Matthew 13
13
1Neħ, sho̱ shaħˑwă̱'nĭsˑhăăt hoˑya'gă̱ħˑo̱h ne Jeˑsus, he'gaˑno̱h'sòt, gaˑnyu'dăăkˑah heˑo'dyă̱nˑdʋs'o̱h;
2Gă̱nˑdyuh'go̱ˑwa̱ˑnă̱s neħˑhuh' waˑo'diˑyaħ'daˑye'iħ; oˑnă̱h' ne'aˑhwa̱ħ hoˑdeħ'no̱hˑdaˑho̱h', ga'o̱ˑwa̱ˑgo̱' thoˑdyă̱n'dʋsˑo̱h; neħ, naeh, ne' gă̱n'dyuhˑgwaˑgwe'go̱h gaˑnyu'dăăkˑah', sho̱, haˑdih'siˑaaħ.
3Oˑnă̱h' hosˑnyĭĕħ'o̱h, weˑsuħ' oˑi'waˑge haˑgo̱s'nyĭĕħˑseeh, ne deˑo'yă̱ˑo̱nˑdăăh'gwaˑno̱ħ; haˑwă̱, Swatˑgaat'huh, na'yă̱ntˑhwʋs' waˑah'dă̱nˑdiħ, wa'oˑna̱nˑjo̱n'dyĕhˑsaħ.
4Neħ noˑnă̱h' sha'oˑna̱nˑjo̱n'diħ, ne gaˑnă̱'o̱ˑgwă̱ħ oˑa'akˑdaˑdyĭĕħ', gyeeh', oħˑga'geˑo̱n'daħˑsyo̱o̱ħ'; jiħˑdăħ'a̱a̱h hoˑdi'yo̱o̱h; neħ, naeh, waˑa'dĭsˑaah.
5Neħ'huh, gyeeh; oħˑga'geˑo̱n'daħˑsyo̱o̱ħ' noħ'sgwăăħ'gĕh; osˑtho̱o̱h', sho̱, tiˑyò'ehˑda''eeħ; oˑnă̱h', sho̱, kuh, oħˑgah'hwă̱ħˑoˑdă̱ħ; neħ dyu'iˑwaħ heh' suħˑjih niˑyó'eh''daˑgă'ă''a̱h.
6Neħ noˑnă̱h' sho̱n'daˑgăăh'gwitˑgă̱ħt, heħˑtgă̱h' no̱ħˑwa'dăhˑgwa'ă̱ħ, oħˑwa'diħˑsgo̱nˑdaħt', sho̱, neħ gai'o̱ˑnih he'deħˑok'deˑot, oħˑga'daˑge'eħ', sho̱.
7Neħ'huh, gyeeh, noˑik'daˑgo̱ oħˑga'geˑo̱nˑdaħt; oħˑwa'doˑdyaak noˑik'daħˑsho̱ħ; neħ', naeh, oħˑdyò'diˑo̱ˑnyaħk.
8Neħ, dih, noˑyaħ'sho̱ħ oˑeh'diˑyus'gĕh, naeh, oħˑga'geˑo̱nˑdaħt'; oħˑwa'do̱ˑniħ, kuh', naeh; sgat deˑwă̱ħ'nyaħˑeeh', gyeeh, niˑgaˑye'iħ no̱ˑsa'yuˑgă̱'ĭs; neħ, gyeeh, ne yeˑiħ' niˑwʋs'hă̱; să̱h, gyeeh, niˑwʋs'hă̱.
9So̱n'diħˑgwa'naħˑot' haˑo̱h'dot noˑgwe'nyo̱o̱ħ' ă̱ˑot'ho̱nˑdek', hot'ho̱n'dek' neh'huh.
10Oˑnă̱h' naˑgo̱'iˑo̱ˑnyaˑni'ak hoˑdi'yo̱o̱h', ho̱ˑwă̱'a̱hˑseeh, A, naeh, gaˑi'o̱ˑnih' deˑga'yă̱ˑo̱nˑdăăh'gwaˑno̱ħ' saˑdye'ăħˑdah'go̱h heh shetˑhă'niih'?
11Deˑsha'goˑwă̱'na̱ħˑsăˑgwă̱h, haˑgo̱'yă̱ˑa̱h'seeh, Neħ', gwa', gai'o̱ˑnih, iis, naeh, eˑchi'wa'wiih nă̱sˑswă̱n'no̱hˑdo̱o̱k he'niˑyo̱o̱h' nahˑso̱h' o'yă̱nˑdet' deħ'yo̱ˑniih' ne gă̱'o̱ˑyaħˑgĕh oˑi'waħˑgĕh, ne dwă̱ˑno̱h'do̱ˑo̱ħ'shăˑgwĕnˑni'yuħ; tă̱ħ'ă̱h, naeh, deħ'neħ' do̱'wă̱ˑna̱'wiih' na'oˑnă̱n'no̱hˑdo̱o̱k.
