Mak 6
6
Osep Nasaret ina tipli Yesus
(Matyu 13.53-58 e Luk 4.16-30)
1Yesus gosok ila disaipel tisongon omur tonari deka tibauluk kla ke ila armok batne e tidong ine. 2Tidong ine la lama oklou sabat polou deka Yesus la sep ke urok duningen ina ninu e parere osep ka tidong ine. Deka osep ka tiklingen ila parerengen ansak nesik e tingelek ine. E tiwai pulu ine langane. “Sei kar pelengon ke gute ane ka iye parere ite ine? Iye due ila ilengen ge? Sei kar ila arit ke iye deka iye due elio arit ina? 3Gute ane iye kamda vala. Tna Maria e ina saiver Jems e Joses e Judas e Saimon. E sulutno blang tidong ke armok ane.” Osep tiwai langane e aitno lisak soulu lokono ke Yesus.
4Yesus ile osep tonari aitno lisak deka iye wai ke isak langane. “Langka gute napaprangan ina dong io osep pula tidue anit ke iye. E osep ka tidong ke gute napaprangan ina ila armok batne e osep ke ila osua e osep ke ila sorip tidue anit ke iye kovok.” 5Yesus ile osep tonari tipli iye deka iye karanga due ila elio arit ina pula ke armok tonari kovok. E limla kai gute kene kene vala ka paia e lua isak. 6Iye vati urok elio tonari deka aitno mter pula ine. Kesua osep tonari aitno lisak dagar ke iye kovok. Deka iye lila la ke armok pula vala e parere osep pula.
Yesus pagei ila disaipel ma tidue ila bokongon
(Matyu 10.5-15 e Luk 9.1-6)
7Yesus gi ila disaipel songotno orwo ma time tipolou ke iye. Tipolou ke iye kodong deka iye pagei isak orwo orwo ma isak kla tidue bokongon ka iye kare ke isak. Deka iye kar ila arit ke isak ma tisapir angelo soulu ka tidong ke osep leklou. 8Alo ka iye pagei isak iye wai ke isak langane. “Umodue lumu langan e umakalke lumu matu vala. E umakalke upu osak e lumu mani e upu ngangon kovok. 9Umesep lumu su e umakakluk lumu siot orwo kovok.” 10Deka iye wai ke isak blang langane. “Alo ka umopolou e umodong ke armok gesa deka umodong ke ninu pula kovok. Umodong ke ninu kene vala la lama iding ke alo ka umosongon armok tonari. 11Langka umala umopolou ke armok gesa ka ina osep tidue umu umesep ke urok ninu kovok e tipono aitno lisak ke lumu pelengon deka umosongon isak e umala ke armok silang blang. Alo ka umosongon armok ka due elio langane deka umasapirpir taklak ina group ka dong ke lumu su. Umodue elio langane kesua batne ma umenis osep tonari ke urok elio soulu ka tiwaiki tiklingen Ida Tapolngon ila pelengon kovok.”
12Deka ila disaipel songotno orwo isak kla tilila e tinapapra ke osep ma tibauluk aitno lisak ke urok elio epmes ina. 13E tisapir angelo soulu ka tidong ke osep pula. E tisak wel ke osep pula ka tipaia deka tilua isak ke inarak paiangan.
Jon ka paunim osep ina metengen
(Matyu 14.1-12 e Luk 3.19-20 e Luk 9.7-9)
14Yesus lua osep pula deka osep pula tiklingen ke ila elio. Ari gute Herot ka vri mgo ke urok omur klingen ine blang. Osep leklou ka tiklingen ke Yesus ila elio tiwai iye gute Jon ka oglou paunim osep. Tiwai oglou iye mete e eknikane iye poga tito ke ina denga. E ila arit dong ke iye deka iye karanga due elio arit ina. 15Osep leklou blang tiwai iye gute Elaija ka dong ke oglou ari. E osep leklou blang isak tiwai iye gute napaprangan ina gesa eriar langka osep napaprangan ina ka tidong ke oglou ari. 16Alo ka gute Herot ka vri mgo ke urok omur klingen pelengon tonari ka la ke Yesus deka iye wai langane. “Oglou ngawai ke gute ola ina ma iye blou Jon agune ma apna kopuk la. Deka gute ola ina tonari due burwa ke iye e iye mete. E eknikane iye poga tito ke ina denga.”
