YOANE 15

1“Na laga a zabibu laga mŋgbalo‚ ’bo Monye liolo a kasoliani ŋanilo. 2Lepe bita ’e’eza keniya giri naga kuwe katani naga ani trora konye kine kaŋo‚ ’bo lepe bita ’e’eza ’do keniya giri naga na trora konye kine‚ ma ko trora konye kilo arodru. 3Ta atokela ku kulia naga ma na takindri ta kine. 4Sakanita kuwe katani‚ ’bo na ilo kasu katani itro. Beti naga kenetana ani romoki trora konye ka’delo kugbo lepe ani saka ku zabibu ilo i muguni ina‚ gbode ta ani romoki itro‚ kugbo ta ani saka kuwe katani. 5Na laga a zabibu ilo‚ ’bo ta a keniya kine. Ŋutu laga lo saka kuwe katani ilo‚ ’bo na ku lepe katani‚ lepe troru konye kilo rodri‚ igbonaga ku na laga ’bayi‚ ta ani romoki kondra le’de ŋo tro ina. 6Ku le’de ŋutu ani saka kuwe katani‚ lepe ibiriŋozi kaŋo be na kenetana, lepe itetio tetio‚ ’bo ko itundra keniya kine i biriŋodru na ko i kima‚ ko inonoka. 7Kugbo ta laga saka kuwe katani, ’bo kulia na ta na kine ku sakani kasu katani, maketa ŋo laga ma ta nyadrilo, ’dia gbo adinyo kpe‚ lepe ikokonaki ta. 8Ku ilo ŋo de Monye liolo irumbi pura‚ ma ta trorani konye kilo rodri‚ kuwade ta igbogbo’da a lotodiniki kuwe kilo. 9Beti naga ma Monyelo nyadri nana‚ na anyari ta ’do. Sakanita i nyadru niona katani. 10Ku ta laga sobu kukuzuki kuwe kine, ta isasaka i nyadru niona katani, beti naga ma na sobi kukuzuki ti Monye liolo kine, ’bo na saka i nyadru na lepena katani ina. 11Na atakindra ta kine kulia de ma nyola niona gbo’da kasu katani, nyola nasuna ma gbo’da koru ’do. 12“Ina de a kukuzu niona, nyareta nya ’beri kasu dridriŋini be naga ma na nyadri tana. 13Le’de ŋutu ’bayi laga lo gbo’da ku nyadru naga arodru ina de, naga na kolokindri ru nanyena ku worisi kanye kilonina. 14Ku ta kondra ŋo giri laga ma na takindri ta kukuzu kilo‚ ta a worisi kuwe. 15Na ani lungu ta a upi ’do‚ igbonaga upiyelo aku deni ŋo laga ma mata lonyelo kondrilo. ’Bo na alungu ta a worisi kuwe‚ igbonaga na atodinikindro ta kuliata giri naga ma na yingi ku Monyelo yu kinena. 16Laga ta aku nyumundro na‚ ’bo laga na anyumundro ta‚ atikindra ta i utu ku trora konye‚ ma konye kasu kilo saka ’duu‚ kuwade ŋo giri laga ma ta magini ku Monyelo yu ku kari kuwe kine kilo‚ ’dia gbo adinyo kpe‚ ma lepe tikindri ta. 17Na takindra ta ina kukuzu de‚ nyareta nya ’beri kasu dridriŋini. 18“Kugbo ŋutu ti ka kilo laga aŋmoza ta‚ deneta adi ko aŋmoza na ti inga ko aku ŋmoza ta. 19Kedri kodro ku ta laga a ŋutu ti ka kilo‚ kedri kodro ŋutu ti ka kilo inyanyari ŋo kasiko kilo. ’Bo igbonaga ta ani gbo’da a ŋutu ti ka kilona‚ ’bo na anyumundro ta kaŋo ku ŋutu ti ka kilo i dridriŋinina‚ kuwade ko aŋmoza ta. 20Rameta kulia naga ma na takindri ta kine adi‚ ‘Upiyelo ani langu mata lonyelo.’ Kugbo ko laga awowondru na‚ ko iwowondru ta itro. Kugbo ko laga asobu kulia kuwe kine‚ ko isosobu kasu kine itro. 21’Bo ko ikokondra ta ku kine konesi de giri ku kulia ti kari kuwe kine‚ igbonaga ko aku deni Ŋun laga lo sunyundro nalo ina. 22Kedri kodro ku na laga aku pondra ku takindra ko‚ kedri kodro ko igbo’da ’ba toro‚ ’bo tinade ko ’ba renya ku kulia ti toro nasikona kine. 23Ŋutu laga lo ŋmoza na ilo‚ ŋmoza Monye liolo itro. 24Kedri kodro ku na laga aku kondra kitazi naga le’de ŋutu aku kondra kine kasiko i dridriŋini, kedri kodro ko igbo’da ’ba toro‚ ’bo tinade ko amedra‚ ’bo ko aŋmoza na ku Monye liolo itro. 25Kuwade kulia naga na wuro i kukuzu nasikona katani kine ma torumokindri ’beri adi‚ ‘Ko aŋmoza na a ’busa.’ 26’Bo kugbo Kalokonilo laga apondra laga ma na isunyukindri ta lo ŋiyu ku Monye yu‚ laga a Yuka na kulia ti to’diri naga na ŋiyu ku Monye yu ina‚ lepe i’do’dodru bo nio na kuliana. 27Ta itro i’do’dodru bo na kuliana igbonaga ta saka kasi na ŋiyu i suluki yuna.

Currently Selected:

YOANE 15: KNT77

Highlight

Copy