12Neħ, să̱ħ'ă̱h' ne so̱n'diħˑgwa'naħˑot' hoˑyă̱ħ, ă̱'o̱ˑwa̱ˑyo̱ħ' ne'neħ; weˑsuħ', dih', naeh, ă̱'oˑyă̱nˑdaħk. Neħ, gwa', ne so̱n'diħˑgwa'naħˑot' tă̱ħ'ă̱h deˑo'yă̱ħ, dă̱ˑo̱'wa̱hˑgwă̱ħ naˑgwa'naħˑoh'dă̱ħˑă̱h, giħˑshă̱h' a'oˑyă̱nˑdaħk'.
13Neħ dyu'iˑwaħ neħ kheˑye'ăħˑdah'gwaˑnih neˑdeˑga'yă̱ˑo̱nˑdăăh'gwaˑno̱h' heh khesˑnyĭĕħ'seh; neħ gai'o̱ˑnih, heh haˑdi'gă̱h, neħˑhuh', sho̱, niˑyuħ'dăăh na'gă̱ˑa̱k', iˑgă̱, deˑa'diˑgă̱h; hă̱ˑna̱'o̱kˑhaħ, kuh, neħˑhuh', sho̱, niˑyuħ'dă̱ă̱h na'gă̱ˑa̱k', iˑgă̱, deˑo'na̱'o̱ˑgă̱h; tă̱ħ'ă̱h, kuh, deˑo'diħˑni'go̱ˑă̱ˑyă̱nˑdaħs.
14Neħˑhuh' nă̱ˑgă̱' haˑdi'yaħˑdaˑdeħ' oˑi'waˑye'iħˑo̱h no'tyòˑoˑwiih' hoˑdo'gă̱sˑda'niˑaħk Eˑsaiˑas, neħ' ne waˑdo̱h, Neħ ă̱ˑwa̱nˑdye'ăħˑdʋk he swa'o̱kˑhasˑthaħ, ă̱ˑswat'ho̱nˑdek; tă̱ħ'ă̱h, naeh, tae'swaħˑni'go̱ˑă̱ˑyă̱nˑdaħt'; neħ, kuh, ă̱ˑwa̱nˑdye'ăħˑdʋk heˑswaˑdok'hʋsˑdo̱h, ă̱ˑswaˑgă̱ħ; tă̱ħ'ă̱h, naeh, taħˑda'eˑswaˑga'yă̱nˑdaħt.
15Neħ, să̱ħ'ă̱h, nă̱ˑgă̱' neˑgă̱nˑdyuh'gwaħˑgĕh waˑoˑnă̱n'nyah'sahˑsă̱ħ'heħt, deħˑsga'gaħˑă̱'yo̱ˑa̱ħ; neħ, kuh, nă̱ˑna̱'o̱hˑdaħ, tă̱ħ'ă̱h deħˑswa'o̱kˑhaħ; deˑo'no̱ntˑgah'gweˑgo̱h; neħ ne dyă̱ˑgwah', sho̱, a'gaˑgă̱ħ' naˑdi'ga'aħ; a'yut'ho̱nˑdek', gwaħˑhuh', noˑna̱'o̱hˑdaħ; neħ, gwaħˑhuh', a'yuħˑni'go̱ˑă̱ˑyă̱nˑdaħt noˑnă̱n'nyahˑsaħ; do̱'saˑaˑdiˑde'niħ naˑdiħ'niˑgo̱'ă̱ħˑgĕh; iiħ, gwaħˑhuh', o̱'saˑkheˑjă̱ħt.
16Neħ, gwa', noˑdă̱'o̱h niis, ne swaˑdok'hasˑdo̱h; neħ, să̱ħˑă̱h, ne ga'gă̱h; kuh he swa'o̱kˑhasˑthaħ; neħ, să̱ħ'ă̱h, ne wa'o̱kˑhaħ.
