साल्न्हाका चात्या 1
1
पबित्तरो आत्माको बाचा
1ओइ आनाउ थियोफिलस, का काङको लाम्फाको पुस्तकता, येसुहेङ स्वर्गता माचुम्पुका भरि वा हाइ-हाइ कामगेलाइ पाहि कालाउ हाइ धिरपाहि गोताङ काथाको बिसोइता लेखेघा। 2येसुहेङ परमेस्वर स्वर्गता चुम्पुका खान्तेङ लाम्फा ताइमिसो छाल्न्हाका चात्यागेलाइहेङ पबित्तरो आत्माको सरबुङसो आदेस पिहि। 3कालाउ न्हुसो येसु दुख भोगितेङ सिहि कालाउ वा न्हे कुरि दिना थेकापा इम्बालाइकोता हेन्जाङखे तिङचालाहि कालाउ खाल-खाल्को प्रामानगेलाइसो ताइमिहेङ सिन्हुका हिघा दोअ्तेङ तिङपाहि। कालाउ वा इम्बालाइ दोफा परमेस्वरको सासनको बिसोइता काथा पाहि। 4ए सोमोइता जेलाउ येसु ताइको चात्यागेलाइ दोफा चालि योम्लाउ वा इम्बालाहेङ आग्या पिहि, “नेलाइ यरुसेलेम सहर मालाअ्सु, कालाउ काङको आबा नेलाइहेङ प्याङका दोअ्का बरदानहेङ ह्रुम्तेङ हिसु। याको बिसोइता नेलाइ काङकोसो लाम्फाङ हिङलि दोका हिसुना।” 5युहान्ना द्याङगेलाइहेङ चिको बप्तिस्ता पिहि, कालाउ आले दिना न्हुसो परमेस्वर पबित्तरो आत्माहेङ नेलाइ दोफा हिलि दिङगिल्लावा।
6कालाउ न्हुसो जेलाउ छाल्न्हाका चात्यागेलाइ आरोङ येसु दोफा मिलिहि कालाउ इम्बालाइ येसुहेङ हिअ्हि, “प्रभु, हाइ नाअ् दोङ इस्राएलगेलाइहेङ मुक्त पाका कालाउ केलाइको राइजि आरोङ बानाइका सोमोइ लोका हि?”
7येसु इम्बालाइहेङ दोअ्हि, “काङको आबा दोफा खिनिङ बेला माकुनु सोमोइ निर्नय पालि खाबारा हि। नेलाइहेङ इदोइ काथागेलाइ गिलि आवस्यक मान्थु। 8जेलाउ पबित्तरो आत्मा नाअ् ह्रुता ल्वावा कालाउ नेलाइ सरबुङ निङस्वाना, कालाउ नेलाइ यरुसेलेम सहरता, सारा यहुदिया जिल्लाता, सामारिया जिल्लाता कालाउ सुमिङको गोताङ थामेगेलाइता द्याङगेलाइहेङ काङको बारेता दोअ्स्वाना।”
येसुहेङ स्वर्ग चुम्पुका
9येसु या काथागेलाइ दोअ्लि दोतेङ, इम्बालाइ खाङका खाङकाताङ परमेस्वर येसुहेङ स्वर्गता तोल्लेहि, कालाउ बादेलको कारनहोइ इम्बालाइ आरोङ हेलाउ बुङ येसुहेङ तिङलि मादोहि। 10जेलाउ इम्बालाइ येसुहेङ हानिकाताङ पालाउ भाङ-भाङतेङ आकास भारि खाङतेङ हिघाहि, कालाउ एन्सालाउ दोङ जे:का धाबा होङका न्हेमि द्याङगेलाइ इम्बालाइको भेरपा जाअ्हि। 11इम्बालाइ दोअ्हि, “ओइ गालिल जिल्लाको द्याङगेलाइ, नेलाइ हाइ पालि आकास भारि खाङकाताङ जाअ्तेङ हिसुन्हा? ओदोङ येसु जाइहेङ परमेस्वर नेलाइकोसो स्वर्गता चुम्पुहि, एला जेसाङ नेलाइ वासेहेङ स्वर्गता हानिका तिङसुन्हा, एन्साङ दोङ वा आरोङ घुरितेङ ल्वाङ।”
(सामुहिक) जोम्तेङ पाका प्रार्थाना
12जेलाउ द्याङगेलाइ हानिलि दोतेङ साल्का चात्यागेलाइ जैतुन मिङ पाका तिकारसो यरुसेलेम सहर घुरितेङ लोहि। जाइ यरुसेलेम सहरसो एन्साङ माकुलाउ बुङ: ए किलो मिटर झोको दुरे हिघाहि। 13जेलाउ चात्यागेलाइ सहरता थुकाहि इम्बालाइ ह्रुताको तल्लाको ताइमि हितेङ हिका कोठाता हानिहि। इन्ता हितेङ हिकालाइको मिङ इदोइ दोङ: पतरुस, युहान्ना, याकुब, आन्द्रियास, फिलिप, थोमा, ब्रथुलमे, मति कालाउ आल्फायासको चान याकुब, कालाउ सिमोन कानानि, कालाउ याकुबको चान यहुदा हिघाहि। 14इम्बालाइ कालाउ आधिमि बेबालाइ जाइ येसुहेङ साघाइका हिघाहि, कालाउ येसुको आमाइ मरियम कालाउ वाको ओनेगेलाइ दोफा इम्बालाइ झाराङ एनोङ दोङ मनको जेङतेङ लागातार प्रार्थाना पातेङ हिघाहि।
