John 6
6
1Neħ noˑnă̱h' shaħˑga'at nă̱ˑgă̱ă̱ no̱ħˑo'iˑòħ'dă̱ħˑsho̱ħ', Oˑnă̱h ne Jeˑsus oħˑta'nyoˑdaiˑyaħk' ne Gaˑliˑlee, neħ' neh Tiˑbeˑrias o̱ˑweh' tga'nyoˑdaˑeħ.
2Neħ ne gă̱nˑdyòh'goˑwaˑnă̱h' waˑo̱'wa̱sˑheeħ, neħ gaˑi'o̱ˑnih heˑwaˑă̱'no̱ntˑgaaˑtòħ' noˑi'waˑnăăˑgwah'do̱ħs he'no̱ˑgo̱ˑyaˑdyeˑăħ'syo̱o̱s noˑdiˑno̱o̱k'daˑnih.
3Neħ ne Jeˑsus hoˑno̱n'doħk'daħ'o̱h he'gae'no̱nˑdeħ, neħ ne' neħˑhuh' da'aˑdyă̱ă̱ħ' kuh' naˑgo̱'iˑo̱ˑnyaˑnih.
4Neħ' ne deˑwaˑdaˑwă̱'o̱hˑgwaħ, hehˑniˑă̱ˑno̱nˑdekˑhweˑo'ees ne Jews oˑnă̱h' dosˑgă̱'o̱h niˑga'wiħs.
5Neħ dih noˑnă̱h ne Jeˑsus waat'gesˑgòħ, neħ' ne gă̱nˑdyòh'goˑwaˑnă̱h' wa'go̱ˑgă̱ħ neħˑhuh' daˑo'no̱ntˑgo̱n'dahˑgo̱n'dyeħ, he'o̱ˑweh niˑă̱ħ'dyo̱ħ, neħ naˑwă̱'o̱hˑseeh ne Phiˑlip, Ga'ă̱ˑo̱ˑweeh' neˑgă̱ħ' hă̱ˑdwaah'gwa'niˑno̱ħ neħ nă̱ˑgă̱ă̱' a'ă̱ˑno̱nˑdekˑho̱ˑniiħ'?
6(Neħ' ne waˑoħˑniˑgo̱'ă̱kˑdo̱o̱ħ heh' neħˑhuh' na'oˑwă̱nˑno̱o̱ˑwă̱h; neħ să̱ħ'ă̱h neh' ha'o̱ˑhwa̱ħ' hoˑno̱h'do̱ħ naeh he'nă̱ˑo̱ˑyeeħ.)
7Detˑhos'nyeħˑo̱h ne Phiˑlip, haˑwă̱'o̱hˑseeh, Dekˑnii deˑwă̱ħ'nyaħˑeeh niˑgah'siˑyo̱ħ'hăˑgee no̱ˑyò'iˑwaħˑsăăk neh' oˑăh'gwaħ tă̱ħˑă̱h no̱o̱h taħ'deˑgaˑyeeˑiħ' naaħ'deˑyo̱ˑgweħ'daˑgee saħˑniˑwaħˑsyo̱nˑdyeħ'ah ha'aˑdiik.
8Shaˑyaħ'daat naˑgo̱'iˑo̱ˑnyaˑnih, Anˑdrew, Siˑmon Peˑter deˑya'dă̱ˑno̱ˑdeeħ, haˑwă̱'o̱hˑseeh,
9Shaˑyaħ'daat naakˑsaħ'aˑah neħˑhuh' iˑeħs wĭs' niˑyò'ăhˑgwaˑgeeh' ne barley no̱ħˑo'ăhˑgoħ'dă̱ħ ho'yă̱ħ, deˑgă̱'jaˑgeeh' gwaħˑhuh niˑgă̱nˑjaħsˑa'ah; neħ gwaa', aˑnaeh' naħˑot ne'neħ aˑwaˑdes' heˑniˑo'no̱ntˑgaħˑdeħ'?
10Neħ neh haˑwă̱ă̱ ne Jeˑsus, Echˑhiħ'dyo̱o̱h nă̱'no̱ˑgweh. Da neħ' neh weˑsòħ' oˑge'oħˑjaaˑyă̱ħ he'o̱ˑweh niˑoˑdiˑyaħ'daˑye'iħˑo̱h. Oˑnă̱h' hoˑno̱ˑdyă̱nˑdas'o̱h nă̱'no̱ˑgweh, neħˑhuh' no̱o̱ neh wĭs niˑă̱'nă̱ħˑnyaħ'esˑhăs'hă̱ă̱h.