17Neħ, să̱ħ'ă̱h, ne doˑgă̱s'o̱ˑweh niiħ oħˑgwă̱'a̱s, Hoˑno̱nt'gaħˑdeħ no'diˑdoˑgă̱s'daˑnih, kuh noˑdi'waˑyeˑĭsˑdo̱h' no̱'gweh, weˑsuħ deˑo'no̱nˑdo̱'ă̱nˑjo'niˑak na'aˑdiˑgă̱ħ ne' na̱ħˑo'iˑoħ'dă̱ħˑsho̱ħ' niis ne swaˑgă̱h; tă̱ħ'ă̱h, dih, deˑo'diˑgă̱s'o̱h; neħ, kuh, na̱'ă̱ˑna̱'o̱k ne' na̱ħ'o'iˑoħ'dă̱ħˑsho̱ħ, niis ne' swa'o̱kˑhaħ, tă̱ħ'ă̱h deˑo'na̱''o̱ˑgʋs'o̱h.
18Neħ, dih, gaˑi'o̱ˑnih, oˑnă̱h' jatˑho̱nˑdaat ne deˑga'yă̱ˑo̱nˑdăăh'go̱h na'aˑyă̱ntˑhwʋs'.
19Neħ noˑnă̱h' neh so̱n'diħˑgwa'naħˑot' ă̱ˑa̱i'iˑwa'o̱k heˑniˑga'wă̱ˑnoħ'dăăh ne gă̱'oˑyaħˑgĕh oˑi'waħˑgĕh, ne dwă̱ˑno̱h'do̱ˑo̱ħ'shăˑgwĕnˑniˑyuħ, — tă̱ħˑă̱h theħˑo'yă̱nˑdaħ'o̱o̱ħ na'oħˑni'go̱'ă̱ˑyă̱nˑdaht, — oˑnă̱h' neħˑhuh' wa'aˑyo̱ħ' naˑnĭs'heˑoˑno̱ħ, waˑa'disˑgwat' ne ga'yă̱nt'hwahˑdo̱h na'wă̱n'nyahˑsa'go̱. Neeħ' ne gă̱ħ' noˑak'daˑdyĭĕħ'gwa oħˑga'geˑo̱nˑdaħt.
20Neħ, gwa', ne waˑo'yaħˑdoˑwă̱ħt ne gaˑnă̱'o̱ˑgwă̱ħ noħˑsgwă'ăħˑgĕh, neħ shaˑa'yaħˑdaat, noˑnă̱h' waˑai'iˑwa'o̱k noˑwă̱ˑna̱ħ [ne gaˑi'wiˑyus'dʋk,] oˑnă̱h', sho̱', kuh, waˑa'do̱hˑha̱'ă̱h, waˑa'yeˑna̱a̱ħ.
21Neħ'huh, gwa', niˑyuħ'dă̱ă̱h, neħ tă̱ħ'ă̱h deħˑok'deˑo̱nt haˑyaħ'daˑdeħ; daħˑjiˑah', sho̱, ne' wa'aˑgwe'niħ; neħ, gwa', noˑnă̱h' oħˑga'dă̱h noħˑtho'yaħˑdo'ăăk, neħ', giħˑshă̱h' nă̱ˑo̱'wa̱ˑno̱h'go̱n'dă̱ħ, neħ ă̱ˑdyu'iˑwaħ'gă̱ˑa̱k' ne gai'wiˑyus'dʋk, neħ, sho̱, ne daˑwa'dyeˑă̱nt ne daˑoh'siħ'doˑdăăh, oˑnă̱h', gwaħˑhuh' waˑa'yaħˑdyeˑnă̱nt'.
22Neħ, kuh, neh waˑo'yaħˑdoˑwă̱ħt' ne gaˑnă̱'o̱ˑgwă̱ħ no'ikˑdaˑgo̱', ne' oˑdo̱h', noˑnă̱h', iˑgă̱, waˑai'iˑwa'o̱k noˑwă̱'na̱ħ [ne gaˑi'wiˑyus'dʋk,] neħ' suħˑjih' hasˑde'isˑthaħ nĭk'huh yo̱ˑă̱n'jaˑdeħ, kuh he'niˑya'goˑyaħ'dahˑdo̱ħt'haħ nʋs'hă̱ˑno̱ˑnyʋs'hăħ, neħ' deˑga̱'o̱ˑnyaħs' noˑwă̱ˑna̱ħ; neħ'huh niˑya'wă̱s neħ tă̱ħ'ă̱h deħˑswa'yo̱ntˑhaħ ha'yaħ'daˑdeħ.
23Neħ, gwa', neħ' waˑo'yaħˑdoˑwă̱ħt ne gaˑnă̱'o̱ˑgwă̱ħ neˑwiˑyu noˑeh'daħ, ne' oˑdo̱h', noˑnă̱h' waˑai'iˑwa'o̱k noˑwă̱'na̱ħ' [ne gaˑi'wiˑyus'dʋk,] waˑoħ'niˑgo̱'ă̱ˑyă̱n'dahˑjih; neħ, gwaħˑhuh', ne wa'do̱ˑnih, neħ, gyeeh, neh sgat deˑwă̱ħ'nyaħˑeeh niˑgaˑye'iħ no̱ˑsa'yuˑgă̱'is; yeˑiħ' niˑwʋs'hă̱, gyeeh; să̱h, kuh, gyeeh, niˑwʋs'hă̱.
