John 5
5
1Neħ' noˑnă̱h' shaħˑga'at nă̱ˑgă̱ă̱, neħ noˑno̱n'dekˑhwe'oˑo̱h ne Jews; neħ' ne Jeˑruˑsaˑlem heˑa'weˑno̱o̱' ne Jeˑsus.
2Neħ' dih heˑniˑdyòħ'dă̱ă̱h ne Jeˑruˑsaˑlem, dosˑgă̱'o̱h he'o̱ˑweh' niˑyò'no̱ntˑă̱ˑoˑga'ă̱nt ne deˑyòˑdiˑno̱ħ'gă̱ˑo̱nt, o'neeˑgòħ, neħ ne' Beˑthesˑda gaˑyaˑso̱h' neh Heˑbrew niˑgaˑwă̱ˑnoħ'dă̱ă̱, wĭs' niˑga'no̱hˑsòòt ne' wakˑah.
3Da neħ' no̱ˑgyes'ho̱ħ nă̱ˑgă̱ă̱ haˑdi'yaħ'daˑgeˑo̱ħ gă̱nˑdyòh'goˑwaaˑnă̱h' noˑdiˑno̱k'daˑnih, no̱'gweh, deˑaˑdiˑgah'gweeˑgo̱h, hoˑdih'sòħˑkaħ, hoˑdihˑhăˑga'yaħˑseh, [haˑdiˑno̱h' neħ' nă̱ˑwa̱h'neˑgò'nyaˑno̱o̱ħ.
4Neħ să̱ħ'ă̱h nă̱ˑo̱'yaħˑge'oˑno̱ħ, gaˑdooˑgă̱ă̱' heˑniˑyò'waħˑgĕh neħˑhuh' gă̱ă̱s' waa'deħˑsgòh' ho'neeˑgòħ, oħˑtaa'neˑgă̱nˑdo̱h; da neħ' gă̱ă̱s noˑnă̱h' oħˑdyò'neˑgă̱nˑdo̱h so̱n'diħˑgwa'naħˑot go̱n'daˑdyeħ' neħˑhuh' ă̱ˑyo̱n'deħˑsgòh, saˑyo̱nˑdo̱ħ' gă̱ă̱s naˑgwa'naħˑot hoˑno̱o̱kˑda'niˑak.]
5Neħ' naˑyaħ'daˑdooˑgă̱ă̱ no̱'gweh neħˑhuh hă̱ħˑdyo̱nˑdʋk, neħ neh să̱h niˑyòs'hăsˑhă̱ă̱ no̱ħˑo'nisˑheħt chiˑoˑno̱o̱k'daˑnih.
6Neħ noˑnă̱h ne Jeˑsus waˑoˑgă̱ħ haˑyas'hă̱h, neħ kuh noˑno̱h'do̱ħ heh' oˑnă̱h' no̱o̱ o'nă̱hˑjih neħˑhuh' chiˑo'yaħˑdaaˑwă̱s, haˑwă̱ˑo̱hˑseeh, Deˑsa'do̱ˑă̱ˑjoˑnih gă̱h' no̱o̱'sahˑsaaˑdo̱ħ?
7Neħ' noˑno̱o̱k'daˑnih no̱'gweh, haˑwă̱ă̱, Syaħ'daˑgwĕnˑniˑyòħ, tă̱ħˑă̱h' deħˑaˑgo̱ˑgweħ'daˑyă̱ħ, noˑnă̱h gă̱ă̱s' oħˑwah'hneˑgo'nyaˑno̱o̱ħ na'aˑyo̱ˑgeħ'sgòh; neħ gwa' gă̱ă̱s noˑnă̱h daaˑgeħ', oˑyaħ' gă̱ă̱s oħˑta'gesˑhă̱ă̱ˑnih', neħ go̱n'daˑdyeħ' hwaˑa'dyaħˑdă̱nt.
8Neħ ne Jeˑsus' waa'wă̱ˑo̱s, Desˑdaħt', deeˑsek' ne saˑno̱ħ'sgwaħ, sahˑdă̱nˑdih' kuh.
