Mark 6
6
Nazaret nu Jisu Melieketa
(Mat 13:53-58; Luk 4:16-30)
1Süsie puo sünunu pra di tuo puo thuo puo ra vorta, mu puoe pethakelieko rei puo siemedzi vo. 2Mu sabat nhie puo sinagog nunu mia petha mu puo die kesi kheko u ngo phita. Sidi uko sie, “Kirapuo nu themia hau mha hako pete nguliete mu? Siro kha puo ketsü mha ha rei kikecüpuo ga? Kikidi puo dzie nunu mha kezha hikecü chülieya mu! 3Hauha sei mistiri, Maria nuou mo me? #6:3 Leshü ewe huo nu sei mistiriu mu Maria nuo. siro Jakob mu Joses tsiu Juda mu Simon-nuoko dzürieu mo me? Siro puo üpfünuoko rei u ze haki lhou ba mo üme?” Sidi uko puo gei u nei mota.#6:3 Moro tetsuta. 4Sitse Jisu sie uko ki, “Siedzekesimia puo thuo puo rakhe nu, puosepuoyiemia mu puo kicükinumia donu zo kemosie puo rhu kemo jü.” 5Sidi puo kechümia kro puo bieshü di süko chü keshürhokeshü sie sünu mha kezha chülie lhota. 6Mu themiako mha pele kemvü la puo bu puo ngo phita.
Jisue Kerekenieko Ketsekeshü
(Mat 10:5-15; Luk 9:1-6)
Süsie puo rühou rünako nu vo di mia petha. 7Siro puoe kerekenieko kielie di mia kenienie ketseshü, mu uko bu mesa kemo ruopfüko whuolie kevi kekuo pie uko tsü. 8Siro uko bu u rüve ki kethe puo rübei sie niekhrüda, likhuo, shükeiraka puorei se hienushü, 9uko bu phikou nyülie, derei boulie thuli we pfü hienushü. 10Puo uko ki, “Nieko kehourapuorei ki puo nu lelie ro, tuota kemochie sünu ba zolie. 11Mhanuü thechü huo nu nieko ze mvüta mu nieko die rünyü mvüta ro nie sünunu lataketuo ki uko kepetsou zhapu la nie phi nu nyophe rei kepfhüwaliecie,” si. 12Süla ukoe tuo pra di themia pete bu thenoukedilienukecü pupie mia petha. 13Mu uko terhuokesuoko kekra whuowa, mu tier pie kechümia kekra kenheshü di süko chü keshürhoshü.
Johan Mia Dzülukepfüu Se
(Mat 14:1-12; Luk 9:7-9)
14Süki Jisu za meyie tuoketa kediu Herod rei silie. Sitse huomia sie, “Johan mia dzülukepfüu kesia nunu rheilasierte; süla puo geinu kekuo mhatho hako chüyakezha zo.” 15Derei kekreiko sie, “Puoe Elija zo,” si. Mu huomia sie, “Puoe thiedzü siedzekesiko mia puo tuoi puo rei siedzekesimia puota zo,” sita. 16Derei Herod rei süu silie di sie, “Johan, hadzü a puo tsü ziekewau rheilasiete,” ita.
17Kekreilamonyü Herod thuo puo siezeu Filip kimiapfü Herodia la mia ketseshü di Johan tepie kedieki nu shüwa; Herod-e thenu süpfü lielietacü la. 18Kekreilamonyü Johan Herod ki, “No n thuo n siezeu kimia liekecü thezho mo zowe,” ikeshü la. 19Süla Herodiapfü rei Johan gei puo nei mo di puo dukhriwa nyü sie. Derei puo silie kenjüta, 20Herod-e Johan miathomia puo mu kemesamia puo ücü la puo prei di puo rüguose ba. Siro puoe puo die rünyükeshü ki puo nou kemezhie phitaya;#6:20 Leshü keweko nu Puo mha kekra chüshü. sirei puo puo die rünyü nyü phiya. 21Derei puotei puo vor, Herod puo kepenuozha nhie puo khro kezhako tsiu chüpahi mhokezhako mu Galil nu pehüko ze hie. 22Sidi Herodia nuopfü ler nashüshü di Herod mu vor hie kebako nei chülie; sitse kediue sie rüüpfü ki, “No a ki mha n kenei kehoupuorei chacie, a süu pie n tsütuo.” 23Sidi puo süpfü mhodzünu rüse zo di sie, “No a ki mhakehoupuo cha rei, puo thuo a kedi tietsa zo shierei a khapie n tsütuo.” 24Sitse süpfüe tuo prata di vo puo zuo ki, “A bu kedipuo cha ta?” Sitse puo sie, “Johan mia dzülukepfüu tsü.” 25Sitse puo rükri kediu ki le di chakecü, “A n bu Johan mia dzülukepfüu tsü pie mekhou puo nu shülie di se vor a tsü nyüyalie.” 26Sitse kediu puo nou kemezhie phita, derei puo thuo puo rüseko mu puo phreimiako la süpfü die melieshülie lhota. 27Süla puo rükri rükhoumia puo ketseshü di puo bu Johan tsüu pie mhai vornushü. Sitse puo vo kedieki nunu Johan tsü zielie, 28sidi mekhou puo nunu pie vor rüüpfü tsüshü, mu süpfüe süu pie vo puo zuo tsüwa. 29Siro puoe pethakelieko süu sishü tse, uko vor di puo rüngetsa pie vo mekhru puo nu pie zhüwata.
