Kejadian Uram 35
35
Yakub Betel dam liki bitinyi dinyi binmou deyok
35:1-15
1Uki tentok tum aryi Er Imtamnyi biryi Yakub bisi ato ebmou, “Ukuca, anarorum! Anabdobminyi ura, Betel dam asi bindoka ai doboka kuronkwandum. Ani, a dikum ara kan du Esau biryi domakou ba, baronmoumwe uca, Ni kan dam lak kibmase dikum asi, Ni Imtamnyi biti dama deiboka uk dan keil lamna labkwandum,” ebmou. 2Ura, Yakub biryi er ai ninyi ab, er miliamnyi ninyi ab asi ato ebmou, “Ninyi aryi kiknibdeiboka ninyi kwemdeina kiboka anda bordaramunya ara nirya bai donoksekdarur. Sun malyi kwemdeina molondarur ba, bol malyi bobdau dinyi ara me ilikoka kwit kimdanmandarur. Ani, sun minob ongoramunyi ongon aling ara kwiriboka deiblobmunyi ura, ukuryok ongon aling ongobdarur. 3Ura, anaboka Betel baronkwamab ati, anaronmandarur! Nun binkwamab mutuk Betel dam ara ni mambul kanya bobdobmasiryi banmase uca, Er Iya Erebdobnyi ni dam lak kibdanmouci, ni mambul dinyi lebdeibmanou. Ani, Er Imtamnyi biryi nisi milianou ba, binanse. Ato kuanou dikum asi bindoka Er Iya Erebdobnyi biti dama deiboka uk dan keil lamna labkwaman ati, binkwayeb,” ebmou. 4Ura, er miliamnyi ninyi ab, er ai ninyi ab aryi, “Nun kwemdeina,” tenen kiboka boramiryi moloramnyi keica ab, amol kweirya birirdaramnyi keica ab nirya bulubmaici, Yakub dam boyanmai. Ba, Yakub biryi a mutuk Sikhem dam asi ilila co deyok dam asi ikdongoboka tukwe siklibmou. 5Ato kuboka sirya ikoka tukwe ukmai ura, sun ai dakoka bobmaici sun nong dem anabmai. Anaboka baroi ura, Er Iya Erebdobnyi ibarya aryi anda doramnyi weik atei-weik atei asi libdobmou aryi Yakub ab, er mabsilib ab, anaboka baronmai ara asing eirina kum kubmai. Ato kubmou deyok aryi Yakub ab, er mabsilib ab asi dombana kum kubmai.
6Ba, Yakub ab, er mabsilib ab, er milin nang ab banmai ani, Kanaan mutuk akwe bok, mutuk si Lus asi Betel dam binmai. 7Ura, bindoka Er Imtamnyi biti dama deiboka uk dan keil lamna laboka kiknibmai. Ura, a keil dukoka kiknibmai dinyi si ara, “El-Betel,” eboka si dobmou. Ara, minob er du Esau biryi domou ba, cukoka baronmou uca, Er Imtamnyi a dikum aryi lak kibdanamwe ba, asing eiamwe deyok aryi, “El-Betel,” eboka si dobmou.#35:7 El-Betel ebyi aia ara Allah Betel dam aryi Erdamnyi lak kibdanmou ati ebyi. 8Ura, a talak aryi Yakub er ner Ribka bisi kalikoka etereramwe ner si Debora dibmou. Ba, a ner tukwi ara Betel mutuk me youkwetam asi, ilila co bukamwa deyok dam asi tukwe dongobmai. A ner tukwe dongoboka engeamnyi deyok aryi a co si ara, “Engena co,” enung.