24Oˑyaħ, kuh, shaˑgo̱'yuˑdah'saħˑseeh desˑho'yă̱ˑo̱nˑdăăh'go̱h, haˑgo̱ˑyă̱ˑa̱h'seeh, Neħ' ne gă̱'o̱ˑyaħˑgĕh oˑi'waħˑgĕh ne dwă̱ˑno̱h'do̱ˑo̱ħ'shăˑgwĕnˑni'yuħ, deˑsga'yă̱ˑo̱nˑdaaħ' no̱'gweh, waˑo'no̱hˑgwă̱'a̱nˑdiħ oˑno̱h'gwă̱ˑiˑyu hoħ'ă̱'go̱.
25Neħ, dih, noˑnă̱h' waˑo'niˑdaħ' no̱'gweh, hoˑyo̱s'o̱h no'oħˑniˑgo̱'ă̱sˑswaˑă̱s, waˑoˑno̱h'gwă̱'a̱nˑdiħ noħˑe'ohˑda'etˑgă̱ħ oˑno̱h'gwă̱ˑa̱a̱ħ he'gaˑyă̱ă̱ntˑho̱h no'na̱n'jaħ; oˑnă̱h hohˑdă̱nˑdyo̱o̱h.
26Neħ noˑnă̱h' oħˑdyo'ă̱nˑjotˑgaħ', oˑdo̱'niˑaˑdyĭĕħ noˑno̱h'gwă̱ˑiˑyu, oˑnă̱h' haeħ'gwah oħˑwă̱ˑna̱nˑdo'dahˑsiħ noˑno̱h'gwă̱''etˑgă̱ħ.
27Oˑnă̱h' na'dih'haħˑshăħ ho̱'wa̱'yaħˑdo'wă̱ħˑo̱h na'no̱h'saˑgwĕnˑni'yuħ' ho̱ˑwă̱'a̱hˑseeh, Tă̱ħ'ă̱h, gă̱ă̱h', neeħ' deħˑsa'yă̱ntˑho̱h noˑno̱h'gwă̱ˑiˑyu ne saħˑă̱'go̱? Ga̱'o̱ˑweh, dih, niˑdya'weˑno̱o̱h', deˑwa'dyĕsˑdo̱h neh'huh noħˑe'ohˑda'etˑgă̱ħ?
28Haˑgo̱'yă̱ˑa̱h'seeh, Neeħ neh'huh na'akˑniˑgo̱'ă̱sˑswaˑă̱s neħˑhuh' niˑoˑye'ă̱h. Dĕtˑho'disˑnyĭĕħ'o̱h na'dih'haħˑshăħ, ho̱'wă̱'a̱hˑseeh, Deˑsa'do̱ˑă̱nˑjo̱ˑnih, gă̱h, neħˑhuh' ha'yaˑgweeħ, [da'yaˑgyu'nyahˑsiħ,] a'yaˑgwe'oˑek?
29Dĕtˑhos'nyĭĕħˑo̱h, haˑwă̱', Tă̱ħˑă̱h; dyă̱ˑgwah', sho̱, noˑnă̱h' dă̱ˑju'nyahˑso̱'o̱nˑdyĭĕħ noħˑe'ohˑda'etˑgă̱ħ, ă̱ˑdi'swaħˑhăănt'gwat haeħ'gwah no'na̱n'jaħ.
30Neħˑhuh', sho̱, nă̱ˑyuħ'dă̱ˑa̱k, deˑja'o̱h waˑdo'dyaak heˑniˑyo'oˑweħ, hă̱ˑga'na̱nˑja'ih; neħ noˑnă̱h' neħˑhuh' niˑyo'oˑweħ, ă̱ˑkhe'yă̱ˑa̱s na'di'na̱nˑjiˑyaħs', Neħ daˑswa'dyeˑă̱nt jiˑo'ek noħˑe'ohˑda'etˑgă̱ħ; jah'gwais'yu'nyaˑno̱o̱h, kuh; neħ să̱ħ'ă̱h, naeh, nă̱ˑga'ă̱ħˑda'ak; neħ, gwa', naeh, neħˑhuh' hă̱ˑswa'yo̱ħt' heˑgeħˑe'ohˑda'yă̱nˑdah'gwaħ no'na̱nˑjaħ.
