MARAKO 12
12
1Nyenaga Yesu apoki i takindra na ko kulia na guguma‚ adi‚ “Le’de ŋutu a’udru zabibu kanye melesi kata‚ a’begu mari i nyogani, a’boga drili na liyani suwe ti konye ti zabibu kine‚ a’dugo morogo‚ druga kolokindro melesi ŋanina ku katiyu kiloni‚ ti lepe lu utu i ne’de ka. 2Ku luŋalo laga ayeŋundra‚ lepe druga sonyodru upiye le’de ku katiyu kilo yu ma lepe ku rumbi konye ku’de ti melesi na zabibuna kasiko yu 3’Bo ko amoga lepe‚ akidro lepe‚ druga sonyodru lepe bo yu kana. 4Monye melesilo druga sonyodru upiye le’de ’do kasiko yu‚ ’bo ko agbudro lepe i kuwe‚ atikindra lepe yukuwe a druma. 5Monye melesilo druga sonyodru le’de‚ ’bo ko arembu lio. Kuwade ku ku’de ŋutulu rodri‚ ku’de kilo ko akidro‚ ku’de kilo ko arembu. 6Druga koloki ŋutu gele‚ ŋiro laga ma lepe nyadrilo. I bo ŋanina lepe asonyodru lio kasi ko yu druga kulia adi‚ ‘Ko isosobu ŋiro liolo.’ 7’Bo kulu katiyu de druga kulia kase dridriŋini adi‚ ‘Ilo de nye laga a kalumelo. Pondrita ti yi reme lepe kaŋo‚ ma luma kilo gbo’da a kayaŋa.’ 8Ko druga moga lepe‚ druga reremi lepe druga biriŋodru lepe kaŋo i melesi katani. 9Monye melesilo ikondra inyo ya? Lepe ipopondra i tukarakindra na katiyu kilo‚ ’bo lepe itikindra melesi ŋanina ku ku’de katiyu. 10Ta aku kendra kine kulia na wuwuro kine de ya? Adi‚ ‘Ŋurupi laga ma ka’duko kilo redrilo, ayeŋundra a ŋurupi laga a druma lo goŋe lo kadi. 11Matalo lo kondra ilo kone de‚ laga kaya konyeni a kulia ti rame na ’beri.’ ” 12Ko druga modyu moga na Yesu‚ ’bo ko akuze mongoyona igbonaga ko adeni adi kine kulia de gupa kase ’berina. Kuwade ko druga kokoloki lepe, druga ko tutu. 13Nyenaga ko asunyundro ŋutulu ku’de ti Farisayo kilo ku ku’de ti Herode kilo ku Yesuni ma ko ku loga lepe i kulia naga ma lepe tazini kine. 14Kugbo ko laga ayeŋundra‚ ko druga piza lepe adi‚ “Katogoloni, yi adeni adi do a ŋutu laga a ’diri‚ do ani ’bo’bodya ŋutulu‚ igbonaga do ani rambu kulia ti todruma na ŋutulu kinena‚ ’bo do togo’yu kiko lo Ŋun ilo a ’diri. Kukuzuna arugo adi ku yi tiki Kaisari mosorolo kuwa ’bayi? 15Ku yi tiki kuwa ’bayi?” ’Bo Yesu adeni toŋulupa nasikoŋana, druga piza ko adi‚ “Ta modyu na gbandra ya? Zowuta silingitana kuweni ku na mete.” 16Ko druga zondra. Lepe druga piza ko adi‚ “Ina kodudo de ku wure laga kinilo a ti ŋa ya?” Ko druga teyitokindro lepe adi‚ “A ti Kaisari.” 17Yesu druga takindra ko adi‚ “Tikita Kaisari kapazi ti Kaisari kilo‚ ’bo tikita Ŋun kapazi ti Ŋun kilo.” Ko druga rambu ’beri ku kulia ti lepe kine koru. 18Nyenaga Sadukayo, lo kulia adi ŋiye na ŋutulu laga atatuwa kilona ’bayi kilo ayeŋundra ku Yesuni‚ druga piza lepe‚ adi‚ 19“Katogoloni, Mose awurokindro ŋutu adi ku luŋase lo ŋutu laga atuwa ku lepe akolokindro nokana‚ ’bo ti lepe aku kolokindro ŋiro‚ ŋutu ŋani ku lupe noka ŋanina ma yuŋundri ŋazi ku luŋase i pirini. 20Kazu luŋaseri ku’de burio. Kayolo azondra noka. Ku lepe laga atuwa‚ aku kolokindro ŋazi. 21Togi murelo druga lubo lepe‚ druga atuwa ti inga ŋazi ’bayi‚ druga togi musala ilo de. 22Ko laga burio kilo aku kolokindro ŋazi. I bo ŋanina nokana druga tutuwa itro. 23I luŋa lo ŋiye lu‚ lepe igbo’da a noka niŋa? Igbonaga ko burio giri a’deba lepe a noka nase ina.” 24Yesu druga teyitokindro ko adi‚ “Ta aku de kulia na wuwuro kine ku teriŋi na Ŋun ina itro‚ nyena liaŋani ta. 25’Bo ku ŋutulu kilo laga aŋiye i dridriŋi na ŋutulu laga atatuwa kilo‚ ko aka