11Oˑnă̱h' ne Jeˑsus deˑoh'gwă̱h neh oˑăh'gwah; neħ' kuh noˑnă̱h' deˑo'dă̱ˑno̱ˑnyo̱s'o̱h, neħ wa'go̱ˑyaħk'ho̱ˑo̱s naˑgo̱'iˑo̱ˑnyaˑnih, da oˑnă̱h neh haˑgo̱'iˑo̱ˑnyaˑnih neħ' naeh ho̱ˑsas'haˑgoˑdiˑyaħk'ho̱ˑo̱s neh ehˑdaħ'gĕh hă̱ˑniħ'dyo̱ħ; neħˑhuh' kuh ha'eħˑgwah no̱ħˑo̱ˑwă̱h ne gă̱ˑjo̱h, gaˑnyòòħ' sho̱ he'no̱ħˑdetˑhoˑno̱n'do̱ˑă̱nˑjo̱ˑnih.
12Neħ' noˑnă̱h waˑo'no̱hˑdaħt, haˑgo̱ˑyă̱ˑo̱h'seeh naˑgo̱'iˑo̱ˑnyaˑnih, Saˑji'oˑeek do̱ˑsaaˑjik ne deˑyo'dyaħkˑho̱ˑnyo̱ħ o'daˑdă̱'o̱h, neħ nă̱ˑgă̱'o̱o̱k haħˑgwĭs'dă̱ħ deħˑo'yesˑhaħˑo̱o̱ħ.
13Oˑnă̱h' saˑdiˑno̱h'gwă̱sˑho̱ˑnyo̱o̱ħ, neħ' neh wasˑhă̱ă̱ dekˑnii' sgaˑeħ niˑgaħ'asˑhăăˑgee oħˑga'no̱hˑheħt neh' deˑyo'dyaħkˑho̱ħ o'daˑdă̱ă̱'o̱h neh' wĭs niˑyo'ăhˑgwaˑgeeˑno̱ħ, ne barley no̱ħˑo'ăhˑgoħˑdă̱ħ neħˑhuh' naˑo'diħˑshă̱ˑniħ neˑgă̱ħ' no̱ˑno̱nˑdekˑho̱'niˑno̱ħ.
14Da neħ nă̱'no̱o̱ˑgweh noˑnă̱h' waˑă̱'no̱ntˑgaatˑhòħ heˑniˑyo'iˑwa'năˑăˑgwat na'oˑyă̱ˑno̱ˑwă̱h' ne Jeˑsus, hoˑnă̱ă̱', Neħˑnă̱ˑgă̱ă̱ doˑgă̱s gai'waˑgwĕnˑniˑyòħ neħ Noˑdo'gă̱s'daˑnih naˑyo̱'neħ he'yo̱ˑă̱ˑjaˑdeħ.
15Neħ' diħ ne toˑno̱h'do̱ħ ne Jeˑsus heh tgaˑgo̱nt' sho̱ ă̱ntˑhă̱ˑneħ gaħˑhas'desˑhăħ ă̱'no̱ˑdye'ăħˑdʋk ă̱'a̱ˑwa̱ˑyeˑno̱o̱ħ, neħ' kuh ne go'wăhˑgoˑwaah ă̱ˑo̱ˑwa̱ˑyo̱o̱ˑniħ', oˑna'eħ hohˑdă̱n'dyo̱sˑo̱h neħˑhuh' heˑaˑweeˑno̱o̱h' heh ga'eˑno̱nˑdeħ haˑo̱h'hwa̱ħˑge'ah.
16Neħ' dih noˑnă̱h' oħˑdwa'dahˑso̱nˑdaˑik neh so̱'eh, neħˑhuh' heh tgaˑnyoˑda'eħ heˑoˑneeˑno̱o̱h' naˑgo̱'iˑo̱ˑnyaˑnih,
17Neħ' neh ga'o̱ˑwa̱ˑgo̱o̱h hoˑno̱n'deħˑno̱h'dahˑho̱h, gaˑnyoˑdăăħ'gĕs'ho̱ħ he'oˑneeˑno̱o̱h Caˑperˑnaˑum' gwaah. Da neħ' neh oˑnă̱h' deˑyò'dahˑso̱nˑdaˑiˑgo̱h ahˑso̱h' ne Jeˑsus deˑaˑgo̱ˑyaħ'doˑwă̱ħ'o̱h.
18Neħ' neh oˑnă̱h oħˑwa'deˑnyo'dăătˑgit, neħ' oˑga'iˑo̱ˑnih heh' sòħˑjih oħ'geˑoˑwaaˑnă̱nt.
19Neħ dih noˑnă̱h' no̱o̱h să̱h', geeˑih' giħˑshă̱h', heˑyot'gatˑhwă̱h ni'oˑneeˑno̱o̱h' heh hoˑno̱hˑsatˑhwă̱'o̱ˑdyeħ, waˑo̱ˑwa̱ˑgă̱ħ ne Jeˑsus oˑne'gaħˑgĕs'ho̱ħ i'eħ; neħ neh dosˑgă̱'o̱h daˑot'hisˑdo̱o̱'dyeħ heˑniˑga'o̱ˑyooˑdyeħ; neħ neh waˑo'no̱hˑdyo̱ħk.
