Johan 10
10
Jisu Kuopfhe Keviu Zo
1“A nieko ki ketho-u puya, kehoupuorei careu ze tekuobouu nu le mo di cha kekrei ze meli leyakezhamia kerügumia mu mia vie sekecümia zo. 2Careu ze di leyakezhau tekuoko kepfheu zo. 3Care kepfheu care khrüshü puo tsüya mu tekuoko puo pfhe silieya, puoe puo kuoko za kie di uko kieya, sidi cha tha ze parshüya. 4Puo süko ze phre pralie ro süko mhodzü rie di uko shüta ze tuoya mu tekuoko rei puo siemedziya, kekreilamonyü sükoe puo pfhe siyakezha la. 5Süko kekreimia siemedzita monyü ta sümia therütaya, süko kekreimia pfhe siya kemo la.” 6Jisue uko ki dievi hau pushü, derei uko puo kepuca silie mota.
7Süla Jisu la sie uko ki, “A nieko ki pu toushütuo, a tekuoko careu zo. 8A mhodzü kevormia pete kerügumia mu miaviesekecümia zo; süla tekuoko süko pfhe rünyü mote. 9A careu zo, kehoupuorei a geinu keleu kelalie zotuo, tsiu puo tuo ler mu tuo pratuo di puo ca ngulietuo. 10Kerügumia rügutuoü, mia dukhrituoü mu mha pekatuoücü la rübei voryakezha zo. A zowe mia bu kerhei ngulie mu u ketshukelhuo ngulieketuo la kevor zo.
11“A tekuo kepfhe keviu zo, tekuo kepfhe keviue tekuoko la puo phou khashüya. 12Kuopfhemia kemo, mia bu puo zhakhrü ze ketuou tsiu tekuoko puo vie kemo-u we socie vorkezhü ngukeshü ki puo tekuoko khawa di tataya; sidi socie bu tekuoko telie mu uko phruokecürewaya. 13Mia bu puo zhakhrü ze ketuou tataya, kekreilamonyü puoe tekuoko rüli leya kemo la. 14A tekuo kepfhe keviu zo. A a vieko si mu a vieko rei a si ba, 15a Puoe a si keba tuoi a rei a Puou si ba. Mu a we a kuoko la a phou khashütuoüzhie. 16A kuo kro hau nu ba kemo tekuo kekrei rei ba saluo. A süko rei ze vorlie morosuo, mu süko a pfhe rünyütuo. Sidi tekuokro puo chü, kepfhe rei puotatuo. 17Puou a khrieya, kekreilamonyü a a phou khashütuoüzhü mu a süu ngu lalietuocü la. 18Miapuorei a kinu süu lielieya mo#10:18 Leshü kewe huo nu süu lielieta mo zo isi. a thuo a medota di süu khashütuoüzhü, mu a süu khashüketuo kekuo ba mu chü lalieketuo kekuo rei ba. A a Puou kinu diekhakeshü hau ngulie.”
19Die hako la Judako chükho kekrei lawa. 20Uko mia kekra sie, “Puo terhuokesuo zeya mu mecie mote! Kiüdi puo die rünyütuo ga?” 21Kekreiko sie, “Die hako terhuokesuo bu u kebi zeketuomia die mo; kimhie di terhuokesuo puoe mhiciemia mhi chü pevishütuo ga?”
Judako Jisu Melieketa
22Süki Jerusalem nu rüsuoki Kenyükecünyiu nyi. Süu teisei ki ta, 23mu Jisu rüsuokiu nu Solomon kifükhro nu tuo vozhü. 24Süla Judako vor puo houpfülie di puo ki, “No kichiepuo hie bu mhalelie kemo chü ba zotieya mu? No Khrista üliro hie ki pu kemesashücie.” 25Jisu uko ki, “A nieko ki pushüwate, mu nieko pele mote. A a Puou za nu mhachüyakezhako sü a zhapuko zo, 26derei nieko peleya mo, kekreilamonyü nieko a kuoko kemo la. 27A kuoko a pfhe rünyüya. A süko si ba, mu uko a siemedziya. 28A kechachie kerhei se uko tsüya, mu uko mhakipuorei katalie lho. Siro miapuorei a dzie nunu süko sesetalie lho. 29Mhapuorei a Puoue khapie a tsükeshüu ki kezha jü mu miapuorei Puou dzie nunu süu sesetalie lho zo. 30A mu Puou hienie sü puo zo.”
31Süki Judako ketsie pie puo vatuoü lata. 32Sitse Jisu sie uko ki, “A a Puou kinu kevor mhatho kevi kekra pie nieko kieshü. Nieko mhatho süko kiu la ketsie pie a vatuoüya ga?” 33Uko la sie puo ki, “Mhatho keviko la hie ketsie pie n vatuoü tha mo, derei no Ukepenuopfü ketha die pute, kekreilamonyü no themia puo zo di n thuo n chüpie Ukepenuopfü üketa la.” 34Jisu sie uko ki, “Nieko zho-u nu thupie kezhü, ‘A puya, nieko terhuomia zo,’ isi mo me? 35Ukepenuopfü die u ki kevormia üse ‘terhuomia’ üdi pu, mu kethodieu vakelie jü üro, 36siro ‘A Ukepenuopfü Nuou zo’ ikeshü la niekoe Puou thuo chü kemesalie di ketsepie kijü nu keshüu üse Ukepenuopfü thaü tuo le? 37A a Puou mhathoko chüya moliro, nieko a pele hie. 38Derei a süko chüya liro, nieko thuo a pele morei, mhathoko we peleliecie, sitse niekoe Puou a nou ba mu a rei Puou nou bakecü silietuo.” 39Sitse uko puo telietuoü la sie, derei puo uko dzie nunu tata.
40Siro puo la sie Jordan rü lutsakhie Johan-e therieki dzülu pie mia ketsü thechüu nu vo di sünu bata. 41Süla themia kekra puo ki vor di sie, “Johan zowe u ngo zasi puorei chü mo, derei Johan themia hau dze kepu pete ketho phreta ze ha.” 42Sidi sünu themia kekra puo pelelie.
Currently Selected:
Johan 10: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