lundrani‚ ’bo aka tiki i lunyani, ’bo ko igbo’da beti malaika ti ’diko kilo. 26Ku kulia ti ŋutulu laga atatuwa kilo ŋona ko iŋiŋiye, ta aku kendra i buku na Mose katani‚ i piri naga na wuroni kulia ti buruzuti nu ya? Adi Ŋun atakindra lepe adi‚ ‘Na a Ŋun lo Abarahama, Ŋun lo Isaka‚ Ŋun lo Yakobo ilo.’ 27Lepe ani gbo’da a Ŋun lo ŋutulu laga atatuwa kilo‚ ’bo a lo ŋutulu laga zoru. Ta aliaŋa koru.” 28Katogoloni le’de lo kukuzuna druga pondra‚ ’bo ayinga ko i rerenya kase dridriŋini. Kugbo lepe laga ayinga adi Yesu teyitokindro ko soso‚ lepe druga piza lio adi‚ “I dridriŋi na kukuzuki kine‚ naga ya naga a kayo?” 29Yesu druga teyitokindro lepe adi‚ “Kayona gbo de‚ ‘Isiraeli kilo‚ yiŋeta: Mata Ŋun likalo‚ Matalo ilo gele. 30’Bo nyare Mata Ŋun lolulo ku teili lolulo giri‚ ku ru nonuna giri ku rambu nonuna giri‚ ku teriŋi nonuna giri.’ 31Togi murena nyena de: ‘Nyare ŋutulu lo saka konu gurubeni kilo be na nyadrini do muguna.’ Kukuzu ne’de naga na rodru kine de ’bayi.” 32Katogoloni lo kukuzunalo druga kulia ku lepe adi‚ “A ’diri Katogoloni, do kulia soso adi lepe ilo gele‚ le’de ’bayi ŋolo a lepe ka’delo. 33Ku do nyadru lepe ku teili giri‚ ku dendrana giri‚ ku teriŋina giri‚ ’bo ku do nyadru ŋutulu laga konu gurubeni kilo be na nyadrini do muguna‚ kine kulia de arodru kapazi giri laga ma ŋutulu ’udri ku ’i’izi kilo.” 34Kugbo Yesu laga amedra adi lepe teyitokindro ku totore‚ lepe druga takindra lepe adi‚ “Do ani gbo’da pazo i tumata na Ŋun ina.” I bo ŋanina le’de ŋutu ’bayi lo togo’yu teili i piza na lepe ’do. 35Ku Yesu itogo’yuni i kadi na Ŋun ina kata yu, lepe druga piza ko adi, “Katogolo ti kukuzuna kilo kulia adi Kristolo a ŋiro lo Dawidi adidinyo ya? 36’Bo Dawidi ku mugu akulia ku Yuka Nakiyena adi‚ ‘Matalo atakindra Mata liolo adi‚ Gbi’dikini i keni lio lo lutatelo yeŋadru tozo i ’delakindra na na mero kolu kilo konu mukuzini.’ 37Dawidi ku mugu lungu lepe a Mata. Kuwade Kristo gbo a ŋiro lo Dawidi adidinyo ya?” ’Bo mongoyo na ŋutulu rodri kilo ayinga Yesu ku nyola. 38Ku lepe itogo’yuni lepe akulia adi‚ “Gbo’dita go ku katogolo ti kukuzuna kilo‚ lo nyadru woro ku bongola naga a nazo kine‚ lo nyadru romaniki i pirito na togboreni kapazi kine‚ 39lo nyadru si’deta naga a na’bu kine i kadizi naga a momoreta kine kata yu‚ lo nyadru gbigbi’diki naga na kukuka i gbadru yu kine‚ 40lo dudumuza awuzio ku kadizi kasiko kine‚ lo magu Ŋun a nazo ma se ku metani ’busa kilo. Ko iŋeŋeraki kulia a naro arodru.” 41Ku Yesu laga agbi’diki ka i piri na gumani riyena i koŋo yu‚ lepe druga bonga mongoyo na ŋutulu i naga ma ko gumbi riye i piri na gumani riyena kata yu ina. ’Bo korineko kilo rodri agumba riye kine rodri. 42Nyenaga awuzi naga a lemerina apondra, druga gupakindra sente naga a na’di’diki mure‚ ko gbo a senteta druma gele. 43Yesu druga lungu lotodiniki kanye kilo kanyeni, druga takindra ko adi‚ “Na takindra ta a ’diri‚ ina awuzi naga a lemeri ina de agupakindra alangu ŋutulu giri laga lo gumba i piri na gumani riye kata yuna. 44Ko giri gumba ’doketa kilo de ŋiyu i tokorine nasena katani‚ ’bo lepe naga a lemerina‚ agupakindra kapa kanye giri laga ti telemera, laga a kapazi ti lepe ti ru itro kilo giri.”
Currently Selected:
MARAKO 12: KNT77
Highlight
Share
Copy
Want to have your highlights saved across all your devices? Sign up or sign in
Kakwa New Testament © Bible Society of Uganda, 1974, 1977.