20Neħ' dihˑne Jeˑsus haˑgo̱ˑyă̱'o̱hˑseeh, Iiħ neh'huh; să̱ˑno̱h' ă̱ˑswah'dyo̱ħk.
21Oˑnă̱h' neħˑhuh niˑyooˑweħ' aˑgwas' waˑoˑdiˑgaaˑyă̱h' wa'o̱ˑwa̱ˑgòħ' waa'deħˑno̱h'dăăh ga'o̱ˑwa̱ˑgo̱o̱h; daah, aˑgwas' waħˑo'go̱nˑdaaˑdyeħ' neħˑhuh' hoħˑwaħ'dihˑheħt he'dyo̱ˑă̱ˑjaˑdeħ' he'o̱o̱ˑweh hwa'oˑneˑno̱o̱'dyeħ.
22Neħ noˑnă̱h' oˑyaħ waħˑooˑhă̱ħt saˑwă̱ˑnĭsˑhăˑdă̱h, neħ nă̱'no̱o̱ˑgweh neh' sgaˑnyòˑdăăˑdi'gwah taˑdih'siˑaaħ, noˑnă̱h' waaˑdiˑgaħ'ă̱ˑyo̱o̱ħ heh tă̱ħˑă̱h deħˑga'o̱ˑwa̱a̱ˑyă̱ħ noˑyaħ, neħ sho̱' kuh noˑno̱n'deħˑno̱h'dahˑho̱h naˑgo̱'iˑo̱ˑnyaˑnih, neħ kuh neˑtă̱ħˑă̱h naeh ne Jeˑsus neħˑhuh deˑoˑdeħˑno̱h'dahˑho̱h ne' gaˑo̱ˑwa̱ˑgo̱o̱h naeh he'o̱ˑweh hoˑno̱nˑdeħˑno̱h'dahˑho̱h naˑgo̱'iˑo̱ˑnyaˑnih, neħˑgwaah' naeh neh hoˑno̱h'ho̱ħˑge'ah hoˑno̱h'dă̱nˑdyo̱o̱h;
23(Neħˑhuh gwaah' naeh oˑyaħ' ne' gaˑo̱ˑwa̱ħ Tiˑbeˑriˑas daˑwă̱'no̱hˑdă̱nˑdiħ, oħˑwaˑdiiˑyo̱ħ dosˑgă̱'o̱h heˑo̱ˑweh niˑoˑdi'ăhˑgwaˑgo̱'no̱ħ, noˑnă̱h' shaħˑthaˑdă̱ˑnyo̱'nyo̱o̱ħ Naˑyaħ'daˑgwĕnˑniˑyòħ,)
24Neħˑdih nă̱'no̱o̱ˑgweh noˑnă̱h' waaˑdiˑgaħ'ă̱ă̱ˑyo̱o̱ħ heh' neħˑhuh' deˑeħs ne Jeˑsus, kuh ha'eħˑgwah naˑgo̱ˑiˑo̱ˑnyaˑnih, oˑnă̱h' ha'eħˑgwah gaˑo̱ˑwa̱ˑgo̱o̱h' hoˑno̱n'deħˑno̱h'dahˑho̱h, Caˑperˑnaˑum heˑoˑdiˑyo̱s'o̱h, ho̱ˑwa̱'yaħˑdih'saˑgo̱o̱'dyeħ ne Jeˑsus.
25Neħ' noˑnă̱h' sa'o̱ˑwa̱ˑgă̱ħ' ne Jeˑsus he'o̱ˑweh' heˑeħs sgaˑnyòˑdăˑdi'gwaa, neħ noˑwă̱'o̱hˑseeh, Rabˑbi, wă̱ˑdo̱h' neˑgă̱ħ niis neħˑhuh' saˑyo̱s'o̱h nĕkˑhuh'?
26Do̱ˑsaa'go̱ˑwă̱ˑno̱ħ'să̱ˑgòħ ne Jeˑsus, haˑwă̱ă̱h', Doˑgă̱s', doˑgă̱s' neħ noħˑgwă̱'o̱s, Tă̱ħ'ă̱h deħˑneħ' deħˑsgwa'yaħˑdih'sakˑtaħ heh' eˑswat'gatˑhòħ noˑi'waˑnăă'gwat, neħ gwaa' sho̱ gaˑi'o̱ˑnih heh' eˑswaa'gwaak noˑăh'gwaħ, neħ' kuh heh eˑswah'daħt.
