MARAKO 10
10
1Ku Yesu laga aŋiyoro i nu piri de‚ lepe druga tu i ka na Yudaya, ku naga i kare laga Yorodani i lu lozo nu, ’bo mongoyo ti ŋutulu kilo druga tunadru ’beri ’do ku lepe yu. Lepe druga togo’yu ko ’do beti naga bita ma lepe kondrini ina. 2Farisayo ku’de druga yeyeŋundra ku lepeni, i piza na lepe i modyu na lepe adi, “Kukuzuna arugo adi ti ŋutu rikoro noka nanye kaŋo ya?” 3Yesu druga piza ko adi‚ “Mose atakindra ta kukuzu adinyo?” 4Ko druga teyitokindro adi‚ “Mose arugo adi ti ŋutulo wuroki waraga na tokorani ko i rikodru na lepe.” 5’Bo Yesu druga teyitokindro ko adi‚ “Bo Mose awudyo ina kukuzu de ku teiliko logo kasu kilo. 6’Bo ŋiyu i luŋa lo gbekini kana lu‚ Ŋun agbeza ko lalale seku nonoka. 7Ku kine kulia de ŋutulo ikolokindro monye lonyelo ku ŋote nanyena, ’bo ko imora seku noka nanyena, 8’bo ko mure katru igbo’da a mugu gele. Ko ani gbo’da mure ’do, ko a mugu gele. 9Ŋo laga ma Ŋun tomodyi kugelelo, le’de ŋutu ka’bi ku totokoru tro.” 10Kadi yu lotodiniki kilo druga piza lepe ’do ku kine kulia de. 11Lepe druga teyitokindro ko adi, “Le’de ŋutu kugbo arikodru noka nanye druga ’deba ne’de, lepe akondra towute ku lepe. 12Kugbo noka naga akolokindro lale lonyelo, ku lepe naga autu i le’de‚ lepe akondra towute itro.” 13Nyenaga ko azondra ŋazi lo’di’diki ku Yesuni ma lepe ku ’bo’yu ko. ’Bo lotodiniki kilo druga riringa ko. 14’Bo kugbo Yesu laga amedra de‚ lepe druga ŋoŋoma‚ druga takindra ko adi‚ “Ti ŋazi lo’di’diki kilo pondri kuweni‚ ku gogota ko‚ igbonaga tumata na Ŋun ina gbo a na ŋutu laga be kilo de kilona. 15Na takindra ta a ’diri‚ le’de ŋutu laga aku rugo tumata na Ŋun ina be ludriŋana, lepe aka lubo kata yuni.” 16Lepe druga mutukundra ko kanyeni, druga tanyakindra kenisi kanye kilo kasiko kini i ’boriza na ko. 17Ku Yesu laga apilara i kiko yu‚ le’de ŋutu druga woku ku lepeni‚ druga ruguŋo ku lepe i koŋoni‚ druga piza lepe adi‚ “Katogoloni lo’bulo, ma na kondra inyo, naga ma na rumbi ru naga ani lengana ya?” 18Yesu druga piza lepe adi‚ “Do lungu na a ŋutu lo’bu gbandra ya? Ŋutu lo’bu ’bayi ŋolo a Ŋun ka’delo. 19Do adeni kukuzuki kine, adi: Ku reremi ŋutu, Ku kokonu towute, Ku koko’ya koko’ya‚ Ku leleŋi ’bure‚ Ku ’du’dumara ŋo lo le’de ŋutu ku toŋulupa‚ Sope so ku munyi seku ŋuti.” 20Ŋutulo druga kulia adi‚ “Katogoloni, kine kulia de giri na akonu ko ŋiyu kuwe toŋiro yu.” 21Ku Yesu laga agbuluzu lepe‚ druga nyanyari lepe‚ druga takindra lepe adi‚ “Do inga aku kondra le’de ŋo gele. Utini ku togbore kapazi kolu kilo giri‚ ku tiki ku lemerika kiloni‚ do irurumbi tokorine i ’diko yu. ’Bo pondri kuru ku keporo bo niona.” 22Kugbo ŋutulo laga ayinga kine kulia de‚ lepe druga sukindro konye kanye kilo ka‚ druga pilara ku luŋuli‚ igbonaga kapazi ti lepe kilo rodrina. 23Ku Yesu laga amedra ko giri‚ druga takindra lotodiniki kanye kilo adi‚ “Ku korineko kilonina lubo naga i tumata na Ŋun ina kata yuna a nago a ’diri!” 24’Bo lotodiniki kilo arambu ’beri koru ku kulia na ta lepe kine. ’Bo Yesu druga takindra ko adi‚ “Ŋazi kilo ta‚ lubo naga i tumata na Ŋun ina kata yuna guguli de ya! 25Lubo na kamelo i drili na sindani katani pa’de’de alangu lubo na korine naga i tumata na Ŋun ina kata yuna.” 26Ko druga rambu ’beri koru‚ druga piza lepe adi‚ “Kuwade ŋa lo romoki irite ya?” 27Yesu druga gbuluzu ko‚ druga kulia adi‚ “Ku ŋutu kilonina ani romoki‚ ’bo ku Ŋun nina ani gbo’da de‚ igbonaga kulia kine giri roromoki ku Ŋun ina.” 28Petero druga poki i takindra na lepe adi‚ “Mete, yi akolokindro kapa kilo giri i kepodru bo nonuna.” 29Yesu druga kulia adi‚ “Na takindra ta a ’diri‚ ku le’de ŋutu laga akolokindro kadi, kuwa luŋaseri, kuwa saseri‚ kuwa ŋote, kuwa monye‚ kuwa ŋazi, kuwa melesiŋo ku kulia kuwe kine ku kuu na’buna itro‚ 30lepe irurumbi luŋa kama gele i ina baŋe de‚ ŋona kadizi‚ ku luŋaseri‚ ku saseri‚ ku ŋotela‚ ku ŋazi‚ ku melesiŋo ku wowonye, ’bo i baŋe naga na popondra nu ru naga ani lengana. 