17Gute Herot wai langane kesua oglou iye wai ke osep ola ina ma tikis Jon dagar. Deka osep ola ina tikis Jon dagar e tipou iye e tipaur iye la dong ke kalabus. Herot due elio langane ke Jon kesua batne Jon wai pelengon ka bik bitna ke elio ka iye gi ina aiver Filip esna ka angaine Herodias. 18Jon wai pelengon ke Herot ke ila elio langane. “Herot amdar pelengon dagar kesua emgi ngap aiver esna.” 19Deka oklou aling aling apmang Herodias aitno dong engil ke Jon e iye waiki due burwa ke iye ma iye mete. E iye karanga ine kovok. 20Kesua gute Herot due anit ke Jon e iye ile Jon iye gute ka dong itau e osuk ke Ida Tapolngon bitna e ila elio isuk isuk keniye itau vala. Deka iye plau Jon itau lama elio soulu polou ke iye. Alo ka gute Herot klingen Jon ila pelengon aitno mter pula ine. E dau iye waiki klingen Jon ila pelengon.
21Elio langane dong e Herodias aitno dau dong engil ke Jon e waiki paiavu iye. Mase Herot due rogo omba batne ma iye kakai oklou ka tna divir iye ine. Iye due rogo tonari deka osep gavman ina ka angainsak omba time tidong tingen kap iye. E osep ka tiplau osep ola ina e osep ka angainsak omba ka tidong ke omur Galili time tidong ke rogo tonari. 22Osep tonari keniye tidong ke rogo deka Herodias otopmang me polou ke amtarsak e tirie. Iye tirie la lama gute Herot gosok osep ka tidong ke rogo aitno lisak itau ke ila tarmai. Deka Herot wai ke apmang tonari langane. “Langka amwaiki ngakar wan gesa e brokngon gesa ke wom deka empmi ngong ine e ma ngadue.” 23Deka Herot wai dagar ine blang langane. “Emdidi aitno lugom ke wan ka amwaiki ngakare ke wom deka ma ngadidi aitno lugom ine. Amwaiki ngatuk omur ka ngaplaue orwo ma leklou lem ma ngadidi aitno lugom ine. Ngawai lokono. Eiou ane.”
24Apmang tonari klingen Herot ila pelengon deka iye la polou ke tna e palongo ila ine e pmi iye langane. “Ma ngapmi Herot ke wansua ma iye kare ke ngong?” Deka apmang tonari tna koli wai langane. “Amwai ke Herot langane. ‘Omblou Jon ka paunim osep agune ma apna kopuk la deka amkar apna ke ngong.’” 25Apmang tonari klingen tna ila pelengon deka iye suong bauluk ke gute Herot e wai ke iye langane. “Lokono ngawaiki omblou gute Jon ka paunim osep agune ma apna kopuk la deka omdue apna dong ke plet gesa deka amkare ke ngong.” 26Herot klingen apmang tonari ila pelengon deka aitno soulu ine. Kesua iye wai dagar ke apmang tonari ke osep ka tidong lelei ke iye amtarsak. Deka aitno mter iye karanga dar ila pelengon dagar tonari kovok. 27Deka lokono gute Herot kar pelengon ke gute ola ina gesa ma iye la blou Jon agune ma apna kopuk la. Deka gute ola ina tonari la ke kalabus deka blou Jon agune e apna kopuk la. 28Deka gute ola ina tonari due Jon apna dong ke plet gesa e paure me ke Herodias otopmang. Deka iye paure la ke tna e kare ke iye. 29Alo ka Jon ila disaipel tiklingen ke elio tonari time tidue pampamu ine e tikalke la munu ke ina denga.
Yesus kar ngangon ke osep 5,000
(Matyu 14.13-21 e Luk 9.10-17 e Jon 6.1-13)
30Mase osep aposel ina ti-bauluk tiding ke Yesus blang. Deka tipolou ke bitna e tipalongo ila ke urok langan. Tipalongo ila ke elio bitna bitna ka tidue e ke pelengon ka tiparere osep ine. 31Deka Yesus wai ke ila aposel langane. “Itala ke omur ka osep tidong ine kovok ma itomtong ine.” Yesus wai langane kesua osep pula dau time tipolou ke isak deka tikaranga tingen inarak ngangon gesa kovok e elio ane opru isak. 32Deka isak kla tisep ke bot gesa e tinogrum kla ke omur ka dong adai vala. 33E osep pula tivati isak e tile omur ke isak. Deka tisuong tididi ekreng ma tipolou ke omur tonari. Timgo tipolou ke omur tonari deka tipara ke Yesus gosok sisrok. 34Alo ka Yesus gosok sisrok tipolou ke burla Yesus vati osep pula ka tidong tipara ke iye. Iye vati isak deka aitno kro ke isak kesua iye vati isak tidong langka sipsip ka inarak plaungan dong kap isak kovok. Deka iye nogrum parere isak ke pelengon pula. 35Iye dong parere isak la lama kirui deka ila disaipel tipolou ke iye e tiwai langane. “Kirui kodong e omur ane dong adai vala. 36Ampagei osep ane ma isak kla ke armok armok ka tidong lelei omur ane ma tikli inarak ngangon.”