27Să̱ˑno̱h' neħ ă̱ˑswaˑiˑoħ'dehˑgo̱'o̱k na'eˑswaˑyă̱nˑdaħt niˑyees naħˑot neh' gaˑiˑwahˑdo̱'eħ; neħˑgwaah', [swaiˑòhˑdeh'go̱ˑo̱k] naˑe'swaˑyă̱nˑdaħt' ne waˑgo̱h neh, hwaħˑoˑiˑwaˑdaˑdyeħ' yo̱hˑheħ'o̱ˑweh niˑga'gasˑdeħ, neħ ne'neħ No̱ˑwa̱'wa̱k no̱ˑgweh' oħˑsheeˑjo̱ħ; neħ neˑgă̱ħ Na'wĕnˑniˑyòħ ne Gaħˑnis'hăħ hoˑi'waˑniˑyăˑdii, [no'aaˑwak.]
28Oˑnă̱h' ho̱ˑwă̱'o̱hˑseeh, A'neˑgă̱ħ' nă̱ˑyaˑgwaˑdyeeħ', naˑgaˑgweˑniħ' iˑgă̱ă̱ neħ a'yaˑgwaˑdye'oħˑdaat noˑi'oħˑdasˑhăħˑsho̱ħ Na'wĕnˑniˑyòħ'?
29Desˑhaˑgo̱ˑwă̱'no̱ħˑsăăˑgwă̱h' ne Jeˑsus haˑgo̱ˑyă̱'o̱h'seeh, Neħ' neˑgă̱ħ nă̱ˑgă̱ă̱ hoˑi'oħˑdasˑhăħ Na'wĕnˑniˑyòħ, neħ' nă̱sˑheˑswa'i'waˑgwĕnˑniˑyòs haˑyaħ'daˑdeħ neh' tohˑhaħ'o̱h.
30Neħ' neh sho̱ˑwă̱'o̱hˑseeh, A'naħˑot' neˑgă̱ħ' noˑi'oħˑdʋs'hăˑnă'ăˑgwat' ă̱hˑso'dahˑsiiħ', aˑyaˑgwat'gatˑhòħ' iˑgă̱ă̱h a'gwa'iˑwaˑgwĕnˑniˑyòs' kuh'? aˑneˑgă̱ħ' naħˑot' saˑi'òħˑdeeħ?
31Neħ nakˑhiħ'nisˑho̱ħ naeh' haˑdiisˑgwaħ' ne manna he'o̱ˑweh neh gaˑnyòòħ' osˑdă̱'ă̱ħ yo̱ˑă̱n'jaˑdeh'go̱h; neħˑhuh' niˑgaˑyeeˑă̱h' he'gaaˑyaaˑdo̱ħ, Neħ na'go̱ˑyaˑwii noˑăh'gwaħ nă̱ˑonˑdikˑseek gă̱ˑo̱'yaħˑgĕh' dyaˑweh'dahˑgo̱h.
32Oˑnă̱h ne Jeˑsus' haˑgo̱ˑyă̱ˑo̱h'seeh, Doˑgă̱s', doˑgă̱s' neħ nòħˑgwă̱'o̱s, neħ neh tă̱ħˑă̱h neħ' ne Moˑses deħˑsheˑswaˑwis'gwaħ noˑăh'gwaħ neh gă̱ˑo̱'yaħˑgĕh dwahˑdă̱n'dyo̱sˑgwaħ; neħ gwaah' Naaħ'nih naeh sheˑswa'wis neˑgaah'gwaˑgwĕnˑniˑyòħ ne gă̱ˑo̱'yaħˑgĕh dwetˑhaħ.
33Neħ să̱ħ'ă̱h neh noˑăh'gwaħ Na'wĕnˑniˑyòħˑgĕh dyaˑweh'dahˑgo̱h neħ ne'huh haaˑyaħ'daˑdeħ ne toˑdyaħ'dă̱hˑdo̱h ne gă̱'o̱ˑyaħˑgĕh, neħ kuh neh' yo̱h'heesˑhăħ daa'yaħˑdo'wehˑdaaˑnih he'yo̱ˑă̱ˑjaˑdeħ.
34Oˑnă̱h' ho̱ˑwă̱'o̱hˑseeh, Syaħˑdaˑgwĕnˑniˑyòħ', dyòtˑgo̱nt' neħ daˑgwa'wihˑseek nă̱ˑgă̱ă̱' oˑăh'gwaħ.
35Neħ' ne Jeˑsus haˑgo̱ˑyă̱ˑo̱hˑseeh, Iiħ' neˑgă̱ħ noˑăh'gwaħ ne yo̱hˑheħ'o̱ˑweh; neħ haˑyaħ'daˑdeħ ne' neħˑhuh ă̱ntˑhat'go̱nˑdʋk he'gyaħˑdaaˑdeħ dee'wă̱nˑdo̱h' taˑoˑdo̱s'weħˑdă̱h; neħ' kuh haaˑyaħ'daˑdeħ neh' iiħ ă̱ˑa̱'giˑwaˑgwĕnˑniˑyòs' de'wă̱nˑdo̱h' taˑaħ'datˑhă̱h.