9Ura, Yakub bira mutuk si Padan-Aram dam aryi kuboka sirya yanmou talak tubto Er Iya Erebdobnyi Yakub dam lak kibdanmouci, kisal dangna dinyi karebmou. 10Ura, Er Iya Erebdobnyi biryi Yakub bisi ato ebmou, “Uku talak aryi kan si ara, ‘Yakub,’ ekunung. Bok, ukura kan si Yakub kuma. Eda, ‘Israel,’ eboka si dobkin. Ati, kan si ara, ‘Israel,’ enkwankunung,” ebmou. 11Ani, Er Imtamnyi biryi ato ebmou, “Nira Imtamnyi Iya Mikibnyi kunun aryi utotoa nirya Ni dinyi akwe kurur. Ati, kanci mi ilinto yaldakoka, odei-odei birum! Ba, kan deibdoba mutuk nang akwe kun mutuk ton kibci ura, yuk-yuk mutuk ababyi kan deibdoba akwe kubde binkwaming. Ani, sien nang kibde bana ababyi kan deibdoba akwe sien nang bukde binkwaming. 12A mutuk ara kan abwe Abraham ab, kan nai Ishak ab ati, minob etereanse mutuk asi kan ab, kan deibdoba ab mutuk kibkwande,” ebmou. 13Ura, Er Iya Erebdobnyi biryi Yakub bisi yandoka uram enmou dikum aryi imtam welebindobmou. 14Ura, Yakub biryi Er Imtamnyi ab ebdanmarei dikum ara keil dukoka tikeibmou. Ura, Yakub biryi anggur me ab, yingying en me si Zaitun me ab a keil dukoka tikeibmoua deici asi dikoka akmou. 15Ura, Yakub biryi Er Imtamnyi yandoka uram ebmou dikum ara, “Betel,” eboka si dobmou.
Yakub ner Rahel biryi er mi Benyamin deirinmou uca, dibmou deyok
35:16-22a
16Ura, Betel dam aryi anaboka banmai. Ani, bisik noutam bai uca, Rahel mi deyok yinmou ura, mi deyok mak dobmou. 17Ura, Rahel deyok donmou ara ola deibman kum kubmou. Ba, er mi deirirmilin ner aryi ato ebmou, “Sal mi deibkwamarim ati, malyi, ilil kuna mem!” ebmou. 18Uca, Rahel dibkouci, sirya isin aryi a deirinmou mi si ara, “Ben-Oni,” eboka si dobmou. Uca, a mi si ara er nai biryi, “Benyamin,” eboka si dobmou. 19Ukuboka Rahel dibmou ba, Betlehem mutuk asi Efrata bisik bana dam bisik lingkwa asi tukwe dongobmou. 20Ura, er akenyi Yakub biryi er ner Rahel tukwe dongobmoua deici asi keil dukoka tikeibmou. A dukoka tikeibmou keil ara tuba kubwe asi, “Rahel keil dungna,” enung.
21Ura, Israel er ner sirya tukwe dongobmou ura, anaboka banmou ani, mutuk si Migdal-Eder bisiboka keis ol atei bindoka dobmou. 22aUra, a mutuk dam bindoka kuramwe uca, Israel er mi yuma deiamwe mi Ruben biryi er nai Yakub aminda dobtabakamwe ner si Bilha bisi yobmou. Ura, a uram er akenyi Israel bisi ebmai ura, kekebmou.
Yakub mabwe deyok Yakub er nai Ishak dibmou deyok
35:22b-29
22bYakub mabwe ara amolbaryi deiamwe. 23Yakub mabwe Lea biryi deiamwe mabwe si ara Ruben yan dua mi deiamwe. Ba, o yaldakmou mabwe si ara Simeon ab, Lewi ab, Yehuda ab, Isakhar ab, Zebulon ab deiamwe. 24Ba, Yakub ner Rahel biryi deiamwe mabwe ara Yusuf ab, Benyamin ab deiamwe. 25Ba, Rahel er me ilingna ner si Bilha biryi Dan ab Naftali ab deiamwe. 26Ba, Lea ai me ilingna ner si Zilpa biryi deiamwe mabwe ara Gad ab Asyer ab deiamwe. Yakub mutuk si Padan-Aram kuramuryi, er mabwe ukuboka yaldakamwe.
27Ura, Yakub ukubde baramwe ani, Kiryat-Arba mutuk asi Mamre dam er nai Ishak kuramwa atei binmou. A mutuk si ara Hebron enung. A mutuk Hebron dam asi Abraham ab, Ishak ab yuma tingyandoka kurandei. 28A talak ara Yakub er nai Ishak bira kwalina yubwa 180 baryi kimbinmou. 29Ura, Ishak dibmouci, er nai yabwe dibde binamnyi nang kankan wengbinmou. Ba, Ishak er dibmoua tukwi ara er mabwe Esau ab, Yakub ab aryi tukwe dongobmarei.
Currently Selected:
Kejadian Uram 35: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
