LUKA 14
14
1I le’de luŋa lo sabato lu‚ Yesu autu a ku lubo ku Farisayota laga a drumalo kadi yu i nyosu, ko druga medra lepe go. 2’Bo le’de ŋutu ma lu ku lepe i koŋo yu ti amoka ku tuwane lo mosi. 3Yesu druga piza katogolo ti kukuzuna kilo ku Farisayo kilo adi‚ “Kukuzuna nyadru ti ŋutu kilo toruweni i luŋa lo sabatolo ya‚ kuwa ’bayi?” 4Ko druga yiŋa tali. Lepe druga luŋundra ŋutu ŋanilo druga totoru lepe‚ druga kolodru lepe i utu. 5Lepe druga piza ko adi‚ “Ŋa laga kasu dridriŋini kugbo ku drongi nanye kugbo ’beŋi lonye lo kite kuwa a’duki i gbu’do kata‚ druga ani pikundro lepe kaŋo i luŋa lo sabatolo agbole ya?” 6’Bo kine kulia de atiga ko i teyite ŋani. 7Yesu druga takindra ŋutulu lo luŋu kilo kulia na guguma‚ i medra na lepe na ŋutulu lo ge’ya si’deta naga na sosopo kine‚ druga takindra ko adi‚ 8“Ku do laga aluŋu i tokomona na ’depani noka‚ ku gbigbi’diki i si’deta naga na sosopo kine kini‚ ŋo laga de ŋutu druma laga alangu dolo aluŋu‚ 9’bo ŋutu laga lo lungu ta seku lepelo ka’bi ku pondra i takindra na do adi‚ ‘Koloki piri na ilo ŋutu de,’ ka’bi do ku yito ku yukuwe i si’de naga bo nu. 10’Bo ku le’de ŋutu laga alungu do‚ ku gbi’dikini i si’de naga bo nu ki yu, kuwade kugbo ŋutu lo lungu dolo laga apondra, lepe itakindra do adi‚ ‘Wori lio pondri yeki.’ Kuwade do isosopo i ta lo gbi’diki i mesa kutuni kilo de i koŋoni giri. 11Ŋutu gele gele lo ŋizu mugu ilo‚ ilo itetemize ka‚ ’bo ŋutu lo temizundro mugu ka ilo‚ ilo iŋiŋiyuzi ki.” 12Lepe druga takindra ŋutu lo lungu nyelo itro adi, “Ku do kondra tokomona na tupara‚ kuwa na tokotria‚ ku luluŋu worisi kolu kilo‚ ’dibani maratezi kolu kuwagi ŋutulu laga kasu ketimini kilo laga a korineko kilo‚ igbonaga ka’bi ko ku lungu do i nyosu na rope ŋani itro‚ ka’bi do ku teyitoki rope kolu kilo bo. 13’Bo ku do lo kondra tokomona nonu‚ luŋe lemerika kilo‚ ŋutulu laga a sosoki kilo‚ ŋutulu laga a babatratru kilo‚ ŋutulu laga ku konye a mudumudu kilo. 14Kuwade do iririondru koŋo na’bu‚ igbonaga ko ’ba kapana‚ ko ’baka teyitokindro doni‚ ’bo do iroropa i luŋa laga kolele ma ŋutu laga mŋgba kilo ŋini lu.” 15Kugbo ŋutu le’de i nyosu kutuni kasi kolo laga ayinga kine kulia delo‚ lepe druga takindra Yesu adi‚ “Koŋo na’buna ina ku ŋutu laga lo inyosu i tumata na Ŋun ina kata yu ilo!” 16Yesu druga teyitokindro lepe adi‚ “Le’de ŋutu kazu a’delakindra tokomona nanye a druma‚ alungu ŋutulu rodri. 