36Neħ gwaah' waeh ne gwă̱ˑo̱h'seeh, neħ' naeh neh' sgwatˑgaatˑhwă̱h, tă̱ħˑă̱h gwaah deħˑswa'iˑwaˑgwĕnˑniˑyòsˑdo̱o̱ħ.
37Gaˑgweˑgo̱h' heˑniˑyo̱o̱h' dă̱ˑo̱'gyaħˑdo'wehˑdă̱ħ Naaħ'nih haħˑdeˑgaˑgo̱nt' ă̱ˑwa̱'gyaħˑdoˑwă̱ħt; neħ' kuh haˑyaħ'daˑdeħ neh iiħ' ă̱ˑa̱'gyaħˑdoˑwă̱ħt tă̱ħ'ă̱h deħˑtaħ'gwĭsˑdă̱ħ to̱'daˑgaˑye'ăħ'dʋk neħ sih' sho̱o̱ ho̱ˑsa'eˑis.
38Neħ să̱ħˑă̱h heh dwaˑga'dyaħˑdă̱h'do̱h ne gă̱'o̱ˑyaħˑgĕh, tăħˑă̱h deħˑneħ niiħ' iˑgă̱ă̱ akˑni'go̱ˑă̱ħ neħ'huh' no̱o̱ˑgyeeħ; neħ gwaah' he'nitˑhoħ'niˑgooħ'dă̱ă̱h neh' taˑgeh'haħˑo̱h.
39Neħ' neˑgă̱ħ nă̱ˑgă̱ă̱ nitˑhoħ'niˑgooħ'dă̱ă̱h Naaħ'nih neh' taˑgeh'haħˑo̱h, neħ ne gaˑgweˑgo̱h heˑniˑyo̱o̱h' deˑa'gyaħˑdo'wehˑdaˑniih tă̱ħˑă̱h deħˑtaħ'gwĭsˑdă̱ħ ta'waˑgah'do̱o̱h; neħ gwaah' nesˑge'gesˑgòħ gwaħˑhòh' neeˑswă̱'nĭsˑhăˑgo̱nt.
40Neħ' gwaħˑhòh' nă̱ˑgă̱ă̱h nitˑhoħ'niˑgooħˑdă̱ă̱h haˑyaħ'daˑdeħ netˑhaˑgeh'haħˑo̱h, neħ naah'deˑyo̱ˑgweħ'daˑgee' nă̱'ooˑgă̱ħ No'aaˑwak, ă̱ˑo'iˑwaˑgwĕnˑniˑyòs' gwaħˑhòh', ă̱ˑo'yă̱nˑdaħt' ne'neħ ne' yo̱hˑheesˑhăħ ne' waħˑo'i'waˑdaˑdyeħ; neħ' kuh ne dă̱ntˑhe'yaħˑda'gesˑgòħ ne swă̱'nĭsˑhăˑgo̱nt.
41Oˑnă̱h' ne Jews waˑdii'wasˑhă̱'nyo̱ˑgòħ haˑyaħ'daˑdeħ, neħ gaˑi'o̱ˑnih heh' waˑă̱ħ, Iiħ' ne gă̱ħ noˑăh'gwaħ ne gă̱'o̱'yaħˑgĕh dyoˑdyaħˑdă̱hˑdo̱h.
42Neħ' ne'oˑnă̱ă̱h, Tă̱ħ'ă̱h gă̱h deħˑneeħ' nă̱ˑgă̱ă̱h Jeˑsus deˑoˑa'wak ne Joˑseph, neħ nă̱ˑgă̱ă̱h nooħ'nih kuh noˑnoħ'ă̱h etˑhi'yă̱nˑdeeˑih? a'neˑgă̱ħ' niˑyòħˑdă̱ă̱h' heˑgoˑwaah' haˑdo̱h' gă̱ˑo̱'yaħˑgĕh dwaˑga'dyaħˑdă̱h'do̱h?
43Neħ' dih neh Jeˑsus desˑhaˑgoˑwă̱'no̱ħˑsăˑgwă̱h haˑgo̱ˑyă̱'o̱hˑseeh, să̱ˑno̱h' ă̱ˑswa'iˑwas'hă̱ˑnyo̱'gwaˑo̱o̱h.
44Deħˑso̱o̱ˑgaaħ' ne'o̱ˑgweh deˑoˑgweˑnyo̱o̱' neħˑhuh' o̱nˑdaat'go̱nˑdʋk he'gyaħˑdaaˑdeħ, neħ sho̱' oˑgweˑnyo̱o̱h neħ Naaħ'nih ne taˑgeh'haħˑo̱h neħ' hă̱ˑo'yaħˑda'diˑă̱nˑtòħ; neħ'' naˑeh Niiħ ă̱sˑhe'yaħˑda'gesˑgòħ neˑswă̱'nĭsˑhăˑgo̱nt.
