MARAKO 9
9
1Lepe druga takindra ko adi, “Na takindra ta a ’diri‚ ku’de ŋutulu lo lira nide kilo aka wangu tuwani ti inga ko aku medra tumata na Ŋun ina i pondra ku teriŋina.” 2I bo na luŋa bukiye‚ Yesu azonga Petero seku Yakobo ku Yoane‚ autuni ko i mere laga a lozolo ki yu ka’delo. Koŋo na lepena druga wudra mugu ka’de kasiko i koŋoni‚ 3’bo bongola ti lepe kine kpekpeza a nakpe salala‚ ’bo ŋutu lo lalazu bongola i ina ka de kilo ani romoki lalazu de tro. 4Eliya seku Mose druga puku kasikoni i tazu na kulia kasi Yesu. 5Petero druga takindra Yesu adi‚ “Katogoloni, a na’bu ti yi sakani inide‚ ti yi ’duke muruguzi musala‚ gele a nonu, gele a na Mose, gele ne’dena a na Eliya.” 6Lepe aku de kulia naga ma nye tazini kine‚ igbonaga ko akuze koru ina. 7’Diko ne’de druga ’diyundra, i muluzu na ko, druga roro le’de kuu i ’diko ŋanina kata yu adi‚ “Ilo de a Ŋiro lio laga ma na nyadrilo. Yiŋeta yiŋ lepe.” 8Wuleŋa gele ko ku boŋadri‚ ko aku medra le’de ŋutu ’do tro‚ ŋolo a Yesu ka’delo. 9Ma ko kiyundri i mere ki yu kanina‚ Yesu druga takindra ko kukuzu adi ka’bi ko ku trutrukoki le’de ŋutu kulia naga ma ko medrini kine‚ ti inga Ŋiro lo ŋutulo aku ŋiyu i dridriŋi na ŋutulu laga atatuwa kilo. 10Kuwade ko a’deba kine kulia de ma ko pipizi kulia kase dridriŋini adi ŋiye naga i dridriŋi na ŋutulu laga atatuwa kilona trugo adinyo. 11Ko druga piza lepe adi‚ “Katogolo ti kukuzuna kilo adi Eliya ti pondri a kayo gbandra ya?” 12Lepe druga teyitokindro ko adi‚ “Eliya lo ipondra a kayo a ’diri i ’delakindra na kapazi kilo giri soso‚ ’bo kulia ti Ŋiro lo ŋutulo kine awuro adinyo adi‚ lepe isasanya ku kuliata rodri, lepe i’da’data ya? 13’Bo na takindra ta, Eliya apondra azo, ’bo ko akondra lepe beti naga ma ko nyadrini ina‚ be naga ma wuroni ku kulia ti lepe kinena.” 14Ku ko laga apondra ku lotodiniki kiloni‚ ko druga medra mongoyo na ŋutulu rodri kasiko i nyogani‚ ku katogolo ti kukuzuna lo rerenya kasi ko kilo. 15Kuwade kugbo mongoyo na ŋutulu giri laga amedra Yesu‚ ko druga rambu ’beri koru‚ druga woku ku lepeni i roma ku lepe. 16Lepe druga piza ko adi‚ “Ta kilo rerenya kasi ko ku inyo ya?” 17Ŋutu gele laga i dridriŋi na mongoyolo druga teyitokindro lepe adi‚ “Katogoloni, na azondra ŋiro liolo konuni‚ igbonaga lepe gbo ku yuka naga na gokindra lepe kulia. 18Pirito giri naga ma lepe mogi lepe kine‚ lepe bita gupakindra lepe ka‚ kamula lupundro ku lepe i kutuni, lepe ŋedya rubi druga rurugugu. ’Bo na ama’yu mugu ku lotodiniki kolu kilo adi ti ko rikoro lepe kaŋo‚ ’bo koŋa aku romoki.” 19Yesu druga teyitokindro ko adi‚ “Ta laga a yuŋe naga ’ba rugo kilo de‚ na isasaka kasi ta luŋa muda ya? Na isasandru mugu ku ta luŋa muda ya? Zowuta lepe kuweni.” 20Ko druga zondra ŋiro ŋanilo ku lepeni. Ku yukana naga amedra Yesu‚ lepe druga gbogbongu lio koru‚ lepe druga ’duki ka‚ druga gbugbulungo mugu ti koputolo ilo yuku ku lepe i kutuni. 21Yesu druga piza monye lo lepelo adi‚ “Lepe gbo de ŋiyu nanu ya?” Lepe druga teyitokindro lepe adi‚ “Ŋiyu i toŋiro yu. 22Luŋa rodri lepe agupa i kima kata yu ku kare kata yu i tukarakindra na lepe‚ ’Bo ku do roromoki kondra kulia ku’de‚ gbo’di ku ediyo‚ loke yi po!” 23Yesu druga teyitokindro lepe adi‚ “Do adi‚ ‘Ku do roromoki!’ ’Bo kulia kine giri roromoki ku ŋutu laga arugolo.” 24Monye lo ŋirolo druga gbi ku teriŋi adi‚ “Na arugo. Loke na ku rugo nio naga ’baziŋana.” 