मतिहेङ छाल्का
15इङको दिनागेलाइता खान्धुराइ ओनेगेलाइ मध्येसो पतरुस जाअ्हि (उङको द्याङगेलाइको सङख्या माकुलाउ बुङ: एसाइ ए कुरि हिघाहि)। 16कालाउ दोअ्हि, “ओइ खान्धुराइ ओनेगेलाइ, पबित्तरो आत्मा हेन्जा लाम्फा राजा दाउदसो यहुदाको बिसोइता दोअ्का हिघाहि। जेदोङ येसुहेङ रिम्पाकालाइको भाअ्सिङ दामा जेङहि। यहुदाको बिसोइता धर्मसास्तरता लेखेका काथा पुरा जेङलि आवस्यक हिघाहि। 17हाइपालिपानु वाते केलाइ मध्येसो एमि हिघाहि। कालाउ इदोङ सेवाता वा बुङ छाल्न्हाका हिघाहि।”
18जेसाङ कि नेलाइ गिसुखेना, यहुदा ताइको दुस्ट कामको ताकासो एनोङ मिलिङ चोल्हि, कालाउ यहुदा ओदोङ मिलिङता ताइमिहेङ दिहामहोइ तोइहि कालाउ वाको जिउ भोनोइता थोबिन्हाहि कालाउ वाको हामु धेनाहि, कालाउ वाको गोताङ तेरेङ भुतिङ बाहार ओल्लेहि। 19कालाउ इङको काथा यरुसेलेमको गोताङ द्याङगेलाइहेङ थाहा जेङहि। ओदोङ भाअ्सिङ इम्बालाइ इङको मिलिङको मिङ ताइको भासाता आखेल्दामा ताअ्हि, जाइको माने हितिको मिलिङ।
20हाइपालिपानु, “राजा दाउदको भजन सङग्रहता यहुदाको बिसोइता इसिका लेखेका हि:
वाको साअ् उदादाङका जेनाको,
कालाउ इन्ता बासा हिका हासु बुङ माजेनाको,
‘कालाउ राजा भेनेङ थामेता एसा बुङ दोअ्का हि!’
वाको पाका कामको जिम्मा भेनेङ द्याङ ह्रुकाको!
21ओदोङ भाअ्सिङ केलाइ प्रभु येसु दोफा हिलाउ केलाइ दोफा हिका द्याङगेलाइ मध्ये इसिका एमिहेङ छाल्लि गोइका हि, जेदोङ युहान्ना येसुहेङ बप्तिस्ता पिका सोमोइसोङ स्वर्गता तोल्लेतेङ माचुम्पुका भरि वा जेलाउ बुङ केलाइ दोफा हिघाहि, 22युहान्नाको बप्तिस्ताको सोमोइसोङ उङको द्याङ दोङ केलाइ दोफा प्रभु येसुको सिन्चालकाको साक्सि जेङलि गोयाङ।”
23कालाउ सुझाब आन्सार इम्बालाइ न्हेमिहेङ जाअ्पाहि, योसेफ जाइहेङ बार्नाबास दोअ्घाहि (कालाउ जाइहेङ जस्टस बुङ दोअ्घाखे) कालाउ भेनेङ द्याङको मिङ चाहि मतियास हिघाहि। 24इम्बालाइ एसापा प्रार्थाना पाहि, झाराङ द्याङको ह्रदयको काथा गिका प्रभु, “इदोइ न्हेमि मध्येसो नाअ् हासुहेङ छाल्का हिना, इङको केलाइहेङ तिङपा पि, 25कालाउ उङको इदोइ सेवा कालाउ छाल्न्हाका चात्याको कामता दुल्लि द्वाको, जेदोङ सेवा लाअ्तेङ यहुदा सिहि कालाउ ताइको निजि थामेता हानिहि।” 26कालाउ इम्बालाइ उङको न्हेमिको माझाता चिट्ठा आअ्हि, कालाउ चिट्ठा मतियासको मिङता परिहि, कालाउ वा तेए छाल्न्हाका चात्यागेलाइता गान्दिन्हाहि।
Currently Selected:
साल्न्हाका चात्या 1: DHINT
Highlight
Share
Copy
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