17I luŋa lo nyosulo lepe druga sonyodru upiye lonyelo i takindra na ŋutulu lo luŋu kilo adi‚ ‘Pondrita, igbonaga kapa kilo giri gbo’di apeta ina.’ 18Ko giri adi ti roroto kase kilo sunyuzini de. Laga a kayolo druga takindra lepe adi‚ ‘Na agborundro melesi nio‚ na lu tu i medra ŋani po! Na ma’yu do koloro na.’ 19Le’delo druga kulia adi‚ ‘Na agborundro ’baŋa kuwe ti su mere gele lo tomora mure mure‚ na lu tu i modyu na ko. Na ma’yu do koloro na po!’ 20Le’delo druga kulia adi, ‘Na azondra noka nio, kuwade na ani romoki utu po!’ 21Upiyelo ku yiteni druga trukokindro mata lonyelo kine kulia de. Monye’balo druga ŋoŋoma, druga takindra upiye lonyelo adi, ‘Lupodri wule wule i kikoli laga a druma ku laga lotritriki ti kezi kilo kata yu, ’bo luŋu ŋutulu laga a lemerika kilo, ŋutulu laga a sosoki kilo, ŋutulu laga ku konye a mudumudu kilo, ŋutulu laga a babatratu kilo weni.’ 22Upiyelo druga kulia adi, ‘Mata kulia konu naga mo do takindri kukuzu kine akondra ’beri azo, ’bo kpe, piri naga a gbi’dikiyena inga ina kata.’ 23Matalo druga takindra upiyelo adi, ‘Uti kaŋo i kikoli yu ku i marina kutu yu, luŋu ko ku teriŋi ma ko lupundri ’busa, ma kadi niona zozore. 24Na takindra ta, kilo ŋutu lo luŋu na kazu kulu de, le’de ’bayi lo iwangu ina nyosu nio de.’ ” 25Nyenaga mongoyo ti ŋutulu rodri kilo autu kasi Yesu‚ lepe druga yonga mugu, takindri ko adi, 26“Ku le’de ŋutu lo pondra kuweni, ku lepe aku ŋmo monye lonye, seku ŋote nanye, ku noka nanye, ku ŋazi kanye, ku luŋaseri kanye, ku saseri kanye, a ’diri lepe ku mugu itro, lepe ani romoki gbo’da a lotodinikita lio. 27’Do ku ŋutu laga aku ’dokodru kedini lonye laga a larelo, pondri kuwe boni, lepe ani romoki gbo’da a lotodinikita lio. 28Ŋutulo a ŋa laga kasu katani lo nyadru ’dugo kadi nazo, laga aka gbi’diki inga ka ki’do, i kendra na gbore ŋani, kugbo ŋona nye ilo ku kapa lo romoki tutuweni lepeni ya? 29Kugbo ’bayi, kugbo lepe laga a’delakindra mukona azo, ’bo ti derengi ani romoki tutuzo, ŋutulu giri lo medra kilo ipoki i ’da’daradru na lepe. 30Ko ikulia adi, ‘Ilo ŋutu de asulukindra ’duko, ’bo lepe aku romoki tutuzo uye.’ 31Kuwagi mata laga a ŋa lo tu i moro seku mata le’de, ani gbi’diki ka a nze‚ i rambu kugbo se roromoki moro ku ŋutu lo pondra kanyeni laga ku kamoro alifu meria mure, ti kanye kilo alifu mere gele ’du ya? 32Kuwa ani romoki kugbo inga lu mata de lu pazo, aka sonyodru lo’di i piza na lepe ku kulia ti tolidra na moroni ya? 33Kuwade ŋutu gele gele laga kasu dridriŋini ilo kugbo aku ko’yu kapazi giri laga ma gbo’dini kanyeni kilo, lepe ani romoki gbo’da a lotodinikita lio. 34“ ’Balana a na’bu, ’bo ku kelei ŋanilo kuwa alupodru, ma kelei lo lepelo ŋiyu ku inyo ya? 35Lepe ani romoki ’delaki i melesi kata, kuwa i ŋurutu ki, ’bo ŋutulu kilo i’bukodru lepe kaŋo. Ŋutu laga ku suwolo ti lepe yingi.”
Currently Selected:
LUKA 14: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
