LUKA 15
15
1Nyenaga kawuro ti mosoro kilo ku katoronya kilo giri amizu nyoga i yinga na Yesu. 2Farisayo kilo ku katogolo ti kukuzu kilo druga ngunguruto ngunguruto adi, “Ilo ŋutu de rukundro katoronya, ’bo nyosu kasi ko kugele itro.” 3Kuwade lepe druga takindra ko kine kulia na guguma de adi, 4“Ŋa laga kasu katani laga kugbo a monye lo kebilizi kama gele, kugbo ne’de aliki gele ani kolokindro meria buŋa konye buŋa kine i diŋo yu, ti tu i galadru na naga alikina yeŋadru tozo i riondru na lepe ya? 5Ku lepe laga ario, druga larakindra lepe kanye muruni ku nyola ŋanina. 6Ku lepe laga ayeŋundra i ’bani‚ druga lungu worisi kanye kilo ku ŋutulu laga kanye gurubeni kilo i piri naŋu’du‚ druga takindra ko adi‚ ‘Kita nyonyola kasi ta‚ igbonaga na ario kebilito nio naga alikina ina.’ 7Na takindra ta, nyolana igbogbo’da i ’diko yu koru kugbo katoronyani gele laga alopugo teili, alangu ŋutulu laga mŋgba meria buŋa konye buŋa laga ani nyadru lopugo na teiliko kilo. 8“Kuwagi noka na ŋa naga gbo ku silingi mere gele, kuwa ne’de gele aliki kaŋo, aka mokakindra tala, i reza na kadina, ga’i madaa yeŋadru tozo i riondru na lepeni ya? 9Ku lepe naga ario lepe druga lungu worisi kanye kine ku ŋutulu naga kanye gurubeni kine i piri naŋu’du, druga takindra ko adi, ‘Kita nyonyola kasi ta, igbonaga na ario silingita naga alikina ina.’ 10Kuwade, na takindra ta, nyolana igbogbo’da ku malaika ti Ŋun kilo i koŋo yu ku kulia ti katoronyani gele laga alopugo teili ilo" 11Yesu druga kulia adi, “Le’de ŋutu gbo ku ŋazi mure. 12’Bo ŋiro lo lepe lo bolo atakindra monye lonyelo adi, ‘Monye lio, tiki na kapa laga ma lu mo do ku tikindri na kilo a ŋo kuwe.’ Kuwade monyelo druga korakindra ko kapa ŋani kilo. 13I bo ŋanina ti inga luŋa rodri aku rodru, ŋiro lo bolo druga pepenara kapazi kanye kilo giri, druga pilara, tu i ka naga pazo. I nu ka de kata yu, lepe akokoro kapa kanye kilo giri ku kulia ti gbiyeri loro. 14Kugbo lepe laga akokorozu ko giri, rile druma druga ’du’duki i nu ka de kata yu, kuwade druga lepe gbo’di gbo ’ba kapa. 15Lepe druga tu i kita ku le’de ŋutu i moko i nu ka de i piri. Ŋutu ŋanilo druga sonyodru lepe i yugu na wuriyo kanye ka yu. 16’Bo ŋirolo kodro nyadru yimo ku koko’bo naga ma wuriyo nyosuni kine, ’bo le’de ŋutu ’bayi lo tikindra lepe le’de ŋo. 17Kugbo lepe laga ayuluki mugu, lepe druga kulia adi‚ ‘Kakita ti monye lio kilo mudaa laga ku nyosu na nyei kpe‚ ti na lo tuwa inide ku mago! 18Na iŋiŋiye i utu ku monye liolo yu, i takindra na lepe adi, “Monye lio, na akondra toro suu i ’diko yu, konu konyeni itro. 19Na ani zuki i luŋu gbo’di a ŋiro lolu ’do. ’Delaki na gbo’di a kakitani lolu.” ’ 20Kuwade lepe aŋiye‚ druga pondra ku monyeni. Kugbo lepe laga inga lu pazo yu, monye lo lepelo ameri lepe‚ druga gbo ku ediyo ku lepe‚ atoba lepe wule‚ amutuga lepe i muru‚ druga nyu’ya lepe i gbangiri. 21Ŋirolo druga takindra lepe adi, ‘Monye lio‚ na akondra toro suu i ’diko yu, konu konyeni itro. Na ani zuki i luŋu gbo’di a ŋiro lolu ’do.’ 22’Bo monyelo druga takindra upi kanye kilo adi, ‘ ’Dumuta bongola naga a na’bu koru kine, soneta lepe. Sukita drumota ku lepe i morinani, sukita kamuka ku lepe i mukuzini. 23Zowuta kaazota laga muguna a namunyalo, ’duŋeta lepe, ma yi nyosu kugele ma yi nyonyolani, 24igbonaga ilo ŋiro de kazu atuwara, tinade lepe aru ina, lepe kazu aliki, ’bo tinade arie.’ Kuwade ko apoki i nyola. 25“Rumbi derengi ti ŋiro lo lepe laga a kayolo ma lu melesi yu. Ku lepe i yiteni, ku lepe laga ayeŋundra i ’ba kutuni nyoga, lepe druga yinga welona ku gbozana. 26Lepe druga lungu kakitani le’de, pizini lepe adi kulu ŋo de inyo lo kokona de. 27Kakitani druga teyitokindro lepe adi, ‘Luŋosu lo pondra, kuwade munyi a’dungo kaazota laga muguna a namunyalo, igbonaga lepe ariondru ŋirolo ku mugu nakiye ina.’ 28Ŋiro laga a kayolo druga ŋoŋoma, druga reredra lubo naga i ’ba yu ina. Kuwade monye lo lepelo druga lupundro ku lepeni i ’bo’bodya na lepe. 29Lepe druga teyitokindro monye lonyelo adi, ‘Mete‚ na akonakindra do kita kiŋazi rodri beti upiye. Na aku kokorozu kukuzu nonuna tro, ’bo do aku tikindra na tore lo kine droo‚ laga ma yi nyolani ku worisi kuwe kilo. 30’Bo kugbo ilo ŋiro lolu de laga ayeŋundra, lo kokorozu kapa kolu kilo ku wate ti towute wuleŋa gele do a’duŋokindro lepe kaazota laga muguna a namunyalo!’ 31Monyelo druga teyitokindro lepe adi, ‘Ŋirolo, do ilo seku na luŋa kilo giri, ’bo kapa laga a kuwe kilo a kolu. 32Kedri kodro a kulia naga na’bu ku yi nyolani nyola ayu‚ igbonaga luŋosu laga ilo de kazu atuwara‚ ’bo tinade aru i piri ina. Kazu aliki‚ ’bo tinade arie.’ ”
Currently Selected:
LUKA 15: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
