Johan 9
9
Jisu mu Mhiciemia Puo
1Siro puo tuo vozhü tse puo mhicie di penuokelie puo ngulie. 2Sitse puoe pethakelieko puo ki, “Kepethau, themia hau puo mhicie zo di penuokelie, puo mo puo krü kephouma la ga?” 3Jisu sie, “Puo kephouma morei puo krü kephouma la rei mo, sirei puo geinu Ukepenuopfü mhathoko pie pesipengushüketuo la hiketa zo. 4Teiso keba ki úko a ketsekeshüu mhathoko chü morosuo; miapuorei mhachülie kenjütaketuo teizeizhau vorzhie. 5A kijü nu keba chie a kijü kezieu zo.” 6Puo hau pukeshü sie, puo mhitsiepie kijü shü, di mhitsie sapie nyoba chülie di nyoba se themia süu mhinie kenheshü, 7sidi puo ki, “No vo di Siloam zieu nunu khrüwalie.” (Siloam ca Ketsekeshü). Süsie puo vo di khrüwa mu mha ngulie di la vorta. 8Süla puo zanuoko mu kekreimia puo hadzü khruocü ba di kenguko sie, “Themia hau ba di khruocüyakecüu mo me?” 9Huomia sie, “Puo süu zo,” si, kekreiko sie, “Puo mo, derei puo riecü puote ha!” Derei puo sie, “A süu zo,” ita. 10Derei uko sie, “Siro no kikidi mha ngulieta ga?” sita. 11Puo sie, “Jisu ükecü themiau nyoba chülie di pie a mhinie nyhoshü di a ki, ‘No vo Siloam nu khrüwalie,’ siru a vo di khrüwa tse a mha ngu parte.” 12Sitse uko puo ki, “Süu kirapuo vota ga?” si. Puo sie, “A si mo,” sita.
Farisiko Shürhokelieu Dze Ketsokecü
13Süla uko tsie mhodzü puo mhiciekecüu ze Farisiko ki vo. 14Jisu nyoba chülie di puo mhi chü pevikeshü nhie sabat zha. 15Süsie Farisiko puo kimhie di mha ngulie shicü dze ketso la. Puoe uko ki, “Puo nyoba pie a mhinie kenheshü. Süsie a vo khrüwa ru tsie we mhanguliete.” 16Sitse Farisiko huo sie, “Themia hau Kepenuopfü kinu vor mo, puo sabat zho-u zeya kemo la,” si. Derei kekreiko sie, “Kimhie di kephoumamia puo zasi hakemhieko chülietuo dimu?” Sidi uko kediekreita. 17Süla uko mhicieu ketso la di, “No puo üse supuo üya ga? Puo n mhi chü pevishüwate.” Puo sie, “Puo siedzekesimia puolie,” ita.
18Sirei Judako themia süu tsie mhodzü puo mhicie di mha ngulieta ücü puo krünie kie zoshü di ketso kemo ki pele mota. 19Sidi uko unie ketso di, “Hau nnie nuou puo mhicie di penuokelieu zo me? Siliro kimhie di puo mha ngulieta ga?” 20Puo krünie sie, “Hau hienie nuou zo, mu puoe puo mhicie di penuolie; 21derei puo kimhie di tsie mhanguliete shi morei supuo puo mhi chü pevishü shi hie si mo. Puo ketsoliecie; puo rei phichüte, mu puo thuo süu dze pushütuo.” 22Puo krünie hau puketae Judako keprei la zo, kekreilamonyü ukoe kehoupuorei Jisu üse Khrista üdi phrakecümia Sinagog nunu u whuowatuo üdi pepi se baketa la. 23Süla puo krünie sie, “Puo rei phichüte, puo ketsoliecie,” ikeshü zo.
24Süsie va kenieu va uko puo mhicie di penuokelieu kie lalie di sie puo ki, “Thetshe pie Ukepenuopfü tsüliecie! Puo kephoumamia puo zocü hie si ba.” 25Puo sie, “Puo kephoumamia mo mo shi a sü si mo. A mhapuo si ba, süusü a mhicie ru tsie we a mhanguliete.” 26Sitse uko puo ki, “Puo n gei kedipuo chüshü ga? Puo kimhie di n mhikecieu chü pevishü ga?” 27Puo sie, “A pushü zorei nieko rünyü mvüte. Nieko kiüdi süu rünyü la nyüya ga? Nieko rei sa puoe pethakeliemia chüta nyüya me?” sita. 28Süla uko puo kenga di sie, “No we themia süue pethakeliemia, derei hie we Mosae pethakeliemia. 29Ukepenuopfü Mosa ki mha pukeshü hie si ba, derei themia hau la we puo kirapuo nu vor shi hie si mo,” sita. 30Themiau la sie, “Mha süu, mha u ngo puote. Niekoe puo kirapuo nu vor shicü si mo, sirei puo a mhinie chü pevishü. 31Ukepenuopfü kephoumamia pfhe rünyüya mo, derei kehoupuorei puo rüsuo mu puo medo-u chüyakezhamia pfhe rünyüyacü hie si ba. 32Siro kijü chülie tsenu vor tsie ketso miapuorei puo mhicie di penuokeliemia mhi chü pevi lakeshü dze we si mo zoluo. 33Themia hau Ukepenuopfü kinu vor zo kemosie puo mha hakemhie chülie kenjü zo.” 34Sitse uko puo ki, “No kephouma nunu penuolie tou di hie pethatuo üya le?” Sidi uko puo whuowa.
Ruopfü Kitsa U Mhikecie
35Jisue uko puo whuowata ücü silie, mu puo ngulie tse puo ki, “No Themia Nuou pelete mo?” 36Themiau sie, “Kezhau, süu supuo ga? A bu puo pelelieketuo la a ki pucie.” 37Sitse Jisu puo ki, “No puo ngu reiwate, mu tsie n ze kerüchü kethau puo zo.” 38Sitse puo sie, “Niepuu, a pelete.” Sidi puo tsu puo rüsuota. 39Jisu sie, “A mia capi chütuoü kijü hanu vor, sidi nguya kemoko bu ngulietuoü mu nguyakezhako bu u mhicietaketuo la.” 40Puo khieki ketha Farisiko huo hau si di sie, “Hie mhi rei cie ücü pu tha mo nhie?” 41Jisu uko ki, “Nie mhicie ro nie kephouma jütatieciü, derei nie ‘Hie nguya’ isiya, süla nie kephouma ba zoluo.”
Currently Selected:
Johan 9: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