9Neħ ne waħˑoˑgo̱nˑdaaˑdyeħ' sho'do̱ħ'o̱h, deˑòh'gwă̱h kuh noˑno̱ħ'sgwaħ, hohˑdă̱nˑdyo̱sˑo̱h; da neħ' neˑneħ shaħˑwă̱'nĭsˑhăăt a'wă̱ˑdaˑdo'gă̱hˑdo̱'no̱ħ.
10Neħ dih dyòˑi'waħ, ne Jews ho̱ˑwă̱'o̱hˑseeh ne gă̱ħ' ne sho̱ˑwa̱n'jă̱ħˑdo̱h, a'wă̱ˑdaˑdo'gă̱hˑdo̱h; tă̱ħˑă̱h' deħˑga'yaˑnes'hăħˑgĕh heh syaħˑdaaˑdeħ' naas'haˑwiħ ne saˑno̱ħ'sgwaħ.
11Dechˑhaˑgaˑwă̱'no̱ħˑsăˑgwă̱h, Neħ haaˑyaħ'daˑdeħ ne shaˑge'jă̱ħˑdo̱h neħ shaa'yaħˑdaat waa'gă̱ˑo̱s, Deˑsek ne saˑno̱ħ'sgwaħ, sahˑdă̱nˑdih' kuh.
12Oˑnă̱h' ho̱ˑwa̱n'do̱s'o̱h, So̱' naħˑòt no̱'gweh' ne yă̱ˑo̱hˑseeh' deeˑsek' ne saˑno̱ħˑsgwaħ', sahˑdă̱nˑdih' kuh'?
13Da neħ' haaˑyaħˑdaˑdeħ' neˑgă̱ħ' ne' sho̱ˑwa̱'jă̱ħˑdo̱h, neħˑhuh' sho̱ niˑyòħ'dă̱ă̱ na'gă̱ˑa̱a̱k iˑgă̱ă̱' de'oˑyă̱nˑdeeˑih; neħ să̱ħ'ă̱h neh ò'yaħˑjih heˑo'datˑhaah ne Jeˑsus, suħˑjih' gă̱nˑdyòh'goˑwaaˑnă̱h' neħˑhuh' goˑyaħ'daˑye'iħˑo̱h.
14No̱ħ'gă̱ħˑgĕh ne Jeˑsus oˑno̱h'saˑdo'gă̱hˑdiħˑgĕh sa'ooˑgă̱ħ, neħ naaˑwă̱'o̱hˑseeh, Satˑga'ă̱ˑo̱h, oˑnă̱h naeh jeˑsa'jă̱ħˑdo̱h; să̱ˑno̱h dih' ă̱chˑhiˑwaˑneeħˑaak, dyă̱ˑgwah' sho̱ si'gwaa heˑnă̱ˑjiˑsaˑyaħ'daˑwă̱h.
15Da neħ nohˑdă̱n'dyo̱sˑo̱h no̱o̱ˑgweh; neħ ne Jews heˑa'go̱ˑoˑwii he neħ ne Jeˑsus ne sa'oˑjă̱ħt.
16Neħ daˑyò'iˑwaħˑheħt ne Jews dya'wă̱ħˑo̱h waˑo̱'wa̱ˑno̱h'go̱nˑdă̱ħ ne Jeˑsus, [neħ kuh ne waˑă̱ˑnihˑsaak heˑno̱'daˑdiˑyeˑăħˑdak a'o̱ˑwa̱ˑnyòħ,] neħ gaˑiˑo̱ˑnih heh aˑwĕnˑdaˑdo'gă̱hˑdo̱ħˑgĕh neħˑhuh dyòtˑgo̱nt niˑoˑdye'a̱nˑdyeħs nă̱ˑgă̱ă̱ no̱ħˑo'iˑòħ'dă̱ħˑsho̱ħ.
17Neħ dih ne Jeˑsus deˑchaˑgo̱ˑwă̱'no̱ħˑsăăˑgwă̱h, Neħ Naaħˑnih dyòtˑgo̱nt' naeh nă̱ˑgă̱ă̱ he'niˑyoˑweħ' heˑga'wiħs hoˑi'oħˑdeħ neħˑhuh kuh nă̱ă̱ħ' iiħ niˑwaˑgyeˑă̱h' heh aˑgyòħ'deħ.
