MARAKO 8
8
1I kulu luŋa de‚ Kugbo mongoyo na ŋutulu kilo laga atunundra ’beri ’do‚ Yesu druga lungu lotodiniki kanye kilo kanyeni, druga takindra ko adi‚ 2“Na gbo ku ediyo ku mongoyona, igbonaga yi asaka kasi ko tinade luŋazi musala ’bo ŋo lasiko lo nyenyei ’bayi ina. 3Ku na sonyodru ko kasiko i ’beŋi yu ku mago‚ ko i’do’dorotu i kiko yu‚ ’bo ku’de kilo ŋiyu pazo.” 4Lotodiniki ti lepe kilo druga teyitokindro lepe adi‚ “Yi roromoki tikindra kilo ŋutulu de nyosuto inide i diŋo katani adidinyo?” 5Lepe druga piza ko adi‚ “ ’Diloto kasu kine muda ya?” Ko druga teyitokindro lepe adi‚ “Burio.” 6Lepe druga takindra mongoyona kukuzu adi ti gbigbi’dikini ka. Lepe druga ’dumundra ’diloto burio kine‚ ku lepe laga atikindra iyete‚ lepe druga ŋoŋowuzu ko‚ druga takindra lotodiniki kilo ma ko ku ’delakindri ku mongoyona i koŋoni. 7Somo lotritriki ku’de gbo kasikoni itro. Ku Yesu laga a’boriza ko‚ lepe druga takindra kukuzu adi ti kilo ŋo de ’delakini ku ŋutulu kilo i koŋoni itro. 8Nyena nyosuni ko‚ ko ayiyimotu. Ko druga pependra limbito ti ’diloto na ŋoŋoyi kine i gobela katani zore zore burio. 9Ŋutulu kulu gbo be alifu iŋmani. Lepe druga sonyodru ko we yu. 10Wuleŋa gele lepe alubo i ki’bo kata yu kasi lotodiniki kanye kilo. Ko druga tu i ka na Dalamanutana yu. 11Nyenaga Farisayo kilo apondra, druga poki i rerenya ku Yesu‚ ’bo ko druga ga’yu kpiye ku lepeni lo ŋiyu i ’diko yulo i modyu na lepe. 12Teili lo lepelo druga nyonyora, lepe druga kulia adi‚ “Ina yuŋe na tinadena ga’yu kpiye gbandra ya? Na takindra ta a ’diri‚ kpiye le’de aka tiki ina yuŋe na tinadenani.” 13Lepe druga kolokindro ko‚ ku lepe laga alubo i ki’bo kata yu ’do‚ lepe druga laŋadru i lu lozo. 14Nyenaga lotodiniki kilo aboŋo zondra na nyosuto, ’bo ’dilo gele’du naga kasikoni i ki’bo katani. 15Yesu druga tepizo ko adi‚ “Gbo’dita ku konye‚ gbo’dita go ku kape ti Farisayo kilo ku ti Herode kilo.” 16Ko druga tataazu kulia kase dridriŋini adi‚ “Yi ’ba nyosuto.” 17Yesu ku dendri kulia kine‚ lepe druga piza ko adi‚ “Ta yoyolozu kulia kasu dridriŋini adi ta ’ba nyosuto gbandra ya? Ta inga aku meri ya? Ta inga aku yo’yu kulia ya? Teiliko kasu kilo a logo ya? 18Ta gbo ku konye‚ ta ani medri ya? Ta gbo ku suwo‚ ta ani yingi ya? Ta ani rambu kulia ya? 19Kugbo kazu na laga ŋoŋowuzu ’diloto mukana kine ku ŋutulu laga alifu mukana kiloni‚ ta apependra ’diloto na ŋoŋoyi kine i nyakaleta kata yu zore zore muda ya?” Ko druga teyitokindro lepe adi‚ “Mere gele ku konye mure.” 20“ ’Bo ’diloto na ŋoŋoyi kine i gobela kata yu zore zore muda ya?” Ko druga teyitokindro lepe adi‚ “Burio.” 21Yesu druga piza ko adi‚ “Ta inga aku yo’yu kulia kine ya?” 22Kugbo ko laga apondra Betesaidani‚ ŋutulu ku’de druga zondra ŋutu ku Yesuni laga ku konye a mudumudu, druga ma’yu ’beri ku lepeni adi‚ ti lepe ’bole ŋutu ŋanilo. 