Mark 8
8
Jisu Mia Nyie Dia Vachükecü
(Mat 15:32-39)
1Süsie themia krodi puo la vor kengulie mu uko kecüca puorei cüketuo tuo motacü la puo puoe pethakelieko kielie di sie, 2“A themia krodiu ngumezhiete, kekreilamonyü uko zha se a ze tuote mu kecüca puorei tuo mote. 3A uko vachüshü mo di ketsepie uko kinu shü ro uko chala nu phisiatatie, kekreilamonyü uko huomia cha cha phicü nunu vor.” 4Sitse puoe pethakelieko sie, “Kimhie di rayha nu kecüca themia hade kelhuo ngulie vituo ga?” 5Ru puo sie, “Nieko niekhrüda kitsuo se tuo ga?” idi ketso. Uko sie, “Thenie,” si. 6Sitse puo themiako bu kijü balienushü; sidi puo niekhrüda thenieko chü pielie siro kethezie khashü di süko bietshielie di pethakelieko bu pie themiako tsünu khashü; mu ukoe süko zashü. 7Siro uko khuo kecü nuonuo huoyo rei se tuo, sitse puo jashü süko gei rei shü di uko bu pie themiako zashünushü. 8Mu themia pete cü pevü phrelie; süsie pethakelieko cü kepesha puoseko merha thenie ketshu kengu lalie. Süsie puo uko ketseshüwa. 9Mu süko mia nyie dia mese. 10Süsie puoe pethakelieko ze rou puo nu pfü mhalie di Dalmanutha#8:10 Leshü keweko nu Mageda morei Magdala. kijütsa vota.
Farisiko Zasi Puo Chakecü
(Mat 16:1-4)
11Sitse Farisiko vor puo kedo di puo bu teigei nu zasi puo chüpie uko kieshünu puo ze keprüli sie. 12Derei puo ruopfü nunu puo noukemezhiekecü pfhephra hapfhüishü di sie, “Kiüdi thephou hau zasi pfhüya shi? A nieko ki pu toushütuo, zasi sikecü puorei kha lapie thephou hau tsülie lhote.” 13Sidi puo uko khawa di rou nu lelie di tuo kekreitsa vota.
Farisiko mu Herod Khrei la U Kireilienukecü
(Mat 16:5-12)
14Siro pethakelieko niekhrüda chülie rükra mota; mu uko rou nu niekhrüda puo zie se tuo mota. 15Siro Jisu uko tarho di sie, “Menuolieluo, Farisiko khrei mu Herod khrei la nie kireiliecie.” 16Sitse uko sie huoniehuo ki, “Úko niekhrüda se tuo moketa la süu pute.” 17Siro Jisu süu silie di sie uko ki, “Nieko kiüdi niekhrüda pfü tuo kemo dze kepu ba mu? Nieko tsie rei si mu lelie mo zo me? Nieko nou repie hi ba zo me? 18Nie mhi nyi di mha ngulie mo zo me? Nie nyie nyi di rünyülieya mo zo me? Nie süsü lelie mo me? 19A niekhrüda pengou bietshiepie mia nyie pengou vachükeshü ki nie puoseko khopenuo kitsuo ketshu kengu lalie ga?” Sitse uko sie puo ki, “Kerekenie,” si. 20“Siro a niekhrüda thenie bietshiepie mia nyie dia vachükeshü ki nie puoseko merha kitsuo ketshu kengu lalie ga?” Sitse uko la sie, “Thenie,” ishü. 21Sitse puo uko ki, “Nieko tsie rei puocapuola silie mo zo me?”
Jisu Bethsaida nu Mhiciemia Puo Chü Pevikeshü
22Süsie uko Bethsaida nu vorlie. Sitse mia kro puo mhiciemia puo ze Jisu ki vor di puo bu puo bieshünuta. 23Sitse puo mhicieu dzie teshüse rüna khie prata, sidi puo mhitsie üse puo mhi nu shü mu puo dzienie pie puo bie di “No mha huo ngu ba mo?” idi puo ketso. 24Sitse themiau sie mha mehoshü di, “A themia ngu tha, derei uko ngupie seibo mhie di chatuo tuo.” 25Sitse Jisu puo dzienie pie themiau mhi bie lashü; mu themiau puo mhi pelapie mha mehoshü ru puo mhi mha ngu par di mha pete ngu mecümecielieta. 26Süsie puoe puo bu kinu votanu di, “No rünau nu la le hie,”#8:26 Leshü keweko nu morei rüna nu kehoupuo ki rei pushülie si. iwa.
Pitor Jisu Dze Phrakeshü
(Mat 16:13-20; Luk 9:18-21)
27Süsie Jisu puoe pethakelieko ze Kaisaria Filipi rünako nu vo, mu cha nu ketuo ki puoe pethakelieko ki, “Mia a üse supuo üya ga?” idi ketso. 28Sitse uko sie puo ki, “Johan mia dzülukepfüu; mu kekreiko Elija ü, tsiu huomia we siedzekesiko mia puo üsiya.” 29Sitse puo uko ki, “Derei nieko we a üse supuo üya ga?” idi ketso, sitse Pitor puo ki, “No Khristau zo.” 30Siru puo uko bu puo dze pie mia puo ki rei pu hienu di uko kha beiwata.
Jisue Puo Se mu Rheilakesie Dze Kepu
(Mat 16:21-28; Luk 9:22-27)
31Süsie puoe Themia Nuou kemezhie phiketuo mu phichüko, zievokezhako tsiu thezhokepethako bu puo meliewaketuo, tsiu puo dukhriwaketuo, mu zha se sie rhei lasielieketuo pushü. 32Mu puo die süko pete pulapuluoshü. Sitse Pitor puo kerei ze vo di puo kerhieta. 33Derei puo rürei vo puoe pethakelieko meho, mu Pitor kerhie di sie, “No a sietsa votalie, Satan! Kekreilamonyü no n nou pie Ukepenuopfü gei monyü themia rüliko medoyakezha la!”
34Süsie puo themia kro-u mu puoe pethakelieko sa kiepie puo ki shülie di uko ki, “Themia kehoupuorei a siemedzi kenyümia, sümia bu puo thuo puo meliewa mu puo krus pielie di a siemedziliecie. 35Kekreilamonyü kehoupuorei puo thuo puo phou pekrupie puo vie chülie nyüyakezhamia süu pejüwatuo, derei kehoupuorei a la mu dieliekeviu la puo phou khakeshümia süu pekrulie zotuo. 36Siro mia puoe kijü pete peviepie puo vie chülie ürei puo kerheiro pekawa ro kedipuo kepra ba ga? 37Kekreilamonyü puo mhapuorei pie puo phousou chülie kenjü zo. 38Kehoupuorei pieüpiera mu kephouma hako mhodzünu a dze mu a dieko pu mengaya ro, Themia Nuou rei kemesa dieliemiako ze puo Puou zapuzayie nunu kevor ki puo dze pu mengatatuo.”
Currently Selected:
Mark 8: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