45Neħ' ne' gaˑyaaˑdo̱ħ he'o̱ˑweh noˑdiˑdoˑgă̱s'daˑnih, Neħ haˑdi'yaħˑdaaˑdeħ, gaˑgweˑgo̱h' neħ ă̱ˑo̱ˑgo̱'iˑo̱ˑnyă̱ħ Naa'wĕnˑniˑyòħ. Neħ' dih gaˑiˑo̱ˑnih haħˑdeˑyo̱ˑgweħ'daˑgeeh no̱ˑgweh neh' goˑo̱ˑgă̱h iˑgă̱ă̱h, neħ' kuh haaˑyaħ'daˑdeħ Naaħ'niħ dyaˑgo'aˑwih'dahˑgo̱h' heˑgoˑde'yă̱sˑdo̱h, Iiħ' o̱ˑgyaħ'doˑwă̱ħs' ne' neħ.
46Tă̱ħ'ă̱h' naeh deħˑneħ neh' so̱ˑgaaħ' ne'o̱ˑgweh a'oˑgă̱'a̱a̱k Naaħ'niħ; neħ sho̱ kuh ne' neħˑhuh' iˑgă̱ă̱h' taˑweh'dahˑgo̱h haˑyaħ'daˑdeħ Na'wĕnˑniˑyòħ; neħ' naeh ne'neħ hoˑgă̱ă̱h' Naaħ'nih.
47Doˑgă̱s', doˑgă̱s' oħˑgwă̱'a̱s, Neħ haaˑyaħ'daˑdeħ neh' Iiħ' ă̱ˑa̱ˑgiiˑwaˑgwĕnˑniˑyòs, hoˑyă̱ħ' ne'neħ neeˑwaħˑo'iˑwaˑdaˑdyeħ yo̱h'heeˑshăħ'.
48Iiħ' neˑgă̱ħ noˑăh'gwaħ ne' yo̱hˑheħ'o̱ˑweh.
49Neħ nechˑchiħ'nisˑho̱ħ'gă̱ˑa̱a̱ħ doˑgă̱s' haˑdiisˑgwaħ' ne manna, heˑo̱ˑweh neh gaˑnyòòħ' osˑdă̱'ă̱ħ yo̱ˑă̱n'jaˑdeh'go̱h, neħ' kuh noˑni'eeˑyo̱o̱h.
50Neħ' neˑgă̱ħ' nă̱ˑgă̱ă̱h noˑăh'gwaħ neˑgă̱ˑo̱ˑyaħˑgĕh dyoˑdyaħ'dă̱hˑdo̱h, neħ' noˑgweˑnyo̱o̱h' naaħ'deˑyo̱ˑgweħ'daˑgee ă̱ˑyo̱n'dekˑho̱ˑniħ tă̱ħˑă̱h' kuh taˑyaˑi'yeeh.
51Iiħ' neˑgă̱ħ neˑyo̱hˑheħ'o̱ˑweh noˑăh'gwaħ neˑgă̱ˑo̱ˑyaħˑgĕh dyoˑdyaħ'dă̱hˑdo̱h. So̱nˑdiħˑgwa'naħˑo̱t ne'o̱ˑgweh ă̱'a̱a̱h'gwaak nă̱ˑgă̱ă̱h' neħ naˑyò'iˑwaˑdaˑdyeħ ă̱ˑo̱ˑheek; neħ kuh' noˑăh'gwaħ ne dă̱ˑgyaħ'doˑweet neħ ne'huh ne geħˑwa'aħ, neh' neˑgă̱ħ nă̱ˑgă̱ă̱h' dă̱ˑgyaħ'doˑweet nă̱ˑya'o̱hˑhesˑdak he'yo̱ˑă̱nˑjaˑdeħ.
52Oˑnă̱h' ne Jews hoˑno̱o̱ˑho̱ħ' sho̱' kuh oħˑtaˑdii'waˑgeh'haˑno̱o̱ħ, hă̱ˑno̱ˑdo̱h', Aˑneˑgă̱ħ niˑdyoˑyeˑăħ'dahˑgo̱o̱h' nă̱ˑgă̱ă̱h' ho̱ˑgweh' hoˑgweˑnyo̱o̱h' ă̱s'ho̱ˑgyo̱ħ naaħˑwa'aħ naˑeˑdwaak'?
53Oˑnă̱h' ne Jeˑsus haˑgo̱'yă̱ˑo̱h'seeh, Doˑgă̱s', doˑgă̱s' òħˑgwă̱'o̱s, Neħ' giħˑshă̱h nă̱ˑgă̱'o̱o̱k neħ deħˑswaˑgo̱o̱ħ naaħˑwa'aħ No̱ˑwa̱'wa̱k no̱ˑgweh', neħ kuh a'eˑswaˑne'geˑă̱ħ naatˑgwă̱h'saħ, tă̱ħˑă̱h deħˑos'to̱o̱h deħˑswaˑyă̱ħ ne'yo̱hˑheesˑhăħ heˑswaˑyaħ'daˑdeħ.
