YOANE 14

1“Teiliko kasu kilo ka’bi ku ’do’do ’do’do. Rugita Ŋun ’duu, rugita na itro. 2Ku Monye liolo i ’ba yu pirito naga a sakayeta kine rodri. Kedri kodro kugbo ani gbo’da de‚ kedri kodro na itrutrukokindro ta adi na itu i kukunakindra na ta piri ya? 3Kugbo na laga autu i kukunakindra na ta piri‚ na ipopondra ’do i dokundra na ta kuweni, kuwade ma ta ku gbo’da kugele i piri naga ma na gbo’dini nu kata yu. 4Piri naga ma na ituni nu‚ ta adeni kiko ŋanilo.” 5Toma druga piza lepe adi, “Mata‚ yi aku de piri naga mo do ituni nu. Ma yi romoki dendra kiko ŋanilo adidinyo ya?” 6Yesu druga teyitokindro lepe adi‚ “Na laga a kikolo‚ na laga a kulia ti to’diri kine, na laga a runa. Le’de ŋutu ’bayi lo yenga ku Monyelo yu ŋolo laga lo yeŋundra kuwenilo ka’delo. 7Kedri kodro ku ta laga adeni na‚ kedri kodro ta adeni Monye liolo itro. Ŋiyoro tinade ta adeni lepe, ta ameri lepe itro.” 8Filipo druga takindra lepe adi, “Mata, kpeki yi Monyelo‚ ma romoki yi.” 9Yesu druga piza lepe adi, “Filipo‚ na asaka kasi ta gbo’di baŋe a nazo de, ’bo do inga aku deni na ya? Ŋutu laga lo medra nalo ameri Monyelo azo. Do kulia adi ti na kpeki ta Monyelo gbandra ya? 10Do aku rugo adi na gbo ku Monyelo katani, ’bo Monyelo gbo kuwe katani ya? Kulia naga ma na takindri ta kine na ani tazu ku kuwe niona, ’bo Monye laga lo saka kuwe katani ’duulo lo kondra kitazi kanye kine. 11Rugita adi na gbo ku Monyelo katani, ’bo Monyelo gbo kuwe katani, kuwagi rugita na ku kulia ti kitazi ŋani kine. 12“Na takindra ta a ’diri, ŋutu laga lo rugo na ilo ikokondra kitazi naga ma na kondri kine‚ ’bo lepe ikokondra kitazi naga na langu kine de‚ igbonaga na lu tu ku Monyelo yuna. 13Ŋo giri laga ma ta magi ku kari kuwe kine kilo‚ na ikokondra de‚ ma Monyelo ma rumbi pura ku Ŋirolo katani ’busa. 14Kugbo ta laga magu le’de ŋo ku kari kuwe kine‚ ’dia gbo adinyo kpe‚ na ikokondra de. 15“Ku ta laga nyanyari na‚ ta ikokondra kukuzuki kuwe kine, 16’bo na imamagu Monyelo, ’bo lepe ititikindra ta Kalokoni le’de‚ ma lepe ku saka kasi ta paratra paratra. 17Lepe a Yuka na kulia ti to’diri, naga ŋutu ti ka kilo ani romoki rugona‚ igbonaga ko ani medra lepe, aku deni lepe ’do. Laga ta adeni lepe‚ igbonaga lepe lo saka kasi ta ina, lepe ina gbo kasu katani itro. 18Na aka kolokindro ta a kikizikoni, na lo ipondra kasuni. 19Akoloki baŋe a naŋutru, ŋutu ti ka kilo aka medra na ’doni, ’bo laga ta imemedra na igbonaga na igbo’da zoruna, ’bo ta igbo’da zoru itro. 20I nu baŋe de ta idedeni adi na gbo ku Monye liolo katani, ta gbo kuwe katani, ’bo na gbo kasu katani itro. 21Ŋutu laga lo gbo ku kukuzuki kuwe kine, laga lo sobu ko ilo a ŋutu laga anyari nalo. Ŋutu laga anyari nalo, Monye liolo inyanyari lepe, ’bo na inyanyari lepe ’do itro, na ikpekpekindra mugu ku lepeni.” 22Yuda, laga ani gbo’da lo Kariotalo druga piza lepe adi‚ “Mata‚ kulia naga a inyo naga mo do kpezi mugu kayani kine‚ ’bo ani gbo’da ku ŋutu ti ka kilo ya?” 23Yesu druga teyitokindro lepe adi‚ “Kugbo le’de ŋutu laga anyari na‚ lepe isosobu kulia kuwe kine‚ ’bo Monye liolo inyanyari lepe. Yi ipopondra ku lepeni i kukundra na piri naga ma yi gbo’dinina kasi lepe. 24Ŋutu laga aku nyari nalo ani sobu kulia na ta na kine. ’Bo kulia naga ma ta yingi kine ani gbo’da a kuweŋa‚ ’bo ko a ti Monye lo sunyundro nalo. 25“Na atakindra ta kine kulia de ti inga na saka kasi ta. 26’Bo Kalokoni laga a Yuka Nakiye‚ naga ma Monyelo isunyundri ku kari kuwe kinena‚ lepe itotogulukindro ta kuliata giri‚ ’bo lepe ititikindra ta i rambu na kuliata giri naga ma na takindri ta kine. 27Na lo kolokindro teili lo trotrolo kasuni‚ na lo tikindra ta teili lo trotro liolo. Na ani tikindra ta beti naga ma ŋutu ti ina ka de kilo tikindrina. Teiliko kasu kilo ka’bi ku gbogbo’da ku drelia, ku kukuzeta itro. 28Ta ayinga na i takindra na ta adi‚ ‘Na lu tutu, ’bo na lo ipondra kasuni.’ Ku ta laga anyari na‚ kedri kodro ta inyonyola adi na lu tu ku Monyelo yu‚ igbonaga Monyelo arodru nana. 29Tinade na atrukokindro ta ti inga kulia ŋani kine aku kondra ’beri‚ kuwade kugbo ko naga akondra ’beri‚ ma ta rugi ’busa. 30Na aka takindra ta kuliata rodri ’doni, igbonaga druma lo ina ka de ilo ipondra‚ ’bo lepe ani gbo’da ku teriŋi kuwe kini. 31’Bo ti ŋutu ti ka kilo dene adi na anyari Monyelo, ’bo na kondra kulia naga ma Monyelo takindri na kukuzu kine. Ŋineta‚ kita tu inide kaŋo.

Currently Selected:

YOANE 14: KNT77

Highlight

Copy