25Kugbo Yesu laga amedra mongoyo na ŋutulu lo woku kugele kilo lepe druga ringa yuka narona, druga takindra lepe adi‚ “Na takindra do kukuzu‚ do naga a yuka naga na gokindra ŋutu kulia naga ’ba suwo ina‚ lupundri kaŋo ku lepe katani‚ ku lulubo ’do tro.” 26Ku yukana naga aresa ti agbogbongu lio koru‚ lepe druga lupundro kaŋo‚ ’bo ŋirolo druga gbo beti opu. Kuwade ŋutulu rodri druga kulia adi, “Lepe a’doro.” 27’Bo Yesu druga ’deba keni lo lepelo‚ i toŋizu na lepe ki‚ lepe druga ŋiŋiye. 28Kugbo Yesu laga alubo kadi yu‚ lotodiniki ti lepe kilo druga piza lepe tali adi‚ “Yi aku romoki rikodru lepe kaŋo gbandra ya?” 29Lepe druga teyitokindro ko adi‚ “Ilo ŋo de ani romoki lupundro ’bo gele’du ku maka na Ŋun.” 30Ku ko laga alupodru yu de‚ ko druga tu ku kiko lo Galililo. Yesu aku nyadru le’de ŋutu ka’bi ku dedeni. 31’Bo lepe asaka i togo’yu na lotodiniki kanye kilo‚ druga takindra ko adi‚ “Ŋiro lo ŋutulo ititiki ku ŋutulu kilo i kenisini. Ko ireremi lepe‚ ku lepe laga aremo‚ i bo na luŋa musala, lepe iŋiŋiye.” 32’Bo ko aku yo kulie ŋanilo‚ ko kukuze piza na lio. 33Kuwade ko ayenga Kaperinauma yu. Ku Yesu laga alubo kadi yu‚ lepe druga piza ko adi‚ “Ta tataazu kulia naga inyo i kiko yu ya?” 34’Bo ko ayiŋa tali igbonaga ko atataazu kulia kase dridriŋini i kiko yu adi ŋa laga kase dridriŋini a druma koru ina. 35Lepe druga gbi’diki ka‚ druga lungu ŋutulu mere gele ku konye mure kilo, druga takindra ko adi, “Kugbo le’de ŋutu nyadru gbo a kayo, ti lepe gbo’dini i bo na ŋutulu giri‚ ti lepe gbo’dini a upiye lo ŋutulu giri itro.” 36Ku lepe laga a’deba ludriŋa le’de, lepe druga toliriza lepe kasiko i dridriŋini. Ku lepe laga awundra lepe i kidini‚ lepe druga takindra ko adi‚ 37“Ŋutu laga lo rukundro ludriŋa gele laga be ilo de ku kari kuwe kinelo‚ ŋolo rukundro na, ’bo ŋutu laga lo rugo nalo agbo’da rugo nani, ’bo rugo Ŋun lo sunyundro nalo.” 38Nyenaga Yoane atakindra Yesu adi, “Katogoloni‚ yi amedra le’de ŋutu i rikodru na dreria ku kari konu kine‚ ’bo yi agoza lepe igbonaga lepe ani kekebu yina.” 39’Bo Yesu druga kulia adi‚ “Ku gogota lepe‚ igbonaga le’de ŋutu lo kondra kone laga ku teriŋi ku kari kuwe kinelo aka romoki ’dadru na wuleŋa geleni. 40’Bo ŋutu laga ani siga yilo lepe gbo ku yi kugele. 41Na takindra ta a ’diri, le’de ŋutu lo tikindra ta pio i mozu igbonaga ta gbo ku kari ti Kristo kinenalo, lepe aka zara rope lonyeloni. 42“Le’de ŋutu lo tikindra ludriŋa gele i dridriŋi na ŋazi lo’di’diki lo rugo na kilo i bayilo, kedri kodro angu a na’bu kugbo kizo naga a ziyena na munuki ku lepe i muruni i biriŋozini na lepe suburi kata yu. 43Ku keni lolu lo tikindra do i bayi, ’duŋoro lepe. Troru lubo nonu i yeŋo kata yu ku keni laga a trutru‚ alangu naga mo do utini i kima naga a noketana kata yu ku kenisi mure 44i piri naga ma kokora ’bani tatuwa, naga ma kima ’bani tatuwi]. 45Kugbo moko lolu lo tikindra do i bayi‚ ’duŋoro lepe. Troru lubo nonu i yeŋo kata yu ku moko laga a trutru alangu naga mo do biriŋozini ku mukuzi mure i kima naga a noketana kata yu [ 46i piri naga ma kokora ’bani tatuwa‚ naga ma kima ’bani tatuwi]. 47Kugbo koyita lolu lo tikindra do i bayi‚ ku’dutu lepe. Troru lubo nonu naga i tumata na Ŋun ina kata yu ku koyita gelena alangu naga mo do biriŋozini ku konye mure i kima naga a noketana kata yu‚ 48i piri naga ma kokora ’bani tatuwa‚ naga ma kima ’bani tatuwi. 49’Bo kimana i’delaki ku ŋutulu kilo giri i ’berini be ’balana. 50’Balana a na’bu‚ ’bo kugbo kelei lo ’balalo alupodru‚ ta ikukundra kelei ŋaŋilo ku inyo ya? Gbo’dita ku ’bala kasu katani. Gbo’dita ku teili lo trotro kasu dridriŋini.”
Currently Selected:
MARAKO 9: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