18Neħ daˑyòˑiˑwaħˑheħt ho̱ˑsa'diˑgă̱ă̱ˑis' ne Jews' waˑă̱'nihˑsaak' heˑno̱o̱'daˑdiˑye'ăħˑdak aa'o̱ˑwa̱ˑnyòħ, neħˑgaˑiˑo̱ˑnih heˑtă̱ħˑă̱h sho̱' neħ, deħˑdyò'iˑwaħ heh oħˑtaaˑyaħk' naˑwĕnˑdaˑdo'gă̱hˑdo̱h, neħ gwa' gye he waˑă̱ħ, neħ haħˑnih Na'wĕnˑniˑyòħ, neħˑhuh' naˑoˑdaˑdyeeħ' ne shaħˑda'iˑyaħ'daˑdeek Naˑwĕnˑniˑyòħ.
19Oˑnă̱h ne Jeˑsus dechˑhaˑgoˑwă̱'no̱ħˑsăăˑgwă̱h' haˑgo̱ˑyă̱ˑo̱h'seeh, Doˑgă̱s', doˑgă̱s', neħ noħˑgwă̱'o̱s', Neħ No'aaˑwak' tă̱ħˑă̱h' deˑoˑgweˑnyo̱o̱' haħˑgwĭs'dă̱ħ ne' aˑo̱hˑhwa̱ħ; neħ gwa', naatˑgaaˑtwʋs' heˑniˑoˑyeˑa̱nˑdyeħ Nooħ'nih; neħ să̱ħˑă̱h naˑgwa'naħˑòt no̱ħˑoˑiˑoħ'dă̱ħ nă̱ˑa̱a̱nˑdyeeħ', neħ sho̱ shaħˑgaasˑho̱ħ ha'eħˑgwah neħˑhuh' nă̱ˑa̱a̱ˑyeeh' No'aaˑwak.
20Neħ să̱ħ'ă̱ħ Nooħ'nih hoˑno'o̱hˑgwaħ No'aaˑwak; neħ kuh neˑyò'iˑwaˑgweˑgo̱h hotˑgat'hwahˑdaaˑnih, heˑniˑa'dyeˑhaħ' ne'aˑo̱hˑhwa̱ħ; neħ kuh ne' tgaˑgo̱nt' si'gwa heˑniˑyòˑiˑoħˑdasˑhă'năˑăˑgwat' aˑòt'gatˑhwah'dă̱ħ, neħ naˑeˑswa'iˑwaˑnă'gòħ iˑgă̱ă̱.
21Neħ să̱ħˑă̱h heˑniˑa'yeˑhaħ Nooħ'nih cha'goˑgesˑgwʋs' ne gaˑwe'eˑyo̱o̱ chaˑga'o̱ˑheeˑdʋs' kuh, neħˑhuh' kuh ha'eħˑgwah niˑyòħ'dă̱ă̱ No'aaˑwak hoˑgweˑnyo̱o̱ ne gaˑnyòòħ' sho̱ iˑgă̱ă̱ ă̱'eeħ skeˑyo̱o̱ˑheet.
22Neħ să̱ħ'ă̱h Nooħ'nih deħˑso̱o̱ˑgaaħ' no̱o̱'gweh daħˑdeˑoˑyaħ'doˑweetˑhaħ, neħ gwa' oˑiˑwaˑgweˑgo̱h' hoˑwii' noˑyaħ'doˑweh'dasˑhăħ No'aaˑwak;
23Neħ ne' gaˑgweeˑgo̱h no̱o̱'gweh aˑo̱ˑwa̱'yaħˑdaˑno'o̱hˑgwaak' No'aaˑwak, shaħˑda'yòħˑdă̱'a̱a̱k sho̱ he'niˑo̱ˑwa̱ˑyaħ'daˑno'o̱hˑgwaħ Nooħ'niħ. Neħ haaˑyaħ'daˑdeħ ă̱ˑgă̱ˑa̱a̱k deˑo'yaħˑdaˑno'o̱hˑgwaħ No'aaˑwak, tă̱ħˑă̱h kuh ha'eħˑgwah deˑo'yaħˑdaˑnoˑo̱hˑgwaħ Nooħ'nih ne tohˑhaħ'o̱h.
