Mark 7
7
U Puotsanuo Zho Kepetha
(Mat 5:1-9)
1Süsie Jerusalem nunu kevor Farisiko mu thezhokepethako huo sa vo puo houpfülie, 2sitse süko puoe pethakelie huomia mesa mo di, puoca u nanyü zho ze u dzie metei mo di, mhacükecü ngu. 3(Kekreilamonyü Farisiko mu Judamia pete u puotsanuo zho ze u dzie metei menuo kemosie mhacüya mo; 4tsiu lhithochü nunu vor rei u dzie metei kemosie mhakehoupuorei cüya mo, siro süsie rei tehiemekhou, tieligali mu mese pie kechü mhakhouko mu thegiko puo zho tou medzi di khrü morokesuo la.) 5Süla Farisiko mu thezhokepethako sie puo ki, “Kiüdi no pethakeliekoe phichümia zho medzi mo di u dzie bu rhu di mhacüya ga?” 6Sitse puo uko ki, “Isayae ketherakezhako dze siedzedie pu toushü di thupie kezhü hamhie,
‘Themia hako u tie se a rhuyakezha zo,
derei u noue a ze kepecie phi tuo;
7Uko a rüsuo thedo chü tuote,
uko themia thuo chücü zhoko se Kepenuopfü zhoko üdi pethayacü la.’
8Niekoe Kepenuopfü diekhakeshüko khawa mu themia thuo kechü zhoko ze menuo tuoya.”
9Sitse puo uko ki, “Nieko Ukepenuopfü diekhakeshüko khawa di nie puotsanuo zhoko keze do si phite. 10Kekreilamonyü Mosae sie, ‘Nie puo nie zuo rhulie;’ mu ‘Kehoupuorei puo puo morei puo zuo rüsekezhau bu sia zotuo.’ 11Derei mhanuü miapuonie puo puo morei puo zuo ki, ‘A mhakehoupuorei se n khruohi kezhükoe Korban-u te,’ (puoca, pie Kepenuopfü tsüshüte,) 12no mhapuorei n puo morei n zuo la chüshü mote, 13sükemhie di nie thuo nie pfutsanuoko zho se mia petha di Ukepenuopfü dieu pie kemethuo chüwate. Mu nieko hamhiekecü kekra chü tuoya,” sishü.
Mia Chü Perhuwayakezhako
(Mat 15:10-20)
14Süsie puo themia krodiu kie lalie di sie, “Nieko pete a die rünyülie di siliecie. 15Mhakehoupuorei chazou nu themia nou le di puo perhuwaya mo, derei themia nou nu keparko thuo puo chü perhuwayakezha zo, 16(Süla kehoupuorei unyie nyi di rünyüketuomia bu rünyüliecie.”) 17Sidi puoe themia krodiu khawa di tuo kinu le tse puoe pethakelieko dieviu ca ketsota. 18Puo sie uko ki, “Nieko mhasi mo hathede chü tuo zoluo me? Chazou nu themia nou leyakezhako themia chü perhuwalie kenjü, 19süko u melou nu le monyü u va nu ke di cavüchü nu votayakezha nieko leya mo zo me?” (Puoe sükemhie di kecüca pete mesa üshü.) 20Puo la sie, “Themia nou nu paryakezha thuo themia chü perhuwaya. 21Kekreilamonyü themia nou nu mha kesuo kemedo: pierüü, kerügu, mia kedukhri, 22pieü, kemehou, u nou kerüzhü, mha kese, kepierakecü, mia ngu u mhikelukecü, mia mele, kemiakokecü, kerhanyakecü parya. 23Mha kesuo hako pete u nou nu par di u chü perhuwaya,” sita.
Thenupfü Puo Kepele
(Mat 15:21-28)
24Süsie Jisu thechü sünunu tuo Tur#7:24 Leshü keweko nu mu Sidon icü sa. rünatsa vota. Sidi puoe ki puo nu lelie mu miapuorei bu puo sünu keba si nyü mota. Derei puo rüshülie kenjüta, 25süki miapfü puo puo nuopfü mesa kemo ruopfü bu puo kebi zetuoketapfü puo, puo dze si mumetha kenourhei vor puo phi nu zhüta. 26Thenu süpfü Sairofonik nunu kevor Judakemomiapfü puo. Sitse hapfüe puo bu puo nuopfü gei terhuokesuou whuowanu chata. 27Süsie puo hapfü ki, “Nhicuko bu pevülie riecie, nhicunuoko nouva kelhoupie tefüko tsükewa puotou mokecü la,” sita. 28Derei hapfü la sie, “Kepethau, siürei tefünuoko rei mizhü khro nu nhicunuoko ca rürie ketsurko pacüya zolie,” si. 29Süla puo sie hapfü ki, “N die süu la, no tuolie, terhuokesuou n nuopfü geinu prate ho.” 30Sitse süpfü kinu vo ru unuoyo thezhü gei zhü mu terhuokesuou puo geinu praketa ngulie.
Jisue Nyievümia Puo Chü Pevikeshü
31Siro puo Tur rünatsa nu la vorlie, sidi Sidon pfüthe Dekapoli rünatsa nu Galil dzükezha nu vor. 32Sitse mia nyievü mu die pu keluodekecümia puo ze puo ki vor; sidi uko puo bu süu bieshünu puo ki cha beita. 33Süla puoe themia krodiu nunu puo ze krei mharapuo vo di, puo dziekinuo pie themia süyo nyieto nu shü mu puo mhitsielie di se puo meü bieshü. 34Sidi puo teigei meho mu hapfhüishü di sie, “Efatha,” puoca, “Cie parliecie.” 35Siru puo vapuonu mhapfhe silieta, mu puo meü rüprei parlie di puo die pu kemecielieta. 36Süsie Jisu themiako bu süu se mia puo ki rei pu hienu beiwa, derei uko bu pu hienukeshüu pu kechükuota. 37Sitse themia pete u ngo pie u ngothorta di sie, “Puo mhakehoupuorei chü pevi seshü ze; puo nyievümia bu rei mhapfhe silie mu keliehuomia bu rei die puliete!” ita.
Currently Selected:
Mark 7: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
