ine koke aurou? Koke ma iye bauluk ke alo ka epmes airavu? Koke ma iye bauluk ke kotkotu lokono? Koke ma iye bauluk ke kotkotu? Umeile omur ine kovok deka umeile umu itau. 36Lama lokono iye bauluk me e umu dau umomunu kudung. 37E pelengon ane ka ngakare ke umu ngakare ke osep ka pula keniye. Umodong umaplau umu itau.”
Currently Selected:
Mak 13: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