24Doˑgă̱s', doˑgă̱s', oħˑgwă̱'o̱s, Neħ' haaˑyaħ'daˑdeħ nă̱ˑa̱a̱ˑgòħ' heˑniˑgwă̱'nòħˑdă̱ă̱h, neħ' kuh nă̱ˑò'iˑwaˑgwĕnˑniˑyòs' ne taˑgeh'haħˑo̱h, waˑoˑyă̱nˑdaħt' ne' waħˑo'iˑwaˑdaˑdyeħ' yo̱ˑheħ'o̱ˑweh, tă̱ħˑă̱h neħˑhuh to̱o̱'daˑaˑyo̱h' heˑniˑgaˑyă̱ħ' ne goˑiˑwaˑă̱ħ'hehˑdaaˑnih; neħ gwaa' neh hoˑăh'do̱h ne gă̱ˑe'yaħtˑgĕh neħˑhuh' hesˑhoˑyo̱o̱ heˑniˑgaaˑyă̱ħ' ne yo̱hˑheħ'o̱ˑweh.
25Doˑgă̱s, doˑgă̱s oħˑgwă̱'o̱s, Daˑweħ' heˑniˑdyò'isˑdaaħˑeeh, aˑgwas' gwa' naeh oˑnă̱h' nă̱ˑgă̱ă̱ ne'waħ, noˑnă̱h ne gaˑwee'yo̱o̱h ă̱'o̱ˑwa̱ˑwă̱'no̱ˑo̱o̱k No'aaˑwak' Na'wĕnˑniˑyòħ; da neħ' haaˑdi'yaħˑdaaˑdeħ nă̱'no̱ˑo̱o̱k ă̱'no̱hˑheek ne'neħ.
26Neħ să̱ħ'ă̱h naeh he'oˑyă̱ħ Nooħ'nih ne yo̱hˑheħ naˑgwas' haˑo̱ˑhwa̱ħ', neħˑhuh' dih kuh haeħˑgwah niˑoˑyeeˑă̱h' hoˑwii ne' yo̱hˑheħ No'aaˑwak neħ na'oˑyă̱nˑdaħk' haeħ'gwah naˑgwas' haˑo̱ˑhwa̱ħ'.
27Neħ kuh neh' hoˑwii ne' gaħˑhas'desˑhăħ, neh dă̱ˑo̱'yaħˑdo'wetˑhaak neħˑgaˑi'o̱ˑnih' neħ' Ho̱ˑwa̱'wa̱k no̱o̱ˑgweh.
28Să̱ˑno̱h' ă̱ˑswa'iˑwaˑnăˑăˑgòh nă̱'gă̱ă̱; neħ să̱ħ'ă̱h ne daaˑweħ' heˑniˑdyò'ĭsˑdaaħˑeeh, noˑnă̱h gaˑgweeˑgo̱h' no̱nˑda'dehˑsaˑdo̱hˑgwaħ'gĕh heˑyeħ'no̱nt, ă̱ˑa̱ˑwa̱ˑwă̱'no̱ˑo̱o̱k,
29Neħ ne dă̱ntˑhă̱ˑno̱ntˑgă̱h; neħ haaˑdi'yaħˑdaaˑdeħ ne wiˑyòò' gòˑiˑoħˑdeh'go̱ˑno̱ħ', neħ' naeh dă̱nˑdyo̱nt'gă̱ˑo̱ħˑdak nă̱ˑya'go̱hˑheeˑdyeħ; da oˑnă̱h neh' waˑeetˑgă̱ħ' niˑyaˑgoˑdye'ă̱ˑno̱ħ', neħ dă̱nˑdyo̱ntˑgă̱ˑo̱ħˑdak nă̱ˑyo̱nt'datˑheeˑwat.
30Neħ naˑgwas' gyaħˑdiiˑtă̱ħˑă̱h' deħˑtaħ'gwĭsˑdă̱ħ deħˑaˑgeˑgweˑnyo̱o̱; neħ' dih' sho̱ heˑniˑyaaˑwă̱s' gaˑo̱o̱kˑhaħ' neħˑhuh nitˑka'wihˑdah'gwaħ deˑgyaħ'doˑweetˑhaħ; neħ' gwaħˑhuh ne wiˑyòò' heˑdeˑgyaħ'doˑweetˑhaħ, neħ gaˑi'o̱ˑnih' ne tă̱ħ'ă̱h neħ deħˑa'gihˑsaaˑgo̱h niiħ heˑniˑdwak'niˑgooħ'dă̱ă̱h, neħ gwa' he'nitˑhòħ'niˑgooħ'dă̱ă̱, Naaħ'nihˑneˑtaˑgeh'haħˑo̱h.