31Oˑyaħ', kuh, shaˑgo̱'yuˑdah'saħˑseeh, desˑho'yă̱ˑo̱nˑdăăh'go̱h, haˑwă̱, Neħ ne gă̱'o̱ˑyaħˑgĕh oˑi'waħˑgĕh ne dwă̱ˑno̱h'do̱ˑo̱ħ'shăˑgwĕnˑni'yuħ, des'sgyaˑdye'ă̱h juˑno̱h'gwă̱ˑa̱nt neh oˑno̱h'gwă̱ˑo̱nˑji'waˑgă̱h', [ne Musˑtard,] deˑoh'gwă̱h no̱'gweħ, neħˑhuh', ho'otˑă̱'yă̱ħ hoˑno̱h'gwă̱ˑo̱nˑdyo̱o̱h.
32Neħ, waeh, naˑgwʋs' heˑyus'tho̱h noˑna̱h'gwă̱ˑo̱ħ'sho̱ħˑo̱h; neħ, dih, noˑnă̱h' oˑdo'dyă̱h, neħ si'gwa goˑwa'nă̱h' noħˑe'ohˑdaħ'sho̱ħˑo̱h; gă̱'o̱nˑdaħ', kuh, waˑdo̱'o̱ħ; neħˑhuh' haħ'deˑgaˑye'iħ ne jiħˑdă̱ħ'a̱a̱'sho̱ħˑo̱h, ne'eħˑtgă̱h waˑdi'dyĭĕħs, wăˑno̱n'daˑthaħ heh oħˑhah'dă'gwaˑo̱ħ.
33Oˑyaħ', kuh, dĕsˑsho'yă̱ˑo̱nˑdăăh'go̱h, haˑgo̱'yă̱ˑa̱hˑseeh, Neħˑne gă̱'o̱ˑyaħˑgĕh oˑi'waħˑgĕh, ne dwă̱ˑno̱h'do̱ˑo̱ħ'shăˑgwĕnˑni'yuħ, dĕsˑsgya'dyeˑă̱h ne yo̱ntˑhăăh'gwă̱ħˑgwat'haħ; deˑya'guhˑgwă̱h ne yaˑgo̱'gweh, otˑhes'hăˑgo̱ heˑya'guhˑseh'do̱h, swaˑdă̱'na̱ħˑge'ăhˑdʋs'hăăt niˑyo̱o̱, heˑniˑyo'oˑweħ gaˑgwe'go̱h waħˑot'gă̱h.
34Gaˑgweˑgo̱h nă̱ˑgă̱' niˑyuˑi'waˑge ne Jeˑsus niˑa'go̱ˑyăăħ'seeh ne gă̱nˑdyuh'goˑwaˑnă̱h, dĕsˑho'yă̱ˑo̱nˑdăăh'gwaˑno̱ħ; tă̱ħ'ă̱h, kuh, na'gă̱ˑa̱k' deħˑgaaħ ne deˑga'yă̱ˑo̱nˑdăăh'go̱h, heˑniˑyo̱o̱ waˑa'go̱sˑnyĭĕħs.
35Neħ, dih, noˑi'waˑye'iħˑo̱h he'niˑoˑye'ă̱h hosˑnyĭĕħ'o̱h no'do'gă̱sˑda'niˑak, haˑwă̱, Neħ ă̱ˑgeh'hoˑdo̱ˑgwat heˑgehˑsa'gaˑă̱nt, neh dă̱ˑgyă̱'o̱nˑdăăh'gwa'no̱o̱ħ; neħ ă̱ˑgya'gă̱h na̱ħˑo'iˑoħ'dă̱ħs, he'niˑyo'oˑweħ dwa'dyă̱ˑnok''daħˑo̱h he'yo̱ˑă̱n'jăˑdeħ, chiˑwah'sehˑdo̱h.
36Oˑnă̱h' ne Jeˑsus shaˑgo̱'yatˑgaħ'wă̱h ne gă̱nˑdyuh'goˑwa'nă̱h; o̱ˑgyeh', naeh, heˑo'yo̱o̱h' heˑgaˑno̱h'sòt; neħˑhuh' heˑo̱'wa̱ˑyaħ'doˑwă̱ħ'o̱h na'go̱'iˑo̱ˑnyaˑni'ak, hoˑnă̱', Daˑgwaħ'niˑgo̱'ă̱ˑyă̱n'dahˑdă̱h ne deˑsa'yă̱ˑo̱nˑdăăh'go̱h noħˑe'ohˑda'etˑgă̱ħ, deˑwa'dyĕsˑdo̱'no̱ħ ne gaˑyă̱ntˑho̱h.
