Kejadian Uram 34
34
Dina ab Sikhem ab deyok
34:1-31
1Uki tentok tum aryi Lea ab, Yakub ab aryi deiandei nebnyi si Dina bira er ka yabwe a mutuk nerabwe asi binmou. 2Ura, Hewi yalanyi Sikhem mi si Hemor bira a mutuk sienyi kiamwe. A mutuk sienyi mi si Sikhem biryi dinmou uca, Dina urasin ara telebto urasin ner nun asing eibmou. A deyok aryi Sikhem er kanyi mantanakdobmou ura, Dina bisi talebmouci, tatab-tatab eboka yobmou. 3Ukuboka yobmou uca, anyi Sikhem er kanyi mantanakmouci, kanya danguboka, Dina kanyi akwe deibmou. Ba, anyi Sikhem biryi a ner asi, “Ni kanyi akwe deibdur,” tenen kanyi mantanangni uram aryi taktak eboka mantanakdeibokmou. 4Ato kubdanmarei deyok aryi Sikhem biryi er nai Hemor bisi ato ebmou, “Dina bisi doboka ni kabdeibnurum! Ba, Dina bira ni dobdobkwan,” ebmou. 5Ba, Sikhem biryi Dina bisi tatab-tatab eboka yobmouci, malyi kibdongobmou deyok ara Dina er nai Yakub sirya bikmou. Ura, Yakub er mabwe ara bisam tuba winibde kunmai tok atei yangana kum kubmai. A deyok aryi a uram kekebmou cok, kilikloboka ur kuronmou.
6Uca, er nebnyi Dina yobmounyi, Sikhem er nai Hemor bira Yakub bisi yanmou ba, uram sisikmarei. 7A uram sisikde burandei talak aryok, Dina er malnang bisam winin mutuk aryi atei yanmai. Yandoka kekeramnyi uca, “Sikhem biryi sun malner Dina bisi tataboka yobmar,” ebmai. Ura, sun Israel nang kankan dam asi Yakub nebnyi Dina bisi tataboka yobmouci, malyi kiboka betebdongobmou. Ura, a nang sun kanyi malyi kubmouci, sun kanya yu wekmou. Ato kurdongona ara ukubman kum dinyi bok, malyi dinyi bobdongobmou. 8Bok, Sikhem er nai Hemor biryi sun nai Yakub bisi yandoka molobmouci, ato ebmou, “Ni mi Sikhem bira Yakub kan nebnyi Dina bisi kanyi mantanakuryi, er kanyi deibwe. Ati, kan nebnyi ara ni mi asi kabdeibkwan ati, niti ebnurum,” eboka molobmou. 9Ani, ton ato ebmou, “Kan yala nerabwe ara ni yala nang donkwaming. Ba, ni yala nerabwe ara kan yala nang donkwaming. Ukuboka dordankwayeb. 10A mutuk dam ara sunda talyi kuronkwandum. A mutuk nirya sun dinyi akwe kibkwande. Ani, sun a mutuk iya kuronkwandum,” ebmou. 11Ura, Sikhem biryi Dina er nai ab, er malnang ab asi ato ebmou, “Sunci, nisi boukwe kibnumunci teleb tenebmunyi ura, sunci nisi ‘A keica karebsurum!’ eboka molobmunyi tok karebkwamasin. 12Sun nebnyi karebnumunyi ura, te murumna tum bona ati, weikto molobnumunyi babyi, ner dengna ilinto ati molobnumunya babyi ara sun molobmamunyi to kunuboka dekwamasin. Ati, sun nebnyi ni karebnumunyi ba, ni dobdobkwan,” ebmou.