31Neħ giħˑshă̱h iiħ sho̱' kuh ă̱ˑga'daˑdi'waˑgwa'ihˑsaħ'seˑaak he'gyaħˑdaaˑdeħ, tă̱ħˑă̱h' waeh' deħˑgaˑi'waˑgwĕnˑniˑyòħ' naˑgi'waˑgwa'ihˑsaħ'seh.
32Neħ ne'huh noˑyaħ naˑiˑwaˑgwa'ihˑso̱s' he'gyaħˑdaaˑdeħ; neħ kuh naˑgă̱'no̱hˑdo̱ħ ne gaˑiˑwaˑgwaˑihˑso̱s' noˑdyeˑăħˑdah'go̱h heh' haˑi'waˑgwa'ihˑso̱s he'gyaħˑdaaˑdeħ', gaˑi'waˑgwĕnˑniˑyòħ.
33Neħ ne swa'dă̱hˑho̱ħt' heˑtaˑyaħ'daˑdeħ neˑJohn, neħ daˑi'waˑgwa'ihˑsaħs ne gaˑi'waˑgwĕnˑniˑyòħ.
34Neħ dih ne tă̱ħ'ă̱h no̱ˑgwee'neh dwehˑdah'gwaħ ne gaˑi'waˑgwa'ihˑso̱s deħˑgyeˑno̱o̱s'; neħˑgwa' nă̱ˑgă̱ă̱ no̱ħˑoˑiˑoħˑdă̱ħˑsho̱ħ oħˑgiħ neħ naˑyòˑgwe'nyo̱ˑo̱o̱k' iˑgă̱ă̱' o̱ˑsaˑyech'hiˑyaħˑdaˑgòħ.
35Neħ haaˑyaħ'daˑdeħ oˑdeekˑhak, deˑyòs'dăătˑheh kuh deˑyòh'hatˑheh; neħ gwaħˑhuh' ne daħˑjiˑah' sho̱ ne swaˑgaaˑyă̱s' na'eˑjo̱ħ'esˑhaħ'o̱ˑo̱o̱k heˑdeˑyòh'hatˑheh.
36Neħ gwa' nee'yòˑgă̱ˑisˑdo̱h heˑniˑyòħ'dă̱ă̱ niiħ' naˑgyă̱ħ' ne gaˑi'waˑgwaˑih'so̱s naeh' heˑniˑyòħ'dă̱ă̱ hoˑyă̱ħ' ne John; neħ să̱ħˑă̱h neˑgaˑi'òħˑdas'hăħ na'gaaˑwii Naaħ'nih, nă̱ˑgaˑdyă̱'noħkˑdă̱h, neħ shaħˑgaˑiˑòħ'dasˑhăăt naˑga'diˑwahˑdă̱nˑdyeehˑdo̱h' gaˑiˑwaˑgwa'ihˑso̱s he'gyaħˑdaaˑdeħ, heˑtaˑgeh'haħˑo̱h Naaħ'nih.
37Neħ kuh Naaħ'nih haˑo̱ˑhwa̱ħ, ne taˑgeh'haħˑo̱h, ha'eħˑgwah haˑi'waˑgwa'ihˑso̱s he'gyaħˑdaaˑdeħ. Neħ niis nah'so̱h gatˑgaaħ, naas'sheˑwă̱ˑno̱'gă̱ˑa̱a̱k neħ' giħˑshă̱h naˑe'swatˑgatˑhwă̱'a̱a̱k heˑniˑa'yaħ'doħ'dă̱ă̱.
38Neħ kuh ne tă̱ħ'ă̱h deħˑwaat' heˑswaˑyaħ'daˑdeħ naa'wă̱ˑno̱ħ; neħ să̱ħ'ă̱h haaˑyaħ'daˑdeħ ne tohˑha̱ħ'o̱h tă̱ħˑă̱h deħˑsheˑswa'iˑwaˑgwĕnˑniˑyòs'taħ.