37Deka Yesus koli wai ke isak langane. “Umakar isak inarak ngangon vala.” Deka tikoli tiwai langane. “Lange? Amwaiki imouri mani buno orwo ma imekli inarak bret ine ma imakare ke isak?” 38Deka Yesus wai ke isak langane. “Bret sesue dong are? Umala umavati ma umeile ine.” Deka isak kla ma tivati ma tile omur ine. Tivati kodong deka tipolou ke Yesus bitna e tiwai langane. “Bret elme e lodu orwo tidong ane.”
39Deka Yesus wai ke osep pula ma isak tidong ke gras. 40Deka tiduni pulu ke duningen leklou langka iselme iselme e duningen leklou blang langka buno kene buno kene. 41Tiduni pulu yagos deka Yesus due bret elme e lodu orwo tonari deka bitna tito la ke omur ka egim deka iye wai tenkyu ke Ida Tapolngon ine. Iye wai tenkyu yagos deka iye tuktuk bret tonari e kare ke ila disaipel ma titongo ine ke osep ka pula keniye. E iye due lodu orwo tonari e tuktuk isak karanga osep ka pula keniye. 42Osep keniye tingen ngangon tonari ma tigot. 43Deka Yesus ila disaipel titagom bret e lodu emkil emkil tisep ke kerka songotno orwo e kerka tonari bon. 44Alo ari osep arang vala ka tingen bret inarak sasa 5,000. E apmang e agau tidong blang e tidue sasa tonari tito.
Yesus lila ke aki tona
(Matyu 14.22-33 e Jon 6.16-21)
45Osep tonari tingen inarak ngangon yagos deka lokono Yesus pagei ila disaipel tisep ke bot gesa ma timgo kla ke armok Betsaida. Alo ka iye pagei ila disaipel kla kodong iye wai ke osep pula ma tisongon omur are e isak kla. 46Iye pagei osep tonari kla deka iye la ke omur ka gigri gigri kesua iye waiki wai itau ke Ida Tapolngon ine. 47Alo ka epmes me kodong Yesus ila disaipel keniye tidong ke bot tonari airavu ke elim. E Yesus iye kene dau dong ke gigri tonari. 48Deka iye vati isak tipoi dagar kesua engen me dagar e opru isak ine. Deka ke kotkotu lokono iye lila ke aki tona la polou ke isak e waiki sala ke isak. 49Alo ka ila disaipel tivati iye lila ke aki tona aitno lisak mter wan ka tivati iye ano. Deka tidaiku ine. 50Kesua alo ka tivati iye tidigrik ine e ansak nesik. Deka lokono Yesus wai ke isak langane. “Anmu nesik sakam. Umoulou tarna lumu sakam. Wan ka umavati ane iye ngong.” 51Deka iye la sep ke bot deka engen tonari yagos. Deka ila disaipel tivati e aitno lisak mter pula ine. 52Aitno lisak mter pula ine kesua alo ari isak dau tile omur ke elio ka Yesus due ke bret lana ine kovok. E dau tidong e bara lisak pono.
Yesus lua osep Genesaret ina pula ka tipaia
(Matyu 14.34-36)
53Yesus gosok ila disaipel tibru aki tonari e tipolou ke omur Genesaret. E tisep ke aki ina dingen batne deka tipou bot. 54Tipou bot deka tisongon bot e isak kla. Deka lokono osep ka tidong ke omur tonari tivati iye e tile ke iye. 55Deka tisuong tilila ke omur tonari e tiwai ke osep ke omon ka Yesus me. Deka osep pula tikalke osep leklou ka tipaia ka timunu ke kova ma tipolou ke omur ka Yesus dong ine ma iye lua isak. 56Deka alo ka iye polou ke armok daudeng koke armok omba koke omur pula ka lelei isak iye lua osep ka tipaia. Deka tipaur osep pula ka tipaia ma time ke urok omur ka tidue bilmu ine e timunu ine. E tikel iye ma iye songon isak ma tikaranga tikai ila molo ene. Deka osep ka pula keniye ka tikai ila molo inarak paiangan yagos e tipolou itau blang.
Currently Selected:
Mak 6: ANT
Highlight
Share
Copy
Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771