37Desˑsha'go̱ˑwă̱'na̱ħˑsăˑgwă̱h, haˑgo̱'yă̱ˑa̱h'seeh, Neħ neh'huh ho'no̱h'gwă̱ˑo̱nˑdyo̱o̱h' noˑno̱h'gwă̱ˑiˑyu, No̱ˑwa̱'wa̱k no̱ˑgweh.
38Neħ ne gaħˑă̱'yă̱ħ, naeh, he'yo̱ˑă̱n'jaˑdeħ. Neħ noˑno̱h'gwă̱ˑiˑyu, nehˑhuh' naeh, ne gă̱'o̱ˑyaħˑgĕh oˑi'waħˑgĕh, ne dwă̱ˑno̱h'do̱ˑo̱ħ'shăˑgwĕnˑni'yuħ okˑsaħ'daħˑsho̱ħ. Neħ, gwa', noˑno̱h'gwă̱''etˑgă̱ħ, nehˑhuh', naeh, no'okˑsaħ'daħˑsho̱ħ na'aħˑniˑgo̱'etˑgă̱ħ.
39Neħ no'oħˑniˑgo̱'ă̱sˑswaˑă̱s no'no̱h'gwă̱ˑo̱nˑdyo̱o̱h noˑno̱h'gwă̱''etˑgă̱ħ, neħ nehˑhuh', naeh, naˑnĭs'heˑoˑno̱ħ; neħ nă̱ˑga'ă̱nˑda'ih, nehˑhuh', naeh, noˑnă̱h' ă̱ˑwa̱n'dokˑdă̱ħ he'yo̱ˑă̱n'jaˑdeħ'; neħ na'di'na̱nˑji'yaħs', naeh, naˑdi'o̱ˑyaħ'geˑoˑna̱ħ.
40Neħ, dih, gai'o̱ˑnih, noħˑeˑohˑda'etˑgă̱ħ, naeh, ă̱ˑge'oˑe'o̱ˑo̱k, ă̱ˑga'ă̱ħˑda'ak oˑjĭs'daħˑgĕh, neħ'huh, dih', kuh, haeħ'gwah, nă̱ˑya'wă̱h, noˑnă̱h' ă̱ˑwa̱n'dokˑdă̱ħ nă̱ˑgă̱' he'yo̱ˑă̱n'jaˑdeħ.
41Neħ No̱'wa̱'wa̱k' no̱'gweh ă̱nt'ha'go̱ˑha̱ħt' no'o̱'yaħˑge'oˑno̱ħ'shăħˑsho̱ħ; neħ, naeh, ă̱ˑa̱nˑdiˑo'ek, ă̱ˑa̱n'diˑyaˑgă̱h' he'niˑa'ă̱nˑjaˑdeħ gaˑgwe'go̱h, heˑniˑyo̱o̱ neh guħˑniˑgo̱'o̱nˑdaˑgwat'haħ; neħ, kuh, ne' waˑet'gă̱ħ goˑi'oħˑdeh'go̱h.
42Neħˑhuh', naeh, he'o̱ˑno̱nˑdiħ' he'o̱ˑweh' oˑdeek'haħ, noˑgă̱'ĭsˑdo̱h oħˑdai'yă̱ħ; dĕs'sgyaˑdye'ă̱h ha'di'nyu̱ħ'o̱sˑhăˑno̱'wă̱hˑdah'gwaˑno̱h; neħˑhuh', naeh, ă̱ntˑhă̱'no̱sˑdă̱'o̱ˑnyo̱'o̱k, dă̱ntˑhă̱ˑno̱nˑdyuħ'gă̱'nyeˑaak', kuh.
43Neħˑhuh' niˑyo'oˑweħ', naeh, no'di'waˑye'isˑdo̱h dă̱ˑo'no̱nˑdă̱ă̱h'go̱nˑdă̱ħ, dă̱'sgyaˑdye'ă̱ˑo̱k hoˑdă̱ă̱h'got ne găăh'gwaaħ, noˑnă̱h' neħˑhuh' hă̱ˑă̱'niħˑdyo̱nˑdaħk hehˑthă̱ˑno̱h'do̱ˑo̱ħ'shăˑgwĕnˑni'yuħ no̱'wăħ'nih. So̱nˑdiħˑgwa'naħˑot haˑo̱h'daˑga'ă̱nˑdo̱ħ, na'otˑho̱nˑdek, hotˑho̱n'dek ne' neħ.