54So̱n'diħˑgwah ă̱ˑa̱a̱k' ne'geħˑwa'aħ, neħ' kuh ă̱ˑa̱'neˑge'ăħ neˑgetˑgwă̱h'saħ haˑaaħ' ne'neħ neˑwaħˑo'iˑwaˑdaˑdyeħ yo̱hˑheesˑhăħ; neħ' kuh neh Iiħ' ă̱sˑheˑyaħˑda'gesˑgòħ neeˑswă̱'nĭsˑhăˑgo̱nt.
55Neħ să̱ħ'ă̱h ne geħˑwa'aħ do'gă̱sˑo̱ˑweh' gakˑhwaħ'o̱ˑweh, neħ' kuh ne getˑgwă̱h'saħ do'gă̱sˑo̱ˑweh ha'eħˑgwah, ă̱ˑye'aħ'daˑno̱ˑwă̱ħ.
56Neħ haˑyaħˑdaˑdeħ neˑneħ' ă̱ˑa̱a̱k neˑgeħˑwa'aħ, ne kuh ă̱ˑa̱'neˑge'ăħ neˑgetˑgwă̱h'saħ, neħˑhuh' dyòtˑgo̱nt' haħˑno̱nt' he'gyaħˑdaaˑdeħ, neħˑhuh' kuh nă̱ă̱ħˑiiħ geħˑno̱nt' haˑyaħ'daˑdeħ.
57Neħ he'neħ taˑgeh'haħˑo̱h no̱o̱ˑheħ'o̱ˑweh Naaħ'nih, neħˑhuh' kuh go̱hˑheh'go̱h haaˑyaħ'daˑdeħ Naaħ'nih, neħˑhuh dih' kuh ha'eħˑgwah nă̱ˑyaaˑwă̱h' haˑyaħ'daˑdeħ neˑneħ' ă̱ˑa̱ˑdekˑho̱ˑniħ heˑgyaħˑdaaˑdeħ, neħ waeh ne' neħˑhuh' ă̱ˑo̱'hehˑgo̱'o̱k he'gyaħˑdaaˑdeħ.
58Neħ' ne'gă̱ħ' nă̱ˑgă̱ă̱h neˑgaah'gwaˑgwĕnˑniˑyòħ neˑgă̱ˑo̱ˑyaħˑgĕh dyoˑdyaħ'dă̱hˑdo̱h; tă̱ħˑă̱h' naˑeh neħˑhuh' deħˑoħ'dă̱ă̱h haa'diisˑgwaħ ne manna nechˑhiħ'nisˑho̱ħ'gă̱ˑa̱a̱ħ hoˑni'eˑyo̱o̱h' gwaħˑhuh; neħ' haaˑyaħ'daˑdeħ neˑneħ' ă̱ˑa̱'dekˑho̱ˑniħ nă̱ˑgă̱ă̱h oˑăh'gwah hă̱ˑyo'iˑwaˑdaˑdyeħ ă̱ˑo̱o̱ˑheek.
59Neħ' nă̱ˑgă̱ă̱h' nòħˑo'iˑòħˑdă̱ħˑsho̱ħ waˑă̱'a̱hˑsyo̱o̱s he'o̱ˑweh hă̱ˑno̱nt'gă̱ˑnĭs'atˑhaħ, he'no̱ħˑweeħ haˑdi'o̱ˑnyaˑnih ne Caˑperˑnaˑum.
60Neħ' dih noˑno̱nt'gaħˑdeħ naˑgo̱'iˑo̱ˑnyaˑnih noˑnă̱h waˑă̱'no̱ˑo̱k' nă̱ˑgă̱ă̱h', hoˑnă̱ă̱h', Gaˑnooˑo̱ħ heˑniˑga'iˑoħ'dă̱ă̱h; so̱'naħˑòt goˑgweˑnyo̱o̱h' ă̱ˑyaˑgoˑdii'watˑho̱nˑdeek?
61Neħ gwaah' ne' taˑyă̱nˑdeeˑih ne Jeˑsus naˑyaħ'daˑgo̱o̱h, heh oħˑtoˑno̱nˑde'yă̱ħˑhih'daˑno̱o̱s' naˑgo̱'iˑo̱ˑnyaˑnih heˑniˑga'iˑoħˑdă̱ă̱h, neħ naˑgoˑyă̱'o̱h'seeh, eˑswa'i'waˑetˑgă̱ħs gă̱h nă̱ˑgă̱ă̱h?
62Neħ' gwaah' giħˑshă̱h neˑdyă̱ˑgwah aas'heˑswaˑgă̱ħ No̱ˑwa̱'wa̱k no̱o̱'gweh heħˑtgă̱h' ho̱ˑsa'eeħ he'o̱ˑweh yaaˑeħ' tă̱ħˑdyo̱ˑdak, a'neˑneħ'?