39Neħ swihˑsaas noˑya'do̱sˑhăˑdoˑgă̱h'diħ; neħ să̱ħ'ă̱h ne' neħˑhuh niˑswă̱'no̱hˑdo̱ˑnyo̱ħˑsyòħ'dă̱ă̱h, niˑswee neħ' gaˑaaħ', nă̱ă̱ˑyò'iˑwaˑdaˑdyeħ' ă̱'jo̱ˑheek; da neħ', ne'huh ne'neħ ne gaˑi'waˑgwa'ihˑso̱s he'gyaħˑdaaˑdeħ.
40Neħ kuh ne deħ'swaˑgaˑyă̱s' neħˑhuh a'eˑswaˑyo̱ħ' he'gyaħˑdaaˑdeħ, a'eˑswaˑyă̱nˑdaħt' iˑgă̱ă̱, ne' yo̱hˑheħˑo̱ˑweh.
41Deħ'gyeˑno̱o̱s' nă̱ˑyo̱'gehˑsă̱ˑniˑyòs' no̱'gwe'neh iˑgă̱ă̱ ă̱ˑdwehˑdahˑgwak.
42Neħ gwa' ne gwa'yă̱nˑdee'ih, he tă̱ħ'ă̱h deħˑswaaˑyă̱ħ' noˑnò'o̱hˑgwaħ'shăħ Na'wĕnˑniˑyòħ ne swaˑyaħ'daˑgo̱o̱.
43Neħ nooh'să̱ă̱ˑno̱ħ' Naaħ'nih aˑga'dyeˑăħ'dahˑgo̱n'dyeħ haˑgyo̱o̱; neħ dih ne deħˑaaˑo̱h' aas'gwa'gòħ; neħ' giħˑshă̱h noˑyaħ' o̱n'daˑeħ haˑo̱ˑhwa̱ħ' hoh'să̱ă̱ˑno̱ħ a'oˑdye'ăħˑdah'go̱'o̱nˑdyeħ, neħ naeh naas'sheˑswaˑgòħ' ne'neħ.
44Aˑno̱o̱ˑyaˑwă̱ă̱h nae'swa'iˑwaˑgwĕnˑniˑyòs neh', iis sho̱ kuh swaˑda'dehˑsă̱ˑniˑyòsˑtaħ', neħ kuh ne tă̱ħˑă̱h' neeħ' deħ'swih'saˑgo̱h' ne' gòhˑsă̱ˑniˑyòs'taħ Naˑwĕnˑni'yoħˑgĕh iˑgă̱ă̱' sho̱' dwah'dă̱nˑdyo̱s?
45Să̱ˑno̱h' neħˑhuh nă̱ˑswă̱'no̱hˑdo̱'nyo̱ħˑsyòħ'dă̱ˑo̱o̱k naˑe'swehˑhe'aak ă̱sˑho̱ˑgwaˑi'waˑyă̱h'daˑno̱o̱ħ' no̱o̱ he'tă̱ħˑdyo̱ħ Nooħ'nih; neħ' waeh ne'huh ne shaˑyaħ'daat ne sheˑswaˑiˑwa'yă̱ntˑhaħ, neħ' ne Moˑses neh he'o̱ˑweh haˑyaħ'daaˑdeħ ne deˑswa'dă̱ˑno̱n'dahˑgo̱h.
46Neħ să̱ħ'ă̱h theħ'sheˑswaˑi'waˑgwĕnˑniˑyòs'do̱h giħˑshă̱h ne Moˑses, neħ waeh naas'gwaˑi'waˑgwĕnˑniˑyòs'do̱h nă̱ă̱ħ iiħ; iiħ să̱ħ'ă̱h haˑgat'hyòˑwii ho'yaˑdo̱ˑnyo̱ħ.
47Neħ waeh' giħˑshă̱h nă̱ˑgă̱'a̱a̱k deħˑswa'iˑwaˑgwĕnˑni'yòsˑtaħ no'oˑyaˑdo̱ˑnyo̱ħ', a'nă̱ˑyaaˑwă̱h' ă̱ˑswa'iˑwaˑgwĕnˑniˑyòs' ne gwă̱ă̱ˑno̱o̱ħ'?
Currently Selected:
John 5: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