44Oˑyaħ', kuh; neħ ne gă̱'o̱ˑyaħˑgĕh oˑi'waħˑgĕh, ne dwă̱ˑno̱h'do̱ˑo̱ħ'shăˑgwĕnˑni'yuħ des'sgaˑyă̱'o̱nˑdaaħ' nas'hă̱ˑno̱ˑnyʋs'hăħ, gaħˑă̱'go̱ wahˑseh'do̱h; neħ noˑnă̱h' waˑas'hă̱ˑwiħ no̱'gweh, shoh'seh'do̱h', sho̱; da neħ, heˑniˑo'do̱hˑho̱'o̱sˑo̱h, hoh'dă̱nˑdyo̱o̱h; gaˑgwe'go̱h waˑa'dă̱ˑniˑno̱ħ, he'niˑo'yă̱ħ'; neħ waˑa'niˑno̱ħt heˑgaeh'daˑdeħ.
45Oˑyaħ', kuh; neħ ne' gă̱'o̱ˑyaħˑgĕh oˑi'waħˑgĕh, neˑdwă̱ˑno̱h'do̱ˑo̱ħ'shăˑgwĕnˑni'yuħ, neħ des'sgaˑyă̱'o̱nˑdaaħ na'dah'gwaˑnyat'geˑo̱'o̱ħ, haˑwih'saˑgo̱'o̱nˑdyĭĕħs ne wiˑyuħs' gaħˑnòh'saħ.
46Neħ noˑnă̱h' he'oˑgă̱ă̱h sgat, naˑgwʋs' oˑi'oˑwaˑnă̱h ne gaħˑnòh'saħ, hohˑdă̱n'dyo̱sˑo̱h; gaˑgwe'go̱h hoˑdă̱'niˑno̱ħ, he'niˑyo̱o̱h' hoˑyă̱n'dʋk; neeħ hoˑni'no̱ħˑdah'go̱h ne' neħ.
47Oˑyaħ, kuh; neħ ne gă̱'o̱ˑyaħˑgĕh oˑi'waħˑgĕh', ne dwă̱ˑno̱h'do̱ˑo̱ħ'shăˑgwĕnˑni'yuħ, des'sgaˑyă̱'o̱nˑdaaħ ne waħ'a'aħ yeˑjuħ'yakˑthaħ, ga'nyuˑdăăħ'gĕh waħˑe'o̱ˑo̱h; oħˑyu'eek naaħ'deˑgă̱n'jaˑge.
48Neħ noˑnă̱h' oˑno̱h'heħ'o̱h, detˑho'no̱nˑdi'ă̱ntˑhwă̱h gaˑne'gakˑah; o'nă̱h' neħˑhuh' hoˑno̱n'dyă̱nˑdʋs'o̱h, oħˑthă̱'no̱ˑnyah'siħ ne gă̱n'jiˑyu; neħˑhuh' hoˑno̱n'dahˑho̱h he'o̱ˑweh ga'yă̱ħ ne yeˑăh'gwaħ; ne gă̱nˑja'etˑgă̱ħ hoˑno̱n'dyo̱o̱h', naeh.
49Neħ'huh, dih', kuh, haeħ'gwah, hă̱ˑya'wă̱h, noˑnă̱h' ă̱ˑwa̱n'doˑă̱n'jokˑdă̱ħ; neħ naˑdi'o̱ˑyaħ'geˑoˑno̱ħ ă̱nt'hă̱'neħ', dă̱sˑha'goˑno'nyahˑsiħ' noˑdi'wa'neħˑaˑgo̱h he'o̱ˑweh niˑa'diˑyaħ'daˑdeħ ne thoˑdi'waˑye'isˑdo̱h;
50Neħˑhuh' hă̱ˑo̱'wa̱nˑdi'yaħˑdoħ'yaak he'o̱ˑweh dyo'deekˑhaħ, noˑgă̱'ĭsˑdo̱h oħˑdai'yă̱ħ, des'gyaˑdye'ă̱h haˑdi'nyu̱ħ'o̱sˑhăˑno̱'wă̱hˑdah'gwaˑno̱h; neħˑhuh', naeh, dă̱nˑdyo̱h'să̱ntˑhwah'so̱ˑo̱k, dă̱nˑdyo̱n'dyuħ'gă̱'nye'aak', kuh.
51Thosˑnyĭĕħ'o̱h ne Jeˑsus, haˑgo̱'yă̱ˑa̱h'seeh, O'nă̱h, gă̱h, gaˑgwe'go̱h' eˑswaħ'niˑgo̱'ă̱ˑyă̱nˑdaħt heˑniˑyuˑi'waˑge? Ho̱ˑwă̱'a̱hˑseeh, Oˑnă̱ă̱h', Syaħ'daˑgwĕnˑni'yuħ.