63Neħ ne'huh Notˑhwa'isˑhăħ neˑwaˑdo̱h'hesˑdah'gwaħ; tă̱ħˑă̱h' naeh nòħˑwa'aħ deħˑosˑhă̱ˑno̱'nyaħˑdah'gweeħ; neħ' noˑwă̱ă̱ˑno̱ħ niiħ' neˑgwas'nyeħˑseh otˑhwa'isˑhăħ ne'huh, neħ' kuh ne'yo̱hˑheħ.
64Neħ gwaah' ne deˑswa'dyesˑdo̱h ne tă̱ħˑă̱h deħˑswa'iˑwaˑgwĕnˑni'yòsˑtaħ, Neħ să̱ħ'ă̱h ne sho̱ˑda'wahˑsaaˑwă̱ħ chiˑa'yă̱nˑdeˑih' sho̱ ne Jeˑsus he'niˑaˑdiˑyaħ'daˑdeħ ne' deˑaˑdii'waˑgwĕnˑniˑyòs'taħ, neħ' kuh haaˑyaħ'daˑdeħ ne' neħˑhuh' nă̱ˑo̱ˑyeeħ' ă̱ˑo'dă̱ˑniiˑno̱ħ ă̱'o'yaħˑdaatˑgaħ.
65Neħ kuh, neˑaˑwă̱ă̱h, Neħ dyoˑi'waħ nă̱ˑgă̱ă̱h heˑneħˑhuh' niˑwaˑgye'ă̱h gwa'oˑwiih, tă̱ħˑă̱h' deˑoˑgweˑnyo̱o̱h' so̱ˑgaaħ ne'o̱ˑgweh neħˑhuh' o̱ˑdaat'go̱nˑdak he'gyaħˑdaaˑdeħ nă̱ˑgă̱'a̱a̱k iˑgă̱ă̱' neħ Naaħ'nih deˑoħ'hasˑdes'hăˑwiih.
66Neħ huh' niˑyooˑweħ' ne'neħ oħˑwah'saˑwă̱ħ ho'no̱nt'gaħˑdeħ naˑgo̱'iˑo̱ˑnyaˑnih saˑă̱ˑno̱hˑgeet, tă̱ħ'ă̱h neˑdoˑgă̱ă̱h' o̱ˑsa'ă̱ˑneħˑseek' ne Jeˑsus noˑă̱ˑdo̱'o̱ˑgwaah oħ'gaˑgo̱nˑdʋk.
67Oˑnă̱hˑne Jeˑsus haˑgo̱ˑyă̱'o̱hˑseeh ne wasˑhă̱ă̱h dekˑni' sgaˑeh [niˑă̱ˑno̱nˑdiih], Neħ' gă̱h no'yaħˑjih nă̱ă̱ħ' iis hă̱ˑsweeħ?
68Neħ ne Siˑmon Peˑter do̱ˑsaˑoˑwă̱'no̱ħˑsăăˑgòħ, haˑwă̱ă̱h', Syaħ'daˑgwĕnˑniˑyòħ, so̱ˑnaħˑòt neˑgă̱ħ' noˑyaħ' haasˑhaˑgwa'yaħˑdoˑwăħt? iis' waeh neˑgă̱ħ' isˑhaaħ' noˑwă̱ă̱ˑno̱ħ' ne'yo̱hˑheħ'o̱ˑweh.
69Neħ kuh naˑgwa'iˑwaˑgwĕnˑni'yòsˑtaħ tă̱ħˑă̱h daħˑdeˑyo̱ˑgwaħ'niˑgo̱'ă̱ˑgee' heh' iis doˑgă̱s' ne' Christ, No'aaˑwak no̱ˑheħ'o̱ˑweh Na'wĕnˑniˑyòħ.
70Desˑhaˑgo̱ˑwă̱'no̱ħˑsăăˑgwă̱h ne Jeˑsus, Tă̱ħ'ă̱h gă̱h Iih' deħˑgwa'yaħˑdăăˑgwă̱h nă̱ˑgă̱ă̱ neh wasˑhă̱ă̱h dekˑnii' sgaˑeħ' niˑswaˑdii, shaˑyaħ'daat ne'huh he'niˑswaˑdii hă̱ˑnis'heˑoˑno̱ħ?
71Neħ was'nyeh'dʋk haaˑyaħ'daˑdeħ ne Juˑdas Isˑcaˑriˑot, ho'aaˑwak ne Siˑmon; neħ să̱ħ'ă̱h ne'neħ neˑgă̱ħ nă̱ˑo'dă̱ˑniˑno̱ħ, neħ shaˑyaħˑdaat nă̱ˑgă̱ă̱ neˑgă̱ħ' neˑwasˑhă̱ă̱ dekˑnii' sgaˑeħ', [niˑă̱'no̱nˑdii.]
Currently Selected:
John 6: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