13Ba, Yakub mabwe aryi Sikhem ab, er nai Hemor ab asi tola ati ato ebmai. Ara, sun malner Dina bisi malyito kibdongoamwe deyok aryi Sikhem ab, er nai Hemor ab asi ato ebmai. 14“Kan molobmarim to kununa kum kubkwamakib. Nunci, nun malner asi den bam sengna kum nang asi karebkwamab ara kikiman kum kubmar. Nun malner asi sun den bam sengna kum nang ati karena ara nun betebdongobdanub. 15Kanci ato kubtum akwe ura, kan molobmarim to kunuboka, nun malner kabdeibkwankib. Ara, sun sal kundarur tok nirya den bam sekmunci, nun kunub to kubmunyi ura, a ner karebkwamasitibyi. 16Sun den bam sekdandate ura, nun nermabwe sun karesitibyi ura, sun nermabwe nun doronkwantibyi. Ukuboka dordatibiryi nun antanibdobtibyi ura, tentok-tentok yala nang kibdobtibyi. 17Bok, nun ebmab to kunuboka, sun den bam sengdana kum kubmamunyi ura, nun nebnyi tubto dobdaki bindobkwayeb,” ebmai. 18Ura, Hemor ab Sikhem ab ara a ebmai uram sun teleb kubmou. 19Ura, Sikhem bira a ner er kanyi iya mantakamwe deyok aryi sun ebmai to kunuboka er den bam sekmai. Hemor ai ninyi nirya ara Sikhem bisi sun nai kimninto kuboka si bikdobnyi kuramwe bok, ato kubmou.
20Ura, Hemor ab Sikhem ab sun atei lika bisik bublan dam tingbinmarei ura, akatei kuramnyi ninyi nirya asi ato ebmarei. 21“A yanmang yala nang ara nun ab mangkau kuronkwayeb. Ati, sun a mutuk kuroramingiryi, wa iboka ai doboka ur mangkau kuronkwayeb. A mutuk ara ilila mutuk bukwa ati, sun yuk a yandoka kuronkwaming. Ba, sun nermabwe ara nun dobibyi ura, nun nermabwe ara sun doronkwaming. Ukuboka bokoka anirdankwayeb. 22Bok, sunci nunsi arukmasing ara ato ebmasing, ‘Nun ab tonkwa kuboka, tentok mutuk nang kibdobkwamibyi ura, nun kunub to sal kundarura nirya den bam sekwandarur! Ukubmunyi ura, nun ab tonkwa antaniboka tentok mutuk nang kibdobkwayeb,’ ebmasing. 23Sun bisam yabwe ab, yuk-yuk bona ab, sun dam kurur dinyi nirya nun dinyi kibkwansir ati, sun molobmang to kunubkwayeb. Ba, a nang ara nun dam iya kubkwaming,” ebmou. 24Ura, Hemor ab, Sikhem ab a uram ebmarei ura, weik atei ninyi nirya lika bublan dam buluryandoka kekebmai. Ba, a weik atei sal kuramnyi tok, nebdob nang nirya den bam sekmai.
25Akatei kuramnyi nang nirya den bam sekmai ba, u ati atei dobde manmai uki bitinyi mabmai. Ani, uki winiryi tum ara Yakub mabwe bitinyi Simeon ab, Lewi ab a ner Dina er malnang ya doboka sakmarei. Ura, a weik atei nirya ilil kuna kum asa uca ibinmareici, ai wekoka, sal akwe nirya obde yibinmarei. 26Ani, Dina er akenyi Sikhem babyi, er nai Hemor babyi obmarei. Ura, sun malner Dina Sikhem ai aryi inibdobmarei ura, bobde binmarei. 27Ura, sun malner Dina yoboka malyi kibdongobmai deyok aryi, Yakub mabwe ton nang aminda akatei wengyanmaici, akatei ninyi oblobmarei nang, sun bona-bona ab, bisam yabwe ab nirya daluboka dobmai. 28Ani, akatei nang bisam yabwe domba toto, sapi toto, kambing toto, keledai toto, baitam babyi, aitam babyi winiramnya nirya daluboka sun kuramnyi atei bobde yanmai. 29Ani, sun bona yala nirya ab, sun nermabwe nirya ab, sun nerabwe nirya ab, sun ai kuramwe keica nirya daluboka bobde yandobmai.
30Ura, sun nai Yakub biryi Simeon ab Lewi ab asi ato ebmou, “Sunda ni si malyi kibmanururumci, ni obsinibmanururum. Ati, ukura a mutuk nang Kanaan nang ab, Feris nang ab aryi nunsi oboka kum dandeibkwamasing ati, kubmarurum. Ni ab nun ai ninyi ab ara weik kum kunub, mitikanun ati sunci nunsi obkaboka erebdobkwamang,” ebmou. 31Uca, er mabwe aryi ato ebmarei, “Ura, nun malner asi talyi yortamni ner kuna yobmar ati kubmanim!” ebmarei.
Currently Selected:
Kejadian Uram 34: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