23Lepe druga ’depadru keni lo ŋutu laga ku konye a mudumudulo, druga tolupodru lepe i ’ba katani kaŋo‚ druga yagu kamula ku lepe i konyeni, druga tanyakindra kenisi kanye kilo ku lepe kini‚ druga piza lepe adi‚ “Do roromoki medra le’de ŋo ya?” 24Lepe druga boŋadru ki yu‚ akulia adi‚ “Na amedra ŋutulu‚ ’bo ko puru be kade lo woworotu.” 25Kuwade Yesu druga tanyakindra kenisi kanye kilo ku lepe i konyeni ’do. Ŋutulo druga medra kana ’de’de’de, druga totoruwe, druga medra kapazi kilo giri a lo’bu. 26Yesu druga sonyodru lepe ku lepe i ’ba yu‚ ti atakindra lepe adi‚ “Kugbo ’ba laga ilo de kpe‚ ku lulubo kata yu.” 27Nyenaga Yesu autu kasi lotodiniki kanye kilo i ’beŋito laga Kaisaria Filipo kilo i laga yu‚ lepe druga piza lotodiniki kanye kilo i kikoni adi‚ “Ŋutulu kilo kulia adi na a ŋa ya?” 28Ko druga teyitokindro lepe adi‚ “Ku’de kilo ŋutulu adi do a Yoane lo tikindra baputizilo, ku’de kilo adi‚ Eliya‚ ku’de kilo adi le’de ŋutu i dridriŋi na kakeyo kilo.” 29Lepe druga piza ko adi‚ “ ’Bo laga ta lepe‚ ta kulia adi na a ŋa ya?” Petero druga teyitokindro lepe adi‚ “Do a Kristo.” 30Yesu druga takindra ko kukuzu adi ka’bi ko ku trutrukoki le’de ŋutu kulia kanye kine. 31Yesu druga poki i togo’yu na ko adi‚ “Ŋiro lo ŋutulo isasanya ku kuliata rodri‚ temezi kilo ku ka’i’ila drumala kilo ku katogolo ti kukuzuna kilo ipapazu lepe‚ ireremi lepe‚ ’bo lepe iŋiŋiye i bo na luŋa musala.” 32’Bo lepe atazu kine kulia de gboŋa. ’Bo Petero azonga lepe i merete‚ druga poki i ringa na lepe. 33’Bo ku Yesu laga alopugo mugu i medra na lotodiniki kanye kilo‚ lepe druga ringa Petero‚ akulia adi‚ “Uti kuwe ki’di yu Satani! ’Bo do ilo ani yo’yu kulia ti Ŋun kine‚ ’bo do lo yo’yu kulia ti ŋutulu.” 34Ku lepe laga aluŋundra kanyeni mongoyo na ŋutulu kilo ku lotodiniki kanye kilo‚ lepe druga takindra ko adi‚ “Kugbo le’de ŋutu lo nyadru kepodru bo niona‚ ti lepe pane mugu kaŋo‚ ti lepe ’dukundri kedini lonye laga a larelo‚ ku keporo na. 35Kugbo ŋutu lo nyadru ritundro ru nanyenalo, lepe iteteliki ru nanyena kaŋo‚ ’bo ŋutu laga lo telikindro ru nanyena ku kulia kuwe ilo‚ ku ti kuu na’buna itro‚ lepe iririo ru nanyena. 36’Bo kugbo ŋutu laga atunakindra mugu kapazi ti ina ka de kilo giri‚ ti lepe ilo itukarakindra ru nanyena kaŋo‚ kilo kapazi de ilogu lepe adidinyo ya? 37’Bo ŋutulo itogboza ru nanyena ku inyo ya? 38Kugbo le’de ŋutu gbo ku yukuwe ku na‚ ku kulia kuwe kine itro‚ i ina yuŋe na tinade naga ’ba teiliko laga mŋgba naga na kondra kulia naro itro ina de katani‚ Ŋiro lo ŋutulo igbo’da ku yukuwe ku lepe itro i luŋa laga ma lepe yeŋundri ku malaika lokiye kilo i mo’yu na Monye lonyelo lu.”
Currently Selected:
MARAKO 8: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