Jisu Mia Nyie Pengou Vachükeshü
(Mat 14:13-21; Luk 9:10-17; Joh 6:1-14)
30Süsie apostelko vor Jisu khieki kengulie di puo ki uko mhachükelieko mu pethakeshü pete pushü. 31Sitse puo uko ki, “Nieko tuo krei vo mia kejüra nu rüleiliecie,” sishü, kekreilamonyü themia kekra puo ki vor mu lacü te mo, süla uko mhakecü tei rei jüta. 32Süla uko thuo rou puo nunu tuo rüdei se themia kejüra puo vota.
33Siürei themia kekrae uko tuotakezhü ngushü mu uko zo ükecü silie di rüna neiü nunu par di tuo uko mhodzü rie vo bata. 34Siro Jisu dzükezha khie vozhü ru puo themia krodi ngu; sitse puo uko ngumezhieta, kekreilamonyü uko tekuo puo kepfhe kejü mhie tuokecü la; sidi puo mha kekra pupie uko pethashü. 35Siro teizeitazhü tse, puoe pethakelieko puo ki vor di sie, “Haha terha zo, mu menuo phitazhie; 36süla uko ketsewa di uko bu vo sonuo kinu u thuo mha khrü cülietacie,” sita. 37Derei puo uko ki, “Nieko uko vachüshücie.” Sitse uko puo ki, “Hieko bu vo niekhrüda denari krie kenie#6:37 Denari ro khunhie mhakrau. ma khrüpie uko vachünuya me?” 38Jisu sie uko ki, “Nieko niekhrüda kitsuo tuo ga? Vo mehoshücie.” Sitse uko vo mehoshü di puo ki, “Niekhrüda pengou mu khuo kenie.” 39Sitse puo uko bu themiako pete kie kengupie nha kepejo nu balienushü. 40Süla uko puo houhou chülie di huo nu krie puo mu huo nu hiepengou idi balie. 41Süsie puo niekhrüdako mu khuonie chü pielie tsiu teigei meho di kethezie pie Ukepenuopfü tsüshü di niekhrüdako bietshielie, sidi pie themiako tsüshünu di pethakelieko tsüshü; siro puo khuonie rei kezapie themia süko pete tsü phreshü. 42Siro uko pete cü di pevü phrelie. 43Süsie uko khuoko rei sa puoseko pfhü kengupie khopenuo kerekenie tshulie. 44Siro themia keze mhacükelieko phrükeshü thepfumia nyie pengou.
Jisu Dzü mho Chatuokecü
(Mat 14:22-33; Joh 6:15-21)
45Süsie puo puoe pethakelieko bu rükri rou nu lelie di puo mhodzü tuo dzükezha khie Bethsaida nu volienushü, sidi puo themiako ketsewa. 46Siro puo uko bu vi volienu di pukewa sie kecha chütuoü kijüthou gei vota.
47Siro thevatieta tse, rouu dzükezha metsuo nu vota, mu puo rübei kijü keso nu ba. 48Siro puoe uko teikhrie u mhodzütsa nu u hetakecü la uko rou thou kemezhie phikezhü ngu, sidi khiserüna dzükezha mhonu chatuo uko ki vor. Sidi puo uko therhietatuoüzhü. 49Derei uko puoe dzükezha mho chatuo ketuo ngulie tse, ukoe puo üse temi üdi shiekhouita; 50uko pete puo ngu di michie phiketa la. Derei puo kenourhei uko rüchü di sie, “Nieko dzüzielie, a zomu; michie hiecie.” 51Sidi puo rouu nu le balie tse tei rei rükhrie mota. Süla uko u ngo phita; 52kekreilamonyü uko niekhrüdako dze rei lelie mo, mu sümho rei uko nou retakecü la.
Jisu Genesaret nu Mia Chü Keshürhokecü
(Mat 14:34-36)
53Süsie uko süu cie Genesaret kijü nu vorlie, mu uko rou khepie bawa. 54Siro uko rouu nunu parlie tse mia puo si mhailieta, 55sidi sükhieümhou rüna peteko nu vo di kechükenyümia u zhü gei kezhüko toupie kehourapuorei puo kebara vorürta. 56Siro puo rünako morei nadiko morei lieko nu rei kevo kheko nu uko kechümia pie vo lhithochüko nu pie zhü di süko bu puo pfhephrie zorei biekelie le di puo ki cha beitata; sidi puo biekelie kheko shürho phrelielie tuota.
Currently Selected:
Mark 6: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