52Shaˑgo̱'yă̱ˑa̱h'seeh, Neħ, dih, gai'o̱ˑnih, haħˑdeˑyo̱ˑgweħ'daˑge, neh shaˑgo'diˑya'do̱ˑnih, haˑya'nesˑhăˑyă̱n de'ih, ho̱ˑwa̱ħ'niˑgo̱'ă̱ˑyă̱nˑdah'daˑniih ne gă̱'o̱ˑyaħˑgĕh oˑi'waħˑgĕh, ne dwă̱'no̱h'do̱ˑo̱ħ'shăˑgwĕn'ni'yuħ na̱ħˑo'iˑoħ'dă̱ħ, dĕsˑsga'yă̱ˑo̱nˑdaaħ' neħ no̱'gweh, naˑno̱h'saˑgwĕnˑni'yuħ, tha'yaˑgă̱s, he'o̱ˑweh niˑga'yă̱ħ nos'hă̱ˑno̱ˑnyʋs'hăħ, ne waˑseeħ', kuh ne waˑga'yo̱h'.
53Neħ noˑnă̱h' neħˑhuh' niˑyò'oˑweħ heˑya'wă̱ħˑo̱h, noˑnă̱h' shaˑa'dyă̱'nokˑdă̱ħ ne Jeˑsus, nă̱ˑgă̱' da'yă̱ˑo̱nˑdăăh'gwaˑno̱'o̱k, hotˑhă'daˑdo̱h' oˑnă̱h'.
54Neħ noˑnă̱h' neħˑhuh' heˑo'yo̱sˑoh, he'o̱ˑweh ha'o̱ˑhwa̱ħ' haˑă̱n'jaˑdeħ, wa'aˑgo̱ˑi'o̱ˑnyă̱ħ' no̱'gweh, he'o̱ˑweh hă̱ˑno̱nt'gĕnˑnĭs'atˑhaħ; neħ he'noˑdi'waˑnă'ăˑguħ, hoˑnă̱', Ga'ă̱ˑo̱ˑweh' niˑtho'aah nă̱ˑgă̱' gaħˑni'go̱hˑdʋs'hăħ', no̱'gweh'? kuh nă̱ˑgă̱' hoˑi'oħˑdʋs'yoˑwa'nă̱s'?
55Tă̱ħˑă̱h, gă̱h, deħˑneħ nă̱ˑgă̱', na'no̱h'soˑnĭs deˑo'aˑwak? Tă̱ħ'ă̱h, gă̱h, dehˑneħ', ne Maˑry deħˑe'yaˑso̱h no'noħ'ă̱h? kuh ne de'ă̱ˑno̱nˑdă̱'no̱nˑdeeħ, James, Joˑses, Siˑmon, kuh ne Juˑdas?
56Kuh ne deˑă̱'no̱nˑdă̱'no̱nˑdeeħ ne wă̱ˑni'o̱sˑsho̱ħ'o̱h, tă̱ħ'ă̱h, gă̱h, gaˑgwe'go̱h daħ'deˑdwaˑdi? Ga'ă̱ˑo̱ˑweh, dih, nitˑho'aˑwih'dahˑgo̱h, nă̱ˑgă̱' no̱'gweh', gaˑgwe'go̱h nă̱ˑgă̱ heˑniˑyuˑi'waˑge'?
57Neħ neh tă̱ħ'ă̱h deħˑo'diħˑni'go̱'iˑyuħˑo̱o̱ħ' haˑyaħ'daˑdeħ. Neħ, gwa, ne Jeˑsus haˑgo̱'yă̱ˑa̱h'seeh, Neħ noˑdo'gă̱sˑdaˑnih hohˑsă̱'niˑyu; neħˑhuh', sho̱, tă̱ħˑă̱h, he'o̱ˑweh tha'ă̱nˑjaˑdeħ, neħ, kuh, ne'aˑhwa̱ħ ho'no̱h'saˑgo.
58Neħ ne tă̱ħ'ă̱h weˑsuħ' deˑo'dyuħ'daˑdo̱o̱ħ no'i'oħˑdʋs'hăˑnă'ăˑgwah'do̱ħs ne' neħˑhuh'; neħ gaˑi'o̱ˑnih heh de'o̱ˑwa̱i'waˑgwĕnˑniˑyus'do̱o̱ħ.
Currently Selected:
Matthew 13: SEE
Highlight
Share
Copy
Want to have your highlights saved across all your devices? Sign up or sign in
Gospels published by the American Bible Society in 1872, Psalms in 1892.