31’Bo ŋutulu rodri laga ti ŋero kilo se lo igbo’da a ti bo, ’bo ti bo kilo se lo igbo’da a ti ŋero.” 32I utu nasiko i kikoni Yerusalema yuna, ti Yesu lu woro kasiko i koŋo yu. Kuwade ko arambu ’beri‚ ’bo ŋutulu lo kepodru bo na lepena kilo druga kukuze. Lepe druga luŋundru ŋutulu laga mere gele ku konye mure kilo i merete yu ’do‚ druga poki i takindra na ko kulia naga na ikondra ’beri kanye muguni kine‚ 33druga kulia adi‚ “Meteta‚ yi kilo tu Yerusalema yu. Ŋiro lo ŋutulo ititiki ku ka’i’ila drumala kilo ku katogolo ti kukuzuna kilo itro, ko iŋeŋeri kulia ti lepe kine adi ti lepe tuwani‚ ko ititikindra lepe ku Monyazi kiloni‚ 34ko i’da’dari lepe‚ ko iyayagu kamula ku lepe kini‚ ko ikpikpinyi lepe‚ ko ireremi lepe‚ ’bo i bo na luŋa musala lepe iŋiŋiye.” 35Nyenaga Yakobo seku Yoane‚ ŋazi ti Zebedayo kilo‚ apondra ku Yesuni‚ druga takindra lepe adi‚ “Katogoloni‚ yi kodro nyadru konaki ŋutu le’de ŋo.” 36Lepe druga piza ko adi‚ “Ta nyadru ku na konaki ta inyo?” 37Ko druga teyitokindro lepe adi‚ “Tiki yi ti yi gbi’dikini gelelo i keni lolu lo lutate yu‚ le’delo i keni lolu lo kaduŋe yu i mo’yu nonuŋana nu.” 38’Bo Yesu druga teyitokindro ko adi‚ “Ta aku deni kulia naga ma ta magini kine. Ta iroromoki mozu i drikeri naga ma na ku mozini nu ya? Ta iroromoki ’deba na baputizi laga ma na ku ’debi lu ya?” 39Ko druga teyitokindro lepe adi‚ “Yi iroromoki.” Yesu druga takindra ko adi‚ “Drikeri naga ma na ku mozini nu‚ ta imomozuni itro. Baputizi laga ma na ku ’debi lu‚ ta i’de’deba itro‚ 40’bo gbi’diki naga i keni lio lo lutatelo ku kaduŋelo ani gbo’da a kulia kuwe naga ma na tikindri kine‚ ’bo nu piri de gbo a na ŋutulu laga ma kukunakini ko kulu.” 41Kugbo ŋutulu laga mere gele kilo laga ayinga kine kulia de‚ ko druga poki i ŋoma ku Yakobo seku Yoane. 42Kuwade Yesu alungu ko giri kanyeni, i takindra na ko adi‚ “Ta adeni adi ŋutulu laga lo gela a ka’dola ti Monyazi kilo ko bita gbo kasiko i koŋoni a mataki‚ ŋutulu drumala kasiko kilo yakiza ŋutulu kase kilo ku teriŋi. 43’Bo ka’bi ku gbogbo’da de kasu dridriŋini, ’bo ŋutu laga lo nyadru gbo’da a druma kasu dridriŋinilo, ti lepe gbo’dini a kalokoni lasu‚ 44ŋutu laga lo nyadru gbo a kayo kasu dridriŋinilo, ti lepe gbo’dini a upiye lo ŋutulu giri. 45’Bo Ŋiro lo ŋutulo itro agbo’da pondra i konaki na kitani‚ ’bo i konakindra na ŋutulu kita‚ i tikindra na ru nanyena i dakundra na ŋutulu rodri.” 46Nyenaga ko ayenga Yeriko yu. Ku Yesu i pilara Yeriko yu kasi lotodiniki kanye kilo ku mongoyo na ŋutulu rodri‚ Baritimayo, ŋiro lo Timayolo, laga ku konye a mudumudu lo magu kapalo‚ ti lu agbi’diki i kiko kutu yu. 47Kugbo lepe laga ayinga adi ilo de a Yesu lo Nazaretalo‚ lepe druga poki i laiza adi‚ “Yesu‚ Ŋiro lo Dawidilo, gbo’di ku ediyo ku na!” 48Kuwade ŋutulu rodri druga ringa lepe, druga takindra lepe adi ti lepe yiŋani tali. ’Bo lepe druga laiza ku teriŋi arodru adi‚ “Ŋiro lo Dawidilo‚ gbo’di ku ediyo ku na po!” 49Yesu druga lilira‚ druga kulia adi‚ “Luŋeta lepeŋa.” Ko druga lungu ŋutu laga ku konye a mudumudu ilo‚ druga takindra lepe adi‚ “Gbo’di ku teili logo‚ ŋine‚ lepe lo lungu do.” 50Lepe druga yokodru bongo nanyena ka‚ druga labara‚ druga pondra ku Yesuni. 51Yesu druga piza lepe adi‚ “Do nyadru ku na konaki do inyo ya?” Ŋutu laga ku kornye a mudumudu ilo druga teyitokindro lepe adi‚ “Katogoloni, ti na mete kana po!” 52Yesu druga takindra lepe adi‚ “Woroni‚ rugo nonuna atoruzo do.” Wuleŋa gele lepe druga memedra kana‚ druga kepodru bo na Yesuna i kiko yu.
Currently Selected:
MARAKO 10: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
